पुस्तक-समीक्षा

हरेश्वर राय

पुस्तक: पीपर के पतई

लेखक: जयशंकर प्रसाद द्विवेदी

विधा: कविता

प्रकाशक: नवजागरण प्रकाशन, नई दिल्ली- 59

प्रकाशन वर्ष: 2017

पृष्ठ संख्या: 104

सजिल्द मूल्य: 200/-

जिनिगी के अनंत विस्तार बा। जल आ थल के साथे-साथे नभ में भी एकर मौजूदगी बा। एहिसे ई एगो अबूझ पहेली कहाले।  एकर रंग हजार आ कोण करोड़ बा। एह रंगन आ कोणन के अभिव्यक्त करे खातिर कविता के सबसे दमदार आ प्रभावकारी विधा मानल गइल बा। अंग्रेजी साहित्य के एगो लोकप्रिय समीक्षक मैथ्यू अर्नाल्ड के भी कह्नाम बा कि ‘कविता जीवन के समीक्षा ह’। भोजपुरी कविता संकलन पीपर के पतई में शामिल पैंसठ गो कवितन के माध्यम से जयशंकरजी जिनिगी के पैंसठ गो रंगन के संप्रेषित करे के सराहे जोग परयास कइले बानी।

पीपर के पतई  के जदि फूल, धूल आ शूल के संग्रह कहल जाय त अनुचित ना कहाई। सार आ शैली के विविधता एह संकलन के ख़ास ख़ूबसूरती बा। लयात्मकता के मामला में भी एह संकलन के रचना कहीं से दब नईखी सन।  सपाटपन आ एकरसता के कमजोरी से कोसन दूर संकलन के रचनन में अदिमी के जिनिगी के घरेलू, सामाजिक, सांस्कृतिक, आर्थिक आ राजनीतिक पक्षन के प्रस्तुति के विषय बनावल गइल बा। रचनन से साक्षात्कार भइला के बाद हमरा अइसन लागल कि एह सम्प्रेषण के प्रभावकारी बनावे में जयशंकरजी के कल्पनाशीलता के आ अनुभव के बराबर के जोगदान बा।

पीपर के पतई  में जयशंकरजी कतहूँ से भी ‘कला कला के लिए’ के सिद्धांत के अनुयायी नइखीं बुझात। उहाँ के ‘कला जीवन के लिए’ के सिद्धांत के जबर्दस्त समर्थक प्रतीत हो रहल बानी। रचनाकार के हर रचना में जीवन के प्रति सकारात्मक दृष्टिकोण एकदम साफ झलक रहल बा। हर रचना जीवन के बेहतरी के कोशिश करत प्रतीत हो रहल बाड़ी सन। कवि के ई जवन आशावादिता बिया उहे एह संकलन के असली सौंदर्य कहाई।

पीपर के पतई  के पहिल कविता के नाँव देल गइल बा ‘सरस्वती वंदना’। एह रचना के अंतिम अंतरा में उहाँ के ज्ञान के देवी से बहुते विनम्रता के साथ निहोरा कर रहल बानी कि हे माई ! सभके मन के मइल धो दीं आ स्वस्थ जनमानस के निर्माण करीं। एह रचना में जिनिगी के सुन्दर बनावे के भाव रेखांकित करे जोग बा! जयशंकरजी निवेदन कर रहल बानी:

ब्रम्ह दुलारी माई

मन अंजोर लाईं..

आज रिश्ता, मूल्य आ नैतिकता, भौतिकता के भंवरजाल में फँसल नजर आ रहल बाड़न स। जिनिगी के एह महत्वपूर्ण पहलुअन के क्षरण बड़ी तेजी के साथ हो रहल बा। एह्में कवनों दू मत नईखे कि एह तरह के क्षरण आज के समाज के सबसे बड़ त्रासदी बा। घर, परिवार, समाज, राष्ट्र आ सम्पूर्ण मानवता के हिफाजत करे खातिर एह क्षरण के गति प विराम लगावल बहुत जरुरी बा। पीपर के पतई के ‘अइसने घरवा’, ‘घूँटत बाप’, ‘पतोह का निबाही’ जइसन कई गो रचना एह क्षरण के रोके के प्रयास करत दिख रहल बाड़ी सन:

तुनक के बबुआ मत बतियावा

सभकर अइठन छूटल

अइसने घरवा फूटल (अइसने घरवा)

सभ भाषा आ बोली के लोकोक्ति लेखा ही भोजपुरी भाषा के लोकोक्ति भी बहुते चुटीली आ अर्थपूर्ण होली सन। कवनों कथन के सजीव, रोचक. प्रभावकारी आ सहज ढंग से समुझे लायक बनावे में एहनी के विशिष्ट जोगदान होखेला। कवनों बात के समर्थन, विरोध भा सीख आदि अभिव्यक्त करे खातिर एहनी के प्रयोग कइल जाला। पीपर के पतई के रचनाकार के लोकोक्तिन के प्रति बड़ा आकर्षण बा; अइसन एकदम साफ लउक रहल बा। लगभग आधा दर्जन से अधिका कवितन के शीर्षक में लोकप्रिय भोजपुरी लोकोक्तिन (आन्हर कुकुर बतासे भोंके, खग बुझे खगही के भाषा, छनहीं तोला छनहीं माशा, खीझल बिलिया खम्भा नोचे आ छुंछा के बा के पुछवइया) के स्थान देल गइल बा।

पीपर के पतई के कई गो रचनन (अब्बो ले सुपवा बोलेला, खग बूझे खगही के भाषा, छुंछा के बा के पुछवइया, बहल गाँव बिलाइल खेती) में गाँव के जीवन के दुःख- दरद के सजीव चित्र उकेरल गइल बा। ‘हाय रे मनई!’ में आज के आदिमी के बेचारगी के भी बड़ा सुंदर फोटो खींचाइल बा:

इंटरनेट के बाज़ार में, बेजार भइल मनई

हर बेरा गूगल के शिकार भइल मनई

घरी-घरी टुकुर-टुकुर वेभ के निहारत रहे

छितिराइल वेभ क औजार भइल मनई..

कल्पना, प्रकृति, अतीत, ग्राम्य जीवन आ कमजोर तबका के प्रति प्रेम राखेवाला रचनाकार लोगन के छायावादी रचनाकार के श्रेणी में राखल जाला। जयशंकर जी के पीपर के पतई में भी कतहूँ कतहूँ छायावाद (अंगरेजी साहित्य के रोमांटिसिज्म) के कई गो विशेषता के दर्शन हो रहल बा। ‘हेराइल आपन गाँव’ के कवि अपना बचपन के याद करत कह रहल बाड़न:

इयाद आवत बा

लरिकाईं में

कोइला से पटरी पचरल फिर

सुखा के ओपर शीशी घोंटल आज

इयाद आवत बा इस्कूल से लवटले प

माई क रगड़ी के हमार मुँह पोंछ्ल..

पीपर के पतई  में हास्य. ब्यंग्य, कटाक्ष आदि साहित्यिक संसाधन के माध्यम से विभिन्न प्रकार के विकृति (लालच, चापलूसी, दिखावा, भेदभाव, ईर्ष्या, द्वेष, जलन, बेईमानी, शैतानी, खींचातानी, लंगी लगौअल) प सधल चोट कइल गइल बा। उपमा, रूपक, अनुप्रास आदि अलंकारन के प्रयोग भी बड़ा तरीका से कइल गइल बा। ‘बेपरवाह’ नाम के कविता के प्रथम पंक्ति में अनुप्रास अलंकार के बहुत सुन्दर प्रयोग देखल जा सकेला: ‘कब कवने कोने से का निकली …’

पीपर के पतई एकदम खाली दूध के धोअले नइखे। कहल जाला कि चाँद में भी दाग होला। पीपर के पतई के कुछ नकारात्मक पक्ष भी बा। ‘बबुआ’ शब्द के आवृति के कारन एह संकलन में छोट-मोट आवृति दोष आ गइल बा। प्रूफ रीडिंग भी बहुत सजगता से नइखे भइल। एह संकलन के अनुक्रम में बहुत सुधार के जरूरत बा। एगो रचना में एगो दल विशेष के प्रमुख हस्ती के नाम शामिल कइल भी हमरा बहुत खटकल।

परिचय– बिहार के भोजपुर (आरा) जिला के जमुआँव गाँव के एगो किसान परिवार में जनमल हरेश्वर जी हिंदी, अंग्रेजी आ भोजपुरी में अपना छात्र जीवन से ही लेखन कार्य कर रहल बानी। अंग्रेजी आ भोजपुरी मिला के इहाँ के नौ गो पुस्तक प्रकाशित बाड़ी सन। वर्तमान में इहाँ के शासकीय पी. जी. महाविद्यालय सतना, मध्यप्रदेश, में अंग्रेजी के प्रोफेसर के पद प सेवा दे रहल बानी।

पुस्तक-समीक्षा  

डॉ. रमाशंकर श्रीवास्तव

पुस्तक: किसिम किसिम के फूल

लेखक- श्रीभगवान पाण्डेय

विधा: गीत-गजल

प्रकाशक: नवजागरण प्रकाशन, नई दिल्ली।               

प्रकाशन वर्ष: 2017

पृष्ठ संख्या : 120

मूल्य: ₹ 200(पेपर बैक) / ₹ 250( सजिल्द)

सुपरिचित कवि-गीतकार श्रीभगवान पाण्डेय के गीत-गजल संग्रह “किसिम किसिम के फूल” जब मिलल, त मन मे आइल रहे कि कबो पढ़ के कुछ लिख देबि। लेकिन हमार सोच गलत रहे। जब पढ़े शुरू कइनी त पता चलल कि “किसिम किसिम के फूल” सचहुँ के किसिम किसिम के भाव भरल कविता, समाज मे धज्जी-धज्जी होत नैतिक मूल्य आ पारिवारिक रिश्ता के टूटन के दर्द में डूबल भोजपुरी गीतन आ रूमानी गजल के मनोहारी गुलदस्ता बा। जब पढ़े के शुरू कइनी त बुझाइल जे गोड़ कीचड़ कादो में अचके पड़ गइल बा। निकले के कोशिश में हम अउरी गहराई में जाए लगनी, एगो अलगे मस्ती में धँसत गइनी। मस्ती अइसन की बहरी निकले के मन ना कइल। अलग-अलग स्वाद के मस्ती लेत मन आंनद में डूबे लागल। पता ना श्रीभगवान पाण्डेय के लेखन में कँटीला बंसी के कइसन जादू बा। पाठक मछरी नियर फँस गइल त फँसते चलि। चहनी कि अचके में अझुरहट के फांस के अलग कर दीं, लेकिन कहाँ भइल!

