global-impact-3.jpg

Hum BhojpuriaMay 6, 20221min310

महेन्द्र प्रसाद सिंह

युद्ध कहीं होखे, विनाशकारी होला। अक्सर ओकर परिणाम दिल के दहला देबे वाला होला। बाकि कामना से उपजल क्रोध का सोझा ना लउके उजड़ल गांव शहर, बिलखत बाल-गोपाल, असहाय लोग, ना तड़पत मानवता। पुतिन के खीस से शुरू भइल  रूस आ यूक्रेन के बीच युद्ध अइसने बा।   एह युद्ध के समाचार हमरा खातिर ओइसहीं बा जइसे केकरो ससुरारी में दू गो सार  भा केकरो नइहर में दू गो भाई आपुसे में लस्साकुटी आ मारपीट करत होखस आ हम फरिआवे में अलचार बानी। बाप महतारी के ना रहला पर भाईयन के लड़ावे-भिड़ावे वाला उनका लोगिन के संघतिया हो जालन स। राजनैतिको स्तर पर, सोवियत संघ टूटला के बाद रूसो आ उक्रेन  के इहे स्थिति बा। हमनी का देशो खातिर बा ई सांच बा। खैर भारत शांति प्रिय देश ह। भारत दिल से चाहत बा कि शांति कइसहूं बहाल हो जाय। मोदीजी शांति खातिर दुनों पड़ोसिया (बांटल भाई) के निहोरा कर कर के थाक गइलन। काश हमहूं कुछ कर पइतीं! शांति आ मैत्री के भाव जगावे वाला नाटक, “वैर के अंत” रूसी भाषा में?  एगो रंगकर्मी आउर का कर सकत बा? भारतीय नाट्य शास्त्र के रचयिता भरत मुनि के भूमि से आधुनिक मेथड ऐक्टिंग के जन्मदाता सह मास्को आर्ट थिएटर के संस्थापक स्तानिसलावस्की (रूसी) आ ली स्ट्रैसबर्ग (यूक्रेनी मूल) के जन्मभूमि खातिर ई साइत सबसे बढ़ियां पहल होइत। इहो मन होला  कि दुनों मित्रन के आपन ईयारी के किरिया धरइतीं आ जंग रोकवइतीं, ओइसहीं जइसे आज से 44 साल पहिले ओहनी जना आपन ईयारी के किरिया हमरे धरवले रहन।

ई लड़ाई बरबस हमरे 46 बरिस पहिले लेके चल जाला जब दूनों देश सोवियत संघ के अंग रहल।

23 बरिस के उमिर में हम 1975 में, बोकारो स्टील प्लांट में आपन योगदान देले रहीं। ओह समें ई प्लांट एशिया के सबसे बड़ स्टील प्लांट के रूप में जानल जात रहे संगहीं सोवियत संघ आ भारत के मैत्री आ आपसी सहयोग के बड़हन मिसाल रहे। हमार पोस्टिंग हॉट स्ट्रिप मिल में बतौर वरिष्ठ आपरेटिव  भइल। प्लांट के संचालन रूसी विशेषज्ञ लोग करत रहन। केहू रूस से त केहू उक्रेन से त केहू दोसर दोसर प्रदेश से। कांट्रैक्ट के मोताबिक ओहनी जना के सब भारतीय काउंटर पार्ट के प्रशिक्षण देके, संचालन के भार  सऊंपे के रहे। प्रशिक्षण सैद्धांतिक ना होके प्रायोगिक स्तर पर होत रहे। ऑन जॉब ट्रेनिंग, मित्रवत भावना के साथ, आपन-आपन भाषा में। प्रशिक्षक रूसी बोलस आ हम भोजपुरी। बस बुझे गुने के सूत्र रहे अभिनय जवना में अंग संचालन बेसी होत रहे। उनका खातिर जइसे हिन्दी रहे ओइसहीं अंग्रेजी आ भोजपुरी त काहे ना आपन भाषा में बोलीं? एक दोसरा के भाषा सीखे के कोशिश जारी रहे। थोड़े दिन बाद सफलता मिलल। फेनु त काम उड़वले चलीं जा। हंसते-हंसत भारी भरकम काम आसान हो गइल। ईयारी दांतकाटी हो गइल रहे। ई ढेर दिन ना चलल। दू तीन साल बाद ऊ लोग लवटे लगलन। मिल संचालन के खुशी के संगे आपन अज़ीज़ ईयार के जाए के दुखो कम ना रहे। बिदाई के घड़ी रूसी विशेषज्ञ रात्रि भोज में हमनी के अपना घरे बोलवले। पहिले शुरू भइल भोदका। ऊ लोग जानत रहन कि हमरा मदिरा भा कवनो नीसा से सख्त परहेज ह। नीट भोदका गिलासन में सजा के राखल रहे। हमार रूसी मित्र पहिले त निहोरा कइलन भोदका पीए के बाकि जब ऊ हार गइलन त आपन ईयारी के किरिया धरा दिहलन। बस भावना के उदवेग में हम एगो गिलास उठइनी आ गट गट पी गइनी। सोचनीं कि देव आ दानव के झगरा मेटावे खातिर भगवान शंकर विष पी गइल रहन त हम माता के भगत होके ईयारी निभावे खातिर भोदका काहे ना पी सकीं? का बुझाइल कि नरेटी आ अंतड़ी के जरावत रूसी एटम बम हमरा पेट के समुंदर में तूफान मचा के कतहीं विलीन हो गइल। आज ऊहे किरिया धरावे के मन करत बा दूनों मीतवन के कि लड़ाई ना बंद करबs जा त भोदका ना पिअब।

 

मन करे इयारी के किरिया धरइतीं,

दुनो मनमीतन के लड़े से बचइतीं।

 


war.jpg

Hum BhojpuriaMay 6, 20221min410

संतोष कुमार सिंह 

विश्व में मानवता के बचावे खातिर युद्ध ना, शान्ति के पहल पर शक्तिशाली देशनों के जोर देवे केआवश्यकता बा। पूरा विश्व अभी कोरोना के कहर से संभललो नइखे कि रूस आ यूक्रेन के टकराहट से पूरा विश्व के मानवजाति पर खतरा मंडराय लागल बा। एह बार खतरा कोरोना से नइखे बल्कि वर्चस्व खातिर हो रहल यूक्रेन आ रूस से हो रहल महायुद्ध से बा। हालत अइसन बन रहल बा कि अगर समय रहते शांति समझौता ना भइल त देखत-देखत पूरा संसार ई युद्ध के आग में लहक जाई। हालात एह क़द्दर गंभीर होत जाता कि रुस के राष्ट्रपति परमाणु हथियार के धमकी पर उतारू हो गइल बाड़न अउर अपना सेना के परमाणु बम के इस्तेमाल करे खातिर तैयार रहे के आदेश दे दिहले बाड़न जेकरा बाद से पूरा विश्व में हलचल मचल बा,  जेकरा बाद से तीसरा विश्वयुद्ध के आशंका बढ़त जा रहल बा।

सवाल ई नइखे की दु गो देशन के बीच युद्ध हो रहल बा। सवाल ई बा कि एतना ताकतवर, एतना विकसित अत्यंत आधुनिक हथियार के का महत्व बा या रह जाई जब मानव जाति ही समाप्ति के कगार पर चल जाई।

एकरा विपरीत कवनों भी विवेकशील व्यक्ति के युद्ध के खबर आनंदित ना करी, बल्कि तबाही के गहरा टीस भीतर ले छोड़ जाई। युद्ध के विनाश लीला से बर्बाद होखे वाला मुल्क के फिर से अपना पैर पर खड़ा होखे में दशकों लाग जाला, जब सरफिरा नेता अपना समझदारी के ताख पर रख के अपना घमंड में युद्ध छेड़ के मानवता के कुचल डालेलन।

युद्ध जब होला त नुकसान दुनो पक्ष के उठावे के पड़ेला। युद्ध छेडल आसान बा लेकिन शांति स्थापित कइल बेहद कठिन। अत्यंत घातक परमाणु हथियार से लैस रूस अउर अमेरिका के भिड़े के संभावना भी बढ़ रहल बा। मिलाजुला के ई कहल जा सकेला कि समय रहते शांति के उपाय ना कइल गइल त परिणाम बडा गंभीर देखे के मिली। रूस के राष्ट्रपति व्लादिमीर पुतिन जानबूझके आग से खेल रहल बाड़न। युद्ध में बढियां-बढ़िया देश के कमर टूट जाला।

लेकिन एह बीच एगो बढ़िया बात ई बा कि भारत आपन परचम लहरावत सभे भारतीयन के सकुशल वापसी करावें में सफल रहल बा। त ओहिजे एह संकटकाल में विश्व के निगाह फिर से भारत पर टिकल बिया अउर उम्मीद लगा के बइठल बिया कि इ समस्या के निदान भी भारत निकाल के विश्वगुरु के ओर एक अउर सफल कदम बढ़ा सकेला। विचारणीय विषय ई बा कि जवन तरीका से चाहे उ शक्तिशाली देश होखे या कमजोर देश होखे सब मानवतावादी अउर शान्ति के राह छोड़ के विध्वंसक हथियार बनावे के होड़ में जुटल बा। ई बात मानवता खातिर घातक साबित होई। इ समय युद्ध के नइखे बल्कि शांति कायम करके मानवीयता देखावे के बा ताकि समस्त मानवजाति सुकून अउर अमन से जिनगी बिता सके। कोरोना पहिलहीं से जनमानस के रुला रहल बा अइसे में अगर अब तीसरा विश्व युद्ध छिड़ गइल त परिणाम विध्वंसक हो


ashok-and-buddha.jpg

Hum BhojpuriaMay 6, 20221min390

सरिता सिंह गोरखपुर

आज विश्व युद्ध के जौंन त्रासदी भइल बा ओसे खाली रूस ही नाही, जेतना भी देस बाटे सबही में खड़मंडन मचल बा, सागरो जहान ई विभीषिका से त्रस्त ह, कतहुं भी शांति नाही लौकत बा,  कुल देसन में भयावह स्थिति बा, सगरो विश्व में हाहाकार मचल बा, कुल ओर त्राहि-त्राहि के दृश्य बा, ई सब देख के एगो प्रश्न मन में उठेला! का युद्ध ही एगो रास्ता बा, काहे नहीं शांति क राह चल के कवनो उपाय खोजल जाय?

अब प्रश्न उठत बा कि शांति के विकल्प का बा? नि:संदेह शान्ति के स्थापना युद्ध ना बुद्धत्व से मिल सकेला। हमनी के ई जाने के जरूरत बा कि बुद्धत्व का ह? एकर सही अर्थ अगर जाने के होखे त हमनी के आपन पौराणिक इतिहास के सहारा लेवे के पड़ी-

तिलक योग्य ना बा तलवार  काटे बेगुनाहन के शीश।

खून सनल बा जेकर हाथ, कइसे उ पाई आशीष।।

जवन  तलवार बेगुनाह के मूडी काटेला ओकर कबो जयकार ना होला। सम्राट अशोक भी अपना राज्य के विस्तार खातिर युद्ध कइलें, जेकर परीणाम बहुत वीभत्स भइल आउर अंतिम बेला थक हार के बुद्ध के शरण ले लिहलें।

मगध के सम्राट अशोक भी शांति के स्थापना खातिर स्त्रियन के सामने आपन अस्त्र डार देहलें आऊर  सेना के सामने आपन अस्त्र डालके युद्ध रोके के  घोषणा कइलें। अंतिम में जाके बुद्ध के शरण में भिक्षु बनके जीवन यापन कइले। ओही जा से  वैचारिक क्रांति के विगुल बजल। अशोक  गौतम बुध के सिखावल राह पर चल के पूरा विश्व के  सत्य, अहिंसा, प्रेम आदि पंचशील के सिद्धांत के संदेश पहुंचइले। विश्व के कोना-कोना में जाईके  सबके  एक ही मूल मंत्र दिहले। प्रेम, दया, सेवा, के साथ लेई  विश्व में नव जागृति के संचार कइले।

विश्व के इतिहास उठा के देखीं। प्राचीन काल से लेके देवता युग में भी कहल गइल बा कि जवना  घर में सब भाई मिलके प्रेम भाव से रहेले, ओही घर में शांति आ संपन्नता के वास होला।  जेकरे अंदर  संतोष ना बा, लूटपाट आ उत्पात ही करेला त होला महाभारत के युद्ध। तब का भइल ? एगो सभ्यता के समूल नाश हो गइल।  रावण के अत्याचार के परिणाम लंका दहन भइल, कुल मिला के निष्कर्ष के रूप में इहे कहे के बा –

युद्ध  शक्ति के स्थापना नाही नाश मात्र बा।

युद्ध विकास के आधार नाही विनाश मात्र बा।

अगर ई युद्ध नाही रुकल त एक दिन अइसन आई कि सागरो दुनिया के समूल नास हो जाई।

बुद्ध के मन में धारण करीं, शुद्ध बनी।

 


india-against-war.jpg

Hum BhojpuriaMay 6, 20221min680

किरण सिंह

अभी कोरोना के कहर से आदमी सम्हरल ना कि  ई दू देसन (रूस आ युक्रेन) के बीच में लड़ाई छिड़ गइल। इ त सभे जानेला कि जंग छिड़ गइला के बाद जीत भले बरियार के हो जाई बाकिर नुकसान अबरा के त होखबे करेला बरियरो के कम ना होखेला। आज दुनिया जतना आगे बढ़ गइल बा लोग तनिको सबुर से काम ली त आरामे आराम बा, बाकिर केकरा के समझावल जाव, सभे लोग त अपने स्वारथ आ अहंकार के तुष्ट करे में लागल बा। अब दू देशो के बीच में लड़ाई भइल त दूगो लोगे नू एकर फैसला कइलस। तनिको दूनो मे से केहुओ अकिल से काम लेले रहित त इ लड़इये ना भइल रहित। एने रूस के राष्ट्रपति पुतिन अपना के जांबाज बुझत रहले ह त युक्रेन के राष्ट्रपति जेलेंस्की भी ना डेरइले आ अपना देश के जनता के मन में देशभक्ति के भाव जगा के अपना देश यूक्रेन के हीरो बन गइले।

बात अतने रहे कि रूस बड़ भाई होखे के नाते यूक्रेन के अलगा होखला के बादो उनका पर नज़र राखल ना छोड़ले। मतलब कि रूस के राष्ट्रपति पुतिन नइखन चाहत कि यूक्रेन नाटो के सदस्य बनस। काहे कि उनको त डर बा नू कि कहीं अमेरिका आ अउरी युरोपीयन देश युक्रेन के आपन खुफिया अड्डा मत बना लेवे। ए तरे सोचल जाव त अपना हिसाब से रूसो के कदम सहिये बा।
बाकिर एगो त बात बड़ले नू बा कि अबर होखे चाहे दूबर केहू के घर में केहू ढूकी त ओकरा के भगावे खातिर त हथियार उठावहीं के पड़ी, अगर स्वाभिमान आ देशभक्ति के नज़र से देखल जाई त युक्रेन के राष्ट्रपति सहिये कदम उठवले।

एगो छोट क्लास में कथा पढ़ले रहनी कि एगो हती मूकी चिउंटी बड़का हाथी के सूढ़े में अमा के उनका के तंग क देहलस। अभिये टीवी पर न्यूज देखत रहनी ह कि रूसी सेना कीव के तीन तरफ़ से घेर लिहले बा बाकिर यूक्रेन आर्मी के जवान अउरी उहाँ के जनता जगह-जगह घात लगा के रूसी सेना के काफिला के तहस-नहस क के मुश्किल में डाल देले बा। ई बात अगर पुतिन बूझ गइल रहते त आज ना उनकर सैनिक माराइल रहित आ ना यूक्रेन तबाह भइल रहित।

एही खातिर नू शान्ति के पाठ पढ़ावल जाला। ना बुझाय त रामायण आ महाभारत ग्रन्थे उठा के देख लीहल जाय कि रामो जी युद्ध से पहिले शांति दूत भेजले रहले आ जब रावण ना मनले त उनकर सोना के लंका जर के राख हो गइल। एही तरे कृष्ण जी भी खूब समझवले बाकिर मति हीन दुर्योधन के ना बुझाइल आ राज के संगे आपन मये खानदान लड़ाई के हवन कुण्ड में झोंक के स्वाहा क देहले।

आज सुने में आइल ह कि भारत, फ्रांस आ अउरी देश के बीचवान पड़ला के बाद युक्रेन के राष्ट्रपति जेलेंस्की रूस से वार्ता करे के तैयार हो गइल बाड़े। हमनी के त भगवान से इहे प्रार्थना करतानी जा कि हे भगवान अबो से इ लड़इया रुक जाव, काहे कि इ लड़ाई में त दूनो देश बर्बाद होते बा बाकिर ओकरा से जुड़ल अउरीयो देश कम ना परेशानी में पड़ल।

यूक्रेन में पढ़े गइल लइका लोग के कतना परेशानी भइल इ त उहे जान तारे। उ त भला होखे मोदी जी के कि सही बेरा पर फैसला लेके लइका लोगन के निकलववले।

यूक्रेन से आइल एगो स्टूडेंट से हम पूछनी कि “काहे ना तहन लोग पहिलहियें आ गइल ह लोग?” त उ कहले कि “का कहीं हमनी के त डेरवावल जात रहे कि गइलs लोग त तहन लोग के फेल क दियाई।” खैर जान बची त लाखोपाये।

अब देखीं कि मोदी जी सांचों ऊ लइका लोगन के डिग्री दियवावतानी आ कि खाली सान्त्वना देवे खातिर कहतानी इ त समये बताई। ए तरी हमनी के मोदी जी से पूरा उम्मीद बा।
फिलहाल त भगवान से हमनी के इहे बिनती करीं जा कि लड़ाई रुक जाव।


2022_1image_14_19_468592701economy-ll.jpg

Hum BhojpuriaMay 6, 20221min630

राजेश पाण्डेय

मन धक् से हो गल बा युद्ध के नाम सुनते
कब ले चली दुनिया में ये आपसी वर्चस्व के लड़ाई”

रूस यूक्रेन युद्ध के कई गो आयाम बा। इ युद्ध बाघ बकरी के बीच होत बा। एक ओर महाशक्ति तऽ दूसरा ओर यूक्रेन जइसन नवहीं देश बा, फेर युद्ध काहे भइल। एकरा पर विचार करे के परी कि रूस-अमेरिका-यूक्रेन-भारत अउर पूरा संसार एकरा से प्रभावित बा।

बाकिर प्रसिद्ध गीतकार साहिर लुधियानवी कहले बाड़े कि ए शरीफ इंसानों जंग टलती रहे तो बेहतर है”। जंग किसी मसले का हल नहीं क्योंकि जंग खुद में एक मसला है। हमनी के पूर्व प्रधानमंत्री अटल बिहारी बाजपेई कहले बानी कि मित्र बदलल जा सकऽता बाकीर पड़ोसी नइखे बदलल जा सकत। एह बात के यूक्रेन अउर रूस दूनो देश के समझे के परी।

कोरोना के बाद रूस-यूक्रेन युद्ध पूरा विश्व के एक बार फेर दर्द, पीड़ा देले बा। यूक्रेन यूरोप के दूसरा सबसे बड़ा देश बा, एकर क्षेत्रफल छह लाख बीस हजार किलोमीटर बा। एकर राजधानी कीव शहर हऽ। इहाँ के जनसंख्या चार करोड सत्तर लाख बा। इहां के लोग बड़ा भावुक अउर दयालु होला। इहां खेती खूब कइल जाला इहे कारण बा कि पूरा यूरोप के ई गेंहू के आपूर्ति करेला। यूक्रेन के ब्रेड के टोकरी कहल जाला। सूरजमुखी खाद्य तेल के बहुत बड़ा निर्यातक देश हवे। कई गो देशन के हजारों छात्र इहां पढ़ाई करेले। प्राकृतिक रूप से बहुत सुन्दर देश बा।

रूस काहे आक्रमण कलस

रूस के एह बात के डर बा कि हमरा पड़ोस में अमेरिका आ नाटो सैनिक संगठन आ के बइठ जाई। बाकिर एह युद्ध के सान-गुमान ढेर समय पहिले से बा। 1991 में सोवियत संघ के विघटन के बाद यूक्रेन में ढेर परमाणु हथियार के जखीरा रहे, जेकरा के रूस-अमेरिका, ब्रिटेन कूटनीति से नष्ट करवा देहले अउर वादा कइले कि यूक्रेन के हमनी रक्षा करब।

सोवियत रूस के विघटन के बाद नवहीं देशन में संघर्ष आंदोलन से कौनो नेता ना उपजले। इ नेता लोग प्रशासनिक अधिकारी रहल बा। इ देश संप्रभुता, लोकतंत्र, राष्ट्रीयता, अंतर्राष्ट्रीय संबंध आ  कूटनीति समझले बिना ही स्वतंत्र देश बन गइल बा। यूक्रेन पर रूस के हमला 2014 में क्रीमिया पर हमला के विस्तार बा। बाकिर ओकरा से पहिले चलल जाव तऽ 2008 में बुखारेस्ट सम्मेलन में कई गो कारण से जॉर्जिया पर हमला भइल। जॉर्जिया के खंडित करे के साथे रूसी राष्ट्रपति पुतिन स्पष्ट कर देले कि रूस नाटो के घेराबंदी बर्दाश्त ना करीऽ।

दूसरा विश्व युद्ध के बाद संसार अमेरिका अउर सोवियत संघ के बीच शीत युद्ध में फस गइल। एह समय अमेरिका सोवियत संघ के घेरे खातिर नाटो नाम से सैन्य-संगठन बनवलस। एकरा जवाब में सोवियत संघ वारसा पैक्ट बनवलस। सोवियत संघ के टूटला के बाद वारसा पैक्ट समाप्त हो गइल जबकि नाटो के विस्तार लगातार होत गइल। नाटो के ई घेराबंदी के विरोध रूस 1997 से ही लगातार विभिन्न प्रकार के अंतरराष्ट्रीय मंच पर करत बा।

रूसी क्रांति के जनक लेनिन पहिले कहले रहले कि रूस खातिर यूक्रेन के गंवावल ठीक ओइसने बा जइसे शरीर से एगो हिस्सा के अलग कऽ दिहल जाव। कई तरह से प्राकृतिक संसाधन के अधिकता से यूक्रेन रूस खातिर काफी महत्वपूर्ण बा। यदि यूक्रेन नाटो के सदस्य हो जाई तऽ रूस पूरा तरीका से विरोधी ताकतन से घेरा जाई, अउर यूक्रेन से मास्को के दूरी 600 किलोमीटर रह जाई।

केहू के संपत्ति गल केहू के पढ़ाई गइल
गजबे के फैसला रूस-यूक्रेन अमेरिका के बीच भ
1991 के बाद ऊ लवटल बा ओकरा का मालूम कि दुनिया के केतना लोर समुंदर में जियान भइल

रूस में बसल मूल रूप से सीवान,बिहार के रहे वाला डॉ अभय कुमार सिंह के कहनाम बा कि रूस के संप्रभुता खातिर यूक्रेन के धरती के दुरुपयोग हो ताऽ, एकरा के रूस कबो बर्दास्त ना करी। यूक्रेन के उकसावे, भड़कावे के पीछे अमेरिका आ कुछ यूरोपीय देशन के हाथ बा जवन ठीक नइखे, रूस आपन सुरक्षा खातिर कवनो कीमत चुकावे के तैयार बा।

