सतुआन भोजपुरी संस्कृति के काल बोधक पर्व ह। हिन्दू पतरा में सौर मास के हिसाब से सुरूज जहिआ कर्क रेखा से दखिन के ओर जाले तहिये ई पर्व मनावल जाला। एहि दिन से खरमास (खर-मास) के भी समाप्ति मान लिहल जाला।

सतुआन के बहुत तरह से मनावल जाला, सामान्य रूप से आज के दिन जौ के सत्तू गरीब, असहाय लोगिन के दान करे के प्रचलन बा। आज के दिन लोग स्नान कवनों जलाशय भा पावन नदी गंगा में कइल जाला, पूजा आदि के बाद जौ के सत्तू, गुर, कच्चा आम के टिकोरा आदि गरीब लोगिन के दान कइल जाला आ अपना ईस्ट देवता, कुलदेवता, बरम बाबा आदि के चढ़ा के प्रसाद के रूप में ग्रहण कइल जाला। ई काल बोधक पर्व संस्कृति के सचेतना, मानव जीवन के उल्लास आ सामाजिक प्रेम प्रदान करेला।

सतुआन के वैज्ञानिक महत्व

आज सउंसे पूर्वांचल में सतुआनी के पर्व मनावल जाला. आजु के दिन भोजपुरिया लोग खाली सतुआ आ आम के टिकोरा के चटनी खाला. साथे-साथ कच्चा पियाज, हरियर मरिचा आ आचार भी रहेला. एह त्योहार के मनावे के पीछे के वैज्ञानिक कारण भी बा. इ खाली एगो परंपरे भर नइखे. असल में जब गर्मी बढ़ जाला, आ लू चले लागेला तऽ इंसान के शरीर से पानी लगातार पसीना बन के निकले लागेला, तऽ इंसान के थकान होखे लागे ला.

रउआ जानते बानी भोजपुरिया मानस मेहनतकश होखेला. अइसन में सतुआ खइला से शरीर में पानी के कमी ना होखे देला, तनि-तनि देरी पर पियास लगावेला आ शरीर में पानी के मात्रा बनवले रहेला। अतने ना सतुआ शरीर के कई प्रकार के रोग में भी कारगर होखेला।

पाचन शक्ति के कमजोरी में जौ के सतुआ लाभदायक होखेला. एकरा में भरपूर प्रोटीन, लवण-पानी के मात्रा रहेला। कुल मिला के ई सतुआ एगो संपूर्ण, उपयोगी, सर्वप्रिय आ सस्ता भोजन हऽ जेकरा के अमीर-गरीब, राजा-रंक, बुढ़- पुरनिया, बाल-बच्चा सभे चाव से खाला.  आजकाल्ह शूगर के मरीज लोग हर जगह मिली, ओह लोगिन खातिर सतुआ दवाई के दवाई आ भोजन के भोजन दूनों ह। 

सतुआ खायें खातिर ढेर बरतन-बासन के भी जरुरत ना परेला। खेत-बधार में किसान-मजदूर लोग, गाड़ीवान लोग अपना गमछों में सतुआ सान लेला। पहिले जब पैदल बारात जाता रहे तब बाराती लोग बोला में भर के सतुआ ले जाते रहे। राह में कतहूं पड़ाव रहते रहे, एके धोती पर दस-पांच लोग के सतुआ सनातन रहे आ लोग बईठ के, हथेली पर सतुआ के लोंदा लेके लोग अचार आ पियाज संगे खा लेत रहे।

असली सतुआ जौ के ही होखेला बाकि केराई, मकई, मटर, चना, तीसी, खेसारी, आ रहर मिलावे से एकर स्वाद आ गुणवत्ता दूनो बढ़ जाला. सतुआ के घोर के पीलय भी जाला, आ एकरा के सान के भी खाइल जाला. दू मिनट में मैगी खाए वाला पीढ़ी के इ जान के अचरज होई की सतुआ साने में मिनटों ना लागेला. ना आगी चाही ना बरतन. गमछा बिछाईं पानी डाली आ चुटकी भर नून मिलाईं राउर सतुआ तइयार.. रउआ सभे के सतुआनी के बधाई. कम से कम आज तऽ सतुआ सानी सभे!