           किताब में छोट-छोट कविता के रचना क्रम बड़के बा। लगभग अस्सी गो छोट-बड़ काव्यानुभूति के विस्तार विषय फइलल बा। मन ना ऊबी,सबके संवाद लेत चलीं। पुस्तक के भूमिका में आचार्य गणेशदत्त किरण जी अइसन गीतकार के निमन से पहचान कइले बानीं। उहाँ के मनले बानी कि- “श्रीभगवान पाण्डेय के गीतन में उक्ति-वैचित्र्य, लालित्य, अर्थ-गौरव भरल बा।” हमरा समझ से भी संकलन के गीतन से गुजरला के बाद पाठक संकलन के गीतन में  अइसन अनुभव कर सकेला। पाठक के आगे इठलात प्रकृति के सौंदर्य त लउकते बा बाकिर उनका आँखि के रौशनी उ सब देखे के क्षमता नइखे राखत, ई काम पाण्डेय जी कइले बानीं। आ एतने कम नइखे कि, कवि पाठक में दृष्टि पैदा कर देता कि प्रकृति के सभ सौंदर्य सामने आ जाता। मिठाई के नाम लेल अउर बात ह,मगर मिठाई जब साक्षाते सामने आ जाई त खाए वाला (पाठक) के संयम टूटिये जाई। एह दशा से हम खुद गुजरल बानी आ विश्वास बा कि जे भी संकलन के रचनन से गुजरी ओकरा ई स्वाद मिली।

           “किसिम-किसिम के फूल” में विषय के विस्तार, भाषा के निखार, विडम्बना के भरमार, सामाजिक पहलुअन पर सटल व्यंजना के स्वाद से पाठक के नजर ना बची।          प्रो.(डॉ)अरुण मोहन भारवि त एह संकलन से भोजपुरी साहित्य में एगो नई आस के शुरुआत मनले बानी।

आईं जा संकलन के गीतन के स्वाद लेत चलल जाय। करूण रस में पगलाइल एगो गीत के बानगी  देखीं जा- 

“सुनुगल दरदिया जिनिगिया धुँआइल

आसरा के अचके दियरिया बुताइल।”

 *       *       .*            *

“जब  जब  चंदा मुंडेरवा  प आवे।

दिल के समुन्दर में हलचल मचावे।

अँखिया के मोतिया छिटाइल अँखिया से।

आइल बा कइसन बिपतिया।।” 

*      *         *          *         *

          अइसन पचासो विम्ब बा जवन आँखि में चिपक जाता।  संकलन के गीतन में  विम्ब-प्रतीक योजना,उपमा, अलंकार आ गेयता से पाठकन के ओइसने ताजगी भेटाई जइसन गरमी के दिनन में ठंढा पानी से नहइला से मिलेला।  

 इहाँ के गीतन के कुछ बानगी देखल जाय –

“छंदन अस अंग गठल,गीत मतिन देहिया।

बोलिया में मिसिरी,नजरिया में नेहिया।

चाल फागुन के जइसे बयार

उमिरिया चटोर हो गइल।।”

*       *       *      *         *

“रूप देखते लजा गइल दरपन

              सनेह भइल अरपन।

मादकता डूबल बा छंद-लय-ताल में,

उलझल चनरमा बा रजनी के बाल में,

भइल सरगम के साज पर समरपन।

सनेह भइल अरपन।”

…………………

“चाँद झाँके बदरिया के पार

अँजोरिया बारि-बारि के।

रात विहँसेले करि के सिंगार

सनेहिया ढारि-ढारि के।”

*     *          *          *          *

           रचनाकार के दृष्टि सूक्ष्माति सूक्ष्म विशेषता पर कइसे गइल बा एकर जियतार अभिव्यक्ति संकलन के गीतन में देखल जा सकेला।एगो मनोहारी चित्र  देखते बनता –

“ताल-तलइया बीच चन्द्रमा,

      नील गगन में रंग भरे।

मन विभोर बा देखि देखि के

      भीतर नया उमंग भरे।

जुगनू टिमटिमात बिरिछन पर

लोग निहारे प्यार में।

सरग भुला जाला आके धरती के एह सिंगार में।।”

अइसन ढेरो प्रसंग बा जवना के चित्रण में श्रीभगवान पाण्डेय आपन सूक्ष्म दृष्टि आ सहृदयता के परिचय देले बाड़े। कवि के सहृदयता कहीं-कहीं सिंगार सौंदर्य में अइसन लपटाइल बा कि तारीफ में कलम छटपटा जात बिया। जइसे-

“अलंकार से सजल-धजल, 

 आ गठल छंद जइसन काया।

  लाज कल्पनो के लागे, 

देखते तहरा जइसन जाया।

संयम टूटल, आजु ओठ से 

       गीत फेनु बिछिलाइल बा।”

*          *             *       .    *

भा-

“कजरा के कोर और बिंदिया पुकारे

पायल आ कंगन भी बाजत डिठारे।

    बाकिर करवट अबहियो लजार।

           निहोरवा टारि-टारि के।

           चाँद झाँके बदरिया के पार।

           अँजोरिया बारि -बारि के।।”

*            *                *              *

हर अनुभव के बेहोश कर देबे वाला ताकत बा अइसन पँक्तियन में। केतना देखाईं भा गिनाईं।

कवि व्यंग्य-प्रहार में भी पीछे नइखे। व्यक्ति,समाज आ देश के धरती कहाँ कहाँ ऊसर बा ओके कवि अपना व्यंग्य के कुदारी से उटकेर-उटकेर के देखा रहल बा। कुछ बानगी देखीं-

“तू कमाल होख कबीर के, भा पुलस्त्य के नाती।

तू ही पट्ठा एक दिन बनब,लोकतंत्र के थाती।

का मजाल जे केहू आ के तो से हाथ मिलाई।”

नेता लोगन पर चुटकी लेबे में कलम के कमाल देखते बनत बा-

“रउरो पावे के बाटे त कर लीं करम कमाई।

अपना घर मे आजादी के रउरो कीर्तन गाईं।

पिचकल गाल करम कइला से, सेव मतिन हो जाई।

झंडा फहराते राउर घर लाल किला हो जाई।”

आजादी के बाद से ही सुना रहल बा कि देश मे रामराज्य आ रहल बा।एकरा पर कवि बता रहल बा कि कइसन रामराज आवे वाला बा-

 “धीरज धर भइया रामराज आई।

 सूरज ना डूबी कहीं रात ना ओराई।   

जेकर लाठी उहे भईस ले के जाई।

नीम पर करैला फुलाई।।

धीरज धर भइया रामराज आई।।”

*            *               *             *

मानवीय पीड़ा पर-

“भूख पेट से लाज चेट से,कइल करे बलजोरी।

एगो रोटी खातिर नन्हका,छछनत खोरी-खोरी।

हम कइसे खेलीं होरी।।”

*            *            *             *

एगो लाइन देखे लायक बा- 

“फूल टटका रहल,गंध बासी मिलल, 

जिंदगी में उदासी-उदासी मिलल।।”

*          *              *             *

कवि के सूक्ष्म दृष्टि समाज के पीड़ा के खोज लेत बा। एगो दोहा में देखीं-

“उमड़त बदरी देखि के,सुरुज गइल लुकाय।

दिन माथा पीटत रहल,रतिया हँसत ठठाय।।”

बहुत कुछ कहलाती जा सकेला। बाकिर सभकर सीमा होला। कुछ पाठकन पर छोड़ देबे के चाहीं।

पाठक के मूल्यांकन महत्वपूर्ण होला।

संकलन के सभ रचना में वर्तमान सामाजिक परिवेश आ मनुष्य के नैतिक स्वरूप पर लेखनी चलल बा। सब कुछ बहुत स्वाभाविकता से कहल गइल बा। स्वाभाविकता हृदय के छुवेला। मूक शरीर सब कुछ देखत आ अनुभव करता। युग मनुष्य बनावेला आ ओही में फँसि के छटफटइबो करेला। कवि श्रीभगवान पाण्डेय के भी दशा उहे बा। सपना दूर बा तबो ओ के अपना बनावे में कवि के योगदान कम नइखे।रउरा रो रो के आपन बात कहीं तबो सभ कुछ कहा जाला।पाण्डेय जी के प्रयास सार्थक बा।

              एह संकलन खातिर रचनाकार श्रीभगवान पाण्डेय जी के बधाई। सुबह के हर किरिन उहाँ खातिर एगो खिलल फूल ले के आओ।

परिचय- डॉ. रमाशंकर श्रीवास्तव हिन्दी-भोजपुरी के सुप्रसिद्ध उपन्यासकार आ हास्य-व्यंगकार हईं। 

पुस्तक समीक्षा

दिव्येन्दु त्रिपाठी

कृति- हमहूँ बानी

विधा- काव्य संग्रह

संपादिका- डॉ. संध्या सिन्हा “सूफी “

प्रकाशक- सर्वभाषा ट्रस्ट, नई दिल्ली

प्रकाशन वर्ष-2020

पृष्ठ संख्या- 111

मूल्य 200₹ (सजिल्द)

       “हमहूँ बानी” डॉ. सन्ध्या सिन्हा द्वारा संपादित भोजपुरी के पहिलका अइसन काव्य संग्रह ह जवना में खाली कवयित्री लोग के रचना शामिल बाड़ी स। डॉ. संध्या सूफी नारीविषयक मौलिक क्रियाकलापन खातिर जानल जाली। ऊ पहिलकी अरु एकमात्र भोजपुरी के महिला पत्रिका “अंगना ” के प्रवर्तक आ संपादक बाडी़। ई काव्य संकलन के उपसंपादक वीणा पांडेय भारती बाड़ी। औरत के मन के तानाबाना, ओकरा द्वारा सहल गइल पीडा, स्नेह आ प्रेम के महसूस कइल गइल कोमल-मखमली भाव आ अवचेतन में दबल-छिपल काँच भा पाकल उद्भावना के अभिव्यंजना नारी से बेहतर भला के कइ सकेला। एह काव्य संग्रह के नारी अस्मिता के कसौटी प देखे-पढे के चाहीं।

      एह संग्रह में कुल्ह पनरह गो कवयित्री लोग के शामिल कइल गइल बा। एकरा में ना त कवनो एगो विधा भा शैली के प्रधानता बा आ नाहीं कवनो वादविशेष के वादी भा प्रतिवादी बने के चेष्टा झलकत बा बलुक एकरा में नारी मन के सामूहिक संवाद अधिक प्रतिध्वनित भइल बा। ई स्त्री मात्र के स्वर प्रस्तावित करत बा आ ऊ लोग के संश्लिष्ट संवेदना के तानाबाना देखावत बा। एकरा में छंदबद्धो रचना मिली छंदमुक्तो रचना मिली, मुक्तो छंद मिली आ गद्य कवितो मिली। गीत त मिलबे करीहें स। ई संग्रह में केहू प्रेम, विरह आ भावुकता से सनाइल बा त केहू में संघर्ष आ अंतरात्मा के दर्द अधिक मुखर बा। बाकिर परवशता आ बंधन के पीडा प तकरीबन सभे जानी कलम चलवले बाड़ी। नारी के पीडा आ ओह प रोकटोक प डॉ. ज्योत्सना अस्थाना के कविता “अब ना रोअब” बहुत मार्मिक बन पड़ल बा। उहाँ द्वारा लिखल ‘नाजुक गजल बा’ आ “काहे कहर तूँ ढइलू “जइसन कविता पढिके ई साफ हो जाता जे सौम्यता भा स्नेह के कतनो कोशिश होखे बाकिर यथार्थ आ समाज के दोराहपन मोलाएम शब्दन के लोर में बोर देता।

           असहीं छाया प्रसाद जी के रचनन में विरासत आ पारिवारिक संबंधन का प्रति दर्द आ लगाव झलकत बा उहां के ‘बेटी’ शीर्षक कविता में बेटियन के संघर्षमय जीवन के बडा मार्मिक चित्रण भइल बा-