रूस-भारत-यूक्रेन संबंध

संयुक्त राष्ट्र अमेरिकी तंत्र के छाता ओढ़ले बा ।
असलियत के सीत घाम से मुंह चुरवले बा।।

1991 के बाद यूक्रेन के स्वतंत्र राष्ट्र बनला पर भारत उ पहिला देश रहे जवन उहाँ आपन दूतावास खोललस। बाकिर यूक्रेन अंतरराष्ट्रीय मंच पर कबो भारत के साथ ना देहलस, चाहे उ कश्मीर के मामला हो, परमाणु परीक्षण के हो आ सुरक्षा परिषद में स्थाई सदस्यता के बात हो। तबो भारत के कहना बा कि हम वसुधैव कुटुंबकम में विश्वास करे वाला राष्ट्र बानी, सर्वे भवन्तु सुखिनः हमनी के ध्येय हऽ।

भारत हमेशा से कहत रहल बा कि युद्ध से समस्या के समाधान ना होई, बलूक आपसी बातचीत से समस्या के समाधान होई। ओही जा भारत आपन सैन्य संगठन के आधा हिस्सा रूस से प्राप्त करेला। रूस भारत के एगो भरोसेमंद सहयोगी हवे। हमनी के 1971 के लड़ाई में रूस खूब मदद कइले रहे, आपन सातवां बेड़ा सहायता में भेजले रहे। रूस हमेशा से भारत के कश्मीर नीति, आतंकवाद विरोधी नीति समेत कई गो मसला पर अंतरराष्ट्रीय मंच पर सहयोग व समर्थन करेला। हमनी के ईहो ना भुलाए के चाहीं कि जब सोवियत संघ 1956 में हंगरी पर हमला कइलस तब संयुक्त राष्ट्र में नेहरू जी तटस्थ रहनी।

भारत अगर रूस के विरोध करता त अपना पड़ोस में चीन-पाकिस्तान- रूस के गठबंधन मजबूत होत देखे के परी, अउर पाकिस्तान आ चीन भारत विरोधी काम करीहे सन। हमनी के अपील करते रहे के बा कि युद्ध खत्म होखे के चाही। भारत संयुक्त राष्ट्र में रूस के खिलाफ आइल प्रस्ताव पर मतदान के समय तटस्थ रहल बा।

याद रहे के चाहीं कि जब सोवियत संघ के विघटन भइल तब अमेरिकी मीडिया कहले रहे कि  अंतरराष्ट्रीय स्तर पर भारत अनाथ हो गइल।

अमेरिका लगातार पिछला 50 वर्ष से पाकिस्तान के सैन्य-संसाधन से मदद करत रहल बा। जब अमेरिका में 2001 में 9/11 के घटना भइल तब उ भारत के बात पर ध्यान देबे लागल। रूस यूक्रेन संकट में रूस से चीन के नजदीकी हमार चिंता के विषय बा। रूस के चीन पर बहुत आर्थिक निर्भरता चीन के बरियार बनावत बा। एह समय में भारत के रूस से पुराना दोस्ती के याद दिलावत रहे के बा।

ओकरा संगे रहे के परी, बाकिर विश्व के सबसे बड़ा लोकतंत्र भइला से हमरा ऊपर मानवीय जिम्मेदारी बा कि हमनी के युद्ध के कइसे रोकी। बेघर पलायन करत जनता के कइसे बचावल जाव। हमनी के 20000 छात्र मेडिकल के पढ़ाई यूक्रेन में कर रहल बाडे, लइकन के पढ़ाई बीच में लटक गइल बा। भारत के दुविधा के बारे में पूरा संसार समझ रहल बा। बाकिर भारत के भी आपन निर्भरता दूसरा देसन पर जरूर कम करे के चाहीं।

अमेरिका के स्थिति

संयुक्त राष्ट्र के पोखरा में जलकुंभी छपले बा
देख यूक्रेन ही में परछाई आपन”।

अफगानिस्तान से जब अमेरिकी सेना जात रहे तऽ इ अनुमान लगावल कठिन रहे कि अब विश्व राजनीति में का होई। बाकिर एही बात के रूस के इंतजार रहे अउर रूस यूक्रेन पर हमला करे खातिर अपन तैयारी करे लागल।

पूरा दुनिया के लागल कि जवन महाशक्ति अफगानिस्तान के ना बचवलस ऊ यूक्रेन पर काऽ करी। हमनी के याद रहे के चाहीं कि अमेरिका काहे वियतनाम, इराक, लीबिया पर हमला कइलस। आपन पड़ोसी देश ग्वाटेमाला व होडुरास पर एह खातिर हमला कइलस कि साम्यवाद ओकरा दरवाजा तक पहुंच गइल बा।

यूक्रेन के उकसावा में अमेरिका के हाथ बा काहे कि ओकरा अपना शक्ति के वैश्विक पुनर्स्थापना करे खातिर एगो खलनायक के आवश्यकता रहे, जवन पुतिन के रूप में प्राप्त हो गइल बा जवन एक समय में फिडेल कास्त्रो अउर लादेन में अमेरिका देखत रहे। अमेरिका के अगर यूक्रेन के ना बचावे के रहे त पहिले ही रूस से कवनो समझौता कर लेवे के चाहत रहे, फेर यूक्रेन के बलि के बकरा काहे बनावल गइल। महाशक्तियन के आपसी भय के आशंका में यूक्रेन के बर्बाद कर दिहल गइल।

बाकिर अमेरिका के वैश्विक महत्वाकांक्षा बा जबकि उनकर यूरोपीय दोस्त देश के क्षेत्रीय महत्वाकांक्षा बा, अइसे में अमेरिका अपना रणनीति के लेके अपने आप में विभाजित बा। ओकर चाहत बा कि हमार दोस्त देश एशिया पेसिफिक राजनीति में भी भाग ले, बाकिर ऊ लोग अइसन नइखे चाहत।

अमेरिका आ यूरोपीय देश रूस पर प्रतिबंध लगवले बाड़े बाकिर पेट्रोलियम पदार्थ पर प्रतिबंध नइखे लागल, काहे कि पूरा यूरोप में 40% तेल की आपूर्ति रूस करेला। अमेरिका फिलहाल शान्त बा, बाकिर उ जरूर कवनो न कवनो रणनीति बनाई अउर एक बार फेर पूरा विश्व के एगो अलग तरह के तनाव देखे के जरूर मिली।

परमाणु हमला आ तीसरा विश्व युद्ध

गजबे उल्टा भल बा ई दुनिया के सियासत में।
जहां बस चोर एगो बा आ चालीस गो अली बाबा”।।

रूस यूक्रेन युद्ध में एह बात के आशंका बहुत कम बा कि परमाणु हमला होई आ पूरा विश्व दू गो गुट में बंट जाई। काहे कि अमेरिका आ रूस आपन गलतफहमी दूर करे खातिर सैन्य सूचना के आदान प्रदान कर सकऽ ता लोग। एकर प्रयोग सीरिया में 2015 से अमेरिका आ रूस कर रहल बा। बाकिर पुतिन अपना परमाणु हथियार के चौकन्ना कर देले बाड़े। अमेरिका शान्त बा, एसे कम संभावना बा आ नईखे। ज्यादा से ज्यादा ई होई कि पुतीन अपना अभियान में माल्डोवा तक बढ़ सकतऽ बाडे। अउर अच्छी तरह से यूक्रेन के सीमा के तीनों ओर से किलाबंदी कर दिहें।

युद्ध के बाद सभे हो जाई भाई भाई बाकिर करा में जे परी ओकर हो जाई कुटाई


images-111.jpg

Hum BhojpuriaMay 6, 20221min560

गणेश दत्त पाठक

रूस यूक्रेन जंग के जंग शुरू भइले काफी दिन हो गइल लेकिन अभी जंग खतम होखे के कौनो संकेत दिखाई नइखे देत। लेकिन रूस आ यूक्रेन जइसन लोकतांत्रिक देसन के बीच जंग कई सवाल खड़ा जरूर करत बा?  आमतौर पर मानल जाला कि आम जनता कबो जंग ना चाहेले। त आम जनता के विचार से अलग सत्ता में बइठल लोग ई फैसला कइसे ले लिहल?  रूस के राष्ट्र के सुरक्षा अवरी यूक्रेन के संप्रभुता खातिर बातचीत त कईले जा सकत रहे। नाटो देसन में त लोकतांत्रिक सरकार बाटे सब, त कइसे रूस अवरी यूक्रेन विवाद के आउर हवा दिहल गइल? बड़का सवाल ई खड़ा होता कि का पश्चिम देसन में लोकतंत्र खोखलापन के शिकार हो गइल बा?

कबो संविधान बनावे खातिर अयोग्य मानल गइल भारत में लोकतंत्र होता परिपक्व

तनी याद करी, ब्रिटिश हुकूमत के समय, जब भारतीय लोग के संविधान बनावे के लायक ना समझल गइल। लेकिन आज भारतीय लोग के बनावल संविधान समय के कसौटी पर खरा उतर रहल बा। कुछ दिन पहिले के बात ह़ जब अमेरिका के राष्ट्रपति के चुनाव के बाद सत्ता के बदलला पर केतना हंगामा मचल रहे। लेकिन भारत में ढेर सारा कमी के बावजूद चुनाव बाद सत्ता के बदलला पर कवनो असर न पडेला।

बो अंग्रेजन द्वारा सभ्यता सिखावे के बात कल जाव

एगो दौर उहो रहे जब बड़हन अंग्रेज कवि रूड यार्ड किपलिंग 4 फरवरी 1899 के टाइम्स ऑफ लंदन में छपल आपन कविता में भारतीय सभ्यता के लोगन के सिखावे खातिर ज्ञान बखारत रहले। उनकरे देश ब्रिटेन जौन नाटो के सदस्य ह दो लोकतांत्रिक देश के बीच जंग रोके खातिर कौनो कोशिश ना कइलस।

डेमोक्रेटिक इंडेक्स में भारत कनाडा से पीछे बा, फेर..

वर्ल्ड इकोनॉमिक इंटेलिजेंस द्वारा हर साल जारी होखे वाला डेमोक्रेटिक इंडेक्स में कनाडा से नीचे भारत बा। लेकिन कुछ दिन पहिले जब कनाडा में ट्रक वाला हड़ताल कर देहल त उहाँ इमरजेंसी लाग गइल। जबकि भारत में किसान लोग एक साल हड़ताल कइल तब सरकार ऊ लोग के बात मान लेहलस। ई कनाडा भी नाटो के सदस्य ह लेकिन जंग रोके खातिर कौनो प्रयास ना कइलस।

आखिर काहे लोकतांत्रिक देसन में संजम अवरी बातचीत के तरजीह नखे दियात

जंग के दौर में लोकतांत्रिक राष्ट्र तबाह होते बा, रूस पर भी प्रतिबंध से आम जनता परेशान हो रहल बा। जंग के दौर में काहे लोकतांत्रिक देसन के सत्ताधारी लोग बातचीत नइखे करत, संजम नइखे रखत। का ई बात आम जनता के विचार से मिलता? त का एकरा के लोकतांत्रिक खोखलापन के हकीकत नइखे मानल जा सकत?

लोकतांत्रिक देसन के पहिला लक्ष्य जनता के जंग से रक्षा बा

लोकतांत्रिक मर्यादा विवाद सलटावे के आधार होला। लोकतंत्र जनता के अधिक से अधिक कल्याण से संबंधित होला न कि विनाश के आमंत्रण से। लोकतांत्रिक देसन के पहिला लक्ष्य जंग से जनता के सुरक्षा ही होखेला। रूस यूक्रेन जंग के शुरू भइला से पहिले जेगा अंतराष्ट्रीय घटनाक्रम तैयार भइल तिसरका विश्वयुद्ध के संकेत मिले लगल। यदि तिसरका विश्वयुद्ध शुरू हो जाई त ई लोकतांत्रिक देसन के बड़का असफलता ही मनाई।

लोकतांत्रिक कलेवर ना भइला से विश्व के कई गो संस्था भी आपन जोरदार भूमिका नइखे निभा पावत

हाल में विश्व के आर्थिक आ सामाजिक बेहतरी आ शांति खातिर बनल, विश्व बैंक, अंतर्राष्ट्रीय मुद्रा कोष, विश्व व्यापार संगठन, संयुक्त राष्ट्र संघ आदि वैश्विक संस्था सब आपन जोरदार भूमिका नइखे निभा पावत। कारण ई बा कि ई सब संस्था के स्वरूप आ संरचना में लोकतांत्रिक तत्व के कमी बा। यदि ई सब संस्था के लोकतांत्रिक बना दिहल जाव त विश्व स्तर पर विकास आ शांति के समुंदर बहे लागी।

लोकतांत्रिक व्यवस्था में संजम अवरी बात चीत के विशेष भूमिका होखेला। लोकतांत्रिक राष्ट्र में सत्ता पर बइठल लोग के ई कर्तव्य बा कि आम जनता के मन के भाव को समझल जाव आ ओकरा अनुसार निर्णय लीहल जाव। जंग के कबो आम जनता पसंद ना करेले। जंग लोकतांत्रिक देसन के खोखलापन के ही उजागर करेला। संजम ओरी बातचीत से ही विश्व में शांति आ सुकून के बयार बह सकेला।


horse.jpg

Hum BhojpuriaMarch 21, 20224min1900

प्रकाश उदय

॥ सुनला प लागे कि सुनत जवन बानीं तवन केहू से कहियो कुछ सुनले कहीँ बानीं त अहोभाग, लागे कि सुनले जवन बानीं तवन एहू से सुनिए के मानीं, अबकियो, एजुगियो, त अहोअहोभाग… ॥

बादशाहूदीन बादशा के बादशाही में जहाँ कहऽ तहाँ, जतना कहऽ ततना, अमन कहऽ अमन, चैन कहऽ चैन। बादशाहूदीन बादशा जेके चाहें कि डेराय, का मजाल कि ऊ ना डेराय ; जेके चाहें कि ना डेराय, का मजाल कि ऊ डेराय।

त एक दिन के बात कि बादशाहूदीन बादशा के मन में आइल कि अहेर करे जाईं। कहला के कवन कहे, चहला के देर, कि मंत्री-संत्री सब तइयार, फौज-फाटा सब तइयार। बादशा से पुछाइल कि नया जंगल बनावल जाय, नया जनावर जुटावल जाय कि पुरनके से काम चलावल जाय ? बादशा अपना एक अँगुरी में धइलन कि नया जंगल बनावल जाय, नया जनावर जुटावल जाय, एक अँगुरी में धइलन कि पुरनके से काम चलावल जाय आ जिन्ह पुछले रहन कि नया जंगल बनावल जाय, नया जनावर जुटावल जाय कि पुरनके से काम चलावल जाय, उनुके के अँगुरी धरवलन। ऊ आँख मून के जवन अँगुरी धइलन, तवना से पता चलल कि नया जंगल बनावल जाय, नया जनावर जुटावल जाय।

त मंत्री-संत्री कहलन कि ठीक बा सरकार, दस-बिस साल देल जाय, दस-बिस लाख दियावल जाय, कि नया बनावल जाय, नया जुटावल जाय। बादशा अपना खजाना में झँकले त दस-बिस लाख त एहू सनूक में, ओहू सनूक में, दस-बिस साल ना एह सनूक में ना ओह सनूक में। त बादशा ओह दस-बिस-साल-लगवइया, दस-बिस-लाख-लगवइया अँगुरी के धरवइया के दस-बिस कोड़ा के सजाय तजबीज कइले आ अबकी जब अँगुरी धरवले त बताऽ के कि कवना अँगुरी में नया बनावल जाय, नया जुटावल जाय, कवना अँगुरी में पुरनके से काम चलावल जाय। त आँख खोल के अबकी जवन अँगुरी धरवइया धइलन तवना से पता चलल कि पुरनके से काम चलावल जाय। बादशा अबकी उनुका के दस-बिस लाख के इनाम-इकराम तजबिजले आ अहेर करे चल दिहले, बिना ई बतवले कि पहिले कवन दिआय, दस-बिस कोड़ा के सजाय, कि दस-बिस लाख के इनाम-इकराम। देनिहार कहले कि पहिले दस में बीस जोड़ के सजाय देब, तब बीस में से दस घटाऽ के इनाम। लेनिहार कहले कि पहिले दस में बीस जोड़ के इनाम लेब, तब बीस में से दस घटाऽ के सजाय। देनिहार कहले कि फोकट में ? लेनिहार कहले कि अँइसे कइसे कि फोकट में, हमार कवनो ईमान-धरम नइखे ?! दूनो जना अपना-अपना फेंटा में से आपन-आपन ईमान आ आपन-आपन धरम निकलले आ मोल-भाव में लगले।

ओने अहेर में, राजा आगा-आगा, फौज-फाटा पाछा-पाछा, जंगल के जनावर सब आड़ा-अलोता। एक दिन बीतल, दुसरको दिन बीतल, तिसरको बीतल। तरकस में धइल-धइल तीरलोग लागल मुर्छाय, मियान में धइल-धइल तरुआरलोग लागल मुर्चाय। ई मुर्चाइल जब खुदा मियाँ से ना सहाइल त आड़ा-अलोता लुकाइल एगो हरिना के हर लेले मति। नया-नया जवान भइल हरिना चौकड़िया मारे खातिर लागल छेरिआय। बाप-मतारी समझवले, भालू-बाघ से डँटववले, ना मानल, बीच राह में मारे लागल चौकड़िया। बादशा के नजर परल, घोड़ा धउराऽ देले। बादशा के बरोबरी भला फौज-फाटा कइसे करी, जतने राजा पीछा करत जायँ, ततने फौज-फाटा पिछुआइल जाय। कोस भर गइले राजा, तले मामा सियार के सलाह से, दोसर एगो हरिना अपना के दहिने लउकाऽ देलस। दहिनवारा के पाछा कोस भ धउरले राजा, तले तीसर एगो हरिना अपना के बाँए लउकाऽ देलस, बँयवारा के पाछा राजा कोस भ धउरले तले चउथा एगो दहिने, ओकरा देने कोस भ धउरले तले पँचवा एगो बाँए। त धउरत-धावत घोड़ा मने-मने कहले कि परवरदिगार ! भूले से, भटके से, कवनो जो पछिला जनम में, हम रहुँईं बादशा आ ई रहुए घोड़ा, त आज, एकरा के, जतना मन ओतना भगावे द, हमरा के भागे द, बाकिर, ना रहे पहिले जो अइसन, त भूले से, भटके से, कवनो जो अगिला जनम में, हम होईं बादशा आ ई होय घोड़ा, त अपने तू रहिहऽ भा हो जइहऽ गायब, बाकिर, भगावे भ, भागे भ जंगल त कम-से-कम, रखिहऽ तू कायम !

बादशा पसेने-पसेन, घोड़ा फेने-फेन। फौज-फाटा के कहीं अता-पता ना। हरिना — पहिलको, दुसरको, तिसरको, चउथको, पँचवो — हेन्ने गइले कि होन्ने गइले, का पता केन्ने गइले ! अब त बदशहवो से, घोड़वो से, भूख कहे कि हम्हीं हतब, पियास कहे कि हम्हीं ! रस्ता कहे कि हम मिलबे ना करब। बाकिर जब केहू ना, कुछुओ ना आवे काम, तब जे कामे आवे ऊहे अल्लाह, ऊहे भगवान। ऊ बाघ बन के अइले आ रस्ता देखइले। ओहर बाघ लउकले, एहर घोड़ा बिदक के चलले भाग। एह भगला में बादशा के बड़ी बेइज्ती रहे, बाकिर एक त कि केहू एह भगला के देखवइया ना, दोसरे कि बादशा अपने त भागत ना रहन, भागत त रहे घोड़ा, आ तिसरे कि भगला में राह-रस्ता मिलत गइल आप से आप, आ चउथे आ पँचवे कि भूख बिलाऽ गइल, पियास हेराऽ गइल।

भला भइल कि ए भगला में जंगल छूट गइल। जब दुचार कोस छूट गइल त घोड़ा के भहराइल बादशा देखले, बादशा के भहराइल घोड़ा देखले, तीसर केहू ना देखल। जले बेहोश रहल गइल तले बेहोश रहल लोग, जब ना रहल गइल त आपन भूख-पियास के लेले-देले ठाढ़ भइल लोग। ठाढ़ भइला के बाद जले घोड़ा चरत रहले, बादशा हहरत रहले। हहरत-डहात, मने-मने कहले कि परवरदिगार ! भूले से, भटके से, कवनो जो पछिला जनम में, हम रहुँईं घोड़ा आ ई रहुए बादशा, त आज, एकरा के, जतना मन ओतना चरे द, हमरा के हहरे द, बाकिर, ना रहे पहिले जो अइसन, त भूले से, भटके से, कवनो जो अगिला जनम में, हम होईं घोड़ा आ ई होय बादशा, त अपने तू रहिहऽ भा हो जइहऽ गायब, बाकिर, चरे भ, हहरे भ हरियरी त कम-से-कम, रखिहऽ तू कायम !