घेंवड़ा: सतुआ में देसी घीव आ गूर मिलाके मीठा सतुआ बनावल जाला। एकरा के घेंवड़ा कहल जाला। जेकरा घरे लइका लोग सतुआ ना खात होखे ऊ लोग के चाहीं कि अपना-अपना लयिकन के घेंवड़ा खिलाईं।

आर.के. सिन्हा

काश, खालिस्तान के पक्ष में नारेबाजी करे वाला लोग अजय बांगा अउर गुनीत मौंगा से कुछ प्रेरणा ले लित। ई दूनू जन भी कट्टर सिख ह लो आ ये लोग के हालिया उपलब्धि पर सारा देश गर्व कर रहल बा। बांगा ओ वर्ल्ड बैंक के अध्यक्ष बने जा रहल बाड़ें जेकर 189 सदस्य देश बाटे, जेमे 170 देशन के नागरिक संसार के 130 शहरन में काम कर रहल बाड़ें। बेशक, गरीबी के खत्म करे आ विकास के रास्ता देखावे वाला वर्ल्ड के प्रमुख बने जा रहल बांगा के उपलब्धि पर सारा भारत खुश बा।

अगर बात गुनीत मोंगा के कइल जाय त उनका उनके फिल्म ‘द एलीफैंट विस्परर्स’ खातिर आस्कर सम्मान मिलल ह। ‘द एलीफैंट विस्परर्स’ के बेस्ट डॉक्यूमेंट्री शॉर्ट कैटेगरी में नॉमिनेट कइल गइल रहे। गुनीत मोंगा के बारे में देश के तब कायदा से पता चलल जब ऊ “लंच बॉक्स”, “मानसून शूट आउट” आ “गैंग्स ऑफ वासेपुर” जइसन फिल्मन के प्रोड्यूस कइले। ई सब फिल्म हिट भइल आ ये फिल्मन के दर्शक अउर समीक्षक के समान रूप से प्यार मिलल।

आजकल ब्रिटेन, आस्ट्रेलिया, कनाडा आ अमेरिका में कुछ भटकल सिख नवयुवक ना जाने कवना भ्रम में काल्पनिक खालिस्तान के मांग करत देखाई देवे लागल बा  लोग। ये लोग पर गुस्सा से बेसी तरस हीं आ रहल बा। अपना महान गुरु लोग के धरती पंजाब आ भारत के लेके ई लोग जवना तरे से अनाप-शनाप बकवास कर रहल बा लो, ऊ बेहद अशोभनीय बा। ई लोग ई समझ लेव कि अब भारत कबहूँ विभाजित ना होई। भारत के बंटवारा के ख्वाब देखे वालन के निराशा ही होई। ये बिन्दु पर 140 करोड़ भारतीय एक बा। कहीं कवनों विवाद नइखे। अब ऊ जमाना गइल जब आपन-आपन नेतागिरी चमकावे आ प्रधानमंत्री बने खातिर नेहरु अउर जिन्ना हिन्दुस्तान-पाकिस्तान बाँट लिहल लोI अब ओइनन होखे से रहल I

काश, खालिस्तान के पक्ष में नारेबाजी करे वाला लोग अजय बांगा अउर गुनीत मौंगा से कुछ प्रेरणा ले लित। ई दूनू जन भी कट्टर सिख ह लो आ ये लोग के हालिया उपलब्धि पर सारा देश गर्व कर रहल बा। बांगा ओ वर्ल्ड बैंक के अध्यक्ष बने जा रहल बाड़ें जेकर 189 सदस्य देश बाटे, जेमे 170 देशन के नागरिक संसार के 130 शहरन में काम कर रहल बाड़ें। बेशक, गरीबी के खत्म करे आ विकास के रास्ता देखावे वाला वर्ल्ड के प्रमुख बने जा रहल बांगा के उपलब्धि पर सारा भारत खुश बा। अजय बांगा एगो शूरवीर के पुत्र हउअन। उनकर पिता हरभजन सिंह बांगा भारतीय सेना में लेफ्टिनेंट जनरल पद से रिटायर भइल रहले। ऊ 1962, 1965 आ 1971 के जंग में शत्रु सेना के दांत खट्टा क दिहले रहलन। अजय बांगा के परिवार बहुत आस्थावान सिख परिवार ह।