       “बेटियन के भाग काहे अइसन लिखाइल बा ।

    जन्म से मरण ले दुख-दरद छाइल बा ।”

       श्रीमती किरण सिन्हा के कवितन में औरत के विविध रूप आ ओकर संघर्ष लउकत बा। ‘माई के देहरी’ कविता में बीतल बचपन आ “कइसे लिखाई कविता ” के बहाने ससुरारी में रहेवाली स्त्री के जीवन में लपटाइल अंतहीन बंदिशन के जिक्र बा। माई बने के असहनीय पीडा प इहाँ के ” ना जननी तोर पीर ए माई ” बढिया लिखाइल बा।        

                डॉ. मधुबाला सिन्हा के कविता लरछुत बहुत व्यंजनात्मक आ प्रतीकात्मक बा। बिम्ब विधान तारीफ के लाएक बा। आपन देश आ गाँव का प्रति आसक्ति के भाव इहांके कविता ” अपना झोंपडि़या में” में प्रकट भइल बा। श्रीमती ममता सिंह के गीतन में लोकपरम्परा के सुगंध मिलि जाई। विरह के पीडा आ निरगुन के भाव इनकर कविता” सुगना उडि जइहें” में देखेके मिली। पद्मा मिश्रा के रचनन में श्रृंगार आ प्रकृति के तालमेल देखेके मिली। छंदमुक्त कविता औरत के बिम्ब विधान बढिया बा आ एकरा कुछ-कुछ नई कविता के तासीर मिलि जाई –

      ” रसोई के धुँआइल अन्हार में/जरत चूल्हा के रोशनी के बीच /गरम पतीला से उठत भाप /धुँधला कर देबेला सबकुछ। “पृ 49

            डॉ. संध्या सूफी के रचनन में स्त्री के प्रति पक्षधरता सबका से अधिक मुखर बाटे। औरत के जीवन के विसंगतियन आ कलंकित कला के साथ जीएवाली लइकियन /युवतियन के सिसकत जीवन मार्मिक आक्रोश से भरल बा। “सवाल चिरईं के” एगो लमहर कविता ह। एकरा में चिरईं के रूपक के रूप में लेके तरुणाई का ओर बढेवाली लइकी के दुख बयान कइल गइल बा। अइसन प्रगतिजीवी कविता ई संग्रह के मूल्यवान बना रहल बा।

             श्रीमती वीणा पांडेय “भारती’ के रचनन में आपन देश आ संस्कृति का प्रति नेह-छोह झलकत बा आ राष्ट्र का प्रति अनुराग प्रतिबिंबित होत बाटे ।

              सरोज सिंह के रचनन में गज़ल के पुरकस तासीर मिली आ नया उपमान-विधान ख़ातिर ललको  झलकी। विरहिणी के पीडा आ गोवंश के दर्द व्यक्त करेके खूब काबीलियत बा इनकर शब्द-विन्यास में। निवेदिता श्रीवास्तव जी के कवितन में विरह श्रृंगार के विविधभाव, सावन आ कजरी के मेलजोल खूब व्यक्त भइल बा। “बाबा के नाम एगो पाती” नइहर के भावुक करेवाली याद संवेदनशील पाठक के आँख नम करे में सफल रही। श्रीमती माधवी उपाध्याय जी के कवितन में प्रकृति आ श्रृंगार के कोमलता के साथ साथ स्त्री के पीडा काफी मुखर मिली। आरती श्रीवास्तव “विपुला” भावजगत में रिश्तन के भावुक तानाबाना देखेके मिली। भाई -बहिन,माई-बेटी आ माता-पिता का प्रति इनकर गहन लगाव सहजे व्यक्त भइल बा।

              श्रीमती ममता सिंह जी के काव्यभाव मन के गहराई का साथ जटिल लगाव के उतार-चढाव आ दुनिया के दोरंगापन के छवि पेश करत बाटे। सोनी सुगंधा के गीतन में दुनिया के ऊँचनीच के समझे-समझावे आ जिनगी के सहेजे आ बनावे के कोशिश झलकत बा। डॉ. रजनी रंजन के गीतन में जीवन-लय आ मृत्यु के वेदना व्यक्त भइल बा। लोकोन्मुखता का प्रति आग्रह इनका में विशेष रूप से मिली।

            अधिकांश कवयित्री लोग भक्तिपूर्णो रचना कइले बा। ई संग्रह कोविड काल के पीडा झेलि के आइल बा। एही से दू-चार गो के छोडिके बाकी सभे कोरोना-कलम उठवले बा। ई संग्रह में कुछ भाव अइसन बा जवन सब कवयित्री लोग में समानुरूप से अभिव्यक्त भइल बा। सदियन से चलि आ रहल नारी के प्रति भेदभाव, शोषण, पराधीनता के खिलाफ सभे आवाज उठवले बा। घरेलू हिंसा, बलात्कार, वैश्यावृत्ति जइसन दैत्यन के खिलाफ बहुत  कठोर आक्रोश व्यक्त भइल बा। साथे  एकरा में ई बात भी प्रकट होता जे औरत अपना घर-परिवार, पति ,बालबच्चा खातिर कतना चिंतित आ कन्सर्न बाटे। ओकरा खातिर आपन घर-संसार दुनिया के कवनो दोसर मुद्दा से अधिक अहम बाटे। बात सही बा जे भावपक्ष के विविधता आ गहराई के एह संग्रह में प्रधानता बा। शिल्पगत भा कलापक्ष प कवनो राय बनावल अभी जल्दबाजी होई। ई संग्रह एगो ऐतिहासिक संग्रह बा। शब्दसाधिका लोग के रचनाशीलता में जहवाँ समाज आ परिवार के पुरान परल रूढि के तूरे के दमखम बा ओनिए दोसर ओर आपन विरासत,परंपरा आ श्रद्धाभाव के समेटे आ बचाने के निष्ठा प्रकट भइल बा। सही से ई संकलन  एक्कीसवीं सदी के भोजपुरिया नारीमन के अभिव्यंजित करत बा।

परिचय- दिव्येन्दु त्रिपाठी, लेखक, अन्वेषक आ वास्तुविद्, कैलाश धाम, मानगो डिमनारोड, जमशेदपुर

पुस्तक- फेर ना भेंटाई ऊ पचरुखिया

लेखक- डॉ. रंजन विकास

विधा- आत्म-संस्मरण

प्रकाशक- सर्वभाषा ट्रस्ट, नयी दिल्ली

प्रकाशन वर्ष- 2022

पृष्ठ संख्या- 224

पेपर बैक, मूल्य- 250 रुपये

सज़िल्द – 400 रुपये  

03 फरवरी 1958 के बिहार के सीवान ज़िला में दरौली ब्लॉक के गौरी गाँव में पैदा भइल डॉ. रंजन विकास एगो ख़ुशहाल आ शिक्षित-साहित्यिक पारिवारिक पृष्ठभूमि से आवेलन। इहाँ के नानी के सगी बुआ श्रीमती राजवंशी देवी के बियाह देश के प्रथम राष्ट्रपति भारतरत्न डॉ.राजेन्द्र प्रसाद से भइल रहे। इन्हिकर नाना पाण्डेय जगन्नाथ प्रसाद सिंह ख़ुद हिन्दी-भोजपुरी के लेखक रहलन अवरू मामा पाण्डेय कपिल भी भोजपुरी के जानल-मानल शख़्सियत रहल बाड़न। हम सन् 1980 के आसपास उन्हुकर नाना के एगो आत्मकथात्मक भोजपुरी उपन्यास ‘घर टोला गाँव’ पढ़ले रहीं। उहाँ के मामा पाण्डेय कपिल के भोजपुरी उपन्यास ‘फुलसुंघी’ भोजपुरी उपन्यास साहित्य में ‘मील के पत्थर’ मानल जाला जवन भोजपुरी में पूर्वी गाना के शीर्ष आ अत्यंत लोकप्रिय गीतकार अवरू स्वाधीनता सेनानी महेन्दर मिसिर के जीवन पर आधारित बा। एने हाले में हिन्दी में मशहूर कथाकार संजीवो के एगो उपन्यास महेन्दर मिसिर के जीवन पर आइल बा। पाण्डेय कपिल भोजपुरी के स्तरीय आ नामी पत्रिका ‘उरेह’ के संपादको रहल बाड़न। हमहूँ एह पत्रिका के पाठक रह चुकल बानी। डॉ.रंजन विकास के पिता शारदानंदन प्रसादो एगो आदर्श शिक्षक आ हिन्दी-भोजपुरी के साधक-साहित्यकार रहलन। उन्हुकर भोजपुरी में कविता-गीत, कहानी आ शोध के कुछ पुस्तक प्रकाशित बाड़ी स। डॉ.रंजन विकास हाल-फिलहाल में भारत सरकार के स्वास्थ्य आ परिवार कल्याण मंत्रालय में मूल्यांकन अधिकारी के पद से सेवानिवृत्ति के बाद पटना में रहि के फेरू साहित्य सेवा में जुट गइल बाड़न। ऊ एहघरी भोजपुरी के ई-लायब्रेरी ‘भोजपुरी साहित्यांगन’ के सह संचालको बाड़न। एकर संचालक उन्हुकर बड़ भाई श्री रंजन प्रकाश बाड़न। एकरा माध्यम से भोजपुरी के लगभग सभ विधन के कुल 900 से ज़्यादा पुस्तकन के अबतक डिजिटल मंच पर प्रस्तुत कइल जा चुकल बा। एह में कई गो दुर्लभ पुस्तक त नष्ट होखे के इस्थिति में रही स। विशेषकर भोजपुरी साहित्य के प्रति डॉ.रंजन विकास आ उन्हुकर पूरा परिवार के ई सेवा अन्यतम आ विरल कहल जा सकेला।