त जवन परवरदिगार घोड़ा के घास लहववले ऊहे परवरदिगार बादशा के देखवले कि दूर दक्खिन देने धुँआ उठत बा। केहू त मिली उहाँ, ईहे सोचत, आ केहू त मिले उहाँ, ईहे मनावत बादशा जब उहँवा पहुँचले त पवले कि एगो खेत बा, खेत के आर बा, खेत में सुस्तात दुगो बैल बा आ आर प सुस्तात एगो बंदा हरवाह बा। घइला में पानी बा आ खाय के तइयारी बा आ चिलम प चढ़े खातिर आग धुँआत बा। पानी देखते पियास बुझाइल कि बादशा के उठाऽ के पटक दी, रोटी देखते भूख बुझाइल कि सँउसे बादशाही गटक ली। चहले कि माँगीं त माँगे ना आइल, चहले कि हाथ पसारीं त हाथो पसारे ना आइल। बादशा के पहिला बेर बुझाइल कि मदरसा के उस्तादलोग उनुका के जवन पढ़ावल, जवन सिखावल तवन सब कुछ अनेर, कूड़ा के ढेर। घोड़वा देखलस त हींक भ हँसल हिनहिनाऽ के कि कइसन कुपातर करमहीन बदशहवा ई सरवा कि एकरा माँगहूँ के लूर ना, हाथो पसारे के सहूर ना। अघाइल घोड़ा के हिनहिनात हँसी भुखाइल बादशा के सहले ना सहाइल। मारे खीस के एँड़ी से मूँड़ी ले कँपकँपात, मारे पित्त के भितरी से बहरी ले पितपितात, जनाइल जे पछाड़ खा के, पिछवड़िए, अब गिरले, तब गिरले, तले अइसन बड़का अगमजानी ऊ बंदा हरवाह कि धउरल आ गिरत बादशा के अँकवारी में ध के खेत के आर प बइठाऽ देलस। बइठाऽ के, अइसन बड़का बैद ऊ बंदा हरवाह, कि ना नाड़ी प अँगुरी धइलस ना लिलार प तरहत्थी, आ बिना कुछ बतवले बूझ गइल कि बेरमिता के कवन बेरामी, आ तवना बेरामी के कँउची दवाई। अधध सेर के दूगो बजरा के रोटी में से एगो उठवलस आ चुटकी भ नून में से चुटकी भ नून आ आठ परत पियाज में से चार परत पियाज के साथे बेरमिता बेचारा के हाथ में दवाई के पहिला खोराक बनाऽ के धइ देलस कि ए बाबू खा ल, राम चहिहें त राम हो जाई — मुँह में रखते, चहु त परते, कंठ से उतरते। बादशा के उस्तादलोग में से केहू ना सिखवले रहे रोटी के हाथ प राख के, नून में बोर के, पियाज के दाँते से काट के खाय के, बाकिर का, कि खइले त खवाऽ गइल,  मेटा में मुँह लगा के जब पियले पानी त पियाऽ गइल, आ इहाँ तक कि दवाई के दोसरका खोराक त बिना बैद बंदा हरवाह के दिहले, अपने से उठाऽ के अइसन चापुर-चापुर चबा के खाय उनुका आ गइल कि ओह चपर-चपर-चापुर-चपुरहट के सुन के बंदा हरवाह त बंदा हरवाह, घोड़वो के मिजाज गनगनाऽ गइल।

बजरा के अधध सेर के एक-प-एक दू-दू गो सँउसे-सँउसे रोटी खइला आ मेटा भर पानी घेंटा भर पियला के बाद बादशा देह झार के ठाढ़ भइले, सके भर मुँह बा के ढेंकरले आ ढेंकरले त अपना एह ढेंकरला में उनुका साज-संगीत के सकल सुर-ताल-झनकार एक्के साथे सुनाइल। तवना के बाद जब भर नजर दुनिया-संसार-ओर तकले त पवले कि ई एगो नवके दुनिया, नवके संसार। चहचह-महमह-गहगह। बाकिर, एही झोंक में जब ऊ बंदा हरवाह के देखले त पवले कि ऊ त माथे हाथ हाथे गाल ध के बइठल बाड़े। पुछले कि ए भाई, का बात, कवन अइसन आफत, कवन अइसन बीपत, हमरा से बतावऽ, हम बादशाहूदीन बादशाह, चाहीं त पल में पहाड़ दीं ढाह, चाहीं त पल में पहाड़ करीं खाढ़। त कहले बंदा हरवाह कि भुक्खड़ तुनाहीं, दुन्नो-के-दुन्नो हमार रोटी भकोस गइलऽ, एक्को कवर हमरा खाती छोड़लऽ ना, अब गोहट के मारी, तोहार बाप कि मतारी ? त बादशा निकलले तरकस से तीर, मियान से तलवार, कि तू हमार पकिया इयार, बतावऽ कहँवा बा गोहट, तीर से मार के, तलवार से गुरिएगुरी काट के, पोरसा भर जमीन में गाड़े खातिर बानीं तइयार…। बंदा हरवाह हरान-हलकान कि ना आँख के देखल ना कान के सुनल अइसन कवनो बुड़बक-बउराह कि गोहट मारे खातिर तीर-तलवार लेके ठाढ़ ! सोचले कि ना एकर पगलेटई छोड़ाइब त एकरा बाप-मतारी के कवन मुँह देखाइब ! त कहले कि हे हो, हई नौटंकी के लाल-पियर कपड़ा उतारऽ, हा ल अँगौछी, करिहाँव में बान्हऽ, तीर-तलवार के फेंकऽ फरदाँवा, कुदारी उठावऽ आ हमरा पाछा-पाछा आवऽ…।

बादशा जब अचकन-पचकन जोड़ा-जामा जिरह-बखतर उतरले त जनले कि उघार देह के छू के जवन बहेला, तवन एगो दोसरे बयार। हहरल हियाव, हींक भ एह आ-हा-हा छुअहा बयार में नहइले। खाली गोड़े फिल्ली भर पाँकी-पानी में उतरले त अपना दरबार के गुलगुल गलइचा के मने-मने गाँज भ गरियवले। बंदा हरवाह पहिले त अपने गोहट मार के बतवले कि हँइसे, आ हँइसे ना हँइसे, तब कुदारी थम्हवले कि ल, लाग जा, गोड़ बचाऽ के, हाथ बढ़ा के…।

बादशा पहिला छेव मरले त छप से सुनाइल। अचंभा में पर गइले कि अइसन बाजा त आज ले देखलीं ना, अइसन बाजल त आज ले सुनलीं ना। त तन-मन दूनो लगाऽ के लगले बजावे। लगले बजावे त आर प बइठल बंदा हरवाह लगले गावे। सात दिन असहीं गावत-बजावत बीतल। बादशा अपना के हर-हेंगा खुरुपी-कुदार सब प अजमवले, सातो दिन दिन-दिन भ पसेने नहइले, साँझ-बिहान हचक के खइले आ अतना सराह के खइले ऊ अपना भउजाई के हाथ के बनावल कि उनुका के उनुकर भउजाई, बंदा बो हरवाहिन, सातो दिन एक रोटी अधिके खियवली, अपना सवांग से। आ तवना के बाद, खरहरे खटिया प सुतले त हाय हो राम, एक्के सुतान अनगुत्ते उठान !

बाकिर का, कि घोड़ा हलकान। सातो दिन पाँचो बखत घोड़ा के एक्के कहनाम कि या अल्लाह, भला कि हमरे के घोड़ा बनवलऽ, बदशहवे के बनवलऽ बदशाह ! सातो दिन पाँचो बखत घोड़ा के एक्के कहनाम कि परवरदिगार, जइसे बदशहवा के, हमरो के सरवा ई बंदा हरवहवा, अद-बद के हर में, हेंगवाही में कहियो मत नाधे !

घोड़वा देखलस कि बदशहवा के खेती-किसानी के सवख बढ़ियाइले जाता, बढ़ियाइले जाता बजरा के रोटी आ नीमक-पियाज से नाता, गहिराइले जाता बंदा-बादशाव के इयारी, त लागल साँझे-बिहाने दुपहरिए-अधरतिए हिनहिनाय। बादशा के बाकिर, ऊ हिनहिनाइल, ना साँझे-बिहाने सुनाइल, ना दुपहरिए-अधरतिए सुनाइल। ना सुनाइल, त सतवाँ दिने होत बिहाने जवन हिनहिनान घोड़ा हिनहिनइले तवना में उनुकर आपन हिनहिनाइले ना रहे खाली, ईहो रहे कि गोतिया-देयाद के हाथे बदशहवा के राज-पाट अब लुटाइल कि तब लुटाइल, ईहो रहे कि अलनिया बेगम हेन्ने ढिमिलाइल, फलनिया बेगम होन्ने ढिमिलाइल, कि मंत्री-संत्री सभकर ईमान अब बिकाइल कि तब बिकाइल !

त अबकी के हिनहिनाइल बादशा के कान से करेजा ले हेल के सुनाइल। कहले कि भाई हो बंदा हरवाह, इयारन के इयार, अब त हम रहे ना पाइब, जाइब। बंदा कहले कि भैवा रे, बोलवला से त आइल ना रहले त रोकला प रुकबे तें कइसे ! हम के आवे वाला के आइल रोके वाला, जाए वाला के जाइल रोके वाला ! अतने रहे कि रह-सह के जइते त बाल-बच्चन खातिर चूरा-चाउर कुछ लेले जइते…। ईहे बा कि ई कुल्ह त अइसन चीझ कि देह-जांगर जहँवे चलइबे तहँवे पइबे। कहले कि नाम तोर बादशा, से त ठीक, बाकिर ई ना कि नामे के नीचे जँताऽ जाय मनई। ई का कि नाम धराइल बा बादशा त अन-मन उन्हनिए-अस घूमल जाय घोड़ा प चढ़ के, फेंटा में बन्हले तलवार, पीठ प तरकस, हाथ में धनुही ! हमार बात मनबे, आ अरियात-बरियात में किराया प चलइबे ई घोड़ा, ई तीर-तरुआर, ई जोड़ा-जामा, त हमरा त बुझाता कि एहू से खाय भ कमइबे…।

बादशा मूँड़ी गोत के सब सिखवन सुनले। जात-जात कहले कि तब्बो ए साथी, कब्बो जो कवनो सकेता में परिहऽ त दिल्ली-ओर अइहऽ, केहू से पूछ लीहऽ नाँव, नून के सैरियत चुकावे के इचिको जो पून हम पाइब त माथे चढ़ाइब…। हँसले सुन के बंदा हरवाह कि मितवा, बुझाता कि नाम के घून तोरा भितरे ले घूस के बइठल बा, ना त तेहीं बताव कि नून त आइल बा समन्दर से, कवन कहीं कि हमरा अंदर से ! त सैरियत चुकावल जे चाहे से लंका-दुअरिका ले जाय, चुकावे। हमरा त पास, एह सात दिन के संगत प, तोरा खातिर बस एक्के गो चीझ — दुलार। लेबे त ले, आ जो। त कहले बादशा कि दे दें। त बंदा हरवाह उनुका पीठ प घोंय-घोंय धइले दुइ हाथ, ध के ऊहो डबडबइले, धरवाऽ के बादशाहो डबडबइले। घोड़ा बाकिर मउज में आ गइले। सोचले कि बदशहवा के पीठ प दुचार घोंय अवरू जब हो जाय, तब्बे अब इहँवा से आगे बढ़े डेग। खुदा मियां के घरे ना देर ना अन्हेर। बंदा हरवाह के हाथ-हरमुठाह के अगिला घोंय घोड़वा के अपने पीठ प आइल, आ दुसरका आइत, एकरा पहिलहिंए ऊ सामकरन घोड़, आन्ही से ले लिहले होड़…।

दिन बीतल दिने भ में, महीना के बीतत महीना भ लागल, साल भ लागल साल के बीते में, आ साले भ में ओह साल के बितला साल भ हो गइल। एकरा बादो, ना दिन आपन बीतल छोड़लस, ना महीना आपन, ना साल आपन। बाकिर, ना जानीं कि कतना दिन, कतना महीना, कतना साल के बाद एगो अइसन साल आइल जवना साल असाढ़-सावन त बरिसल भादो ना बरिसल। तवन साल बीतत-बीतत बीतल। अगिला साल असाढ़ त बरिसल, सावन-भादो ना बरिसल। तवन साल बितावत-बितावत बीतल। अगिला साल बाकिर, ना असाढ़-सावन बरिसल, ना सावन-भादो बरिसल। तवना साल दिन बीते तब त महीना बीते, महीना बीते तब त साल बीते ! बंदा हरवाह बैलन के खूँटा से खोल देले कि मनइन के त अपना घर-परिवार से बन्हाऽ के मुँअही के बा, तोनहन के त कम से कम, मूँए खातिर त कम से कम, छुट्टा मैदान मिले ! जात-जात बाकिर, दहिनवारा बैल कहले बँयवारा के सह पा के, कि बंदा बउराह, अपना इयरवा बदशहवा के भुला गइलऽ का कि का कहले रहे… कहले रहे कि कब्बो जो कवनो सकेता में परिहऽ त दिल्ली-ओर अइहऽ, केहू से पूछ लीहऽ नाँव, नून के सैरियत चुकावे के इचिको जे पून हम पाइब त माथे चढ़ाइब…।

त कहले बंदा हरवाह कि ई ऊ कहले रहे त हम का कहले रहीं तवन भुलाऽ गइल का ! त कहली बंदा बो हरवाहिन कि खेतिहर खातिर त, की त खेत, ना त मैदान। त देस के खेत में त एसों कुछ बा ना, त जा, दिल्ली के मैदाने में जा। त कनमनइले बंदा हरवाह कि जइसन बेचारा ऊ बादशा, तइसने त होई ओकर दिल्ली आ दिल्ली के मैदान ! जोड़ा-जामा कस के, तीर-तरुआर में फँस के, बहुरुपिया-अस सज के, आ घोड़ा प चढ़ के, दू रोटी खातिर देस-देस मारल फिरल जवन ऊ बेचारा बादशा, सेकरा दुआर प, केहू बतावे कि वाजिब बा का, एह अकाल-दुकाल में, हमरा-अस आन-अनगँइया के जा गिरल ? त कहली बंदा बो कि ऊ आके गिरल रहे का ? त कहले कि ना। त कहली कि आन के मान के खेत में खटल रहे का ? त कहले कि ना। त कहली कि ऊ ना गिरल त तू काहे गिरबऽ ! ऊ ना मनलस जब आन-अनगँइया, त तू काहे मनबऽ ! ओकरा खटत लाज ना त तहरा खटत लाज का ! जहाँ खटत होई खट लिहऽ, जहाँ थाके-थहराय तहाँ सम्हरिहऽ, जहाँ थकिहऽ थहरइहऽ तहाँ सम्हारे त सम्हारे दिहऽ। इहँवा त ‘ना’ बा, उहँवा, के जाने होखे कुछ ‘हाँ’, त होखे भा ना, बाकिर होखी, एतने के असरा में जा। आ हमरो के असरा धराऽ के तू जा। जा, कि बालू-ह-जानि-के-झँउरि-मरे-हरिना, तवना से नीमन कि पानी-ह-मानि-के-धउरि-मरे-हरिना… !

बाकिर का, कि बंदा हरवाह जब जतरा प चलले, बंदा हरवाहिन के रोआई, बुझाइल कि ओरियइले ना ओराई। सुनले त बंदा चउकठ ले जा के लवट अइले। त बंदा बो के फेरू से परल समझावे कि हो सँइया, बालू-ह-जानि-के-झँउरि-मरे-हरिना, तवना से नीमन कि पानी-ह-मानि-के-धउरि-मरे-हरिना… ! त कहले कि सहात नइखे बाकिर, तहार रोआई, त कइसे जाईं ! त कहली कि जइसे हमरा खातिर, ओसहीं तोहरो खातिर, रोआई, नाहिंए सहइला के दवाई। त रो ल, बाकिर का, कि खेत-ओर पीठ करऽ, कुरुखेत मुँहे हो ल। त बंदा हरवाह खेत-ओर पीठ कइले, कुरुखेत मुँहे हो गइले।

अब जब चल देले बंदा हरवाह, आ चलते रहले त आज भा हप्ता दस दिन बाद, जहाँ पहुँचे के रहे तहाँ कहियो-ना-कहियो त पहुँचहीं के रहे। त कहिया पहुँचले, ई त पता ना, बाकिर जहिया पहुँचले, तय बात कि तहिया पहुँचले। पहुँचले त हप्ता दस दिन त चिहाते-सिहात बीतल। बाकिर, केहू कतना दिन चिहाई, कतना सिहाई ! खाली चिहइला-सिहइला से कहिया ले पेट पटाई ! बाकिर, ईहो कवनो कम चिहाय लायक थोरे कि पेट पोसाय में खास कवनो दिक्कत ना दिल्ली में, जेकर बोझा उठा दें, ऊहे कुछ-ना-कुछ धराऽ दे। बाकिर, बंदा हरवाह के एक दुख ईहो कि उनुकर भरलो रहे पेट, आ ऊ कहबो करें कि कुछ चाहीं ना, तब्बो, जेकर बोझा उठावें ऊ जबर्दस्ती कुछ-ना-कुछ पकड़ाऽ दे। केहू मनबे ना करे कि केहू केहू के बोझा असहूँ उठावेला, उठवला खातिर अलगा से कुछऊ ना चाहेला, जवन पावे के होला, ओही उठवला में पा लेला। कहियो कहबो कइले केहू से कि भइया रे, हमरा कुछ चाहीं ना बदला में…। सुनले त भइया-रे सकपकइले कि भला अँइसे कइसे कि कुछ चाहीं ना बदला में ! त बतवले बंदा कि बात बस अतनवे कि सकेता में देखलीं हा तहरा के, त देख के रहाइल ना हमरा से। सुनते ऊ भइया-रे उठावल बोझा पटक के भड़क गइले कि तोरा बेमतलब के मदद के जरूर-से-जरूर भितरिया कवनो मतलब बा, कुछ-ना-कुछ साजिश बा एम्मन, कवनो-ना-कवनो खटजंतर बा ! का बा बता दे, ना जो बतइबे त थाना पहुँचाइब, उल्टा लटकवाइब, डंटा से पुछवाइब। बंदा हरवाह हलकान कि कइसन कुदेश ई दिल्ली ! कि कइसन बउराह बदशहवा कि आन बसल इहँवा, अइसन कुजगहा ! बाकिर का, कि आज त बदशहवे बचवलस बंदा हरवाह के जान। दूनो हाथ दसो नोह जोड़ के बतवले कि हे हे हे हे भइया-रे, हमरा बेमतलब ए मदद के, एक इहे मतलब, कि बदला में रुपया ना, पइसा ना, हमरा के हमरा बिछुड़ल संघतिया से कसहूँ मिलवा दे। पुछले कि का नाँव तोहरा संघतिया के ? बंदा बतवले कि बादशा। सुनले त अवरू तनतनाऽ गइले भइया-रे कि का रे, हम थाना के ले लिहलीं नाँव, त बदला में तें हम के एक्के बे बादशा के देबे भौकाल ?! फटहा धोती आ लटहा बबड़ी के अइसन ! अतना !! अतहत औकात !!! बंदा बतवले कि ना-ना-ना भइया-रे, बादशा त बस ओकर नाँव ह, ऊ त बेचारा बस नाटक-नौटंकी के सवखल इन्सान, बजरा के रोटी पियाज खाती ललचत आ हरवाही-हेंगवाही-कुदरवाही में निकहा फरहर…।

भला अइसन कवन बादशा… भइया-रे लगले इयाद पारे। उठ के परले इयाद, बइठ के परले इयाद। ओठंग के परले इयाद त परल इयाद कि हो-ना-हो, फलनवा के पूत चिलनवा…। ऊहे नौटंकी के अइसन रसिया कि बापो से बोले त बोले कि ‘हे बाप’, माइयो के ‘हे माई’ कह के बोलावे। ऊहे कि एक बात एक डेग अगवढ़ बढ़ के बोले, त एक बात बोले पिछवड़ हट के, ऊहे कि हाथ से बतावत, मुँह से बतियावे। ऊहे कि एक बे बादशा बन के उतरल नौटंकी में त अतना जमल, अतना जमवलस कि तहिए से बाश्शा-बाश्शा लागल कहाय। कहीं ऊहे त ना ? त भइल कि कवन ठेकान ! त भइया-रे बंदा के हाथ धइले, धइले-धइले बाश्शा किहाँ पहुँचइले। बाश्शा के देख के बंदा जब मुँह बिजुकवले कि कहाँ हमार बादशा सजीला-गठीला आ कहाँ ई बाश्शा मरगिल्ला, त बाश्शा अँइसे कि जइसे गिड़गिड़ाऽ के कहले कि तनी आगा-पाछा होके निरेखऽ, तनी दहिने-बाएँ होके देखऽ, के जाने हमहीं होखीं, ना जादे अधिका त थोरहूँ-थोर ! बंदा बात मनले, आगे-पीछे होके देखले, दहिने-बाएँ होके निरेखले आ बतवले कि ना हो, तू त ऊ केनियो से इचिको भ हइए ना हउअ, ना अधिका ना थोर। सुन के ई बाश्शा, अइसन जब बित्ता भर मुँह लटकइले कि जइसे कि टूट गइल उनुकर पुरान कवनो आशा, गुनावन में पर गइले बंदा हरवाह, कि कइसन ई कइलीं अनजानल-अनचाहल अपराध। त हँसले ठठाऽ के अचक्के में बाश्शा कि धत् मर्दे, हमरा खातिर त का आस आ का निरास — सब-के-सब निछुने नाटक ! तू बाकिर मत होखऽ इचिको हलकान, बादशा इयार तहार जो ना भेंटइले, त बूझऽ जे नया एगो बन गइले बाश्शा इयार। जवन रूख-सूख खाइब तवन तोह के खियाइब आ तोहरा के तोहरा बादशा इयार से मिलवाइब।

शुरू भइल जोहाई। बंदा के बतवला मोताबिक, लागल जोहाय कि कवन अइसन बादशा कि जवना किहें आपन, निज के, लाम-लहकार बरियार एगो घोड़ा। जोह पहुँचल तीन गो इकवान किहाँ, दू गो साईस किहाँ। एगो त अइसन बादशा भेंटइले जिनिका किहाँ एगो घोड़ा के के कहो, सैंतीस गो गदहा प ईंटा ढोआय। कहले कि भले हम ना निकलनीं तोहार वाला बादशा, बाकिर चाहऽ त दू गदहा ले ल, आजे से लदनी में लाग जा, अधिका अपने कमाऽ, तनिका हमके कमवावऽ। त कहले कि काहे ना कमाइब, काहे ना कमवाइब, बाकिर तब जब अपना हम भाई बदशहवा के पा जाइब। कहबऽ त ओकरो के लिवा आइब, जवन घोड़ा धउरावे में माहिर, सोचऽ कि कइसे ना होई ऊ गदहा चलावे के काबिल !

बंदा के बतवला मोताबिक जब लागल जोहाय कि कवन अइसन बादशा कि जवना के जोड़ा-जामा लाल पियर हरियर लहरदार, त जोह जाके  धोबघाट पहुँचल, जहाँ धोबी के एगो, एगो लरिका नादान, अमीर-उमरा कवनो गाहक के, रंग-बिरंग कवनो कपड़ा जो पावे, त जले अपने ना हबेखे दुचार दिन, दुचार दिन अपने ना पहिरे, पहिर के जले दुचार हितई घूम-टहर ना आवे, तले टरकावे कि अभी त धोआइले नइखे, अभी दरकचात बा, अभी पसरात बा, लोहा दियात बा, तहियावल अभी बाकी बा। तवन लरिका नादान, जले पहिरले रहले अनकर रंग-बिरंग, तले त अड़ल रहले कि हमहीं तहार ऊ बादशा इयार, बाकिर जब बंदा हरवाह ना पतियइले त नाहिंए पतियइले, त अनकर रंग-बिरंग उतार के, असल आपन बदरँग ऊ अइले पहिर के, आ कहले कि भले हम ना भइलीं तहार ऊ असली बादशा इयार, बाकिर हमरा किहाँ बाटे, उनुका से तहरा भेंटाय के पक्का उपाय, कहऽ त बताईं। त भइल कि बताईं। त कहले कि तब्बे बताइब जब तीन रेख खींच के किरिया खइबऽ कि हमार अनकर रंग-बिरंग पहिरला के बात केहू अउर से कबो ना बतइबऽ। त तीन रेख खींच के किरिया खइले कि केहू पूछी ना, त बताइब का ! तब जाके बतवले ऊ लरिका नदान ऊ पक्का उपाय। कि किला मैदान में आजे साँझ के निकली बादशा बहादुर के जलूस। फतह के सलाना तिउहार। सँउसे दिल्ली उपट परी देखे। किला के दुआर प उँचास प तू हो जइहऽ ठाढ़। सभ देखी बादशा बहादुर के, तू देखनिहारन के देखत रहिहऽ मूँह। तहार इयार, होइहें इहँवा त अइहें जरूर। की त तूहीं लेबऽ चीन्ह, ना त ऊहे लीहें चीन्ह।

आ ना अइहें, तब ? त भइल कि अँइसे कइसे कि अइबे ना करिहें, जब सभे आई त ऊहे भला कइसे कि घरे रहे पइहें ! काहे आई सभे भाई, जे आवल चाही सेही आई, कि जे ना चाहत होई सेहू आई ? त भइल कि पहिले के बात रहित त भले केहू आइत केहू ना आइत, बाकिर अब अइसन नइखे। पहिलवा, ईहे बादशाहूदीन बदशहवा, अतना बद, अइसन बदेल कि अझेल। जतने जिद्दी ओतने जाहिल ओतने जालिम। अपने में गाफिल। जेने ताके तेने तबाही, केहू ना चाहे कि केहू प एकर, कवनो बिध परे परिछाहीं। बाकिर का, कि एक बे अहेर में गइल त हप्ता भ रहल नपत्ता। बहुरल त दोसरे हो के। दोसरा के दुख में दुखात, दोसरा के सुख में समात। जतना खात ओकरा से जादे खियावत, जतना जीयत ओकरा से जादे जियावत। त केहू ना चाहत रहे जवना बदशहवा के नजर तर आवल, आज के हवाल कि केहू ना चाहे ओही बदशहवा से नजर हटावल। त आई, सब आई ओकरा जलूस में, जे पाँव पैदल, सेहू जब आई, त तहरा इयार के त घोड़ा बा भाई, कइसे ना आई !