अजय बांगा बेहतरीन मोटिवेशल स्पीकर भी हउअन। उनके नेतृत्व में ही “मास्टर कार्ड” नाम के कंपनी अपना निकटतम प्रतिद्वंद्वी “वीजा कार्ड” के पछड़ले रहे। अजय बांगा मास्टरकार्ड के मोबाइल पेमेंट के क्षेत्र में पहिला नंबर पर पहुंचवलन। ऊ हिन्दी, पंजाबी, इग्लिश के अलावा गुजराती भी बोल लेलन। प्रधानमंत्री नरेन्द्र मोदी के 2015 के अमेरिका यात्रा के समय उनका से फार्च्यून-500 कंपनियन के सीओ मिलल रहलें। ओमे अजय बांगा भी रहले। बांगा के बैंकिंग आ फाइनेंस के दुनिया के एक्सपर्ट मानल जाला। बांगा के अमेरिका के पूर्व राष्ट्रपति बराक ओबामा अपना ट्रेड पॉलिसी से जुड़ल सलाहकार टीम में लेले रहले। अब ऊ वर्ल्ड बैंक के अध्यक्ष बने जा रहल बाड़ें। जाहिर बा कि उनके सलाह से सदस्य देशन के लाभ होई। अजय बांगा वर्ल्ड बैंक के अध्यक्ष पद पर रह के ओ देशन खातिर विशेष योजना ले अइहें जे विकास के दौड़ में बहुत पिछड़ गइल बा।

अगर बात गुनीत मोंगा के कइल जाय त उनका उनके फिल्म ‘द एलीफैंट विस्परर्स’ खातिर आस्कर सम्मान मिलल ह। ‘द एलीफैंट विस्परर्स’ के बेस्ट डॉक्यूमेंट्री शॉर्ट कैटेगरी में नॉमिनेट कइल गइल रहे। गुनीत मोंगा के बारे में देश के तब कायदा से पता चलल जब ऊ “लंच बॉक्स”, “मानसून शूट आउट” आ “गैंग्स ऑफ वासेपुर” जइसन फिल्मन के प्रोड्यूस कइले। ई सब फिल्म हिट भइल आ ये फिल्मन के दर्शक अउर समीक्षक के समान रूप से प्यार मिलल।

पहिले वर्ल्ड बैंक के अध्यक्ष बने वाला अजय बांगा आ फेर गुनीत मोंगा देश के नाम रोशन कइले बा लो। ई साँच बा कि अजय बांगा अब अमेरिकी नागरिक बन चुकल बाड़ें। पर उनका अपना भारतीय मूल के भइला पर गर्व बा। ऊ बार-बार भारत आवेलें। ऊ भारत से दूर जा भी नइखन सकत। आखिर इहे उनकर देश ह। उनकर मातृभूमि ह I

ओने, मूल रूप से दिल्ली के रहे वाली गुनीत मोंगा अब मुंबई में रहेली। गुनीत मोंगा जब आस्कर पुरस्कार लेवे गइली तब ऊ साड़ी पहिनले रहली आ ऊ कहली कि उनका भारतीय भइला पर नाज बा।

जे खालिस्तानी लोग लंदन में भारतीय तिरंगा के अपमान कइल, ओ लो के नींद कइसे आवत होई। ऊ लो त अब अमर शहीद भगत सिंह के भी गाली दे रहल बा। ओ लोग के डूब मरे के चाहीं। ओ लोग के मरे खातिर एसे बेहतर कवनों रास्ता नइखे हो सकत। जवना भारत माता के प्रति हरेक हिन्दुस्तानी अपना जान देवे खातिर तइयार रहेला, ऊ लोग ओकरा खातिर अपशब्द बक रहल बा। ऊ लो भारत आके काहे ना भारत माता आ भगत सिंह खातिर अपशब्दन के प्रयोग करेला। एक बेर क के देखे लो त सही। ओ लो के तब जन्नत के हकीकत सामने से देखे के मौका मिली। पर ई लोग त कायर  ह।