डॉ. रंजन विकास के हिन्दी में एगुड़ा काव्य संग्रह ‘थिगलियाँ कटी धूप की’ सन् 1995 में ही प्रकाशित हो चुकल बा। ऊ छात्र-जीवन में ही सन् 1983 में बिहार के कुछ युवा कवियन के एगो साझा संकलन ‘धरती से जुड़कर’ के संपादन कर चुकल बाड़न। एगो लमहर चुप्पी के बाद जब ऊ साहित्य सृजन के तरफ़ मुख़ातिब होखल बाड़न त ऊ आपन भावाभिव्यक्ति खातिर आपन मातृभाषा भोजपुरिए के चयन कइले बाड़न। साहित्य में ऊ गद्य शैली में आत्म संस्मरण विधा के अपनवले बाड़न। समीक्ष्य पुस्तक उन्हुकर आत्म संस्मरण ह। एकरा के स्मृति कथा, स्मृति आख्यान भा आत्मकथो कहल जा सकत बा। अपना भूमिका में रंजन विकास जी लिखत बाड़न कि ‘ एह पुस्तक के लिखे के प्रेरणा उनका भोजपुरी जंक्शन के यशस्वी संपादक मनोज भावुक से मिलल बा। एह पुस्तक में परिशिष्ट के शामिल कर लिहल जाई त कुल 17 गो अध्याय हो जाई। एह मए पुस्तक में लेखक डॉ. रंजन विकास जवना एगो जगह के केन्द्रीयता प्रदान कइले बाड़न, ऊ जगह पचरुखी अर्थात् पचरुखिया ह। ई सीवान ज़िला के एगो छोटहन क़स्बा ह जेहवाँ लेखक के बचपन बीतल बा आ उन्हुकर हाई स्कूल तक के पढ़ायी-लिखायी भइल बा। ईहे जगहिया उन्हुकर शिक्षक आ साहित्य-साधक पिता शारदानंदन प्रसाद के कर्मस्थलियो रहल बिया। ऊ पचरुखी के सामाजिक जीवन के बारे में बहुते तफ़सील में आ रोचक तरीका से बतवले बाड़न। ऊ पचरुखी अवरू ओकरा आसपास के गाँवन में फइलल आपन हितई-नतई के विवरणो देले बाड़न। ऊ आपन पैतृक गाँव गौरी, ननिहाल शीतलपुर, शीतलपुर बाज़ार आ सादिकपुर के बहुते आत्मीयता के साथ चर्चा कइले बाड़न। एह पुस्तक के पढ़त घरी ओह मए जवार-पथार (ग्रामीण क्षेत्र) के तत्कालीन पारिवारिक-सामाजिक स्थितियन आ भौगोलिक बनावट के बारे में जानल जा सकत बा। डॉ.रंजन विकास आपन स्मृतियन में पचास-साठ साल पीछे लौटत बाड़न अवरू ओहघरी के समय के शब्दन के ज़रिए जीवंत कइ देत बाड़न। ऊ बीच-बीच में आपन लेखकीय टिप्पणियन से वर्तमान की बदलत जात स्थितियनो के बोध करा देत बाड़न। एह तरह से ऊ ‘नॉस्टेल्जिक’ होखे से भी बाँचल रहत बाड़न। एह पुस्तक के पढ़त बेर हमनी सब के पता चलेला कि समय केतना तेज़ गति से बदलत रहल बा। लेखक आपन प्रिय जगहन पर एगो लमहर अंतराल के बाद वापस लौटत बा। ई केतना पीड़ादायी बा कि हमनी के रोज़ी-रोज़गार आ विकास के चक्कर में विस्थापित होनी जा अवरू देखते- देखत आपन प्रिय जगहन आ आपन आत्मीय लोगन से बहुत दूर हो जानी जा। हमार ई सोच बा भा मानना बा कि हर पढल-लिखल आदमी के आपन अनुभव आ मूल्यवान पारिवारिक-सामाजिक स्मृतियन के एही तरह से लिख के सहेजे के चाहीं। एकर एगो आपन अलहदा महत्वो बा। लेखक रंजन विकास के जीवन के गढ़े में पचरुखिया आ ओकरा आसपास के जवार-पथार के महत्व त बड़ले बा पटनो शहर उनका खातिर एगो केन्द्रीय जगह रहल बा। उन्हुकर शख़्सियत के बनावे भा रचे-गढ़े में में पटनो शहर के अहम योगदान बा।

उन्हुकर आत्म संस्मरण के ई पुस्तक बहुते सरल-सहज अवरू पारदर्शी भोजपुरी गद्य में लिखल गइल बा। एकरा के पढ़त बेर पाठक कठिनाई के अनुभव ना कर सकेला। हमनी के आपन पुरान सम्बन्ध, पुरान जगह आ ओह दौर के जीवनानुभव के दुबारा स्मृतियन के ज़रिए भाषा में संभव कइ सकत बानी जा; बाक़ी त लेखक पुस्तक के शीर्षके व्यंजक देले बाड़न- “फेर ना भेंटाई ऊ पचरुखिया !” हमरा एह शीर्षक भा मथेला के पढ़त बेर बार-बार हिन्दी कवि शमशेर के एगो कविता-“लौट आ, ओ धार” के किछु पंक्ति स्मृति में कौंधत रही स –” लौट आ, ओ फूल की पंखड़ी/फिर/फूल में लग जा/चूमता है धूल का फूल/कोई,हाय!” (रचना काल–1959)

एह पुस्तक के एगो सुंदर भूमिका साहित्यकार भगवती प्रसाद द्विवेदी जी लिखले बानी। भूमिका के शीर्षक बा-“लोकसंस्कृति के जियतार झाँकी”। बहरहाल, रंजन विकास जी के एह भोजपुरी आत्मकथात्मक गद्यकृति खातिर बहुत-बहुत बधाई आ शुभकामना।   

परिचय- बक्सर, बिहार में जनमल आ लगभग चार दशक से लेखन में सक्रिय चंद्रेश्वर जी के अब तक हिन्दी-भोजपुरी में सात गो पुस्तक प्रकशित बाड़ी स। यूपी, बलरामपुर के एम.एल.के.पी.जी. कॉलेज से हिन्दी के प्रोफेसर आ अध्यक्ष पद से सेवानिवृत्ति के बाद आजकल लखनऊ में रहि के लेखन कार्य कर रहल बानी।

किताब: दीपशलभ

लेखक: मार्कण्डेय शारदेय

विधा: प्रबंध काव्य

प्रकाशक:सर्वभाषा ट्रस्ट प्रकाशन

प्रकाशन वर्ष : 2020

पृष्ठ संख्या : 84

मूल्य : 150 ₹

भोजपुरी में पौराणिक प्रसंगन भा चरितन पर रचित प्रबंधकाव्यन चाहे ऊ महाकाव्य होखे भा खंडकाव्य के संख्या बेसी बा। आधुनिको विषयवस्तु के ले के प्रबंधकाव्य भोजपुरी में रचत जात रहल बा। बाकिर ऐतिहासिक विषय वस्तु के ले के रचल जाए वाला प्रबंधकाव्य कम बा। बौद्धकालीन इतिहास पर बउधायन, कुणाल आ बुद्धायन हम पढ़ले बानी, जबकि मध्यकालीन इतिहास पर ‘ किरणमयी ‘ आ ‘ शेरशाह पढ़े के मिलल रहे। ओकरा बाद मार्कण्डेय शारदेय रचित प्रबंध काव्य  ‘ दीपशलभ ‘ 2020 ई. में छपल बा जेकर कथावस्तु मध्यकालीन इतिहास से जुड़ल बा। मेहरुन्निसा ऊ दीप बाड़ी जेकरा पर सुरनाथ शर्मा, शेर आ सलीम जइसन शलभ आकर्षित होत बाड़ें आ जर के मर जाए के हालत में पहुँच जात बाड़ें।

युवा सुरनाथ शर्मा सुघर नौजवान रहलन, बिद्या बुद्धि से भरल पूरल रहलन। ऊ अकबर जइसन राजा के खजांची गयाशुबेग के मुंशी रहलन। साहित्य, व्याकरण, न्याय, ज्योतिष आ वेदांत के विद्वान रहलन। युवामन रूप आ सुघराई के ओर खिंचाजाला आ कर्तव्य पथ से भटके लागेला, सौन्दर्य ओकरा के विचलित करे लागेला। ऊ यमुना तट पर प्रकृति नटी के नर्तन देख के विचलित हो जात बाड़न, बाकिर अपना के सम्हार लेत बाड़न काहे से कि गयाशुबेग जइसन सनेह देवेवाला राज अधिकारी के कर्मचारी भइला के बोध रहे। असल में कवि शारदेय जी प्रकृति चित्रण से ही एह काव्य के शुरुआत कइले बानी।

बेग साहेब के बेटी रही मेहरून्निसा, अनिंद्य सुन्दरी। कुल खानदान के मान बढ़ावेवाली मेहरुन्निसा रूप आ शील से भरल पूरल रहली। उनका सोझा जाये में विद्वानो लोग का भय लागत रहे। प्रबंधकाव्य के कवि शारदेय जी उनका रूप के बरनाका करत लिखत बाड़ें-

सुन्दर चंचल बृहन्नयन आ ओठ सरस अति पातर।। रससे भरल कटोरी जइसन गाल, शंख जस गर।  पातर लमछर करिया कुचुकुचु नरम केश मन मोहे।  रेशम के करिया में रँगि के सूता सझुरल सोहे ।।

मेहरुन्निसा सद्व्यवहारी त रहले रही, ज्ञान खातिर पियासल रहली। उनकर पढ़ाई घर पर होत रहे। मोलवी साहेब पढ़ावत रहलें जे फारसी पढ़ावत रहलें। संस्कृत के शिक्षा देवेला सुरनाथ शर्मा के रख लिहल गइल जे कचहरी के काम के बाद गयासुद्दीन बेग के घर पर आके पढ़ावे लगलन। बाकिर सुरनाथ के जवानी  मेहरुन्निसा के सुघर आ मादक रूप में भटके लागल- 

शिष्या के सुन्दरता से मन उनुकर डोले लागल। नीति-रीति आ धरम-करम के गीरह खोले लागल।।  हिरदय में हिलकोरा होखे यौवन से गदराइल। भावत्रय के सम्मिश्रण से मादकता बढ़िआइल।।

सुरनाथ शर्मा प्रेमरोग के आत्मनियंत्रण से दबावे के कोशिश करत पढ़ावे के काम करत रहलन। बाकिर उनकर मन आँवक में नइखे आवत। ऊ मेहरुन्निसा के रूप आ देह के घाटी में भटके लागत बा –

शर्मा जी के मन बानर अस डाढ़-डाढ़ प फाने।  लाख मनावसु रोकल चाहसु बाकिर ऊ ना माने।।

जइसे शलभ दीप के भीरी आवेला, हट जाला। छिन छिन का दो सोच समझ कुछ हट जाला, सट जाला।। 

चरित्र के बिछिलाए से बचावे खातिर, ऊ गयासुद्दीन बेग के सेवकाई छोड़े के चाहत बाड़न। ई बात ऊ मेहरून्निसा से बतावत बाड़न, ऊ उनका के एगो अँगूठी गुरूदक्षिणा के रूप में देत बाड़ी। बेग साहेब का पता चलत बा कि सुरनाथ शर्मा सेवकाई छोड़ के जाए के चाहत बाड़न, ऊ मनावे के चाहत बाड़न, बाकिर शर्माजी आपन आ बेग साहेब के इज्जत प्रतिष्ठा के हानि से बचे खातिर नइखन मानत, विदा कर देत बाड़न। शर्मा जी अपना के कोसत घर वापसी करत बाड़न। बाकिर घर पहुँचियो के उनकर मन उचिटल रहत बा-

रहसु दार्शनिक अस अपने में नित-नित,  बिसरल बिसरल स्वप्निल रहल सदा चित। 

खाइल-पीयल-सूतल कुछो न भावे,  स्वजन समझ ना पवलें रोग उपस्थित।

एने मेहरुन्निसा के रूप आ जवानी पर बादशाह अकबर के पुत्र सलीम आ वजीर शेर खाँ लोभाइल बाड़ें। दुनों लोग चाहत बाड़न कि मेहरुन्निसा उनकर हो जास। गयासुद्दीन बेग का ई ज्ञान रहे कि सलीम बादशाह पुत्र बा जे मेहर के सब रस चूस के छोड़ दी, ऊ कुछ ना कर पइहन। बेटी के समझावत बाड़न कि सलीम से बढ़िया वीर शेर खान से बिआह कइल ठीक रही –