त भइल कि भला कहऽ कइसे ना आई ! जलूस से पहर भर पहिलवे पहुँच के, किला मैदान के दुआर प उँचास प हो गइले ठाढ़ बंदा हरवाह। जेने देखऽ तेने  मुँड़िए-मूँड़ी। पैदल हैदल गैदल। कहीं नाच, कहीं गाना, कहीं नारा, कहीं जैकारा। सँउसे दिल्ली सबके छोड़ के अपना बदशहवा प नजर गड़वले, अकेले एगो बंदा हरवाह कि ओही बदशहवा के छोड़ के सबके प नजर गड़वले। एक-से-एक देह-मुँह लउकल, एगो ऊहे ना लउकल, जवन लउकित त होइत कि हँ हो, कुछ लउके लायक लउकल ! बंदा चाहत त ना रहन, बाकिर उनुका बिना चहले लागल सोचाय कि कहीं झूठ त ना कहले रहे इयरवा कि दिल्ली के बानीं बसिन्दा ! लागल सोचाय त के जाने अपने से मूँद लेले आँख, कि अँखिए लागल मुँदाय कि केहू से कहियो कहे-बदे खातिर हो जाय कि जब अँखिया मुँदाइल रहे, तबे बुला ऊ आइल रहे। तले किला मैदान में घुड़दउड़ के बेरा-बखत आ गइल। गरदा उड़ल आ असमान तकले छा गइल। बाश्शा के चिंता कि गरदा के अइसन उड़ान में कइसे भला लउकी हमरा इयरवा के ओकर इयरवा ! धोबपूत फरके फिकिरियाइल कि अँइसे धुरियाई त त धूर में मिल जाई हमार बतावल ई उपाय, कवना मुँहे कहब कि केहू से कहिहऽ मत अनकर रंगा-बिरंगा पहिरला के बात ! बंदा के बाकिर, मने-मने तोख कि ईहो त हो सकेला भाई कि एही धुरखेल के चलते ना हमरा लउकल इयरवा ना इयरवा के हम !

ओने सामकरन घोड़ा, घुड़दउड़ के पहिलके चक्कर में उँचास के पास से होके जब गुजरले त उनुका ना बुझाइल कि ई गोहट-अस मरला के छप-छप-अस कहाँ से सुनाइल। दुसरका चक्कर में पीठ प बइठल सवरवा दे’ देखले जब, तनी कन्खियाऽ के, त जनले कि के जाने केने से ओकरो कुछ बजरा के रोटी पियाज अस सुँघाइल। बाकिर का, कि एही सुना-सूँघी में, एक त कि बादशा के, दोसरे कि सामकरन घोड़ा, बुझाइल जब, कि बाकी कुल्ह घोड़न से बाँस भ से अधिके पिछुआइल, त अरजा से परजा ले सभे फिकिरियाइल। बाकिर का, कि तिसरका चक्कर में जसहीं उँचास के पास से गुजरल, घोड़वा के अपना पिठाँस प, हाथ हरमुठाह के घोंय-अस आइल जनाइल आ अगिला घोंय आइत, एकरा पहिलहिंए ऊ सामकरन घोड़ आन्ही से ले लिहले होड़। अइसन, कि घुड़दउड़ में जीत के धूहा जब छू के पीछा मुँहे तकले, त सात बाँस पाछा ले, ना कवनो घोड़ा लउकले, ना घोड़वाह। बाकिर का, कि घोड़ा उहाँ रुकले ना जीत के जसन मनावे, रुकले ऊ किला मैदान के दुआर प। ओही उँचास प। रुकले ऊ पहिले कि पहिले हिनहिनइले कि पीठ प से उनुका कूद गइले पहिले सवार, के बतावे कि कूद के धउरले पहिले कि बान्ह के अँकवारी में बंदा हरवाह के उठवले पहिले कि पहिले बाजल ढोल कि बाजल नगाड़ा आ शुरू भइल फतह के सलाना तिउहार के जसन जगराता !

बंदा हरवाह के एकाध दिन त ईहे ना बुझाइल कि भइल का, का होता, कि आगे का होई ! इयरवा भेंटाइल, से त भेंटाइल, बाकिर हतहत दरबार, हजार लोग आगा, हजार लोग पाछा, हाथी के झुमेल आ घोड़ा अनठेल, हतहत गो महल अठमहला, हतहत गो फाटक … जानत त रहले कि इयरवा हमार नौटंकी के सवखीन, बाकिर, बुझाइल ना उनुका कि आखिर, कतहत ई नाटक, कि कतना एह नाटक के पसरल पसारा ! कि के-के बा, का-का बा नाटक के भितरा आ के बाटे, का बाटे नाटक से बहरा ! कि बहरी एगो हमहीं, कि केहू अउरी !

बइठे के सिंघासन दियाइल त जे सिंघासन लेके आइल ओकरा के पहिले त बंदा बहुते समझवले कि भाई, एह नाटक में हम नइखीं शामिल, हम नइखीं एकर, केनियो से कवनो किरदार, बाकिर, ना केहू मानल त का करिते, ओही प मार के अल्थी आ पार के पल्थी बइठ रहले। बगल के सिंघासन प बादशा जब आके बइठले ओलर के, पलर के, त बलु पुछबो कइले कि तहार तबियत त नइखे न खराब ? बतइबो कइले कि तुलसी-गिलोय के काढ़ा त कुल्ही बेरामी में रामबाण। त जइतऽ आ काढ़ा के पहिले अजमइतऽ त अइतऽ, बइठितऽ…। सुन के, बादशा मुसुकइले त जरूर, बाकिर तवना के बाद, जल्दी-से-जल्दी,  ऊहो अपना सिंघासन प, ओसहीं, तन के बइठ रहले, मार के अल्थी, पार के पल्थी। आ देख के, उनुकर ई बइठल, सँउसे दरबार, देखले बंदा हरवाह कि अँइसे चिहाइल जइसे नाटक में ना, सचहूँ चिहाइल !

खाय बइठले जब बंदा हरवाह, त थारी के साथे बहत्तर गो कटोरी तिहत्तर गो तहतरी। सोचले कि जनाता कि गाँव भ से थोरे-थोरे माँग के आइल बा। केहू बरी देले बा केहू बजका। केहू बारा-फुलौरा। केहू भात केहू दाल केहू चोखा। केहू चटनी आ केहू अँचार। केहू नेनुआ के तियना, केहू करइला के भरवाँ। दिलदार कवनो इहाँ ले, कि देले बा खीर, कवनो रबड़ी देले बा, त कवनो मलाई, कवनो मिठाई। दिल्ली में, कवन ठेकान कि ईहो कुल्ह मिलत होखे बोझा के उठवाई ! सोचले कि आखिर कतनन के बोझा उठावेला बेचारा बदशहवा कि बदला में, भलहीं तनकिए-तनी बाकिर हतनवा-हतना पावेला ! कि नाटक-नौटंकी के ह ई कमाई ! कि खेला के बाद चदरा पसराऽ गइल आ पा भ, छटाक भ, जेकरा चुहानी में जवन रहे आ गइल ! सोचले बंदा, कि बलु बदशहवा, खेती किसानी से कमाइत त जवने पाइत, भरखर पाइत ! सितुहा भ खीर खा के खखनित ना, जवन खाइत थरिया भ खाइत, अघाइत ! बाकिर का, कि जवना कटोरी से उठा के ऊ खइले तवन जब फेरू से भर के रखाइल, आ फेरू खइले त फेरू से भर के रखाइल, त तवना के माने कुछऊ ना उनुका बुझाइल। बाकिर का, कि बूझत-बूझत आ बुझात-बुझात जब बुझाइल कि नाँवे के ना ह, सचहूँ के बादशा ह उनुकर इयार, त अपना ए बादशा इयार प बड़ी बिगड़ले बंदा हरवाह। हींक भ डँटले कि काहे तें बात ई छुपवले, बादशा होके, काहें तें अपना के हमरा से अतना डँटववले, कि काहे तें एक त कि अपना के, दुसरे कि हमरा से रे-तें करववले ! काहे बेचारा हरवाह प चढ़वले तें बादशा से अपना कुदारी चलववला के पाप, हर में, हेंगा में, बैलन के साथे नधववला के पाप ! अइसन खिसियइले कि हप्ता दिन लाग गइल बादशा के उनुका मनावे में। बाकिर, तवना के बाद, महिनवन लागल बंदा हरवाह के, बादशा के मनावे में कि भाई हमके जाए द। एक त कि तू, तहार अमला, खरिको खरकावे भ खटे हमके देत नइखे, दोसरे कि तहरा एह दिल्ली दरबार में हाथी बा, घोड़ा बा, खेत नइखे। एक्को हाथे करे कुछ चल दीं त हजार मुँहे अरे-अरे, हजार हाथे धरे-धरे…। लोटकियो भ पानी, अपना से अपने उठावे के, केनियो से कवनो सवाँस ना, आ अँइसे, बइठल-बइठल, हमरा से भाई, खइले खवात ना, घोंटले घोंटात ना…।

बादशा बाकिर, काहें के जे मानें। बंदा आज माँगें बिदाई बादशा काल्ह प टार दें। बंदा जतने उबियायँ ततने उनुकर सेवा-टहल बढ़िआय आ जतने उनुकर सेवा-टहल बढ़िआय ततने ऊ उबियायँ। अंत दाँव, बादशा के सबसे पुरान एगो टकसब-ना-तहरा-टकसवले टहलुआ से  पुछले उपाय कि सोच के बतावऽ कि कवन अइसन बेरा, कवन अइसन बखत, जब बादशा से जवन मँगाय तवना से ना ऊ ना करे पायँ। त टकसब-ना-तहरा-टकसवले टहलुआ सात दिन सोच के बतवले कि नमाज के बाद। त बंदा घात में लगले। रोज सँपर के, नमाज के आस-पास जुट जायँ कि ओने ऊ आपन नमाज फरिआवें आ एने ई सोझा आवें, आपन अरदास सुनावें कि ढेर भइल, जाए द हमरा के अब हमरा गाँवे। बाकिर का, कि देखें जब लागें नमाज त देखते रह जायँ। भुला जायँ सोझा आवल, आपन अरदास सुनावल। एक दिन बाकिर, सँपर के पुछले कि का हो, ई का करेलऽ, काहे करेलऽ, केकरा से का कहेलऽ ? त बतवले बादशा कि भाई, जेकर ई खलक-खुदाई, सातो दीप नवो खंड जेकरा परताप के दोहाई, ओकरे से माँगींले हाथ पसार के, मुलुक के खैर। आ आपनो। कि केहू से केहू ना राखे ना माने कुछ बैर। आ हमहूँ। कि कमी मत रहे केहू के कवनो, कि गमी मत रहे, कतहूँ, केहू के, कवनो। आ हमरो। कि बनल रहे बरकत, बरसत रहे रहमत। कि हथिसार हाथी-हाथी रहे, घुड़साल घोड़ा-घोड़ा रहे, कि चानी के गोदाम चानी-चानी रहे, सोना के सनूक सोना-सोना रहे। त पुछले बंदा कि रोज माँगेलऽ हाथ पसार के ? कहले बादशा कि काहे ना, रोज माँगींले हाथ पसार के। पुछले कि माँगत मुँह ना दुखाय, मन ना लजाय ? कहले कि उनुका से माँगत मुँह ना दुखाय, मन ना लजाय। पुछले कि काल्हो मँगबऽ ? कहले कि काहे ना, काल्हो माँगब। त कहले बंदा कि काल्ह तब हमहूँ माँगब। त कहले बादशा कि काहे ना, तूहूँ मँगिहऽ। कहले कि मँगला प मिल जाई ? कहले कि मन से मँगबऽ त काहे ना मिल जाई !

काल्ह, काल्ह से आज भइल। बादशा तय कइले कि नमाज पढ़ब, पढ़ला के बाद में आस्ते से पूछब इयार से कि हम त हो भाई, रोज जवन माँगींले, मँगलीं हा, आपन बतावऽ कि कहले रहऽ माँगब, त का-का तू मँगलऽ हा, आ जवन-जवन कहिहें कि मँगलीं हा, तवन-तवन उनुका के की त देब, ना त दियवाइब। बाकिर, बंदा से पुछिते, एकरा पहिलहिंए, बंदा बता दिहले कि का उनुका चाहीं। छुट्टी। जाय के इजाजत। कहले कि सुनले हम बानीं कि नमाज के बाद, जे जवन माँगेला, दे दे ल, त माँग देलीं, दे द। त कहले बादशा कि कहले त रहलऽ कि हम जिनसे माँगींले उनुका से माँगब…। त कहले बंदा कि ना भाई, ई त तू सुनलऽ, कहले त रहलीं हम अतने कि माँगब। त मँगलीं। त कहले बादशा कि ठीक बा कि मँगलऽ, बाकिर बतावऽ कि उनुका से मँगबऽ त का मँगबऽ ? त कहले कि उनुका से माँगब त उनुके से माँगब, उनुके बताइब, ओसहीं, जइसे कि तोह से जवन मँगलीं, तोह के बतवलीं। आ उनुका से माँगब, त तूहीं बतावऽ कि इहाँ काहे माँगब, दे दीहें इहँवे त लादे के तूल, लदवावे के तूल, गाँवे ले ढो के पहुँचावे के तूल ! त माँगब, बाकिर अपना गाँवे जा के, भउजी से तहरा बतियाऽ के। बादशा बड़ी कुनमुनइले बाकिर का करिते, कहले कि ठीक बा, जा, बाकिर जवन तहरा चाहीं, जवन-जवन, जतना, हमके बता द, हम तवन-तवन, ततना मँगवा दीं, घरे पहुँचवा दीं। कहले बंदा कि काहे के अतना हलकानी में परबऽ, हमरा जवन चाहीं, हम गाँवे अपना जा के, जेकरा से माँगेलऽ ओकरे से माँग लेब, ऊहे पहुँचा दीहें, सीधे। कतनो कहले बादशा कि अन ले ल, धन ले ल, जर ल, जमीन ल, बाकिर बंदा, काहे के जे मानें ! एक्के रट कि काहे तू देबऽ, ऊहे जब दीहें !

कहले बादशा कि घोड़ा ले ल, त कहले बंदा कि बे मर्दे, गिर-पर जाइब। कहले कि अच्छा त एक्का से जा, त कहले कि महिनवन तहरा महल में बइठल-बइठल बात-पित्त-कफ तीनो बढ़ियाइल बा, पैदल जाइब त कुछ त पचाइब। सुनले त बादशा मने-मने कुछ तय कइले, अपना दरबारी लोग से जाके कुछ-कुछ बतियइले आ आके बतवले कि ठीक बा, जा, बाकिर जे बा दरबार में, सबका से मिल के अँकवार। कहले बंदा कि भाई, सबकर अँकवार के त हमरो दरकार !

गाँवे जाय के चाव में, बंदा के ई ना बुझाइल कि जेकरा के दिहले अँकवार, ऊ उनुका झोरा में, बगली में, इहाँ ले कि पगड़ी में, कुछ-ना-कुछ रख देल, चुप्पे, चुपचाप। मिलत गइले अँकवारी आ होत गइले भारी। ईहो ना कि बंदा एह भारी भइलका के जनबे ना कइले, जनले, बाकिर अगली के, बगली के, झोरा के, पगड़ी के — कुल्हिनी के भारी भइलका के मनवे के भारी भइलका ऊ जनले।

बादशा कहले कि फेरू अइहऽ, आ कहले कि फाँफर पाइब त हमहूँ आइब, बंदा कहले कि काहे ना आइब, आ कहले कि अइहऽ जरूर। साथी के देत अँकवारी जब जादहीं कुछ भारी भइल मन त कहले तनी हँस के कि अबकी बे बजरा के रोटी आ नीमक-पियाज थरिया में तोह के खियाइब, सहूर से, आ तूहूँ तनी खइहऽ त ओही सहूर से, ई ना कि हूर के ! सुन के जब ऊहो मुसुकइले, त कुछ त ईहो, कुछ ऊहो हलुकइले। बाकिर, चार डेग चल के पिछवड़िए, रस्ता प सोझ जब भइले त पइले कि ईहो बगली भारी आ ऊहो बगली भारी आ कपार प के पगड़ी अउरियो भारी। झोरा त अतना ना भारी कि जवना कान्हे लटकल तवना के हड़री बुझाइल कि अब-तब में चटकल। छू-छा के देखले त सोना के असर्फी ! कहँवा हलुकाईं ? त पहिले त धोबघाट गइले आ पगड़ी के सकल असर्फी धोबी के पूत के हाथ में धइले कि हा ल, लाल-पियर-हरियर, जइसन मन, आपन तू अपने से कीन ल धोती-मिर्जई। धोबी के पूत अचकचइले कि ई बाकिर बहुतो से जादे से ढेर तनी अधिका…। ईहे बात कहले बादशा नाँव के सब-सब साईस-इकवान। त कहले बंदा कि जेकर बादशा नाँव, ओकरा से जवन-जवन पवलीं, तवन-तवन, ओकरा के जवना-जवना बादशा के नाँव से जोह के पवलीं, तवना-तवना बादशा के नाँव तक ना जो पहुँचाइब त के हम होइब आ के हम कहाइब ! एक त ई, आ दोसरे ई कि ई मत जानऽ कि पवलऽ, जानऽ ई कि हमके हलुकवलऽ, बीच राह थाकि के थउसे से बँचवलऽ। बाकिर का, कि जवना बादशा के सैंतीस गो गदहा से ईंटा ढोआय, तवन तनी अड़ गइले। कहले कि कइसे खाली तूहीं हलुकइबऽ, हम ना हलुकाइब ? अवरू कुछ ना, त एगो गदहा तू ले जा, अवरू कुछ ना, त गाँवे ले बइठल त जइबऽ…। त कहले बंदा कि बे मर्दे, पैदल जाइब त बात-पित्त-कफ कुछ पचाइब। त आइल जबाब कि पचइहऽ, जब पच जाय, तब्बे बइठिहऽ। त कहले बंदा कि बे मर्दे, गदहा प बइठे हमरा ना आवे, गिर-पर जाइब। त आइल जबाब कि तहरा बइठे ना आवेला त का भइल, हमरा गदहवा के बइठावे त आवेला न ! आ मान ल कि गिरबऽ, त कवन कहीं कि पाँच हाथ के घोड़ा प से गिरबऽ, सरपट के चाल प से गिरबऽ ! गिरबऽ त दू हाथ के गदहा प से गिरबऽ, दुलुकी के चाल प से गिरबऽ, उठ जइहऽ, धूर-गरद झार लिहऽ, झूर लिहऽ, गिरल केहू देखल त ना, तनी घूर लिहऽ…। अब का कहिते बंदा, का करिते बंदा ! अतने कहले कि भाई, तहार गदहा, तहरे के चीन्ही, अनजान के पाई त दुलतिए से बतियाई। त गदहा के मालिक गदहा से उनुकर नीके तरी अरचो-परचो करवा दिहले, पीठ-पोंछ सुहुरवाऽ दिहले आ पगहा धराऽ दिहले। गदहा प बइठिए के बंदा, बाश्शा किहाँ गइले, झोरा सहित्ते बाकी के कुल्ही असर्फी उनुका हवाले कइले कि आपन समियाना तनवइहऽ, आपन पर्दा लगवइहऽ, आपन नाटक अपने बनइहऽ आ खेलिहऽ, खेलवइहऽ। कहले बाश्शा कि नाटक त अपने बनाइब, बाकिर बनाइब तहरा प। हमरा प ?! काहे ना, आ नाँव रही बंदा-बादशाह ! त कहले बंदा कि हद बा, भला कतना तू जानेलऽ हमरा के, कतना तू जानेलऽ हमरा इयार के ? त कहले बाश्शा कि तहरा के जानब तहरा साथे-साथे गाँवे ले, घर तकले चल के, आ तहरा इयार के, रस्ता भर तोहरा से पूछ-बतियाऽ के। बंदा कहले कि भाई, जब अपने से कहलऽ कि जाइब, त आपन घर अछइत कवना मुँहे कह दीं कि ना लेके जाइब, बाकिर, दाँव एगो चलले, कि गदहा त एक्के बा। त हँसले बाश्शा कि हमरो के गिन ल आ अपनो के गिन ल त गदहा के गिनती त तीन बा ! त बूझ गइले बंदा, कि बात बतियावे में दिल्ली के केहू ना उनइस, सब-के-सब बीस बा, तीस बा।

बोलत-बतियावत,  उनुकर सुनत आ आपन सुनावत, आज किदो काल्ह किदो हप्ता दिन बाद, पहुँचल लोग गाँव के गैंड़ा, त सुनले रहन बंदा कि जेकर सगरो सकान, गाँव के गैंड़ा सेकरो गोड़ थकान, त पता ना कि सचहूँ कि सुनलका के राखे खाती मान, जानल एगो पाकड़ के पेड़ झँखाड़ त बइठले, बाश्शा के बइठवले, घरी-छन सुस्ताय कि थकान दुराय। त एगो त गाँव नगिचइला से हरखल, दोसरे, देखले कि खेतन में कादो-कींच पुरहर, त बरखल-भुलाइल-अभी-नइखन-भगवान — एह भरोसा से उलसल हुलसल, कहले बंदा कि ए भाई बाश्शा, कुछ छू देबे अइसन सुनइतऽ, कुछ कढ़इतऽ, कुछ गइतऽ ! बाश्शा जब लिहले अलाप, कहिए से पाछ धइले  आवत, दूइ बैलगाड़ी, थथमले आ थम गइले। गड़िवान लोग उतरले आ अलाप में अलाप मिलावत ओहिजे जम गइले। जम गइले त जम गइल महफिल। गवनई के अइसन उठल लहर-प-लहर कि बुझाइल जइसे अपने मने साज सज गइल, बाज बज गइल। एक सुर त अँइसे कि जइसे कि पाकड़ प से उतरल आ दसो दिसाईं पसर गइल, आ ताकधिनाधिनधिन त कहँवा से आइल, ना केहू जानल ना केकरो जनाइल। इहो ना बुझाइल कि एही में आज, कब आके बीत गइल साँझ ! त भइल कि का भइल, एहिजे फुटेहरी अब लागे, चोखा सनाय। फुटेहरी लगावल लोग, चोखा सानल लोग। हींक भ पावल लोग। सूतत के बेर पुछले बंदा कि केकर ई गाड़ी, त बतवले जा गड़िवान, कि बाड़े एगो भाई भगवान सिंघ उनुके ई गाड़ी। के हवे भाई, ई भाई भगवान सिंघ, त कहले जा कि के जाने, दिल्ली के बादशा बहादुर के बुला कुछ लागेले। उनुकर कुछ लागेले, त तय जानऽ भाई कि हमरो कुछ भाई भगवान सिंघ लागेले — बंदा अगराऽ के बतवले आ पुछले कि गाड़ी में कँउची लदाइल, त बतवले गड़िवान कि ललसा के कलसा। पुछले कि कहँवा ले जाई, त बतवले कि ई त जानस भगवाने सिंघ भाई…।

ठीक अधरात, के जाने पाकड़ प का खड़खड़ाइल कि अचक्के अचकचाऽ के उठ के बइठ गइले बाश्शा निनिआइल। बंदा जब करवट फेर के कहले कि अहो अभी सुत्तऽ, त सुनले जब ‘सुत्तऽ’, तब जाके नीन उनुकर नीके तरी टूटल। टूटल आ दूनो नैन खूलल त पहिले त लागल टकटक्की तब छूटल कँपकँप्पी। लगले बंदा के झोर के जगावे कि उट्ठऽ हो, का भइल, होता का, देखऽ, निरेखऽ, बुझाय त बूझऽ, आ बूझ के हमरो के तनिका बुझावऽ। बंदा देखले कि दूर, डगरल अस चलल जाता दुन्नो-के-दुन्नो बैलगाड़ी आ भीरी, मुँड़तारी-गोड़तारी, एगो आ दूगो आ तीन, चार… चउदह गो साज के राखल बा कलसा। एगो के खोल के पेहान, झाँक के देखले जा भितरा त हीरा आ  मोती आ सोना आ चानी के गहना आ गुरिया, असर्फी-तसर्फी… ! देखले त देख के, ई अलगे जहुअइले, ऊ अलगे भकुअइले।

जे जहुआइल बा, जहुआए दीं, जे भकुआइल बा, भकुआए दीं। सातो भाई चोरवन के सोचीं कि उन्हनी के कतना सत्पिसानी… !