भारत में करोड़न सिख जीवन के अलग-अलग क्षेत्रन में श्रेष्ठ काम कर रहल बाड़ें। देश के प्रमुख समाजसेवी जितेन्द्र सिंह शंटी कहेलन कि उनकर जीवन भारत माता के समर्पित बा। ऊ खलिस्तनियन के ललकारेलन। शंटी लगभग तीन दशक से लावरिस शव के अंतिम संस्कार करवा रहल बाड़ें। ऊ कोविड काल में अपने हाथ से दर्जनों अभागा लोगन के अंतिम संस्कार करववले रहलन। ओ बेरा उनका आ उनके परिवार के कई सदस्य के कोविड हो गइल रहे। लेकिन ऊ हार माने वाला कहाँ रहले। ऊ कोविड के हरवला के बाद फेर से सड़कन पर उतर गइले। पदमश्री पुरस्कार विजेता शंटी रक्त दान के सैकड़ा भी बना लेले बाड़न। ये बीचे, अर्पणा कौर भारतीय समकालीन कला जगत के सशक्त हस्ताक्षर बाड़ी। उनकर कूची 1984 के सिख विरोधी दंगा आ वृन्दावन के विधवा लोग पर खूब चलल बा। अर्पणा कौर के चित्रन में बुद्ध, बाबा नानक आ सोहनी-महिवाल भी मिली लो। उनका चित्र में स्त्री पात्र खूब मिलेला लो। उनका पर सारा भारत गर्व करता।

करीब दू साल पहिले बिजनेस के दुनिया से रिटायरमेंट ले लेवे वाला पीआरएस ओबराय से सारा देश परिचित बा। ओबराय के निगरानी में राजधानी के ओबराय इंटरकांटिनेंटल होटल 1965 में बनल रहे। उनका के भारत के होटल इंडस्ट्री के गॉड फादर मानल जाला। मुंबई के दि ट्राइडेंट होटल 26/11 हमला में बर्बाद हो गइल। लेकिन पीआरएस ओबराय ओही राख के ढेर से फेर खड़ा कइलन। खालिस्तान के मांग करे वाला इयाद क ले कि ओबराय ओ लोग पर थुकबो ना करिहें।

 भारत के चोटी के सिख हस्ती के बात होई त भारतीय क्रिकेट टीम के पूर्व कप्तान बिशन सिंह बेदी, भारतीय हॉकी टीम के दू पूर्व कप्तान क्रमश: हरबिंदर सिंह आ अजीत पाल सिंह के नाम भी लेवे के होई। भारत के चौतरफा विकास में सिख लोगन के योगदान अमूल्य रहल बा। सारा देश ये सच्चाई के जान रहल बा। बहरहाल, देश के खालिस्तानी तत्वन के साथ कवनों भी तरह के रियायत बरते के जरूरत नइखे। ये लोग के कठोरता से कुचलेके होई।

(लेखक वरिष्ठ संपादक, स्तंभकार अउर पूर्व सांसद हईं)

पुस्तक-समीक्षा
डॉ. शंकर मुनि राय ‘ गड़बड़’

पुस्तक: भोजपुरी प्रकाशन के सइ बरिस
संपादक: पं. गणेश चौबे
विधा: साहित्य संकलन
प्रकाशक : भोजपुरी अकादमी, पटना
प्रकाशक वर्ष: अगस्त 1983
पृष्ठ: २००
मूल्य: बीस रूपया

भोजपुरी अकादमी पटना से १९८३ में छपल ई किताब भोजपुरी के बहुते महत्वपूर्ण प्रकाशन ह. ई एगो सम्पादित किताब ह. एकर सम्पादन कइले रही पंडित गणेश चौबे जी. चौबेजी भोजपुरी के लोकसाहित्य सहित एकरा अउरी कई गो विधा के मर्मज्ञ-विद्वान रहीं. जवना घरी लोग कहत रहे कि भोजपुरी के साहित्य बहुते कमजोर बा आ एकरा में पढ़े जुगुत कवनो साहित्य नइखे, ओह घरी चौबे जी लोग के ई बतावे के कोशिश कइनी कि लोग बहुते भरम में बा.