तहरा लायक बा सिर्फ शेर। जेमें गुण बाड़े बहुत ढेर।                            

वजीर शेर वीर बा आ ऊ अइसन ना कर सकी। सलीम बादशाह से अपना मन के बात बता के शादी करावे के विनती करत बाड़न। बादशाहो नइखन चाहत कि सलीम से बिआह होखे। झूठा दिलासा दे के सलीम के लवटा देत बाड़न। गयाशुबेग से बतिया के वजीर शेर से मेहर के बिआह करा देत बाड़न। अकबर आ गयाशुबेग के मन मोताबिक काम हो जात बा। बंगाल के राजपाट शेर के दे देत बाड़न।

ओने सुरनाथ शर्मा मेहरुन्निसा के बिछोह आ अपना कर्तव्य से चुकला के चलते ग्लानि में पड़ल गलल जात रहन-

मेहरुन्निसा उनकरा हृदय में जब समइली,  तब से शरीर उनुकर पचकत गइल सदा ही।                  

ऊ हृष्ट – पुष्ट आकृति, ऊ दर्शनीय यौवन,  ठठरी मतिन अशोभन होखत गइल सदा ही ।।

विक्षिप्तता में एक दिन घर छोड़ के वन में भटक गइलन आ घाहिल हो के पड़ल रहलन-

बढ़ते रहन तलक ऊ फेड़ा में जाई लड़लें,  भइलें निठाह घाही सब तंतु झनझनइलें।                     

बेजान अस अचानक मुँह के बले बिगइलें,  चेतन अचेत होखल मृतप्राय ऊ बुझइलें।।                   

कवनो तपस्वी के नजर पड़ल, ऊ अपना आश्रम में ले गइलन आ इलाज बात करके उनका तन आ मन दुनों के निरोग कइलन अउर उनका के राह धरावत विदा कइलन।

बंगाल के शासन बढ़िया से चलत रहे। अपराधी लोग दंडित होत रहे। प्रजा खुशियार रहे। बाकिर, मेहरुन्निसा के पावे में विफल सलीम बंगाल राज में उपदरो मचावत रहे। ऊ ना चाहत रहे कि बंगाल शांत रहे। ऊ शेर के जानी दुश्मन बन गइल रहे। सुरनाथ शर्मा जंगल में तपस्वी आश्रम से निकललें त भटकत राति खा कतहीं टिक गइलें। निसबद रात में कुछ लोग के बातचीत से पता चलल कि ऊ लोग सलीम के आदमी ह, जे शेर के जान लेवे के उदेसे निकलल बा। उहो तालमेल बइठा के ओह दल में शामिल भइलें आ बुद्धि लगा के शेर खाँ के जगवा देलें। शेर के जान बचल आ सुरनाथ के प्रायश्चित पूरा भइल। गला के हार दे के शेर शर्मा जी के पुरस्कृत कइल चहलें। जाते-जाते ऊ कह गइलें –

पुनः करजोरि कहलें, ‘ हे नृपतिवर। न चाहीं कुछो भौतिक वस्तु सुखकर।                     

रखीं ; ई न बा हमरा काम लायक। बने हम जा रहल संन्यास धारक।                          

 इहे सब साधना के हवें बाधक। गृही जन भले मानसु सुखद साधक।                

 निवेदन करे हम बस पास अइलीं। हृदय के बात सँउसे कह सुनइलीं। ‘

जहाँ तक काव्य शास्त्र के निष्कर्ष पर एह प्रबंध काव्य के कसल जाई त संस्कृत के आचार्य मारकण्डेय शारदेय जी, एकरा के सात सर्ग में निबद्ध कइले बानी। बाकिर अपना काल के छोटे प्रसंग पर आधारित भइला से ई खंडकाव्य के श्रेणी में आई। एह में प्रसंगानुकूल प्रकृति चित्रण, दिन-रात, साँझ-प्रात, सूरज-चान, नदी-ताल के बरनन मिलत बा। प्रकृति के मानवीकरण भी खूब भइल बा।

जहाँ तक चरित्र शिल्प के बात बा, एह प्रबंधकाव्य के नायक सुरनाथ शर्मा बाड़ें। कथा उनके से शुरु होत बा आ उनके से समाप्त होत बा। ई मेहरुन्निसा के चारित्रिक शुचिता आ अपना आचरण के बचावे खातिर आपन पेशा तक छोड़ देत बाड़न। पुत्रीतुल्य शिष्या पर इनकर कामुक दृष्टि पड़ल, जवन इनका के पछतावा में डारि दिहलस, जवना के ऊ सह नायक शेर के जान बचा के प्रायश्चित से दूर कइलें। शेर सह नायक बाड़ें, जे नायिका मेहरुन्निसा के प्राप्त करत बाड़न, बंगाल के कुशल शासक बाड़न आ उनका हत्या के उदेसे सलीम के भेजल उपद्रवियन के मार गिरावत बाड़न। सलीम खल नायक बाड़ें, ऊ ऐयाश बाड़न, मेहरुन्निसा के पावे में विफल रहला पर तरह-तरह के उपदरो करत-करवावत बाड़न। मेहरुन्निसा नायिका बाड़ी, जे रूप आ गुण दुनों से भरल बाड़ी। ऊ अपना गुरु के दिशा देखावत बाड़ी आ अपना बिआह के बारे में पिता के सलाह मानत बाड़ी। अकबर, गयाशुबेग, मौलवी आ जंगल के तपस्वी गोण पात्र बाड़ें।

शारदेय जी के भाषा तत्सम बाहुल्य बा, काहे से कि उहाँ का संस्कृत के आचार्य बानी। बाकिर ई तत्सम के बाहुल्यता खटकत नइखे। भोजपुरी में सहज आ गतिमान रहत बा।  

आखिर में हम एह प्रबंध के उदेस पर विचार करत बानी त पावत बानी कि मध्यकालीन इतिहास के ई प्रसंग आजुओ काल के समय में बड़ा प्रासंगिक बा। आजु समाज में कतना घटना अइसन घट रहल बा, जवना में प्रेम में प्राण तक ले लिहल जात बा। सात्विक प्रेम ना, दैहिक प्रेम में पड़ल युवा पीढ़ी बेलगाम बा। ई प्रबंधकाव्य प्रेम में पवित्रता बरकरार राखे के ऊपर बल देत बा।

पुस्तक: हमार गाँव (स्मृति आख्यान)

लेखक: चंद्रेश्वर

प्रकाशन: रश्मि प्रकाशन, 204, सनशाइन अपार्टमेंट, बी-3, बी-4, कृष्णानगर, लखनऊ

प्रकाशन वर्ष:  

मूल्य: 200 रुपया

चंद्रेश्वर जी के एगो किताब ह ‘हमार गाँव’। एह किताब में चंद्रेश्वर अपना गाँव के बीतल दिन के इयाद करत बाड़न। बचपन से लेके हाल हाल तक के अपना गांव के एकेक बात खोज खोज के सुनावत बाड़न। जतने आपन गांव के खोजत बाड़न, गांव के लोगबाग के, जोरापारी के लइकन के, नाता रिश्ता के, अतने अपनहूँ के। खेत-खरिहान, बाग, नदी- ताल- पोखर, मेला-ठेला,लीला-रामलीला,परब-तेवहार, गीत-गवनई, झगड़ा-रगड़ा, गारी-गेंग, कथा-कहानी,भूत-पिचास, खेल, माई, बाबू, चाचा, चाची, नाना, नानी, गोतिया-नइया, हरवाह, चरवाह, बूढ़-पुरनिया, मजूर, गवनिहार,गवनिहारिन सब अपना रंग ढंग में हाजिर बा। इयाद दर इयाद एगो लड़ी परोसल गइल बा। स्मृति में कवनो ठहरल ना, बदलत गांव उभरत बा। बदलाव चाहे जइसन होखे। लेखक खुदे एह के इयाद कथा कहत बाड़न, स्मृति आख्यान। एकर भूमिका लिखले बाड़न हरे प्रकाश उपाध्याय। संजोग बा कि चंद्रेश्वर जी आ हरे प्रकाश एके जिला जवार के ह लोग। दूनो लोग के मातृभाषा भोजपुरी ह। हरे प्रकाश एह किताब के बारे में सही बात लिखले बाड़न कि ई किताब खाली चंद्रेश्वर के गांव ‘आशा पड़री’ के खिस्सा नइखे कहत, बलुक भोजपुरी क्षेत्र के अनेक गांवन के नीक-जबून कह जात बिया। एह किताब के पढ़त समय जे भोजपुरी अंचल के भौगोलिक बनावट, भाषालत, उच्चारण आदि से वाकिफ होई ऊ जरूर बूझ जाई कि एह किताब में गंगा के मैदानी इलाका, जेके दीयर कहल जाला, मुख्य रूप से ओहिजे के बात बा। चंद्रेश्वर जी एकर जिकिरो करत बाड़न।

ई पूरा किताब एकावन उपशीर्षक में बा। एकावनो मिल के एगो गांव के बहाने एगो इलाका के निकट अतीत आ वर्तमान के हाल अहवाल सब बतियावत बा। निकट अतीत आ वर्तमान के बीचे कवनो फांक नइखे। इयाद सबके जोड़ले रहत बा। कुल पचास पचपन साल के गांव के बात बा आ खाली अतने ले नइखे। लेखक से बेसी उमिर के जे बा, जे काका, बाबा, काकी आ ईया बा, पहिले के पीढ़ी के बा, ओकर बात बतकही में जवन बात आवत बा ऊ पिछिला के पिछिला पीढ़ी से जुड़ल बा। मतलब कि लमहर कालखंड बोलत बा।

भोजपुरी समाज में, खास क के आमजीवन में बात बतकही के जवन शैली देखे में आवेला,आपन बात प जोर देके बतियावे के, सुनेवाला यकीन करिए ले, ना यकीन करे के कवनो गुंजाइश बेछोड़ले, ओह शैली के अनूठापन एह किताब में जगह जगह देखल जा सकेला। बतियावे वाला जदी मरद बा, त ऊ बात बात में कहेला कि लोहा छू के कहत बानी, खटिया प होई त खटिया छुवे के कही, गाँछ त होई त ऊपर देखत कही कि बिरिछ त बानी, कुछ ना होई त धरती छू के भा आकाश देने ताक के बात कही। कि सुनेवाला खूब सुने आ यकीनो करत जाए। मेहरारू होले त किरिया खाले, आँखी किरिए। चंद्रेश्वर के एह किताब में एकर बानगी जगह जगह देखल जा सकेला। बानगी के तौर प पहिलके चैप्टर के ओह अंश के देखल जा सकेला जहां ऊ मोबाइल नंबर देवे के कहत बाड़न कि “ना परतोख होखे त रउवा सब हमरा बाबूजी से भा हमार समउरिया चचेरा बड़ भाई अशोक जी से पूछ सकत बानी। ओह लोग के मोबाइल नंबर दे देब।” केहू के पतियावे के हद तक जाए के कला ‘डकैत सिरी किसुना अहीर’ पाठ में भी देखल जा सकेला -“केतना लोग पतियाई ना आ कही कि बनत बाड़े, बाकी सचाई इहे बा।” अब साँच चाहे जे होखे।