एक भाई के पता लागल कि बादशा के, खेतिहर एगो आइल बा साथी, कवना दो गाँव-गिराँव के, त जा के दुसरका भाई के बतवले। तिसरका भाई कहले कि हो-ना-हो बिदाई में ई खेतिहरवा अपना औकात से अधिके कुछ पाई। चउथकू कहले कि जवने पाई, दाँव लगा के चोराऽ लिहल जाई। पँचऊँ कहले कि एकर, भा केहू के, अबहीं, भा कबहीं — सबकुछ चोरावे के बात कबो सोचिहऽ मत। पुछाइल कि काहे, त छठऊँ कहले कि सबकुछ  चोरइबऽ त सोचऽ कि जेकर चोरइबऽ ऊ आगे अब कइसे कुछ करी-कमाई,  कइसे कुछ सँची-जोगाई, आ ना कुछ करी-कमाई, ना कुछ सँची-जोगाई त सोचऽ कि आगे, हमनिए के, भा केहुए, केहुओ के, कइसे में कुछुओ चोराऽ पावे पाई ? अँइसे त भाई, दुनिया-संसार से चोरी-चकारी के रेवाजे उठ जाई ! त सतऊँ बिगड़ गइले कि आगे जवन होई तवना के सोच के बुड़बक ऊ होई जे अबहिंए से रोई। सुन के पँचऊँ आ छठऊँ भड़क गइले। भड़क गइले त एह लोग के भड़कला प पहिलकू-दुसरकू कुछ अधिके भड़क गइले। बाता-बाती से बात चलल, चलत-चलत मारा-मारी ले जा पहुँचल। तिसरकू-चउथकू कहले कि हमन के का कइल जाई ? त भइल कि जब झगड़ा बढ़ियाई त छोड़ावल जाई। झगड़ा बढ़ियाइल। केहू के भुभुन फूटल, केहू के नाक ; केहू के लोल, केहू के लिलार। जे झगड़ा छोड़ावे आइल ओकर तनी जादे फूटल, तनी जादे फाटल, बाकिर, सबकर जब कुछ-ना-कुछ फूट गइल, फाट गइल, त नीमन बात ई भइल कि झगड़ा फरियाऽ गइल। झगड़ा फरियाइल कि रजवा के साथी खेतिहरवा, अस-मन-जनिहऽ जे हमनी के भाई, कि बिदाई में जवन ऊ पाई, तवना में, दीन के दुहाई, ईमान के कमाई, कि आठ गो बखरा लगा लिहल जाई, एकए गो सातो हमन भाई के, त एगो ए भाई खेतिहरवो के, कि आगहूँ कुछ करी कुछ कमाई, कुछ सँची कुछ जोगाई आ अगिलकी पीढ़ी के चोर बिरादर के, भाई-भैवद्धी के कामे कुछ आई।

त चोर बिरादर के भाई-भैवद्धी के सातो भाई लागल लोग जोह में कि राज-रजवाड़ा से कहिया खेतिहरवा के होई बिदाई। एगो दूबर दरबान के कुछ  घूस-घास दियाइल त ऊ सीधे खेतिहरवे से भेंट करवा देलस कि हम का बताईं, इनहीं से पूछ ल कि कहिया होई इनिकर बिदाई। खेतिहर कहले कि काल्ह। चोर लोग काल्ह के कइल तइयारी बाकिर तइयारी के मोसल्लम खर्चा अकारथ गइल, बिदाई ना भइल। ना भइल त दूबर दरबान के फेरू कुछ घूस-घास दियाइल। त दूबर दरबनऊ फेरू से सीधे खेतिहरवे से भेंट करवा देले कि हम का बताईं, इनहीं से पूछ ल कि कहिया होई इनिकर  बिदाई। खेतिहर फेरू कहले कि काल्ह। चोरऊ कहले कि बे मरदे, तू त काल्हो कहले रहऽ कि काल्ह, लाज नइखे लागत, खेतिहर होके झूठ कढ़ावत ? त हँसले खेतिहर भाई, बंदा हरवाह, बादशा के इयार, कि भाई, हमार ई ना हउए बात, हम त कहलीं कि जाइब हम आज, ई त बादशा के बात कि जइहऽ तू काल्ह। चोरऊ सोचले कि जब बादशा के बात, त होइबे करी साँच। चोर लोग फेरू कइल काल्ह के तइयारी, बाकिर तइयारी के मोसल्लम खर्चा अकारथ गइल, बिदाई ना भइल। फेरू दियाइल कुछ घूस-घास। फेरू पुछाइल। फेरू ऊहे जबाब कि काल्ह। त भइल कि लाज नइखे लागत, बादशा के झुट्ठा बनावत, कहाँ भइल बिदाई तहार आज ? त कहले कि हमहूँ त ईहे कहलीं बादशा से कि कइसन तू राजा-बादशाह कि काल्ह तू कहलऽ कि काल्ह, आ कहियो के सप्फा पलट गइलऽ आज ? त कहले हा बादशा कि हम त भाई, जवन काल्ह कहलीं, तवने कहत बानीं आज, कि काल्ह। जब कहबे ना कइलीं कि आज हम करब बिदाई त कइसे करीं आजे बिदाई ! बिदाई होई काल्ह !

महिनवन बीतल चोरवन के, घूस-घास खियावत आ काल्ह के तइयारी सँपरावत। जमा-पूँजी लागल ओरिआय त सातो भाई बेबात के बात प झगरि जायँ, ई उनके रगरि जाय, ऊ इनके रगरि जाय। एह रगरा-रगरी के बिच्चे एक दिन के बात कि पता चलल कि आज नमाज के बाद अपना बादशा इयार से बंदा इयार कुछ मँगिहें। चोर लोग सोचल कि आज मँगिहें त काल्ह गाड़ी पर लदाई, परसों होई बिदाई। तले पता चलल कि आजे हो गइल बिदाई। त बिना कवनो सुबहित तइयारी के, सातो भाई धावा-धाई लागल लोग पाछा, त पावल कि ना हाथी ना घोड़ा, ना बोरी ना बोरा, पैदल पाँव दिल्ली के गली में सरसरसर चलल जाता, के ? त छछात जे बादशा के जिगरी इयार, से ! तीन भाई कहले कि बुला बादशा बैमनवा कुछ देलस ना, तीन भाई कहले कि बुला बंदा बउरहवा कुछ लेलस ना। बाकिर, एह बात पर छवो भाई झगरिते एकरा पहिलहिंए सतवाँ भाई बतवले कि एकरा अगलो के बगली में बाटे तरमाल, एकरा बगलो के बगली में बाटे तरमाल, पगड़ियो में बाटे भरपूर, आ झोरवा में त कुछ कहहीं के ना ! एह बात प सातो भाई के हुँकारी के आवत-आवत, बाकिर, बंदा पहुँच गइले धोबघाट। उहाँ, करेजा प ध के हाथ, सातो भाई देखल कि कइसे उन्हनी के हिस्सा के सँउसे  एक बगली माल, खेतिहर के जात, बंदा हरवाह, बम्मड़-बउराह, धोबी के पूत के सँउपलस, आ जइसे भइलहिंए ना होखे कुछ, अँइसे, मूँड़ी उठवलस आ चल दिहलस ! त पाँच भाई पाछा लगले, दू भाई रुकले कि हमनी के धोबी के पूत के नीके तरी मूँड़ के आइब जा, आपन हिस्सा वसूल के। कोशिश कइल लोग, बाकिर धोबी के पूत के धोए के आदत, दुन्नो भाई चोरवन के दुन्नो हाथे धो के, फींच-फचकार के गार के पसार देले। बाप-बाप करत भागल लोग त रस्ता में एक भाई मिलले कि इकवनवा सरवा पैने-पैना मरलस हा, एगो दुसरका भाई मिलले कि हमरा के त सइसवा ना, ओकर कुकुरा भँभोरलस हा। जिनका सैंतिस गो गदहा से ईंटा ढोआय, उनका किहाँ बाकिर,  बकियवा तीनो भाई, बड़ा गौं से, सोच-समझ के घात लगावल, केकरो भनक तक ना लागल आ बंदा के दीहल मोसल्लम असर्फी के गठरी उठावल आ चलत-चलत चल आइल लोग बिना कवनो आफत-अफदरा के घर से बीस हाथ बहरा ले। बहरा आ के देखल लोग कि आ-हा-हा, चारो ओर गदहे-गदहा…! सोचल लोग कि गदहे प बइठ के जो भाग चलीं जा त भगला के भागल आ तिन-तिन गो गदहा के आमद अलावा ! जब फान के गदहा प बइठल लोग त गदहन के रोस ई ना कि ई बइठल लोग, रोस मलिकवा प कि कइसन ई सरवा मलिकवा, कि बिना कवनो अरचो-परचो के, बिना कवनो पीठ-पोंछ-सुहुरावन के, तीन तिरछोलन के, अचके में हमनी के उपरे, अँइसे हुमच के अचक्के बइठवलस ! मय गदहा मिल के मलिकवा के मय खीस तीनो एह चोर चल्हाँकन प उतारल, दुलतिए-दुलत्ती बड़ी देर ले बतियावल। बात अभी बाकिए रहे तले तीनो जना जान आ असर्फी के गठरी, दुन्नो के छोड़ के, भगाय भ भागल। चाहल लोग जरूर, सातो-के-सातो भाई, कि ना कुछ आउर, त बाश्शा किहाँ जवन असर्फी के झोरा धराइल, तवने हथियावल जाय,  बाकिर सातो भाई मानल कि ए घरी, गरम-गरम दूध में हर्दी पकावल कुछुओ से जादे जरूरी। त पकावल लोग, मिल-जुल के पीयल लोग, जेकरा से अपना हाथे ना पीयल गइल ओकरो के मिल-बेवहर के पियावल लोग। पी-पा के बइठल लोग त भइल कि सब त गइल, अब का ? सातो भाई सन्मत कि जवन कुछ पवलस ई बंदा बउरहवा, सब कुछ त इहँवे लुटववलस, त का अब पिछुअवला में फैदा ? सातो भाई सन्मत कि बाँचल कुछ हइए ना, त ना अब पिछुअवला में फैदा। बाकिर, सातो के मन में कि जब डिठार में अतना ई पवलस खेतिहरवा, त चुपका त के जाने कतना ई पवले होई ! सातो भाई सोचले कि जब उपरे-उपर अतना लुटवलस त सोचे के बात कि भितरे-भितर कतना जुटवलस ! त सातो भाई सन्मत कि जब अतना दिन लागल गइल पाछ त अँइसे, अचक्के में छोड़ दिहल बहुते बेजाँय।

त लागल लोग बंदा आ बाश्शा आ बंदा आ बाश्शा के गदहा के पाछा। कहँरत आ भचकत, लँगड़ात आ भहरात। लागल लोग त तवन बात जानल लोग जवन बात ना बंदा के जानल, ना बाश्शा के जानल आ मोह-माया से दूर आ अपने में चूर, गदहवा के, जानल त का, न-जानल त का ! जानल लोग कि बंदा आ बाश्शा आ बंदा आ बाश्शा के गदहा जेने-जेने तेने-तेने, कबो अगाड़ी आ अक्सर पिछाड़ी, दूइ बैलगाड़ी। झाँक-झूँक के जानल लोग कि दुनो बैलगाड़ी में सत-सत गो कलसा। कलसा में का बा आ कतना बा — ई, चाहल त बहुते, बाकी जाने ना पावल लोग। जतने मरखाह लखात रहन गाड़ी के बैल, ओतने गड़िवान। सातो भाई सोचले, आपन-आपन घाव सुहुरावत, कि ठीक नइखे खतरा उठावल, जतरा में बनल रहल जाई, त कब्बो-ना-कब्बो त मोका-मोनासिब अपने से चल के इहँवा ले आई ! आइल। गाँव के गैंड़ा, पाकड़ के पेड़ झँखाड़ के नीचे, बाश्शा जब लिहले आलाप। बैलगाड़ी, दुन्नो, जब थथमल आ थम गइल, गड़िवान जब गाड़ी प से कूद के उतरले आ अलाप में अलाप मिलवले। तब तीन भाई पहिला बैलगाड़ी में, तीन भाई दुसरका बैलगाड़ी में घुसले। एक भाई पाकड़ प चढ़  गइले कि खतरा बतइहें। तले अइसन आइल गवनई के लहर-प-लहर कि एक भाई पाकड़ के पेड़ के उपरे से राग-में-राग मिलवले आ गाड़ी के भितरे से तीनो-तीनो भाई सातो-सातो कलसा के, कहाँ ले कि खोल के देखिते, त सब कुछ भुलाऽ के लगले बजावे, एँड़ी से मूँड़ी ले हिल-हिल के लगले धउरावे ताकधिनाधिनधिन। साज बुझाइल जइसे आप-से-आप सज गइल, आप-से-आप बज गइल बाज। अभाग बाकिर अइसन कि ओने गवनई  खतमाइल ना कि एने गड़िवान लोग फुटेहरी-चोखा के टंट-घंट में लागल आ सतुआ-पिसान के इन्तजाम खातिर एह गाड़ी से ओह गाड़ी ले अइसन शुरू भइल आवाजाही कि चोर लोग कसहूँ-कसहूँ गाड़ी से निकल के पाकड़ के पेड़ झँखाड़ प चढ़ के जइसे-तइसे जान बचावल। अब लागल ताका-ताकी कि कब पंच सूते कि कलसा लोग के खोल के देखाय आ तरमाल भेंटाय त चोराऽ के चल दिहल जाय। ऊ बेरा-घरी अइबे ना कइल। बंदा आ बादशा त सुतले निरभेद बाकिर गड़िवानन के त अँखिए ना लागल। भइल अधरात त आपने गाड़ी से आपने कलसा, चोर-अस उतार के आस्ते, धइलन स बंदा के मुँड़तारी-गोड़तारी आ बैलन के घंटी उतार के हाँक ले गइलन स खाली गाड़ी। चोर लोग के त ढेर देर ले बुझइबे ना कइल कि गड़िवानन के एह कारस्तानी प चिहाईं जा कि चल के कलसा चोराईं जा। एही दोपापाही में देर भइल तले छोटका भाई के साँप एगो लउकल, पाकड़ के डाढ़ से लपटाइल, बाँचे खाती आसन बदलले त पतई से डहँगी ले अइसन खड़खड़ाइल कि  अचक्के अचकचाऽ के उठ के बइठ गइले बाश्शा निनिआइल। बंदा जब करवट फेर के कहले कि अहो अभी सुत्तऽ, त सुनले जब ‘सुत्तऽ’, तब जाके नीन उनुकर नीके तरी टूटल। टूटल आ दूनो नैन खूलल त पहिले त लागल टकटक्की तब छूटल कँपकप्पी।  लगले बंदा के झोर के जगावे कि उट्ठऽ हो, का भइल, होता का, देखऽ, निरेखऽ, बुझाय त बूझऽ, आ बूझ के हमरो के तनिका बुझावऽ। बंदा देखले कि दूर, डगरल अस चलल जाता दुन्नो-के-दुन्नो बैलगाड़ी आ भीरी, एक, दू, तीन, चार… चउदह गो राखल बा कलसा। एगो कलसा के पेहान उठवले जा त हाय राम, हीरा आ मोती,  सोना आ चानी ! देख के, ई, अलगे जहुअइले, ऊ, अलगे भकुअइले। जहुअइनी-भकुअइनी जब छूटल त बाश्शा कहले कि भाई, बादशा के मँगला प जवन भेंटल, देखऽ, बिधि के बिधान, कि तहरा तवन भेंटल बेमँगले, बिना कवनो हाथ पसरले। अब जोड़ के हाथ आ मूँद के आँख, मने-मने सरधा से एक बेर सुमिरऽ कि कइसे भगवान सिंघ भाई के भेजल दूगो फरिस्ता लो’ आइल, अपने त संगे-संगे गावल, आ अलोप फरिस्तन तक से अपना, गवावल-बजवावल, संगे-संगे कइल लोग खियान-पियान आ बिरत रात में ललसा के कलसा उतार के आस्ते से, बिना कुछ कहले, बिना कवनो लदले एहसान, निकल गइले लोग, पाकड़ के डाढ़-पात खड़खड़ाऽ के, जगाऽ के। आ सुमिरन के बाद, आवऽ, दुचार गो कलसा तू उठावऽ, दुचार गो हम, बकियवा गदहा प लदाय आ घरे चलल जाय। बंदा कहले कि घरे त चलल जाय, बाकिर अतना कुल्ह लाद के काहे ? जवन भगवान इहाँ ले पहुँचइले तवने भगवान घरे लेके अइहें…! बाश्शा बेचारू अथोर समझवले कि अपना हिस्सा के काम त भाई भगवान सँपरइले, थरिया परोस के धइ देले सोझा, आगे के काम खनिहार के, कि कवर उठावे, चबावे, भला ऊहो भगवाने सँपरावें ? त कहले बंदा कि से त ठीक बा, बाकिर परोसल थरिया सोझा त धराय ! अब एकर का माने कि बइठल बानीं दलान में आ खाय खातिर थारी धराइल सीवान में ! अनसाऽ गइले बाश्शा कि बुड़बकदास, दलान में रहितऽ त दलान में दिहिते, जब बड़ले तू बाड़ऽ सीवान में सुत्तल, त सीवाने में न दीहें बेचारू भगवान ! एगो तोहरे काम त नइखे न उनुका, अउरियो त बा उनुका दुनिया जहान ! त हँसले बंदा कि देखस आपन दुनिया-जहान, केहू छेंकले बा, बाकिर, ईहो त जानस कि बंदा के बसगित ना पाकड़ के पेड़ त, ना खेत के मेंड़ प। छावल-छुअल घर हइन उनुका आ लीपल आ पोतल दुआर !

तब्बो, अपना से बाश्शा बहुते समझवले, बाकिर का, कि एन्ने ऊ जतने समझइले, ओन्ने, पाकड़ प टँगाइल सातो भाई ओतने भगवान से मनइले कि अड़ल रहस बंदा, समझस मत बाश्शा के कतनो समझइले ! त सुनले भगवान, सातो भाई चोर के अरदास। कइसे ना सुनितन, करेजा से रहुए जे निकलल ! बाश्शा बहुबिध जुझले, बाकिर, बंदा, ना बुझले बाश्शा के बात, त नाहिंए बुझले।

ओही अधरात बंदा, बाश्शा के धइलन हाथ आ आगे-आगे चल दिहलन। पाछे-पाछे गदहा। बाश्शा के बुझाइल कि पछवा वाला गदहवा से बड़का गदहवा त हमरा अगवा-अगवा…। एने ई लोग आँखी के अन्ह भइले, ओने सातो भाई चोर, एक-प-एक दन्न-दन्न पाकड़ के पेड़ प से उतरले। ई ना देखल लोग कि सँपवा सर्र-से उन्हनी के पहिले उतरल। उतरल आ खुलल-मुँह कलसा में सर्र-से समा गइल। सब जब उतरि आइल, बड़कू कहले कि केहू हड़बड़ाई मत, बनले बोलत बा बिगड़ल बात, अब खबरदार, केहू गड़बड़ाई मत। कहले कि मँझिलकू, तू तनी हाथ लगा के देखऽ कि कलसा में का बा। मँझिलकू खुलल-मुँह कलसा में जतना बेग से हाथ लगवले ओकरा से अधिके उदबेग से निकलले, निकलल आइल हाथ से लपटाइल हतहत गो साँप। कहऽ कि डँसलस ना, झरले त झर गइल, सर्र-से निकल गइल। बाकिर का, कि जात-जात बिना कुछ कहले बहुत बात कह गइल। एगो त ई कि एह कलसवन बा में का ? कवनो में साँप, कवनो में बिच्छी। कवनो में हाड़ा, कवनो में बिर्हिनी। कवनो में चूँटा होई, कवनो में माटा। बिस्तुइया, कनगोजर। दोसरे ई कि ई कुल्ह बदशहवा आ ओकरा इयरवा के चाल। हमन के त भोला-भाला चोर, जरिको ना जनलीं  जा कि हमनी के जानत ई बाड़न स, आ लगलीं जा पाछा। जरिको ना जनलीं जा कि हमनी के जेकरा पाछा, असल में त ऊहे बा लागल, हमनिए के पाछा ! चोरवन बेचारन के डाहे बदे, बाप-रे-बाप, हतना नौटंकी !  हँइसे हरियरी सुँघाऽ के बोका बनावल ! धोबी से धँगवावल, इकवनवा के पैना से पिटवावल, सइसवा के कुकुरा से कटवावल, गदहन के दुलत्ती खियावल, आ तवनो से ना मन मानल त हे देखऽ हो, हई साँप आ बिच्छी आ हाड़ा आ बिर्हिनी आ चूँटा आ माटा, बिस्तुइया, कनगोजर…! अइसन अनेत ! बादशा के इहे बादशाही ?! ईहे ह सरवा एह बंदा के खेती-किसानी ?! कहँवा से सिखलन स इन्हनी के ई नाटकबाजी ? त छोटका भाई बतवले कि ई जवन इन्हनी के साथी बा, बाश्शा, तवने ह असल नाटकबाज। हम का जानीं कि खाली, करबे करेला ना सरवा ई नाटक, नाटक के जियबो करेला ई सरवा !