पिछिला एक सव साल में भोजपुरी के जतना किताब छपल रही सन ओह सब के खोजबीन कर के एह किताब में जानकारी दिहल गइल बा. कवन किताब के, कहवाँ से लिखल, छपवावल, कतना दाम रहे आ ओह किताब में का बा, ई सब जानकारी एह किताब में दिहल गइल बा. जब ई किताब छपल आ लोग देखल तब बुझाइल कि भोजपुरी में कतना साहित्यिक काम भइल बा. बहुते लोग के भरम दूर भइल एह किताब के छपला से. जे लोग अपना के बहुते बड़हन लेखक आ साहित्य सेवी मानत रहे, ओहू लोग के बुझा गइल कि भोजपुरी भाषा-साहित्य आ संस्कृति के बारे में सोचे-विचारे वाला लोग पहिलहीं से लागल बा.

एह सम्पादित किताब में १८८२ से लेके १९८२ तक भोजपुरी लोकभाषा, साहित्य आ संस्कृति में जतना लिखित काम भइल रहे ओह सब से परिचयात्मक जानकारी दिहल गइल बा. सम्पादन के दिसाईं एह किताब के विधावार कुल्ह ११ हिस्सा में बाँटल गइल बा, जइसे कि काव्य-साहित्य, कथा-साहित्य, नाटक, निबंध साहित्य, पाठ्य-पुस्तक, शब्दकोश, व्याकरण आ भाषाविज्ञान, रस , छंद, अलंकार आ साहित्यशास्त्र, पत्र-पत्रिका, लोकसाहित्य आ परिशिष्ट.

एह किताब के अइला से सबसे ज्यादा लाभ भोजपुरी भाषा, साहित्य आ संस्कृति में अनुसंधान करे वाला विद्यार्थी लोग के मिलल. हालांकि किताब पहिले से छपत रही सन, बाकिर ओकरा बारे में जानकारी ना मिल पावत रहे. एह विचार से ई किताब एक तरह से ‘भोजपुरी लाइब्रेरी’ बनके सामने आइल. एह किताब के ऐतिहासिक पृष्ठ बे बात कइल जाव त इहो बात सामने आई कि भोजपुरी में साहित्य सम्पादन के काम कइसे भइल. एह से पहिले भोजपुरी में लोकसाहित्य के संकलन आ सम्पादन के काम होत रहे, बाकिर ई किताब एह विचार से सबसे बड़हन सम्पादन रहे.

एह किताब के शुरुआत में ‘अकादमी के और से’ अकादमी के निदेशक हवलदार त्रिपाठी ‘सहृदय’ जी लिखले बानी–
“जवन ग्रन्थ-सूची अपने सभे के हाथ में बा, ई पहिलहूं हिंदी भाषा में अखिल भारतीय भोजपुरी साहित्य सम्मेलन से छपल रहे. ओही सूची के विस्तार कइल रूप ई सूची ह, जवन ब्योरेवार ढंग से तइयार कराके आ छूटल-भुलल पोथियन के नांव जोड़ि के तइयार कइल गइल बा. एह सूची से बिसेस फायदा ओह लोग के होई, जे भोजपुरी भाषा-साहित्य में सोध आ खोज कइल चाह्ताड़े. एह ग्रन्थ-सूची से ओइसनो लोग के आँखि खुली, जे कहेलन कि भोजपुरी में कहाँ कुछुवो साहित्य बा?”