बाकी लेखक जहां तक जानत बा, जवन कहत बा ऊ साँच बा।

एह में एगो अंश बा ‘गांव में मेहरारू”। लेखक के स्मृति में जवन गाँव घर बा, ओह में मेहरारू त खूब बा लोग, बाकी ऊ अपना अपना नाम के संगे नइखे लोग। एकाध गो के छोड़ के। केहू अपना पति के नाम से त केहू बेटा बेटी के नाम से जानल जाता। ऊ चाची होत रही, काकी, मउसी, ईया, नानी, फुआ होत रही। बहुत लोग त आपन नाम तक भुला गइल होई। लेखक इहो सवाल उठा रहल बा कि केतने मेहरारुन के घर भितरे मुआ देल गइल, एकर कवनो हिसाब नइखे। केतने के पेट गिरल, केतने कुहुक के मुअल। एह में लेखक अपना पट्टीदारी के एगो बीस बाइस साल के बियाहल लइकी के, जे नाता में लेखक के फुआ लागत रहे, जिनगी के बहुते त्रासद प्रसंग के वर्णन करत बा। ओह लइकी के अपना भरल जवानी में आग लगा के मुवे के राह चुने के परल। लेखक तब छोट रहे। ओह के लेके ना ससुरा के केहू फिकिरवंत लउकल आ नइहर त रहले ना रहे।

स्मृति आख्यान लिखल जोखिम के काम ह। बहुत कुछ कहे के संगे संगे बहुत कुछ छिपा लेवे के भी भरपूर गुंजाइश होला। ई किताब पढ़त बुझाला कि चंद्रेश्वर लेखकीय ईमानदारी के ताक पर नइखन रखले। बाकी कुछ बात बा जवना के तरफ ध्यान बेगइले नइखे रहत। ऊ ई कि अधिकांश त अइसन लागत बा जइसे लेखक धड़ाधड़ आपन बात कहत जा रहल बा। जहां रुक के बात कहल बा, ऊ हिस्सा जादे तथ्यपूर्ण बा, विश्लेषणपरक बा।

भाषा के लेके भी कुछ बात बा। बेशक ई किताब भोजपुरी के मुकम्मल स्मृति आख्यान ह। आ भाषा के लेके जवन आग्रह दिखाई देत बा ऊ खाली इनके साथ नइखे। जइसे सिरी भगवान , परकीरती, संस्कीरती के देखल जाए। बहुते लोग अइसे लिखेला। बाकी सोचे के चाहीं कि जब मल्लाह लिखल ठीक बा त संस्कृति काहे बेठीक बा।

गाँव के धूर्त आ चलबिद्धधर चरित्र के भी खोज बा। लेखक कवनो ठहरल गाँव के बात नइखे करत। गाँव कतना आ कवना रूप में बदल रहल बा, लेखक के नजर ओह पर बा। परिचय- बलभद्र, हिंदी विभाग, गिरिडीह कॉलेज, गिरिडीह, झारखंड।

पुस्तक-चिन्तन कुसुम

लेखिका-श्रीमती शैलजा कुमारी श्रीवास्तव

विधा- निबन्ध

प्रकाशक- भोजपुरी संस्थान,पटना  

पृष्ठ-155

मूल्य- 25 रुपया

संस्करण- सन् 1989

भोजपुरी खातिर ई गौरव के विषय बा कि ‘चित्रलेखा पुरस्कार’ से पुरस्कृत ‘चिन्तन कुसुम’ जइसन ठोस विवेचनात्मक साहित्य-सर्जन अब भोजपुरी-साहित्य में हो रहल बा। ‘चिन्तन कुसुम’ श्रीमती शैलजा कुमारी श्रीवास्तव के लिखल- बात, जीवन के उद्देश्य,  काव्य में प्रकृति-वर्णन, नारी-सौन्दर्य आ प्रकृति, ऋतु चक्र,  वर्षा ऋतु, शरद ऋतु, बसन्त कुसुमाकर, योग साधना आ भक्ति, साधना प्रक्रिया में नाद-योग के महत्त्व आ रस-सिद्धान्त के कसौटी पर भोजपुरी काव्य समेत कुल ग्यारह निबन्धन के एगो संग्रह ह; जवना में ‘बात’ शीर्षक निबन्ध ललित या व्यक्तिगत निबन्ध के श्रेणी में मानल जाला, शेष  निबन्ध  साहित्यिक चाहे आध्यात्मिक बा।

एह संग्रह के अध्ययन करते पाठक के ई समझत देर ना लागी कि शैलजाजी के अध्ययन के क्षेत्र बहुत विस्तृत  बा। एही बात के एह निबन्ध-संग्रह के भूमिका में अनुग्रह मेमोरियल कॉलेज, गया के प्रधानाचार्य  (आचार्य)  विश्वनाथ सिंह एह तरह से लिखतानी- “शैलजा कुमारी कवि आ कहानीकारो हई। इनका भोजपुरी-हिन्दी-कविता के कुछ नमूना उदाहरण के रूप में एह पुस्तक में जगह-जगह मिली। बाकी ई समझे में कवनों कठिनाई नइखे कि इनका व्यक्तित्व के प्रधान रूप अध्ययन, भावना आ चिन्तन का तन्तुअन से बनल बा। शैलजा जी का अध्ययन के क्षेत्र काफी व्यापक बा। संस्कृत, अँगरेजी, उर्दू, हिन्दी आ भोजपुरी-काव्य के अनुशीलन के साथे-साथे एक ओर लोकगीतन का लालित्य से आ दोसरा ओर योग अउर भक्ति का आध्यात्मिक तत्वन से लेखिका के जवन समृद्ध मानस निर्मित भइल बा ओकर परिणत स्वरूप एह चिन्तन कुसुम में मिलsता। इनका दार्शनिक अध्ययन का विस्तार में गीता, उपनिषद्, अउर हठयोग, नादयोग से लेके बाइबिल तक के समावेश बा।

शैलजाजी के जीवन-दर्शन आध्यात्मिक बा। उहाँ खातिर स्वाद आदमी के सबसे बड़ा दुश्मन ह। आदमी के अपना अन्तःकरण का केन्द्र का ओर बढ़े के चाहीं । जीवन के लक्ष्य आनन्द-प्राप्ति ह; ऊ आनन्द जेकर कभी अंत ना होखे। एकरा खातिर परम शान्ति आवश्यक बा। बिन्दु के सिन्धु में मिलल ही जीवन-लक्ष्य ह। एहसे माया से विमुख रहके ओकरा के प्राप्त करे के चाहीं। हमरा दोसरा में ना, अपना में दोष देखे के चाहीं आ अपना तन-मन पर काबू रखे के चाहीं,  अपना ज्ञान में वृद्धि आ किताबन से मित्रता करे के चाहीं । हमरा अपना में ही ई शक्ति पैदा कर लेबे के चाहीं जवना से हम अपना आप से बतिया सकीं। ओही के  ज्ञानीलोग  ‘ध्यान’ या ‘मनोयोग’ कहेला।

शैलजाजी के अध्यात्मिक निबन्धन के पढ़ते ई स्पष्ट  हो जाई कि उहाँ के जीवन-दर्शन के मूल में केवल उहाँ के अध्ययन-चिन्तन-मनन ही नइखे, बल्कि उहाँ के व्यक्तित्व पर साधना-सत्संग के प्रभाव के साथ ही आस्था भी अपना बीज रूप में वर्तमान बा।

आदमी स्वभाव से ही सौंदर्यप्रेमी रहेला, एहसे ऊ हर हालत में सौंदर्य के उपासक रहेला। मनुष्य के एही सौंदर्यवृत्ति के तुष्ट करे खातिर अद्भुत प्राकृतिक सौन्दर्य के रचना भइल बा। एतने भर ना प्रकृति के रचना आदमी के उपयोग खातिर भी भइल बा। एहीसे जे लोग प्राकृतिक सौन्दर्य से अभिभूत ना होखे; ऊ लोग प्रायः दुर्जन होला। मनुष्य के सुन्दरता के प्रति एही आकर्षण  के चलते भगवानो के स्वरूप अत्यंत सुन्दर मानल गइल बा।

भारतीय काव्य-शास्त्र में काव्यानन्द के ब्रह्मानन्द के सहोदर कहल बा। बाकिर शैलजाजी अपना के एगो मौलिक चिन्तक के प्रमाण देत ‘रस-सिद्धान्त का कसौटी पर भोजपुरी काव्य’ में अपना बात के सतर्क रखत काव्यानन्द के ब्रह्मानन्द से श्रेष्ठ बतावतानीं। उहाँ के  लिखतानी कि ब्रह्मानन्द संसार-निरपेक्ष होला अर्थात् आत्मगत होला जबकि काव्यानन्द संसार में रहके भी लौकिक धरातल से ऊपर। कवि के दृष्टिकोण मानवीय होला; एहसे मानवीकरण से प्रकृति के भाव-रस में डुबा देला। जवना कारण, ब्रह्मानन्द से काव्य में आनन्द अधिक होला।

शैलजाजी के अध्ययन-चिन्तन के दायरा काफी विस्तृत बा; जवना में एक ओर आध्यात्मिकता-दार्शनिकता के भाव प्रचुर अनुपात में दृष्टिगोचर होता, उहईं दोसरा ओर लौकिक-संस्कृत, हिन्दी, उर्दू आ भोजपुरी पर भी उहाँ के पकड़ बहुत मजबूत दीखता । एकर कारण ई बा कि शैलजाजी संस्कृत के एगो प्रतिभाशाली (स्वर्ण पदक प्राप्त) विद्यार्थी रहनीं; बाकिर उहाँ के हिन्दी,उर्दू से अधिक अपना मातृभाषा भोजपुरी से लगाव रहे। एहसे उहाँ के चाहत रहनीं कि भोजपुरी के जवना कोना में अभी ओतना समृद्धि नइखे भइल, ओह कोना के समृद्ध बनावल जाव आ भोजपुरी में भी बहुत कुछ अइसन बा जे समृद्ध साहित्य के इयाद करा सकेला, ओकरा के पाठक के ध्यान में ले आवल जाव। एहसे उहाँ के सिर्फ पाठक खातिर ही ना भोजपुरी-साहित्यकारन के प्रेरित करे आ ओह लोगन के ज्ञान- भंडार बढ़ावे खातिर भी एह संग्रह में कइगो शोधात्मक निबन्ध लिखले बानीं; जे अगली पीढ़ी के मार्गदर्शन करे में सक्षम बा।

‘नारी-सौन्दर्य आ प्रकृति’ शीर्षक निबन्ध में लेखिका के कहनाम बा कि संस्कृत-साहित्य में प्रकृति के चारुतम रूप प्रस्फुटित भइल बा । प्रकृति के प्रेमिका के रूप में या वास्तविक नायिका के रूप से प्रकृति-नायिका के स्पर्धा दिखावल गइल बा। कभी-कभी उपमा, उत्प्रेक्षा, रूपक, प्रतीप, श्लेषादि के प्रयोग से पाठक कठिनाई  में पड़ जाला कि उपमान श्रेष्ठ बा कि उपमेय। कालिदास उपमा के जादूगर हउअन। उनका रचना में दूनू तरह से उपमा के प्रयोग भइल बा। भोजपुरी में भी उपमा के प्रयोग बहुत भइल ला। भिखारी ठाकुर द्वारा उपमा के प्रयोग देखीं-

“आँखिया त हउए जइसे अमवाँ के फँकिया से,

मोछिया      भँवर       गुलजार   रे    बिदेशिया

ओठवा     त   हऊए   जइसे  कतरल पनवाँ  से,

नकिया    सुगनवा   के    ठोर      रे    बिदेशिया ।।”