त भइल कि तजबीजल जाय एकर सजाय। तजबीजल गइल कि एक्के उपाय। कि जेकर ई पठवल बलाय, ओकरे कपार प पटकल जाय। कि उठावल जाय कलसा आ ओकरे घरे गिराऽ आवल जाय ई साँप आ बिच्छी, ई हाड़ा आ बिर्हिनी, ई चूँटा आ माटा, बिस्तुइया, कनगोजर…। त भारी त बहुत रहे, बाकिर, खीस के बल से उठवले जा सातो भाई चउदहो कलसा आ चलल लोग बाई के बेग में, धरती धमकावत।

धमकावे दीं उन्हनी के धरती। कतने धम-धम आ कतने गो धमक अपना करेजा में धइली ई धरती। ईहो धरिहें। जइसे धइली ई धरती बंदा बो हरवाहिन के बिरह-बियोग। ई बिरह-बियोग जेकरा कहे जोग, कहे, जेकरा सुने जोग, सुने, आपन त अतनवे भ जानल कि बंदा बो हरवाहिन अनेसा के नीन में मातल, सनेसा के सपना में जागल, जब दुआरी के सिकड़ी बाजल, अइसन हड़बड़ाऽ के उठली कि केंवाड़ी खोले चलली त घिरसिर के कलसा में केहुनी लागल आ कलसा भुँइया छितराऽ के नौ-नौ ठँइया। बाकिर, भला भगवान कि कलसा फूटल, करम ना, करम हमार जस-के-तस लवटल। ओसहीं जगमग। एगो सँघाती के जोह में गइले त एगो सँघाती के जोड़ के अइले। कहली कि का भइल, कइसे, कुल्ह कह के सुनावऽ, त कहले कि आपन हम काल्ह सुनाइब, आज तू आपन सुनावऽ। त कहली कि ओने तू गइलऽ एने दिन बदरियाइल, बेलावल बैल लोग लवटि के दुआरी प आइल, आ एकरा से आगे त हमहूँ अब काल्हे सुनाइब। अतने जानऽ कि भले तहार रस्ता अगोरत, बाकिर एक दुख ‘संगे-संगे-तहरा-ना-रहला-के’ छोड़ के आ एक ‘दुख-आउर’ के अलावा बाकी कुछ बाउर ना बीतल। पुछले कि एक दुख आउर का ? त कहली कि ऊहो सहाउर। त कहले कि भलहीं सहाउर, बाकिर, बात त बतावऽ कि कवन दुख आउर ? त कहली कि केहुनी से लाग के निसने एगो कलसा के फूट के छितरइला के दुख, एकरा अलावा कुछ आउर ना।

बाश्शा जब देखले कि कलसा के फूट के छितरइला के जतना पछतावा मलिकाइन के, ओतने मलिकार के पछतावा, त लगलन धिरकारे कि बम्मड़ तुनाहीं, चउदह गो कलसा तू तज अइलऽ पाकड़ के फेंड़ त, तवना के कुच्छ ना, आ एगो के फुटला के अतना गुनावन, अदिमी तू हउअ कि निछुने पैजामा ?! त बंदा बतवले, अँइसे कि जइसे कि भेद के कवनो ई बात, कि भाई, कलसवा ई पानी के रहुए…।

थाकल-खेदाइल सब, सब बात काल्ह प छोड़ के, चैन से सुत्तल, बाश्शा के बाकिर, आँखिन में नीने ना। ढिबरी के टिम-टिम में टुकुर-टुकुर छान्ही निहारत लगले सोचे कि कइसन ई नाटक रचाई, कि आखिर में ना कवनो सुक्ख, ना कवनो दुक्ख। त आखिर में काथी ? त कुछ ना, कुच्छो ना, बंदा हरवाह के बउराही ! कुछ अवरू ऊ सोचिते जरूरे, तले गाँव भ के कुक्कुर, एक्के संग लगले जा भूँके। अब भूँकल ओरिआय त आगे कुछ सोचें भा सुत्तें। बाकिर, भूँकल त अँइसे कि जइसे कि दूर से चलल आ कले-कले अवरू भिरियात गइल। त जबरी मुँदले ऊ आँख। तले अइसन ना हड़हड़हड़, अइसन ना खड़खड़खड़ मच्चल, कि उठ के बइठ रहले बाश्शा कि परवरदिगार ! आन पहुँचल का हो कयामत के रात ! धरती के छुअले कि डोलत त नइखे, त पवले कि डोलत त नइखे। बाकिर, देखले जब छान्ही, त अँइसे कि जइसे कि हहास बन्हले आन्ही…।

एह बंद कोठारी के छान्ही के आन्ही में बाश्शा बेचारू उधिआयँ त उधिआय दिहल जाय, चोरवन के सोचीं कि ना होइत भितरे जो बदला के आग-अंगार त कइसे के ठनितन स गाँव भ के कुकुरन से रार, कइसे कर पइतन स गाँव भ के कुकुरन के पार। बिरत रात पवलन स ढिबरी टिमटिमात, त जान त गइलन स कि ईहे घर बंदा हरवाह के, बाकिर, दुआर प देखलन स बैल मरखाह आ गदहा उपरवार, त कहलन स कि फार के छान्ह सीधे कपार प गिरा दिहल जाय, कलसा चउदहो के साँप आ बिच्छी, हाड़ा आ बिर्हिनी, चूँटा आ माटा, बिस्तुइया, कनगोजर। त फान के चढ़ले जा, ओदार के फरले जा छान्ह आ अपना के बड़ा बचा के, बड़ा तन्देही से दनाक दे दिहले जा उलाट, एक साथ कलसा चउदहो। बाकिर का, कि जब साँप के सर-सर सुनाइल ना, सुनाइल ना हाड़ा के बिर्हिनी के भन-भन, झन-झन के झर-झर सुनाइल झन्कार, त फाँफर से झाँकल लोग। झाँकल लोग त हाय हो राम, हीरा आ मोती, सोना आ चानी आ पन्ना, जवाहर… झराझर…। बरखा अस बरखत गहना आ गुरिया, असर्फी-तसर्फी… सातो भाई सातो भाई के तकले, त सातो के सातो मुँहे करखी ! झाँईं-अस आइल आ सातो के सातो भाई छान्ह से लोंघड़ाइल आ लद्द-लद्द तर-ऊपर धरती प आइल। उठहूँ भ बाँचल ना हूब।

त अब जब उठहूँ भ बाँचल ना हूब, त भाग के जइहें जा थोरे, रहे देल जाय जहाँ बाड़न जा तहँवे भहराइल, जतना कहँरत ओकरा से अधिके हहरत, आ ओकरो से अधिका एह बात प झगरत कि कवना कुभाई के रहे ई सलाह कि जेकर ई भेजल बलाय, ओकरे कपार प पटकल जाय ! त अब जब कुछ कहँरल निकल जाय इन्हनी के, निकल जाय कुछ-ना-कुछ हहरल आ झगरल, तब इहँवा आइब, आ आइब, त बात मानीं, इहाँ सब के इहें रउरा पाइब। तले बाश्शा से मिल लीं कि आन्ही में उधियइले ना, त कइले का ! पहिले त खरहरा उठइले आ चहुँओर छिंटाइल गहना-गुरिया, असर्फी-तसर्फी के अहार-बहार के एकोर कइले, धरन-बँड़ेरी प जवन अँटकल रहे, लटकल रहे, तवना के लाठी-लग्गी लगा के उतरले। तवना के बाद, कलसा उठवले आ साज देले घिरसिर प तर-ऊपर। तवना के बाद, कुल्हि कुकुर-भूँक आ हड़हड़-खड़खड़ के चाँप के, अबहीं ले सुत्तल बंदा हरवाह के झोर के जगवले कि जागऽ ए कुम्हकरन के नाती, आ जा के जगावऽ कुम्हकरन के नतिन पतोह के। त करवट बदल के बंदा बड़बड़इले कि सुत्ते द भाई, महिनवन के हउए जगराता, छटाक भ के नीन से कइसे फरियाई ! त कहले बाश्शा कि जब ले तहार जगराता फरियाई तब ले त हमार खुशखबरी निझाऽ के बुताऽ जाई ! सुनते के साथ कि कवनो खुशखबरी के बात, बंदा बो उठ के बइठ रहली चट-से कि कइसन खुशखबरी ! त बाश्शा बतवले कि जा के घिरसिर प देखऽ कि कइसे, एगो तू कलसा गँववलू, तवना के बदला में कौ गो कलसा तू पवलू ! बंदा बो चलली चिहाऽ के, त बंदा चहले धधाऽ के, कि चलीं तनी देख आईं हमहूँ। त बाश्शा धइले उनुकर हाथ कि तहरा बदे भाई, खुशखबरी कुछ आउर। ऊ का ? त कहले कि ई कि तहरा प नाटक हमार, अब पूरम्पूर पूरा। आ अतने ले थोरे, अपना नाँव के जोरे। बंदा पुछले कि का नाँव ? बाश्शा बतवले कि नाटक के नाँव ‘भगवान छपरफार’। बंदा चिहइले कि ई कइसन नाँव ? त बाश्शा लगले सुनावे शुरुए से नाटक के सँउसे कथानक कि कइसे बादशाहूदीन बादशा के बादशाही में जहाँ कहऽ तहाँ, जतना कहऽ ततना, अमन कहऽ अमन, चैन कहऽ चैन। कि कइसे बादशाहूदीन बादशा जेके चाहें कि डेराय, का मजाल कि ऊ ना डेराय ; जेके चाहें कि ना डेराय, का मजाल कि ऊ डेराय। कि कइसे एक दिन के बात कि बादशाहूदीन बादशा के मन में आइल कि अहेर करे जाईं…

सुनावत गइले, सुनावत गइले कथानक, बाकिर का, कि जब अंत में आइल कि फार के छान्ही लगलन भगवानजी चउदह गो कलसा से हीरा आ मोती आ सोना आ चानी के गहना आ गुरिया, असर्फी-तसर्फी बरिसावे त बंदा ना पतियइले। ना पतियइले त बाश्शा उनुकर हाथ धइले, धइले-धइले गइले आ उपरे देखवले कि देख ल भगवानजी के फारल छान्ही, आ भुँइया देखवले  कि देख ल उनुकर बरसावल ई हीरा आ मोती आ सोना आ चानी के गहना आ गुरिया, असर्फी-तसर्फी आ तवना के बाद, देख ल जा के घिरसिर प चउदह गो कलसा। का बंदा हरवाह आ का बंदा बो हरवाहिन, दुन्नो जन गहले जा बाश्शा के गोड़ कि कइसन भगमानी रउआ बानीं कि पा लिहलीं भगवन के दरसन, जियते जिनगानी ! कि हमनी के कइसन अभागा कि सोवत न जागा ! त हँसले बाश्शा कि छोड़ऽ जा गोड़वा, गिरइबऽ जा का ? हमरा त बरिसल लउकल बस, लउकल बरसावल, तहरा ना लउकले त हमरो त नाहिंए लउकले बरिसावत भगवान। आ सोच के देखऽ कि कइसन बम्मड़ तू बाड़ऽ, कि अतनो ना जनलऽ कि जवन भगवान दूइ बैलगाड़ी प लाद के चउदह गो कलसा पठवले, तवन भगवान तवने कलसवन के लाद के कपारे प इहँवा ले अइहें ? भला भगवान किहाँ कमकर-करिन्दा के कवनो अकाल !

सुनले त बंदा आ बंदा बो दुन्नो जन उठले हबड़ाऽ के, कि हाय राम, उनुकर करिन्दा लोग आइल, पैदल चल के, कलसा कपार प उठा के, त धरम रहे हमन के कि भेजितीं जा दुचार कवर नीमन खियाऽ के, सँपरित त पियरी पहिराऽ के ! कहिहें जा भगवान किहाँ जा के कि अइलीं जा छूँछा, केहुओ ना पूछा, त कइसन मन होई खराब भगवान के ! त भइल कि देखल जाय खेत-बधार में जा के, कवन ठेकान कि कवनो गाछ-बिरीछ तर बइठल सब भेंट जायँ, हाँफत-सुस्तात !

भला कि खेत-बधार ले धावे के ना परुए। दुअरिए प मिल गइले प्रभुजी के  सातो करिन्दा। कहँरत आ हहरत। बंदा आ बाश्शा बारी-बारी से सातो के टांग-टुंग के ले अइले भितरे। बंदा बो दूध में हर्दी पकवली, सातो के पियवली। बाश्शा कुछ जड़ी-बूटी बतइले, बंदा ले अइले, बंदा बो जवन पीस के लगावे के रहे तवन पीस के लगवली, जवन गार के पियावे के रहे तवन गार के पियवली। नीम के पानी गरमा के नहवावल गइल, लेटाइल कपड़ा धोआइल, फाटल सियाइल। खियावल-पियावल गइल, निनिआय लागल लोग त बेना झुलाऽ के, लोर मे घोर के लोरी सुनाऽ के सुतावल गइल। जब जागल लोग सातो भाई त पावल लोग सातो भाई कि तबियत अब ठीक बा, हाथ-गोड़ नीके तरी हिलत बा डोलत बा, जोड़-जोड़ में जवन दरद रहे तवन नदारद बा। एक भाई कहले कि जब टांग-टुंग के भितरे ले अइलन स, हमरा त जनाइल कि काट-कुट के अँगना में गड़िहन स, बाकी ना कटलन स, ना गड़लन स, त अपना से बढ़ के जनइलन स। एक भाई कहले कि जब दूध में हर्दी पियवलन स, हमरा त बुझाइल कि जहरवो एही में होई, महुरवो एही में होई, बाकिर, ईहे ना कि ना जहर रहे, ना माहुर, ईहो, कि पियते बुझाइल कि जान में जान मतिन आइल। एक भाई कहले कि जब बूटी पिसाइल हमरा बुझाइल कि एही में पीस के मरिचाई, घाव प लगावल अब जाई, बाकिर,लगवला प बुझाइल जइसे जांगर जुड़ाइल। एक भाई कहले कि नीम के पानी जब लागल गरमाय त हमरा त बुझाय कि नीके तरी खउलइहन स, हरहरा के  उझिलहन स देह प, बाकी इनरा प जा के, ठंढा पानी मिला के, जब नेह से नहववलन स, हमरा त मन में आइल कि नहाते रह जाईं। एक भाई  कहले कि हमरा त बुझाइल कि इनार प हमनिए से पानी भरवइहन स, भरते बेर पाछा से मरिहन स लात, इनरवे में ढकेल के मुँअइहन स, बाकी का, कि अपने खिंचलन स घइलन पानी, हम त अब सोच लेले बानी कि छाइए के जाइब अब आपन उजारल हम छान्ही। एक भाई कहले कि जब लगलन स कपड़ा उतार के धोए, हमरा इयाद परल धोबिया के पूत, कि बुला ओसहीं हमनियो के धो के, फींच-फचकार के गार के पसरिहन स, बाकिर का, कि आहा ! जब छुअलन स, रूई के फाहा ! एक भाई कहले कि भाई, खइला-पियला के बाद, जब आँख निनिआइल आ ई तीनो जन बेना झुलावत, लोरे घोर के लोरी सुनावत भिरियाइल त हमरा त बुझाइल कि बुला सुतला में घेंटी दबाई लोग, सुतले मुँआई लोग। कि इहाँ के रेवाज ह का दो कि मूँअल के नेवर्तक मुँअलका के मुँअला के बादे रोआई-गवाई, मुँआवल के नेवर्तक मुँआवे के पहिलहीं रोआई-गवाई… बाकिर का , कि खुलल जब आँख त देखलीं हा कि सातो-के-सातो हमन भाई सरगे में बानीं, नरक में नइखीं जा…।

अभी आपन-आपन गावते रहन सातो भाई, तले बंदा हरवाह आ बंदा बो हरवाहिन आ बाश्शा कुछ चर-चबेना, कुछ भेली-भूँजा लेके आइल आ जवन आइल तवन सातो के बीच में चदरा बिछाऽ के रखाइल। कहले बंदा, दुनो हाथ दसो नोह जोड़ के कि भाई जी लोग, माफ कइल जाई, अइसन  गलती अब आगे से ना होई। कब्बो अब घर के दुआरी प बैल भा गदहा, कुछ ना बन्हाई। अबकी जब रउआ सब आइब, घर के दुअरिए से आइब। हमने के गलती से, अबकी बे, सातो आप सभनी के, घर के पिछुत्ती से, छान्ही प चढ़े परल, खपड़ा आ नरिया से लड़े परल, आ ढह के, ढिमिलाऽ के भुँइया में गिरे परल, सहे परल घाव, खाय परल चोट,  त हे हो छछात भगवान के करिन्दा जी लोग, जवन चाहीं हमनी के दे दीं सजाय, बाकिर का, कि अपना मलिकार से बताइब मत, जा के ई बात, कि रउरा सब साथ, कइसे आ कइसन आ कतना भइल घात…।

कहत के साथ बंदा के आँख छलछलाइल, बाकिर सुनत के साथ, सातो भइयवन के आँख से बह-बह के बहरी ले आइल। त थोर-बहुत बड़कू आ थोर-बहुत छोटकू, थोरे मँझिलकू, सँझिलकू आ थोर-बहुत छोटकू से बड़कू आ उनुका से बड़कू आ उनुको से बड़कू बताऽ गइले सब-सब साँच, कि कहाँ भगवान के करिन्दा आ कहाँ हमन चोर-चुहाड़, धरती के भार भइल, अबहिन ले जिन्दा ! बतवले आ चउदहो हाथ से छवो गोड़ छनले कि आईं जा तहरा कुछ काम त जिनिगी सुकलान ! त कहले बंदा कि कइसन साधू आ कइसन सिपाही आ कइसन चोर, जेकर जइसन चाव, जेकर जइसन इच्छा, बाकिर भगवान, जेकरा के चुन-गुन के आपन बनवले करिन्दा, ऊहे भगवान के करिन्दा। त तोनहन के हाथे जइसे-जवन-जतना सब भेजले भगवान, ओमें जतना गाँव भ के हिस्सा, ओतने तहार आ ओतने हमार। आपन लेके जो चाहऽ जा जाइल त कइसे भला रोके हम पाइब, बाकिर, हमार त अतने अरदास कि पहिले साथे मिल के गाँव भ में बैना बँटवा दिहितऽ जा, तब आपन हिस्सा उठवा लिहितऽ जा। तोनहन के हाथे आइल, तोनहने के हाथे बँटाइत त ना केहू देला के गुमाने गुमसाइत, ना केहू लेला के लाजे मसुआइत। त कहले जा सातो भाई कि बाँटब जा भाई, बँटवाइब जा भाई, बाकिर का कि भगइबो जो करबऽ त अब, जाइब जा त ना, आ ना, आ नाहिंए ए भाई। एक भाई कहले कि हम देवाल उठाइब, दुसरकू कहले कि हम छान्ही छाइब। तिसरकू कहले कि हम गोतब सानी, चउथकू कहले कि हम भरब कुँइया से पानी। पँचऊँ कहले कि खेत बाकिर हमहीं पटाइब, छठऊँ कहले कि खेती-किसानी में हमरा से अधिका सहाय त रउरा केकरो ना पाइब। सतऊँ कहले कि हम बाकी अपना भउजिए के काम में हाथ बँटाइब। त कहली बंदा बो भउजाई कि अइसन देवर अब कहँवा हम पाइब !

बाश्शा कहले कि एक बात बाकिर हमार। कि तोनहने सात के बात के बखान से नाटक में हमरा, असल अब आइल बा जान। तोनहने के अरनक आ बरनक से चमकी आ गमकी ई नाटक, नाटक से बढ़ के नौटंकी कहाई। तोनहने के पुन्ने-परताप कि अब जब खेलल ई जाई, त देखनिहारन के लागी धरनिहार। सतमहला समियाना के राखे के होई इन्जाम। त भाई हो सात, अजुए, अबहिंए सँकारऽ जा कि खेलल जब जाई ई नाटक, ‘भगवान छपरफार’, त बिना कवनो ना-नुकुर, बिना कवनो धुकुर-पुकुर, बात हमार मनबऽ जा, सातो भाई सात किरदार में अइबऽ जा…। त कहले जा कि काहे ना आइब जा…आइब जा जरूर, सिखइबऽ त सीखब जा काहे ना, नाटक-नौटंकी के सब-सब सहूर… बाकिर, हमनियो के बा एगो बात, कि घोड़ा बनइहऽ, धउराऽ लीहऽ, हरिना बनाऽ के कुदवाऽ लीहऽ, बनाऽ लीहऽ बाघ भा सियार, सीखब जा सवखे से गरजल आ सवखे से सीखब जा फेंकरल, बैल बनवाऽ के नधवाऽ लीहऽ, गदहा के दीहऽ किरदार, लतियइहऽ, दुलत्ती में तनिको जो कम्मी तू पइहऽ, कुक्कुर बनवा के भुँकवा लीहऽ, बाकिर… आ बाकिर… सातो भाई चोर के किरदार, हमन से करावे के सोचबो जो कइलऽ, त भाँड़ में जा तू, आ भन्सार में जाय तहार नाटक…!