भोजपुरी के लिखितंग इतिहास के नजर से देखल जाव त एह किताब से पता चल जाता कि भोजपुरी के कवना विधा के पहिली किताब के लिखले रहे आ कहवाँ से छपल रहे. उदाहरण खारित भोजपुरी कविता के पहिलकी किताब जवन छपल रहे ऊ रहे ‘सुधाबुन्द’. महाराजा लाला खङ्ग बहादुर मल्ल के लिखल ई किताब जवन खङ्ग बिलास प्रेस, बांकीपुर से छपल रहे ओकरा बारे में लिखल बा कि जार्ज ग्रियर्सन एकरा बारे में लिखले बाड़न कि ई किताब १८८४ में छपल रहे. बाकिर पंडित गणेश चौबे जी के कहनाम बा कि ग्रियर्सन जी के किताब में ई तिथि गलती से छपा गइल होई. उहाँ के लिखतानी–
“लेखक स्वर्गीय दुर्गाशंकर प्रसाद सिंह ‘नाथ’ के पास एह पुस्तक के एगो नकल देखले रहस जवना में एकरा छपे के समय १८८२ ई. लिखल रहे. रचइता मझौली के राजा रहन. ओह जुग में लोक संगीत के लोक भाषा में रचे के परिपाटी रहे. अब तक जेतना जानकारी बाटे एकरा आधार पर इहे कहल जा सकेला कि ई भोजपुरी के पहिलका छपल पुस्तक बाटे.”

एही तरे एह किताब में भोजपुरी के पहिलका गजल संग्रह ‘बदमाश दर्पण’ (१८९५ ), पहिलका महाकाव्य ‘कुंवर सिंह (१९५७), पहिलका खंडकाव्य ‘बलिदानी बलिया’ (१९४२), पहिलका हास्य-व्यंग्य ‘भोकास’ १९५६), पहिलका संस्कृत के भोजपुरी अनुवाद ‘बदरऊ’ (१९५४), पहिलका गद्य गीत ‘जोत कुहासा के’ (१९७६), चम्पू काव्य ‘बाबू कुंवर सिंह’ (१९६०), भोजपुरी उपन्यास ‘बिंदिया’ (१९५६), कहानी संग्रह ‘जेहल के सनद’ (१९४८), भोजपुरी नाटक ‘बाबू कुंवर सिंह (१९६२), एकांकी ‘सुदेसिया नाटक’ (१९४०), प्रहसन ‘सिव टहल काका’ (१९८०), रेडियो रूपक ‘लोहा सिंह (१९५५), अंग्रेजी नाटक अनुवाद ‘अब्राहम लिंकन’ (१९७९), लोक नाटक ‘भिखारी ठाकुर ग्रंथावली, पहिला खंड (१९७९), निबंध संग्रह ‘भोजपुरी संगम (१९६२), रेखाचित्र ‘चतुरी चाचा की चटपटी चिठ्ठियां’ (१९५७), ललित निबंध ‘के कहल चुनरी रंगा ल’ (१९६८), समीक्षा ‘रामकाव्य परम्परा में मानस’ (१९७६), ‘भोजपुरी शब्द कोश’ (१९४०), पत्रिका ‘बगसर समाचार (१९१८), पहिला लोकगीत संग्रह ‘भोजपुरी ग्राम गीत’ (१९४३), लोककथा संग्रह ‘सरवरिया’ (१९१३), ‘कहावत कोश’ (१९६५), पहेली ‘भोजपुरी पहेलियाँ’ (१९६९) बतवल गइल बा .

कुल्ह २०० पेज के एह सम्पादित किताब में भोजपुरी के बारे में अंग्रेजियो में लिखल किताबन के उल्लेख बा. बतावल जरुरी बा कि एह किताब में ‘फुटपथिया’ साहित्य के उल्लेख नइखे. ई बहुते उपयोगी किताब बा. भोजपुरी भाषा आ साहित्य, संस्कृति के बारे हिंदी में जवन अध्ययन आ अनुसंधान के काम हिंदी में भइल रहे आ हिंदी में प्रकाशित रहे ओकरो बारे में जानकारी दिहल गइल बा. जैसे कि –‘भोजपुरी लोकगाथा.’ एकर सम्पादन १९५७ में डॉ. सत्यव्रत सिन्हा जी कइले रहीं. एहमे भोजपुरी के बड़हन-बड़हन लोकगाथा के अध्ययन भइल बा. ई पीएचडी के शोध प्रबंध ह. १९५८ में छपल ‘लोक साहित्य की भूमिका’ किताब डॉ. कृष्णदेव उपाध्याय जी के ह, जवना में भोजपुरी के लोक साहित्य के हिंदी में विवेचना बाटे. वैजनाथ सिंह विनोद के किताब ‘भोजपुरी लोक साहित्य : एक अध्ययन १९५८ में छपल रहे एहमें भोजपुरी क्षेत्र के इतिहास, भोजपुरी आ ओकर विभाषा , लोकगाथा, लोककथा, संस्कारगीत, व्रत-त्यौहार, ऋतुगीत, राष्ट्रीय गीत, कहावत आ पहेली के संक्षेप में विवरण बा. एह किताब के भूमिका डॉ. धीरेन्द्र वर्मा जी लिखले बानी.