शैलजाजी के बारे में पाण्डेय कपिलजी लिखतानी- “एह ग्रंथ में चिन्तन के कुसुम कुसुमित भइल बा। चिन्तन के अइसन फूल त पाण्डित्ये का गाछ पर फुला सकेला। शैलजाजी के विदुषी व्यक्तित्व के आयाम बहुत व्यापक बा। संस्कृत, हिन्दी आ भोजपुरी, भाषा, साहित्य आ संस्कृति; धर्म, दर्शन आ अध्यात्म के अध्ययन, मनन आ विवेचन से उहाँ के जवन साहित्यिक व्यक्तित्व निर्मित भइल बा ओकरे रम्य आ सुचिन्तित अभिव्यक्ति एह ग्रंथ का निबन्धन में भइल बा।”

हालाँकि भोजपुरी में निबन्ध पिछला कुछ दशक से  लिखाये लागल बा। फिर भी स्तरीय आ अध्ययन-विवेचन-परक निबन्धन के सर्वथा अभाव बा। एहसे पाण्डेय कपिल लिखतानी- ” एह अभाव के पूर्ति का दिसाईं, एह ग्रंथ के प्रणयन आ प्रकाशन के महत्त्व माने के होई।– एह विशिष्ट कृति खातिर श्रीमती शैलजा कुमारी श्रीवास्तव जी भोजपुरी-जगत के साधुवाद के पात्र बानीं।” एही बात के (आचार्य) विश्वनाथ सिंह एह तरह से लिखतानी-“हम एह कृति के अभिनन्दन करsतानी कि एकरा से भोजपुरी के व्यक्तिगत आ समीक्षात्मक, दूनों तरह के निबन्धकार लोगन के दिशा-निर्देश होई।”  

एह तरह से हम कह सकेनी कि शैलजाजी के ई निबन्ध-संग्रह कोई मामूली निबन्ध-संग्रह ना ह बल्कि ई भोजपुरी-साहित्य खातिर मील के पत्थर साबित भइल बा। काहेकि एह संग्रह के निबन्ध एक ओर जहाँ अध्ययन-विवेचन से भरपूर बा, त उहईं दोसरा ओर एह संग्रह के व्यक्तिगत आ समीक्षात्मक दूनू तरह के निबन्ध भोजपुरी निबन्धकार लोगन के दिशा-निर्देश करे में भी सक्षम बा।

परिचय – अनिल कुमार प्रसाद (जन्म 1958-), अंग्रेज़ी के अवकाशप्राप्त प्रोफ़ेसर आ शिक्षाविद देस विदेस में कार्यरत रहल बानी  , अंग्रेज़ी, हिंदी आ भोजपुरी में कविता, कहानी आ निबंध बराबर लिखत  रहेनी।

किताब के नामः कचोट

लेखक के नामः महेन्द्र प्रसाद सिंह

किताब के विधाः भोजपुरी हास्य व्यंग्य नाटक

प्रकाशक के नामः रंगश्री प्रकाशकन

प्रकाशन वर्ष   : 2001       

पृष्ठ संख्या   : 62

किताब के संशोधित मूल्यः 100 रु.

भोजपुरी के शिष्ट साहित्यिक आ प्रतीकवादी नाटकन के परम्परा में सर्वोच्च स्थान रखेवाला भोजपुरी हास्य व्यंग्य नाटक “कचोट” जेकर लेखक बानी भोजपुरी के सुविख्यात नाटककार, रंगकर्मी, निर्देशक तीनों विधा में समान रूप से पारंगत श्री महेन्द्र प्रसाद सिंह। एह नाटक में भरतपुर गाँव के एगो आदर्शवादी स्वतंत्रता सेनानी रामचनर के कहानी बा। आजादी के बाद चुनावी तिकड़म, राजनीति के अपराधीकरण, चतुर्दिक भ्रष्टाचार आ जीवन मूल्यन के उत्तरोत्तर अकल्पनीय ह्नास के दुष्परिणाम से ओह स्वतंत्रता सेनानी के मोहभंग आ आक्रोश एह नाटक के कथावस्तु बा। रामचनर के करेजा के कचोट नाटककार के एह पक्तियन से स्पष्ट हो जाता।

‘‘गहीड़ घाव करे वाला कवनो बरियार चोट खइला के बाद जब आदिमि कुछुओ करे से अलचार हो जाला त ओकर करेजा कचोट के रह जाला। आज अनेत, भ्रष्टाचार आ आतंक के मार से आदिमि अतिना घवाहिल आ बेकस हो गइल बाड़न कि कुछुओ करे के बउसाव नइखन बटोर सकत। कुल्हि लंठ, खूनी आ भठियारा साँढ अस, सभे के रउन्दत, माकल चलत बाड़न आ उन्हुका छतरछाँह में पनपत-पोसात चोर, बैमान आ लूटेरा सउँसे सामाज के मूस अस चाल के खोंखड़ कर देलन। एकर करण बा इन्हिके लोगिन प टिकल देस के गइल बहाइल राजनीति जे आदर्श ना रह के बेसाह हो गइल बा।

आज गद्दी हथियावे के चुनावी दंगल में जे अनेत होता ओकर कवनो लेखा नइखे। तरह-तरह के लालच देके भाई-भाई में भेद पैदा कइल जाता। जाति-पाँति, टंटा-बखेड़ा, खून-खराबा आउरी ऊ कुल्हि करम होता जे ना होखे के चाहीं।

हमरा एह नाटक में कइगो पात्रन के भूमिका निभावे के सौभाग्य प्राप्त भइल बा जइसे सकलू, समानन, चिरकुट आ रूपन। एह नाटक में रामचरन के माध्यम से देखावल बा कि देश के कानून व्यवस्था उनकरे लेखा लंगड़ा आ असहाय हो गइल बा आ धरीछन जइसन सत्ताधारी के गुलाम हो गइल बा। नाटक के एगो संवाद, अब भगवान में पावर कहाँ बा। अब त ना भगवान में पावर, ना भगत में पावर, ना तहरा में पावर ना हमरा में पावर, ना गाँव में पावर ना सहर में पावर…. सगरे पावर के कराइसिस बा। सभ पावर त धरीछन बबुइया अपना हाथ में ले लेले बा।

भागमानो के एगो संवाद बा, “बिपतिया लगवना मूस सउँसे घर चाल के रख देले बाड़न स। कहिला कि मुसमरनिया ले आवऽ लोगिन, त हमार के सुनेला। देखऽ त भरल बोरा के चाउर रहे सभ काट के खा गइलन स। ई मूस जीअल दूलम कइले बाड़न।” इ संवाद में मूसो एगो प्रतीक बा जवन भ्रष्ट व्यवस्था के चोर, बैमान, भ्रष्ट अधिकारी, कर्मचारी के रूप में सउँसे समाज के चाल रहल बा आ जवना से एगो आम आदमी त्रस्त बा बाकि ओकरा के मार नइखे सकत। एह नाटक में बकरियो प्रतीक के रूप में लिहल बा जवन कि खेत के मेढ़ पर चरत पकड़ के काट दिहल जातिआ आ ओहिजे साँढ़ बिगहा के बिगहा खेत चर जाता बाकिर ओकरा के कानी हउद में केहू ना डलवा सके। ओहिसही देश के आम आदमी के जीवन बकरी जइसन हो गइल बा। जेकरा के केहू सता सकेला। बाकिर नेता बनके बड़का-बड़का घोटाला कइला के बादो ओकर केहू कुछ ना बिगाड़ सके।

जवन रामचनर आजादी के लड़ाई में अंगे्रजन से लड़के आपन एगो गोड़ गँवा बइठल ओकरे छोट भाई रूपन पियक्कड़ हो गइल आ “जेकर राज ओकर माला जप” इहे ओकर सिद्धान्त बा। ओकरा हिसाब से गुंडातंत्र आ गद्दी के सोझा बहनोई आ दामादो के बली दिहल जा सकता। ऊ परिवारिक व्यभिचार के सूत्रधार त बड़ले बा आ चापलूसन के प्रतीक बा जे निरंकुश आ भ्रष्ट व्यवस्था के चापलूसी कर के पुड़ी आ कचैड़ी के गलचभ्भा उड़ावत बा। रूपन त रूपन रामचनर के आपन बेटा सामाननो गुमराह हो जाता आ मुखिया के चुनाव में वर्तमान व्यवस्था के विरुद्ध खड़ा त बा बाकिर एह आशा में कि जदि बढ़ियाँ धन मिल गइल त बइठियो जाइब। सामानन आ ओकर संघतिया सकलू समकालीन लक्ष्यहीन, भ्रष्ट आ मूल्यहीन युवावर्ग के प्रतीक बाड़न जेकर आदर्श खाली रूपिया कमाइल बा चाहें उ जइसे आवे।

जहवाँ सत्ताधारी धरीछन अपना गुण्डातंत्र के संगे खाली अनैतिक कामे के आपन धर्म मानता। ओहिजे रामचनर के सच्चा उत्तराधिकारी ढ़ोढ़ा जइसन संत, ईमानदार आ जुझारू आदमी के झूठे आरोप में जेहल भेज दिहल जाता। नाटक में चुनावी दंगल में बाहुबल आ धनबल के वर्चस्व, नशाखोरी, स्वार्थपरता आ चाटुकारिता आम आदमी आ चिरकुट जइसन गरीबन के दमन आ शोषण, अनीति आ पाप के नंगानाच के एतना कलात्मक आ प्रभावी रूप से चित्रण कइल बा जवना से साबित होता कि लेखक के नाटक आ भाषा के हरेक रूप पर पूरा आधिपत्य बा। एह नाटक के संवाद प्रसंगानुकूल, पात्रानुकूल, संक्षिप्त, सुबोध आ प्रवाहमय बा कि पाठक भा दर्शक एकरा से अइसन मंत्रमुग्ध हो जाले कि कब शुरू भइल आ खतम बुझइबे ना करे। एह नाटक में जवन ठेठ भोजपुरी शब्दन के प्रयोग भइल बा उ अपना आप में बेजोड़ बा। जइसे, खराई मारल, भाॅड़ी में बन कके राखल, मुहें माटी लगावल, जोम जागल, चोला कउआ भइल, टंट बेसाहल, करेजा ठंढावल, चोला कुफुत में पड़ल आदि।

परिचय: अखिलेश कुमार पाण्डेय एगो वरिष्ठ रंगकर्मी और रंग निर्देशक बाड़न। पिछला 16 वर्ष से रंगमंच का अलावे अभिनेता के तौर पर कई गो टीवी सीरियल का संगे-संगे, फिल्मों कइले बाड़न। विभोर, (विश्व भोजपुरी रंगमंच) पत्रिका के प्रबंध सम्पादक बाड़न।

कृति – पहिलका डेग

रचनाकार– अशोक कुमार तिवारी

विधा – कविता

प्रकाशक– अखिल भारतीय भोजपुरी साहित्य सम्मेलन, पटना

प्रकाशन वर्ष – 2014

मूल्य–१५० (एक सौ पचास रूपये मात्र)