-चंद्र-विद्यार्थी-1-1280x1623.jpg

Hum BhojpuriaMarch 21, 20221min1430

विनय बिहारी सिंह

एमे कौनो दू राय नइखे कि आदि शंकराचार्य सनातन धर्म के एने-ओने छिंटाइल विचारधारा के एकीकरण क दिहले। उनकर जनम केरल के मालाबार इलाका के कालड़ी गांव में नंबूदरी ब्राह्मण परिवार में भइल रहे। पिता- शिवगुरु आ माता- आर्याम्बा परम ईश्वरभक्त रहे लोग। शंकराचार्य के जन्म सातवीं शताब्दी के मानल जाला। बाकिर एगो मान्यता बा कि उनुकर जनम 508 ईसा पूर्व आ मृत्यु 474 ईसा पूर्व भइल रहे। त हमनी के एकरा पर ढेर सोचला के जरूरत नइखे। ईहे मानि के चलेके बा कि आदि शंकराचार्य ईश्वर के एगो अवतार रहले। काहें से कि ऊ सिरिफ 32 साल के आयु तक जियले। एही बीच में ऊ अद्वैत वेदांत के ठोस आधार बना दिहले, विविध विचारधारा के एकीकरण कइले, उपनिषद आ वेदांत के सूत्र के व्याख्या कइले, बिसेस रूप से ईश, केन, कठ, प्रश्न, मुंडक, मांडुक्य, ऐतरेय, तैतीर्य, वृहदारण्यक आ छांदोग्य उपनिषद के विलक्षण भाष्य लिखले, ब्रह्मसूत्र के व्याख्या कइले, चारो दिशा में चार गो पीठ- ज्योतिष्पीठ (बद्रीनाथ, उत्तराखंड), गोवर्धनपीठ (पुरी, उड़ीसा), शारदापीठ (द्वारका, गुजरात), आ श्रृंगेरीपीठ (मैसूर, कर्नाटक) में स्थापित कइले। एकरा अलावा ऊ दसनामी (दस प्रकार के) संप्रदाय बनवले, जवना के नांव ह- गिरि, पर्वत, सागर, पुरी, भारती, सरस्वती, वन, अरण्य, तीर्थ आ आश्रम। एही से उनुका के ढेर लोग भगवान शिव के अवतार भी कहेला।

आदि शंकराचार्य के जनम के लेके एगो बड़ा रोचक प्रसंग बा। कहल जाला कि माता आर्यांबा आ पिता शिवगुरु के कई साल ले कवनो संताने ना भइल। लागत रहे कि अब माता आर्याम्बा बिना संताने के रहि जइहें। घर के लगिए एगो शिव जी के मंदिर रहे। दूनो परानी ओही मंदिर में पूजा आ ध्यान करे बइठि गइल लो आ ठानि लिहल लो कि जब तक भगवान शिव के पुत्र पैदा होखे खातिर आसिरबाद ना मिली ऊ लोग ओहिजा से टस से मस ना होखिलो। चाहे मृत्यु काहें ना हो जाउ। त कहल जाला कि भगवान शिव कृपा सिंधु हउवन, किरपा के सागर। एह दूनो परानी के बिना खइले-पियले कठिन तप देखि के शिव जी के मन पसीज गइल। ऊ प्रकट हो गइले आ कहले कि बर मांग लोग, का चाहीं। कहाला कि भगवान के सब मालूम रहेला कि के का चाहता। बाकिर उनुकर लीला अइसन ह कि ऊ भक्त के मुंह से ओकर कामना सुने के चाहेले। त शिवगुरु जी कहलन कि प्रभु, हमनी के कौनो संतान नइखे। किरपा करीं आ एगो पुत्र प्राप्ति के आशिरबाद दे दीं। भगवान शिव कहले कि तोहरा लोगन के लइका होखी। बाकिर एगो शर्त बा- तू ढेर उमिर के लइका चाह तार त ऊ बुद्धिमान ना होखी। कम उमिर के लइका होई बाकिर ऊ परम बिदवान होखी। कइसन लइका चाह तार। शिवगुरु स्वयम परम विद्वान रहले, उनुकर माता भी विद्वान रहली। तुरंते कहले- प्रभु, कमे उमिर के लइका दीं, जवन परम विद्वान होखे। तब माता आर्याम्बा के कोख में आदि शंकराचार्य आ गइले। बाकिर उनुका जनम के कुछए महीना बाद पिता शिवगुरु के देहांत हो गइल। जनम के पहिले शिवगुरु अपना मेहरारू आर्याम्बा के वेद-पुराण के पवित्र प्रसंग आ धार्मिक, आध्यात्मिक कथा सुनवले ताकि आदि शंकराचार्य के कान में ई कुल बाति जाउ। आदि शंकराचार्य के आठ बरिस उमिर भइल त उनुका वेद, पुराण, उपनिषद आदि के परम ज्ञान हो चुकल रहे। उनुका मन में परम वैराग्य के भाव उठल। ओही घरी ऊ अपना महतारी से आज्ञा ले के गुरु के खोज आ साधना खातिर घर छोड़ि दिहले।

उनुकरा संन्यास लिहला के भी एगो कहानी बा। घर का लगे अलवाई नदी बहत रहे। ओही में माई-बेटा नहाए गइल लोग। अचानके आदि शंकराचार्य के एगो गोड़ मगरमच्छ पकड़ि लिहलसि। उनुकरा माई के त जइसे पराने निकलि गइल। ऊ रोए लगली। त आदि शंकराचार्य कहले कि ए माई तूं हमरा के संन्यास के आज्ञा दे देबू त ई मगरमच्छ से बांचे खातिर हम प्रार्थना कर सकतानी। माई कहली कि ठीक बा। तू संन्यास ले लीह। बाकिर तोहार जान बांचि जाउ। ज्योंही माई संन्यास के आज्ञा दिहली, मगरमच्छ आदि शंकराचार्य के गोड़ छोड़ि दिहलस। लोग कहेला कि भगवाने मगरमच्छ के रूप में आइल रहले।

आदि शंकराचार्य गुरु के खोज में निकलले त उनुका मन में गहिर आस्था रहे कि गुरु जरूर मिलिहें। ऊ पैदले, नंगे पैर जगह-जगह भ्रमण कइलन। कठिन खोज के बाद आखिरकार हिमालय के बद्रीनाथ के एगो आश्रम में गुरु गोविंद भगवत्पाद से भेंट होइए गइल। आदि शंकराचार्य के बुझा गइल कि ईहे हमार गुरु हउवन। गुरु पुछले कि तूं के हव। आदि शंकराचार्य कहले कि एह शरीर के पिता के नाम शिवगुरु ह। बाकिर हम के हईं, ईहे जाने खातिर हम रउवां शरण में आइल बानी। विनम्र प्रार्थना बा कि हमरा के शिष्य बना लीं। गोविंद भग्वतपाद जी जानत रहले कि ई हमार शिष्य के लायक लइका बा। ओह दिन से आदि शंकराचार्य ओह आश्रम के निवासी हो गइले आ अद्वैत दर्शन के शिक्षा प्रारंभ हो गइल। शिक्षा पूर्ण भइल त ई देश भर के भ्रमण कइलन आ जगह-जगह आपन चेला (शिष्य) बनवलन। बनारस में मंडन मिश्र जइसन विद्वान के शास्त्रार्थ में हरा दिहलन आ उनका के आपन चेला बनवलन।

एक बार के बात ह कि आदि शंकराचार्य गंगा में नहा के अपना चेला लोगन के साथे वापस आवत रहले। सामने से एगो मइल-कुचइल चांडाल चारि गो कुकुर ले के आवत रहे। चेला कहलन स कि चांडाल रास्ता से हटि जा, हमनी के गुरु जी गंगा असनान क के आवतारे। चांडाल सामने आके ठिठकि के रुकि गइल। कहलसि कि हमरा देहि के रउवां सब चांडाल कहतानी। बाकिर हमार आत्मा त ओइसने बा जइसन राउर बा। त केकरा के हटे के कहतानी, देह के कि आत्मा के? रउवां सब त विद्वान हईं सभे। आत्मा पवित्र ह। आदि शंकराचार्य के लागल कि ई कौनो साधारण व्यक्ति ना ह। ऊ तुरंते हाथ जोड़ि के चांडाल के प्रणाम कइले आ कहले कि महाराज रउवां के हईं, रउवां निश्चय रूप से मनुष्य के रूप में कौनो देवता हईं। ई सुनते चांडाल भगवान शिव के रूप में बदलि गइल। भगवान शिव के गुरु आ चेला लोग चरण छुअल लोग आ धन्य भइल लोग। चारि गो कुकुर चारि गो वेद के रूप प्रकट भइलन स।

शंकराचार्य के आनंद के कौनो ठेकाना ना रहे। शिव जी कहलन कि तोहरा के हम आसिरबाद दे तानी कि तू ब्रह्मसूत्र पर भाष्य लिखब। तब तक ले ऊ भगवत् गीता पर भाष्य लिखि चुकल रहले। त ब्रह्मसूत्र पर भाष्य लिखत के बेरी एगो अउरी घटना भइल। नदी से नहा के आदि शंकराचार्य वापस लौटत रहलन त एगो साधु उनुका से ब्रह्मसूत्र के एगो श्लोक के अर्थ पुछलसि। आदि शंकराचार्य ओकर अर्थ बतवलन। एह पर ऊ साधु उनुका से शास्त्रार्थ करे लागल। आठ दिन ले शास्त्रार्थ भइल। शंकराचार्य के लागल कि ई कौनो साधारण साधु ना हउवन। ऊ हाथ जोड़ि के प्रार्थना कइलन कि रउवां आपन असली परिचय दीं। रउवां के हईं? तब पता चलल कि ऊ ब्रह्मसूत्र के रचयिता वेदव्यास हउवन। आदि शंकराचार्य के त आनंद के ठेकाना ना रहे। वेदव्यास उनुका के कहले कि तू हमरा ब्रह्मसूत्र के सही-सही व्याख्या कर रहल बाड़। जा तोहरा के हमार आशीर्वाद बा।

आदि शंकराचार्य सचहूं ईश्वर के अवतार रहले। उनुका बारे में जेतना लिखाउ कमे कहाई। कहल जाला कि ऊ 262 से ज्यादा ग्रंथ लिखले बाड़े। हमनी के धन्य बानी जा कि ओह धरती पर जनम लेले बानी जा जहां परम पवित्र ईश्वर के अवतार आदि शंकराचार्य के जन्म भइल रहे।  अंत में 32 बरिस के उमिर में ऊ केदारनाथ में आपन शरीर छोड़ि दिहले, महासमाधि में लीन हो गइले।


-बी-ए-1280x2324.jpg

Hum BhojpuriaMarch 21, 20222min1530

भगवती प्रसाद द्विवेदी 

नब्बे-पार मोती बीए लमहर बेमारी से जूझत आखिरकार 18 जनवरी, 2009 के सदेह एह लोक से मुकुती पा लेले रहनीं। किशोरे उमिर (1934) से संग-साथ देबे वाली जीवन संगिनी लछिमी सरूपा लक्ष्मी देवी पहिलहीं 1987 में साथ छोड़ि देले रहली। बांचि गइल रहे उन्हुका इयाद में बनावल ‘लक्ष्मी निवास’, जहंवां हिन्दी, भोजपुरी, अंगरेजी, उर्दू के एह समरथी आ कबो सभसे अधिका शोहरत पावेवाला कवि के पहिले आंखि  आउर कान जवाब दे दिहलन स,फेरु अकेलहीं तिल-तिल टूटत,बिलखत-कलपत शरीर से आतमा निकलि गइल,संसा टंगा गइल।

1 अगस्त, 1919 का दिने उत्तर प्रदेश में देवरिया जिला के बरेजी गांव के मालवीय ब्राह्मण परिवार में बाबूजी राधाकृष्ण उपाध्याय आ माई कौलेसरा देवी के सपूत मोतीलाल उपाध्याय हालांकि आगा चलिके एम ए, बी टी, बी एड, साहित्य रत्न के उपाधि हासिल कऽ के इण्टरमीडिएट कॉलेज में प्रवक्ता (इतिहास) हो गइल रहनीं, बाकिर बी ए कइला का बादे साहित्य के हलका में अतना लोकप्रिय हो गइनीं कि ताजिनिगी उहांके नांव मोती का संगें  बी ए तखल्लुस बरकरार रहल। उहां के आखिरी सांस ले कविता के जीयत रहनीं। हिन्दी में तेइस गो, भोजपुरी में आठ गो, उर्दू में पांच गो आउर अंगरेजी में तीन गो कविता-संग्रह देबे वाला मोती बी ए सही माने में भाषा-साहित्य-संस्कृति के मोती रहनीं। डॉ. रामदेव शुक्ल के संपादन में नौ खंड में मोती बी ए ग्रंथावली के प्रकाशन 2011 में दिल्ली के नमन प्रकाशन से भइल रहे। भोजपुरी में ‘सेमर के फूल’, ‘भोजपुरी सानेट’, ‘तुलसी रसायन’, ‘भोजपुरी मुक्तक’, ‘मोती के मुक्तक’, ‘बन-बन बोलेले कोइलिया’, कालिदास के ‘मेघदूत’ के भोजपुरी काव्यानुवाद नियर कृति देबे वाला मोती बी ए कबो कवि सम्मेलन में धूम मचवले रहनीं। भोजपुरी गीतन के सभसे पहिले फिलिम में जगह दियवावे वाला उहेंके रहनीं। हिन्दी आ भोजपुरी में रचल उहां के गीत जहवां जन-जन के जबान पर चढ़ल रहलन स, उहंवें पुरान फिलिमन में उन्हुकर गीत शोहरत के बुलंदी के छूके मील के पाथर साबित भइल रहे।

गिरावट आ क्षरणशीलता के एह बाजारवादी निठुर समयो उहां के डिगा ना पवले रहे आ सरलता, सहृदयता आउर मनुजता के प्रतिमूर्ति रहनीं मोती जी बीए। जवना घरी उहां के अखिल भारतीय भोजपुरी साहित्य सम्मेलन के अध्यक्ष रहनीं, हमरा के सम्मेलन के महामंत्री बनावल गइल रहे। जब बइठकी में हिस्सा लेबे उहां के देवरिया से आईं, त वरिष्ठ गीतकार विंध्यवासिनी दत्त त्रिपाठी के घरे ठहरीं। हमहूं उहां पहुंचि जाईं आ खूब बतकही होखे, उहां के सम्मान में गोष्ठी आ एकल पाठो होखे।

हम जिज्ञासावश पुछले रहनीं, “ओह घरी, जब कवि सम्मेलन के मंच पर राउर आ डॉ. शंभुनाथ सिंह के चरचा खूब जोर पर रहे, एकाएक रउआं फिलिम में कब आ कइसे चलि गइनीं?”

मुंह में पान चभुलावत मोती जी ओह तथ के खुलासा करत कहले रहनीं, “ओइसे त मुंशी प्रेमचंद, प्रदीप, सुमित्रानंदन पंत, भवानी प्रसाद मिश्र, अमृतलाल नागर, भगवती चरण वर्मा, सुदर्शन, वृंदावन लाल वर्मा, नरेन्द्र शर्मा, नीरज, नेपाली, शैलेन्द्र, राही मासूम रज़ा नियर अनेक साहित्यिक हस्ती कवनो ना कवनो रूप में फिलिम से जुड़ल रहली स, बाकिर हमार जुड़ाव एकदम अप्रत्याशित आ अचानक भइल। भइल ई रहे कि पंडित सीताराम चतुर्वेदी के अध्यक्षता में बनारस में ‘प्रसाद परिषद्’ के एगो कविगोष्ठी में भाई शंभुनाथ जी का संगें हमहूं हाजिर रहलीं। जब ‘रूप भार से लदी तुम चली’ शीर्षक कविता के हम सस्वर पाठ कइलीं, त उहां मौजूद पंचोली आर्ट पिक्चर, लाहौर के मालिक पंचोली साहब आ निर्देशक रवीन्द्र दवे मंत्रमुग्ध हो गइलन आ अगिली फिलिम के गीतकार का रूप में हमार बहाली हो गइल। सन् 1944 से 1952 ले लाहौर आ मुंबई में रहिके हम फिलिम के गीत लिखलीं। प्रमुख फिलिम रहली स-कैसे कहूं, नदिया के पार, सुभद्रा, साजन, सिन्दूर वगैरह।

‘नदिया के पार’ के त उहां के मए गीत सुपरहिट रहलन स। फिलिम रहे हिन्दी के आ गीत रहलन स भोजपुरी के। हम सवाल कइले रहलीं, “सभसे पहिले ‘नदिया के पार’

हिन्दी फिलिम में भोजपुरी गीत डाले के बात रउरा दिमाग के उपज रहे आकि निर्माता के?”

आत्मबिसवास से भरल उहां के जवाब रहे, “हम लरिकाइएं से लोकभाषा के ताकत आ सामरथ के पहिचानत रहलीं। एह से हमहीं निर्माता-निर्देशक किशोर साहू पर जोर डालिके दिलीप कुमार-कामिनी कौशल अभिनीत ‘नदिया के पार’ खातिर सात गो भोजपुरी गीत लिखलीं। दूगो गीत के तनी मुखड़ा देखीं-‘कठवा के नइया बनइहे रे मलहवा कि नदिया के पार दे उतार-‘, ‘अंखिया मिलाके अंखिया रोवे दिन-रतिया हो, कहीं का बतिया, भूले ना सुरतिया हो तोहार-!’ हम ना खाली पहिलकी बेर भोजपुरी गीत के फिलिम में प्रवेश दियवलीं, बलुक ओकरा के स्थापितो कइलीं। जब फिलिम रिलीज भइल, त ऊ गीत जन-जन के जबान प रहलन स। फिलिम के नायक दिलीप कुमार ओह गीतन के पहिला बेर सुनिके झूमि उठल रहलन आ ओही घरी लोकभाषा के एगो फिलिम बनावे के दीढ़ निश्चयो कऽ लेले रहलन, जवन आगा चलिके ‘गंगा जमुना’ बनाके पूरा कइलन।”

हमरा मन में फेरु सवाल उठल रहे, “आठ-नौ बरिस ले फिलिम लेखन का बाद, जब रउरा गीतन के धूम मचल रहे, तबे रउआं फिलिम जीवन से संन्यास काहें ले लिहनीं?”

“ना-ना!” उहांके मूड़ी हिलावत कहलीं,” एकरा के संन्यास ना कहल जा सके। अपना स्वाभिमान के गिरवी राखे के शर्त पर हमरा फिलिम मंजूर ना रहली स। कतिपय बिंदुअन पर हम समझौता ना कऽ पवलीं आ गांवें आके श्रीकृष्ण इण्टरमीडिएट कॉलेज, आश्रम बरहज (देवरिया) में जुलाई, 1952 से इतिहास के प्रवक्ता नियुक्त हो गइलीं। सन् 1980 में सेवानिवृत्ति के बाद हम फेरु भोजपुरी फिलिमन खातिर कुछ गीत लिखलीं, जवना में ‘गजब भइले राम’, ‘चंपा-चमेली’, ‘ठकुराइन’ वगैरह फिलिम रहली स।”

“कविता में राउर रुझान अपने आप जागल आकि केहू के प्रेरना से?” हमरा प्रश्न प  उहां के हठात् कहलीं, “हम हिन्दी के विद्यार्थी ना रहलीं, बस हाई स्कूल ले हिन्दी साहित्य पढ़ले रहलीं। फेरु हम कवि बने के होसला कइसे करितीं! बाकिर हमरा बचपने से सुर में गावे के सवख रहे। सुरीला गीतन के सुनिके सुननिहारन के नीमन लागल। तबे डॉ शंभुनाथ सिंह विद्यालय में अइलन। ऊ हमरा गांव के लगहीं के रहलन। उन्हुके कहला से हमहूं कविता लिखे लगलीं। ओही घरी महादेवी वर्मा के भाई मनमोहन वर्मा के संपादन में हस्तलिखित विद्यालय पत्रिका के शुरुआत भइल रहे, जवना में हमार पहिलकी कविता छपल रहे-

अरी सखि,घूंघट का पट खोल!

कली अभी प्रस्फुटित नहीं है,

मंद समीरन डोल रही है,

रस-परागयुत राग-सुरभि

बिखरा देना अनमोल–!

1938 ले बीए के पढ़ाई कइला तक कविता लिखलीं। फेरु क्रांतिकारी हो गइलीं। डेढ़ साल ले जेहल के सजाइयो कटलीं। सन् 1941 में एमए (इतिहास) के डिग्री मिलल, ओकरा बाद बीटी, साहित्य रत्न कइलीं। बीए आ एमए का बीचे रचल कविता मोती बी ए के लोकप्रिय बना दिहली स। नांव का संगें बीए लिखेवाला तीन गो साहित्यकार भइलन-बाबू श्यामसुंदर दास, संतराम आ हम। ओह घरी के कवि सम्मेलन से हमरा के खूब शोहरत मिलल रहे।”

जब कवि सम्मेलन के चरचा छिड़ल, त मोती जी के चेहरा प खुशी के भाव झलके लागल। हम उहां के कुरेदल चहलीं-“ओह घरी के कवनो यादगार कवि सम्मेलन के इयाद बा का?”

उहांके मुसुकी काटत कहलीं, “ओह घरी के अधिकतर कवि सम्मेलन यादगार होत रहलन स। सन् 1939 में बनारस के एगो कवि सम्मेलन आजुओ मन परत बा, जवना में ओह समय के नामी-गिरामी कवि-बच्चन,श्याम नारयण पाण्डेय वगैरह आमंत्रित रहलन। हम श्रोतन का बीचे लुकाके बइठल रहलीं। तलहीं काव्य-पाठ खातिर हमार नांव पुकारल गइल। हम अउरी लुकाए लगलीं, बाकिर संयोजक हमरा के पकड़िके उठा लिहलन। मंच पर ले जाइल गइल। जब गीत पढ़े लगलीं, त अतना वाहवाही मिलल कि हम खुदे चकित रहि गइलीं। खुद बच्चन जी उठि के शाबाशी देत हमार पीठि थपथपवले रहलन। गीत के पांती रहे-

सृजन, यह आह्वान तेरा!

वेदना में चेतना खो, अचल मूर्च्छित-सा रहा जो

शृंग उर से फूट निकला एक कल-कल गान तेरा,

सृजन,यह आह्वान तेरा!

फेरु एगो आउर गीत के मांग बेर-बेर होखे लागल रहे। तब हमरा ‘वह तुम्हारा मान मानिन’ गीत सुनावे के परल। सन् 1943 में सेठ आनंदीलाल पोद्दार के संयोजन में दूदिनी काव्य समारोहो के खूब इयाद आवत बा, जवना में सोना के मोहर लुटावल गइल रहे आ नेपाली, नीरज का संगहीं एह मोती बी ए पर भी सोना के मोहर के बरखा भइल रहे।”

बाकिर धनाभाव में मोती बी ए के खूब संघर्षो करेके परल रहे। ओह दिनन के इयाद करत उहां के कहनाम रहे-“छात्र जीवन में हम दर-दर के ठोकर खइले रहलीं, पत्रकारितो कइले रहलीं। दैनिक आज,संसार, आर्यावर्त, अग्रगामी जइसन पत्रन में सहायक संपादक रहलीं। जब एमए करत रहलीं, त ‘आज’ (बनारस) में रात के नौ बजे से भोर के चार बजे ले कबीरचौरा में पत्रकारिता कइलीं। उहां से छूटीं त एमए के पढ़ाई करीं। तनखाह के पचीस रोपेया में से पनरह फीस में, दू रोपेया भाड़ा में, चार रोपेया एक सांझि के भोजन में हरेक महीना खरच करत रहलीं आ बाकी के चार रोपेया में मए काम निपटावत रहलीं। बाकिर फांका करहूं में मस्ती रहे ओह घरी।

अपना कवना कृति से उहां के सभसे बेसी प्यार रहे? मोती बी ए के उद्गार रहे-“हम हिन्दी, भोजपुरी, अंगरेजी आ उर्दू में तीन दर्जन किताब लिखले बानीं। अंग्रेजी से शेक्सपिअर आ संस्कृत से कालिदास के काव्य कृतियन के हिन्दी आ भोजपुरी में काव्यानुवादो कइले बानीं। ‘लव एंड ब्यूटी’ में एकावन गो सानेट बा। आंसू डूबे गीत, बादरिका, पायल छम-छम बाजे, हरसिंगार के फूल, मधुतृष्णा, कवि और कविता, प्रतिबिंबिनी, अश्वमेध, कुछ गीत:कुछ कविता (सब हिन्दी कविता-संग्रह), सेमर के फूल, बन-बन बोलेले कोइलिया, भोजपुरी सानेट, तुलसी रसायन, मोती के मुक्तक (मए भोजपुरी कविता-संग्रह), रश्के गुहर, दर्दे गुहर (उर्दू काव्य) वगैरह हमार प्रिय कृति बाड़ी स।”

हमार अगिला सवाल फूटल रहे-“ओइसे त ‘समिधा’ पर उत्तर प्रदेश हिन्दी संस्थान से ‘राहुल सांकृत्यायन पुरस्कार’, शिक्षा विभाग से आदर्श शिक्षक पुरस्कार, राष्ट्रपति पुरस्कार रउरा के मिलल रहे, तबो  सरकारी पुरस्कार का बारे में राउर का नजरिया बा?”

एह पर उहांके दू टूक जवाब रहे-“दूरदर्शन, आकाशवाणी, सरकारी भा गैर-सरकारी पुरस्कार-सम्मान में हमार कवनो आस्था नइखे रहल। ई सब कुछ अपना लोगन के तुष्ट करे आ पइसा कमाए के चालबाजी ह-बस!