पृष्ठ –116

       ‘पहिलका डेग’ सूर्यभानपुर, बलिया (उ0प्र0) के रहनिहार यशस्वी साहित्यकार अशोक कुमार तिवारी जी के पहिलका भोजपुरी काव्य संग्रह ह। भोजपुरी सम्मेलन पत्रिका के सम्पादक प्रो0 ब्रजकिशोर, चौधरी कन्हैया प्रसाद सिंह, डाँ जनार्दन राय, आ बृजमोहन प्रसाद ‘अनारी’ आदि दिग्गज साहित्यकारन के भूमिका/शुभकामना से सज्जल ई किताब सांचो सराहे जोग बीया।

     काव्य संग्रह के पहिलका रचना ‘गणेश जी के जोहार’ में भारतीय परम्परा के निबाहत गणेश जी के वन्दना अपना ढंग से करत जब कवि आगे बढत बा त सबसे पहिले ओकरा देश लउकत बा आ अपना रचना ‘इहे परिपाती’ हऽ भारत महान के पक्तिंयन’ घरे घरे मंदिर बा घरे-घरे धाम बा। केहू जये देबी केहू रटत हरि नाम बा। राखे ईमान ओकर नाम मुसलमान बा। बेरि-बेरि मसजिद में गूँजत अजान बा। कहीं बाटे चरच, कहीं बाटे गुरुद्वारा। आपन-आपन धरम से जुटल लोग सारा। ‘ से देश के एकता आ अखण्डता के अलख जगावे के प्रयास करत बा। ‘पान गुटखा’, ‘मोबाइल’, ‘फेंड’, ‘गमछा’, टाइटिल से लिखल दू-दू गो कुण्डलियन के पढला से ई साफ बा कि कवि छन्दबद्ध रचनो करे में प्रवीण बा।  ‘का बा दोस हमार’ कविता में कवि नारी महिमा के बरनन करत भ्रूणहत्या के घोर विरोध करत अगिला कविता ‘कहिया ना लाज लुटाता’ में देश के नैतिक-चारित्रिक पतन पर आपन चिन्ता व्यक्त करत कहत बा ‘आखिर एकर कारन का बा?’ कांहे अइसन होता। आखिर कांहे उजरल जाता?। हर गरीब के खोंता।। धनिक-धनिक अउरी होता,। होता गरीब भिखमंगा। चिरकुट गांथे वाला अउरी। होखल जाता नंगा।। एह कविता के बाद जवन कविता एह संग्रह में संग्रहित बीया, ओकरा के एक तरह से एह किताब के आत्मा कहल जा सकेला। ‘गाँव होई नापाता’ ई कविता एह काव्य संग्रह के सबसे लम्बा दस पेजी कविता बीया जवना में कवि गाँवन पर कइसे शहरीकरण के प्रभाव पसरल जाता, घर-दुआर, बाग-बगइचा, खेती-बारी, पेन्हांव-ओढाव, रहन-सहन, रीति-रिवाज, संस्कार-परम्परा कइसे बदलल जाता, एकरा पर आपन गझिन दृष्टि डालत बडा रोचक रूप में कविता के माध्यम से कहे के प्रयास कर रहल बा। कहे के ढंग केतना रोचक बा देखल जाऊ-  खेती-बारी पर कइसे मशीनीकरण हाबी बा, नमूना देखी-   ” हर-बैल जुआठ का होई?/ का होई पैनानाथा?/ एकही हेक्टर आइ गइल कि/दूर भइल सब बाधा/ कुँआ रहट से जल निकालल/ नइखे अब जरुरी/ पम्पिंग सेट चलावे पानी/ दूर भइल मजबूरी/ अब पकौढा कहँवा लागे? / होरहा कहाँ झोलाता? / कुछुए दिन में अइसन होई/ गाँव होई नापाता/” पुरनका लूर-गून कहाँ भुलाइल जाता एकर बानगी देखी- ” के चाहत बा सीखल बोने? / छँइटी- खाँच खँचोली/ कँहवा लउकत बा अब सोझा? / बँसखट अउर खँचोली/ चरबधिया-छवबधिया सोखऽ/ बहुत कठिव बा ठाटल/ इन्द्र चन्द्र-जम् राज के गोनल / समय फालतू काटल/ के लउकत बा खटिया छानत/ कँहवा सोक गिनाता? / कुछुए दिन में अइसन होई/ गाँव होई नापाता/ कँहवा सोके गिनाता? धर्म परम्परा के हमनी के कातना ताक पर राखत जात बानी जा, एकर उदाहरण देखी- ”कहाँ सुनाता केनियो अब/ त्रिलोकीनाथ के काथा/ अण्ड-बण्ड-महमण्ड रहत बा/ के करो ई ताथा?/ दू घण्टा लोगन के झेलऽ / तब बांटऽ परसादी। बाटे बहुत कठिन काम। सऽहल दूनो बरबादी/ कँहवा लोग-हँसी ठहाका?/ कँहवा शंख फुकाता?/ कुछुए दिन में अइसन होई/ गाँव होई नापाता।” सब मिला के ई कविता भले लम्बा बीया बाकिर एकर विषय, ठेठ-भोजपुरीयन आ कहे के तरीका एतना रोचक आ मनभावन बा कि पाठक एको सेकेण्ड खातिर कहीं बोरियत महसूस नइखे कर सकत। एह तरे ई कविता ”गाँव होई नापाता” संचहूँ एगो कालजयी रचना बन पडल बीया। काव्य संग्रह में नमूना के तौर पर दीहल गइल दूगो गजल आपन अलग प्रभाव डालत बा तऽ ”गरीबी के पीर” कविता में गरीबी के बरनन मर्मभेदी बा। ”झुलनिया उधार ना मिली” काव्य के निर्गुन रुप में हाजिर बा।” जनि मूव रोपिया खातिर” आ ”तुहूँ खेल हमहूँ खेलीं” कविता में यथार्थ आ दर्शन के मिलल जुलल रुप लउकत बा। ”दु:ख- सुख” कविता त दर्शन के साक्षात रुप प्रस्तुत करतीया। देखीं- ”दुनिया ऊ दियना हऽ हिसे जिनिंगी जरल करेला,/ जनम-मरन के खेल निरन्तर असहीं चलल करेला। / जिनिगी तेल हऽ सुख जोती हऽ दुखवा ओहकर बाती हऽ/ सुख हवे दुइ छन के पाहुन/ दुख जिनिगी के थाती हऽ ”। ”परले राम कुकुर के पाला” में कवि तथाकथित नेता जी लोग के सीधे कहत बा- ”जीये दऽ जनता के चाहे, गरदन जांति मुआव। हते देश बपौती तहरे जइसे मन चलावऽ”। किताब के टाइटिल वाली कविता ”पहिलका डेग” स्वछन्द गद्यात्मक शैली के कविता के एगो सुन्दर उदाहरण पेश करत बीया। देखीं- ”पहिलका डेग/ ई करेला तय/ कि का होई आगे/ एह से ई जरुरी बा/ सबका खातिन/ सोच बिचार कइल/ कि हम कवना ओर/ डाले जात बानी/ आपन/ पहिलका डेग ”।”मुखिया जी के शौचालय” आ” सूनी एगो खीसा” दास्तान शैली के रचना बाडी सन जवन कवि के बहुमुखी प्रतिभा देखा पावे में सक्षम बाडी सन आ एह दूनो के बीचे सेनरयू आ  हाइकू पन्द्रह-पन्द्रह गो के संख्या में बा जवना से ई साफ बा कि हर तरह से एगो सक्षम रचनाकार बा। अंतिम कविता ”सूनी एगो खीसा” में शराब के दुष्प्रभाव से अवगत करावत कवि ”इहे हटे चरित दारु के/ सत्य बचन ई मानों/ दोस्त-दोस्त दुसुमन भइले/भइली द एण्ड कहानी। ” पंक्तियन से सुनियोजित तरीका से किताब के सम्पन्न करत बा।

परिचय – डॉ. आदित्य कुमार अंशु। गीत, गज़ल, कहानी, नाटक,,संस्मरण, समीक्षा आदि विधन  में लेखन।  

खाँटी भोजपुरिया आ हिंदी साहित्य के गंभीर अउर  विचारोत्तेजक आलोचक मैनेजर पांडेय जी के 6 नवम्बर 2022 के दिल्ली में निधन हो गइल।  पांडेय जी से हमार पहिला भेंट सन 2008 में काशी हिन्दू विश्वविद्यालय, बनारस में आयोजित विश्व भोजपुरी सम्मेलन में भइल रहे। हमनी के एक साथे टेलीविजन के एगो परिचर्चा में भी भाग लेले रहनी जा, जवना में हमरा आ पांडेय जी के अलावा अरुणेश नीरन, जगदीश गोवर्धन (मॉरिशस) आ  सोमदत्त दल्तमन (मॉरिशस ) भी शामिल रहीं। विश्व पटल पर भोजपुरी के बात भइल।  हम लंदन में भोजपुरी विषय पर बोलनी। पांडेय जी के ज्ञान से बेसी उहाँ के बोले के अंदाज, भोजपुरी में खाँटीपन आ स्पष्टबयानी हमरा के प्रभावित कइलस।  

हम महसूस कइनी कि 23 सितंबर, 1941 के लोहटी, गोपालगंज में जनमल आ जवाहरलाल नेहरू विश्वविद्यालय के भारतीय भाषा विभाग में प्रोफेसर रहल  पांडेय जी हमेशा अपना अंदर अपना गाँव आ अपना मातृभाषा के जीवंत रखनी। हमरा उहाँ के साथे कई गो कार्यक्रम में मंच साझा करे, आपन बात रखे आ सम्मानित होखे के सौभाग्य भी मिलल। टेलीविजन में भी हमरा आग्रह पर उहाँ के अइनी आ भोजपुरी में लमहर बातचीत कइनी। निर्भीक, बेबाक, रोचक आ सरस बतकही पांडेय जी के विशेषता रहे। कबीरदास के उहाँ के भोजपुरी के कवि मानत रहीं आ ई बात उदहारण के साथ डंका के चोट पर कहत रहीं।   

उहाँ के पहलके  किताब साहित्य के समाजशास्त्र की भूमिका के हिंदी आलोचना में जोरदार स्वागत भइल।  तब से शब्द  और कर्म, साहित्य। के समाज शास्त्रच की भूमिका, भक्तिर आंदोलन और सूरदास का काव्या, हिंदी कविता का अतीत और वर्तमान, आलोचना में सहमति असहमति, भारतीय समाज में प्रतिरोध की भूमिका, अनभै सांचा, आलोचना की सामाजिकता, उपन्यास और लोकतंत्र, साहित्यद और दलित दृष्टिह,शब्दस और साधना, संगीत रागकल्पतद्रुम, संकट के बावजूद और साहित्य और समाजशास्त्रीय दृष्टि सहित उहाँ के अनेक पुस्तक प्रकाशित भइल। हिंदी अकादेमी के शलाका सम्माून, राष्ट्री य दिनकर सम्मा्न, गोकुलचंद्र शुक्लत पुरस्कादर आ सुब्रहमण्य् भारती सम्मािन सहित कई गो पुरस्कार से नवाजल गइल। 

समाज के विसंगति, विद्रूपता आ विडंबना पर दृष्टिबपात करे वाला आ ओह पर निडर होके बोले वाला अइसन आलोचक फेर केहू दोसर ना होई। ना होई केहू फेर मैनेजर पांडेय।  स्मृतिशेष के नमन !