“आजु के साहित्यिक मंच का बारे में राउर खयाल? “सवाल सुनते उहां के बतवनीं-“पहिले के मंच सचमुच साहित्यिक मंच होत रहलन स। अब त सुनेवाला श्रोता, आयोजक, कवि- सभे बदलि चुकल बा। अब दक्षिणा के धियान अधिका रहेला आ कोशिश रहेला कि कइसे दोसरा के नीचा देखावल जाउ।”

“कहल जाला कि गद्य कवि के कसउटी होला। का रउओं गद्य लिखले बानीं? एने का लिखनीं रउआं?” चाह के चुसुकी लेत मोती जी जानकारी दिहनीं-“समय-समय पर हमहूं गद्य लिखले बानीं। गद्य के हमार किताब बा- ‘इतिहास का दर्द ‘। घनानंद, बोला, रसखान के पुस्तक के लमहर-लमहर भूमिका लिखले बानीं। एने आत्मकथा लिखत रहलीं, जवना के प्रकाशन देवरिया के पत्र में धारावाहिक रूप से होत रहे।”

हम दुखी मन से पुछनीं, “राउर विपुल साहित्यिक देन के देखिके अइसन लागत बा कि राउर सार्थक मूल्यांकन अब ले ना हो पावल। आजु के आलोचना का बिसे में राउर का विचार बा?” बेगर लाग-लपेट के उहांके कहनाम रहे-“आजु के आलोचना गोलबंदी के शिकार होके रहि गइल बा। अब आलोचना कृति के पढ़िके ना, कृतिकार के पहुंच आ ओकरा से होखे वाला घाटा-मुनाफा के धियान में राखिके होत बा।”

हमार एगो अउरी उत्सुकता रहे -“जवना तरी फिलिम में रउआं सबसे पहिले भोजपुरी गीत लिखनीं, ओह किसिम के भोजपुरी साहित्यो में का कवनो प्रयोग कइले बानीं?

उहांके तपाके से जवाब दिहनीं-“जरूर!’बन-बन बोलेले कोइलिया’ में रउआं हमार प्रयोग देखि सकींले। ई लोकसंगीतिका के संग्रह ह, जवन आकाशवाणी इलाहाबाद (अब प्रयागराज) के केशवचंद्र वर्मा के निहोरा पर ‘फोक ऑपेरा’ का रूप में लिखल गइल रहे। ई भोजपुरी के पहिल प्रयोग रहे।”

“आजु कविता के का हाल बा?” सुनते उहांके भावुक हो गइनीं-“आजु के अधिकांश कवितन में काव्यात्मकता सिरा से गायब बा। बाकिर जब कबो हमरा नीमन कविता मिलेला, हम जरूर पढ़ेलीं। हम हरदम कविता के तलाश में रहेलीं-खाली छंद, गीत आ लए में ना, एकरा हर रूप में। लिखे से हमार मन कबो थाकेला ना, काहें कि लेखने हमरा खातिर जिनिगी बा-

कलम जिंदा न होती तो कभी का मर गया होता,

पहुंचने के लिए घर पर खुदा के घर गया होता!

 

हम कविता के परेमी हईं आ आखिरी सांस ले कविता के प्यार करत रहबि, ओकरा के जीयत रहबि।”

फेरु त मोती बी ए के कविताई शुरू हो गइल रहे। कविता के बाबत उहांके कहनीं-

 

जब ले कविताई कला दरबारन से हटिके जनता में न जाई

जबले न दलालन के धोकरी से निकाल के बाहर कइल जाई

जबले चमचा के बजारन में कविताई से पेट के आगि सेवाई 

तबले कवि गंग के खींचल खाल में काहे न ठूंसिके भूस भराई!

 

कृषि के साझा संस्कृति पर ‘कटिया के सुतार’ का बहाने उहांके विचार रहे-

 

खेत-खेत घूमेला तेली-तमोली 

नउवा आ धोबिया के निकलल बा टोली

सुनऽ ताड़ू लोहरा आ कोंहरा के बोली 

भइले गंवार सरदार हो सजनी 

कटिया के आइल सुतार।

 

उहांके गांव के महुआबारी में ले जात कहनीं-

महुआ अइसन ले रेंगइले,जरी-पुलुई ले कोंचइले 

लागल डाढ़ीडाढ़ी डोलिया-कंहार सजनी 

ई गरीबवन के किशमिश अनार सजनी 

असों आइल महुआबारी में बहार सजनी!

 

उहांके ‘चिरई हो चिरई’ के पांती रहे-

खिचड़ी खइबू कि खइबू सतुआ 

लबरी खइबू कि पिंड़िया घोरुआ 

भरुआ मरिचा, आम के चटनी 

ओकरा ऊपर सोगहग मुरई 

खेते जइबू कि कीरा खइबू 

टांगुन रहिला कतहीं ना पइबू 

हमरे अंगना मंगना लोटे 

जब तू अइबू तब पछतइबू 

कहां बनइबू आपन खतोना 

आगि लागल बा गंवई गंवई 

चिरई हो चिरई, चिरई हो चिरई!

 

आजुओ जब मोती बीए के इयाद आवेला, त उहांके रचनाशीलता के अइसन दिया जरत बरत लउकेला, जवना के बुताए के त सवाले नइखे उठत, ऊ त हरदम गह-गह कोना-अंतरा अंजोर करत रही। उहां के ओह शाश्वत जगमगात पांती से स्मृति के प्रणामांजलि!

 

एगो दिया जरेला, जवन कहियो ना बुताय 

जवन परे ना लखाय, जवन हाटे ना बिकाय 

जवन कोना-अंतरा सगरो अंजोर करेला 

एगो दिया जरेला, एगो दिया जरेला!


19-Shaida-ji-1280x1681.jpg

Hum BhojpuriaMarch 21, 20221min1230

मार्कन्डेय शारदेय  

विश्वनाथ प्रसाद ‘शैदा’  एगो अइसन नाँव जे आपन व्यक्तित्व आ कृतित्व से अपने ना, अपना साथे आपन जिला-जवार, प्रदेश आ भोजपुरियो के एगो अलगे पहचान देलस। उनुकर कारयित्री प्रतिभा शैक्षणिक प्रमाणपत्रन के ऊँचाइयन के दरकिनार कइके आ सम्पन्नता के बड़-बड़ इमारतन के नजरअंदाज करत ‘स्वदेशे पूज्यते राजा विद्वान् सर्वत्र पूज्यते’ एह सूक्ति के चरितार्थ कइलस। उनुका में ना शेखी बघारे के आदत रहल आ ना केहू के प्रति बेअदबी से पेश होखे के। अदब के साक्षात् मूर्ति रहन शैदाजी। जे मिलो, जेकरा से मिलसु मुस्काइये के। बच्चा, बूढ़, छोट-बड़ के इंचटेप बिना रखले प्रसन्नता से मिलल उनुकर सहज स्वभाव रहल। हँ, ज्ञानवृद्ध के कवनो उमिर होखे, उनुका  समक्ष सहजता से सिर नवाने में, सड़को प पैर छूवे में परहेज ना करसु।

शैदाजी से हम कतना निकट रहलीं आ ऊ हमरा से कतना निकट रहलें, ई कहल कठिन बा। हम जब प्राइमरी में रहलीं, त ऊ हमार शिक्षक रहलें। ऊ जवना स्कूल के शिक्षक रहलें, ओही में हमार बाबुओ जी शिक्षक रहलें। ऊ जवना महल्ला के रहन, ओकरा से कुछुवे दूरी प हमरो महल्ला रहल। हमरा दरवाजा प हरसाल अनन्तव्रत के कथा बाबूजी बाँचत रहन आ शैदोजी श्रोता लोगन के मण्डली के सदस्य रहसु। कबो बाबूजी के कहत सुनलीं, ‘रउरा हतना दूर काहें आ जाईंला, रउरा नगिचे त कथा होले’। त ऊ तुरते कहलें, ‘जब कौण्डिन्य मुनि अनन्त भगवान के खोजे कहाँ-कहाँ चल गइलें त हम कतना दूर आइल बानी’? फेरु त दूनो जाना के चेहरा भोर का फूल हो गइल।

हमार कवि कब जागल, ई विषय नइखे, बाकिर जब जागल त शुद्धिकरण खातिर गुरु तलाशे लागल। शैदाजी अवकाशप्राप्त हो चुकल रहन। सुनले रहीं जे सुबह उनुकर बइठकी सुग्रीव सिंह जी के इहाँ रहेला, जे डुमराँव राज के मैनेजर रहन आ मैनेजर साहब के नाँवे से विख्यात रहन। अपना शहर में उनुकर सबसे अधिक सम्मान रहल। शाम के सम्भवतः द्वारका प्रसाद के दुकान प उनुकर बइठकी रहे। कवि-सम्मेलन, गोष्ठी भा कवनो सभा-सोसाइटी में ना जाये के रहे त दिनभर घरही रहसु। हमरा घर से उनुकर घर मात्र पाँच से सात मिनट पैदल दूर रहल। बस, जवन लिखीं, लेके पहुँच जाईं। बैठिके बिस्कुट खाईं, चाय पीहीं, आपन कविता सुनाईं आ उनुकर कविता सुनीं। हमार कवि के तराश हो जाउ त घरे आ जाईं।

ऊ पान खाये के बड़ शौकीन रहलें। हमरो घरे पानसंस्कृति रहल। पनबट्टा पासे राखसु। गइला प पान खुदे लगाके खियावसु आ अपनहूँ खासु। कबो बाजार में बाबूजी उनुका मिल गइलें त बताइयो देसु जे मार्कण्डेय अइसन कविता लिखले बाड़ें। बाबूजी पूछियो बइठसु त उनुको के सुनावे के परे।

शैदाजी के कदकाठी मध्यम रहल। शरीर भरल-पूरल। गोल-मटोल। रंग साँवर। मुखमण्डल गोल के साथे तजोदीप्त। साफ-साफ धोती-कुर्ता आ दूनों कान्हें लटकल गमछा। कान्हि ले लटकल बड़-बड़ बाल। लिलार प गोपी चन्दन आ रोरी के टीका। मुँह में पान। बाईं कलाई में घड़ी आ दायाँ हाथ में नक्काशीदार छड़ी। हमरा आँखिन में उनुकर ईहे सजीव सूरत आजुओ बिया। सड़क प मन्थर चाल में जब चलसु त लागे जे वाकई कवनो सरस्वतीपुत्र कहूँ से निकल पड़ल बा। लोगन के दृष्टि से सम्मान छलकत रहल। हम उनुकर शिकायत केहू मुँहे कबो ना सुनलीं। हाँ, कविद्वन्द्व जरूर सुनले रहीं। इयाद त नइखे जे कवन कवि  ‘शैदा के मैदा बनाके कूटिके पीसिके चालिके चूलिके….’ जइसन कविता बनाके उनुका के सुनइले रहन त ऊ ‘खुदा ने कान काटा है, रसूला नाक काटेगा’ कहि सुनइलें। ‘सखि मोर मरदा, बड़ बकलोल रे। ओकरा बजरिया तकरियो ना मिले, सेतिहे के ले आवे रोजे ऊ ओल रे’। ई पंक्तियो कवनो कविये खातिर प्रत्युत्तर में कह गइल रहे। ऊ त अइसन कवि रहन जे राहचलते कविता बना लेसु आ सड़को से कवनो कागज उठाके झट लिख मारसु।

डुमराँव के साहित्यिक इतिहास के एगो भाग अवश्य शैदायुग कहाई। उनुकर समकालीन कवियन में सत्यनारायण ‘सौरभ’, हरिहर प्रसाद ‘बेकार भोजपुरी’, शिवशंकर प्रसाद जायसवाल ‘मौजी’, कालूराम अखिलेश आ जवाहरलाल श्रीवास्तव प्रमुख रहन। उनुकर परवर्ती समकालीन कवियन में किशोर डुमराईं, मुफलिस रमेश, अम्बिकादत्त त्रिपाठी ‘व्यास’, वासुदेव प्रसाद शायर और लल्लूलाल केशरी के नाम विशेष तौर से लीहल जा सकेला। परन्तु शैदाजी के जवन लोकख्याति मिलल, ऊ अउर लोग खातिर दुर्लभे रहल। ऊ बिहार आ बिहार से बाहरो अपना कवित्व के ध्वज फहरावत रहन। ऊ राष्ट्रीय स्तर प रहन। उनुकर गायनकला आ काव्यसौष्ठव से सभे निहाल होते रहे। उनुकर हास्य-व्यंग सभे के गुदगुदावे, काँट चुभावे आ चिंउटी काटत रहे। ऊ मंचीय कवि-महारथियन के पहिल पंक्ति में सुशोभित होत रहन आ कवि-सम्मेलनन के गौरवान्वित करत रहन।

शैदाजी के जन्म बिहार के डुमराँव में रवानी (कमकर) परिवार के रामटहल राम के सुपुत्र के रूप में 24 जनवरी, वर्ष 1911 के भइल रहे। शिक्षा मिडिले तक हो पावल। पारिवारिक जिम्मेदारी के कारण ऊ डुमराँवे के ‘शिक्षक-प्रशिक्षण महाविद्यालय’ के परिसर में स्थित ‘अभ्यासार्थ मध्य विद्यालय’,जेकरा के ‘प्राक्टिसिंग स्कूलो’ कहल जात रहे, ओही में  बतौर शिक्षक नियुक्त रहलें। ऊ आगे चलिके प्रवेशिको (मैट्रिक) पास कइलें।

शास्त्रकार लोग के शब्दन में शैदाजी के बुद्धिमान कहल जाउ भा आहार्यबुद्धि?; हमरा समझ में दूनों के योग कहल जाई। ऊ अवश्य पूर्वजन्म के संस्कार से बुद्धिमान रहलें। एही से भोजपुरी के पहिला व्याकरण लिखेवाला पुण्यश्लोक पं. रासिहारी राय शर्मा इनिका के जन्मजात कवि कहले बाड़ें (‘श्रीदुर्गा-महिषासुर संग्राम’ के अनुशांत्मक ‘दू शब्द’ में)। परन्तु जइसे दत्तात्रेय के अनेक गुरु रहन, ओसहिये ऊहो गुणग्राही रहन। एही के बदौलत ऊ भोजपुरी, हिन्दी, ब्रजभाषा, उर्दू आ अँगरेजियो में आपनि काव्यप्रतिभा से सभके चमत्कृत करत रहन। उनुकर लाइब्रेरी में हमरा कवनो खास किताबि ना लउकली सँ आ हमरा पता नइखे जे ओह घरी उनुका कवनो आचार्य से सत्संग होत रहे। एहसे स्पष्ट बा जे ऊ जन्मजात कवि रहन। मुहावरा-कहावत से भरपूर चुटीला अंदाज में उनुकर प्रस्तुति साधारणीकरणे रहे।  भोजपुरी साहित्यकारन के बीच प्रयोगधर्मी के रूप में खूब यश पावत रहन। उनुकर नाँव के सोहरत दूर-दूर ले रहल। ऊ अपना समय में त अपना कवितन, गीतन से लोगन के जीभ प बइठले रहन, आजुओ उनुकर कुछ ना कुछ पंक्तियन के लोग बोल-गाके निहाल हो उठेलें। साँच मानल जाउ त ऊ जनता के कवि रहन। शृंगार रस उनुकर अंगी रस रहल, बाकिर व्यंग्य खातिर ऊ कम ख्यात ना रहन। शेष रस घलुवे में कहल जा सकेलें।

शैदाजी नारीहृदय रहन। भोजपुरी नारीगीतन प उनुकर बड़ पकड़ रहल। स्त्रियन के हाव-भाव भा सुख-दुःख, विरह-मिलन, काम-काजे के ऊ मुख्य वर्ण्य विषय रखलें- ‘खटाई बिना कोंहड़ा कइसे बनीं’! ‘फगुआ सखी, निगिचाइल हो, पिया घर ना अइलें’-जइसन  ऊ नारी के पीर त गइबे कइलें समाज-सुधार खातिर व्यंग्यबाणो / गभिया चलावे में कोताही ना कइलें- ‘बहनोइया अपना सरवा के सोरहो आना साला हो गइल। हमरो देस बंगाला हो गइल’।। अन्ततः रामकथा प आधारित ‘रावण-अंगद संवाद’ के रूप में रामगुनो गइलें। जइसे महाराज भर्तृहरि शृंगार, नीति आ वैराग्य के कवि रहन, लगभग ओसही ऊ शृंगार, नीति (व्यंग्य) आ भक्ति के कवि रहन। भोजपुरी के यशस्वी साहित्यकार हवलदारपति त्रिपाठी ‘सहृदय’ जी के ई कथन उनुकर कवित्व प पकिया मोहर बा- ‘अइसे त शैदाजी के हास्य-व्यंग्य कवितन के कवि-सम्मेलन के श्रोता-मंडली खूब सराहना करत आइल बा, बाकिर इहाँ के सिंगार आ बीर रस के कवितो से भोजपुरी साहित्य के कम रसगर नइखीं बनवले। ‘शैदा’ के गाभी निसाना प बड़ा गहरा चोट करेली स’।

प्रसाद गुण के कवि शैदाजी शब्दशिल्प आ भावसौन्दर्य के सिद्धहस्तन में से एक रहन। पद्मश्री शारदा सिन्हा, जोगीन्दर सिंह अलबेला आ निधि दुबे के द्वारा गावल जायेवाला उनुकर प्रसिद्ध गीत ‘बताव चाँद केकरा से कहाँ मिले जाल’ भावुकन के हृदय में उतर जाला नु!  अब लोकगायिका चन्दन तिवारी उनुकर कजरी गीत के स्वर देके जन-जन तक पहुँचावे के काम करताड़ी। दुःखद-सुखद बात ई बिया जे शारदाजी ‘शैदो के आपन बनाल सँघतिया’ के जगह ‘हमरा के अप्पन बना ल सँघतिया’ गावताड़ी। अलबेला आ निधि दुबे के भी ईहे हाल बा, बाकिर चन्दन तिवारी उनुकर नाँव नइखी हटइले। ऊ ओसहीं गावताड़ी,जइसे शैदाजी लिखले बाड़ें –

‘जब से आइल सवतिया मोर, सुखवा लेलस हमसे छोर,

झरे अखियाँ से लोर, नइया मोर परल बा ‘शैदा’ माहाधार में

सावन के बहार में ना’।।

शैदाजी के ‘चाँद’ नामक कविता ‘चितचोर’ के पृष्ठसंख्या 6 में संगृहीत बा। एह पुस्तक के प्रकाशनकाल फरवरी 1953 लिखल बा। ऊ कब से लिखे शुरू कइलें, ई कहल कठिन बा, बाकिर अपना निधनकाल 2 दिसंबर 1985 से लगभग छव महीना पहिले तक लिखते रहन। छव महीना पहिले एहसे जे ऊ ओकरा बाद अस्वस्थे होत गइलें। खटिया पकड़ लेलें। स्मृति मन्द प मन्द होत गइल। पचहत्तरवाँ साल पूरा करे में कुछुवे बचल रहे कि स्वर्ग सिधार गइलें।

उनुकर प्रकाशित प्रमुख कृतियन में- 1.गीतमंजरी (हिन्दी, उर्दू, भोजपुरी में, प्रकाशनकाल-1950 ई)., 2.चितचोर (भोजपुरी गीतसंग्रह, 1953 में), 3.जागरण (ब्रजभाषा, हिन्दी, उर्दू, भोजपुरी, 1955 में), 4.आपन देस आपन गीत (भोजपुरी, 1964 में), 5.डुमरेजिन चलीसा (1973 में), 6.श्रीदुर्गा-महिषासुर संग्राम(भोजपुरी प्रबन्ध,1977 में) आ 7.रावन-अंगद संवाद (भोजपुरी प्रबन्ध-1982 में), आ 8.शैदा व्यंग्य बावनी (…)। एकरा अतिरिक्त अप्रकाशितन में डुमराँव के झाँकी (डुमराँव के बिरासत प आधारित काव्य), जय बंगलादेश (नाटक) के साथ-साथ अउरो कतने फुटुकर कविता रहीं सँ। पता ना, उनुकर पाण्डुलिपि कहाँ बाड़ी सँ।

उनुका के अनेक साहित्यिक संस्था  सम्मानित कइलीं सँ आ उनुका के सम्मानित क के स्वयं सम्मानित भइली सँ। मुजफ्फरपुर विश्वविद्यालयो उनुका समये में ‘करे के ना चाहीं’ कविता के पाठ्यक्रम में स्थान देलस। उनुका के सम्भवतः 14 संस्थानन से सम्मान मिलल रहे, जवना में पटना में 4 फरवरी, 1979 के भोजपुरी अकादमी, पटना द्वारा तत्कालीन राज्यपाल के करकमल से दीहल ताम्र-पत्र विशेष मान राखता। आजु ऊ एह दुनिया में नइखन, बाकिर ऊ आजुओ अपना कृतित्व से बाड़ें आ काल्हुओ रहिहें। उनुकर सारस्वत अवदान उनुका के बिसरले बिसरे ना दी।

शैदाजी के स्मरणीय काव्य-पंक्ति

1.पतरा तू देख पतरातू न जा।

2.शहर की सफाई से का वास्ता है,

जिधर देखिए हँस रहा रास्ता है

शहर के किनारे पड़ा है जो राशन

उसे घर में लाएँ लिये जाएँ बासन,

ये मिस्लेमलाई मुफ्त का नास्ता है।

शहर की सफाई से क्या वास्ता है।

 

3.ये नगारे का है घेरा या कि घेरा नाँद का

या कि चूतड़ है हमारे द्वारिका परसाद का।

 

5.शैदा पियेंगे चाय डुमराँव नजर आएगा मोगलसराय से।

 

6.बड़ सुख देला मोरा दुअरा के नीम रे

 

7.रहलीं करत दूध के कुल्ला, छिल के खात रहीं रसगुल्ला,

सखी,हम खुल्लम-खुल्ला, झूला झूलत रहीं बुनिया फुहार में,

सावन के बहार में ना।

 

8.हमरो देश बंगाला हो गइल,

बहनोइया अपना सरवा के सोरहो आना साला हो गइल।

हमरो देश बंगाला हो गइल।

 

9.गोसाईं जी फेरु आईं भारत में हमरा।

स्वागत में रउरा के चाह पियाइब,

दूध मलाई हम कहँवा से पाइब,

घर-घर पोसाइल बा कुकुरे नु झबरा।

गोसाईं जी, फेरु आईं भारत में हमरा।।

 

10.घर ही पढ़लें भइलें मास्टर,

घरही पढ़लें भइलें डाक्टर

सब गुनवा में गामा हउवें।

 

  1. घिवहा पंडित में गुन अनेक बा,

बुद्धि कम अधिका विवेक बा।

***



About us

भोजपुरी भाषा, साहित्य, संस्कृति  के सरंक्षण, संवर्धन अउर विकास खातिर, देश के दशा अउर दिशा बेहतर बनावे में भोजपुरियन के योगदान खातिर अउर नया प्रतिभा के मंच देवे खातिर समर्पित  बा हम भोजपुरिआ। हम मतलब हमनी के सब। सबकर साथ सबकर विकास।

भोजपुरी के थाती, भोजपुरी के धरोहर, भूलल बिसरल नींव के ईंट जइसन शख्सियत से राउर परिचय करावे के बा। ओह लोग के काम के सबका सोझा ले आवे के बा अउर नया पीढ़ी में भोजपुरी  खातिर रूचि पैदा करे के बा। नया-पुराना के बीच सेतु के काम करी भोजपुरिआ। देश-विदेश के भोजपुरियन के कनेक्ट करी भोजपरिआ। साँच कहीं त साझा उड़ान के नाम ह भोजपुरिआ।


Contact us



Newsletter

Your Name (required)

Your Email (required)

Subject

Your Message