‘भोजपुरी लोक साहित्य का अध्ययन कृष्ण्देव उपाध्याय जी के मशहूर किताब १९६० में छपल रहे जवन पीएचडी के थीसिस रहे. एही तरे डॉ. श्रीधर मिश्र के किताब ‘भोजपुरी लोकगीतों के विविध रूप, आ फेर ‘भोजपुरी लोकसाहित्य के सांस्कृतिक अध्ययन’ किताबन के बारे में जानकारी बा. भोजपुरी पर विदेशी भाषा में लिखल किताब अल्फबेटाम ब्रह्मनिकम सिउ इन्दोस्तानम उनवर्सिटिटिस,(रोम १९७१) नोट्स ऑन द भोजपुरी डायलेक्स ऑफ़ हिंदी ऐस स्पोकन इन वेस्टर्न बिहार, ए ग्रामर ऑफ़ द हिंदी लैंग्वेज,बिहारी लैंग्वेजेज आदि बिसहन ऐतिहासिक किताबन के बारे में जानकारी देबेवाला चौबे जी के ई सम्पादित किताब भोजपुरी प्रकाशन के अनमोल धरोहर बा.

परिचय- डॉ. शंकर मुनि राय ‘ गड़बड़’ – हिंदी आ भोजपुरी के प्रतिष्ठित लेखक, समीक्षक आ व्यंग्यकार। भोजपुरी साहित्य में हास्य-व्यंग्य पर पीएचडी आ भोजपुरी लोक साहित्य में यूजीसी परियोजना कार्य। डेढ़ दर्जन किताबन के लिखवयिया, आकाशवाणी आ दूरदर्शन से कविता कहानी आ व्यंग्य पाठ। विभागाध्यक्ष-हिंदी आ शोध निर्देशक, शासकीय दिग्विजय महाविद्यालय राजनांदगांव (छत्तीसगढ़।

पुस्तक-समीक्षा

सौरभ पाण्डेय

पुस्तक- भोजपुरी साहित्य परम्परा आ परख 

लेखक- डॉ० ब्रजभषण मिश्र

विधा– आलेख

प्रकाशक- सर्वभासा ट्रस्ट,  राजापुरी, उत्तमनगर, नई दिल्ली-110059

प्रकाशन वर्ष – 2021

पॄष्ठ संख्या – 168

मूल्य – 250 रुपया  

रचनात्मकता आ उपलब्धी के नजर से देखल जाव त पाछिल साठ के दसक से भोजपुरी लेखन के जवन उठान बनल बा, ऊ पद्य भर ले ना, गद्य तक में रचना के मजगर प्रकाशन आ संकलन के कारन बनके लउक रहल बा। ई साफ बा, जे ई उठान सत्तर के दसक तक लेखन आ साहित्य-संवर्धन के सोझगर राहि ध लेले बा। साहित्य साधना के एह कालखण्ड में डॉ० ब्रजभूषण मिश्र लगभग पैंतालिस बरिस से भोजपुरी साहित्य के गँभिराह बिद्वान के तौर सोझा बानीं। भोजपुरी भासा के समुझ आ एकर सांगठनिक परसार खातिर जवन लगन, अध्ययन आ चहुँप चाहीं, आलोचना आ समीक्षा खातिर जवन पोढ़ नजर, जरूरी ग्यान आ परखर संप्रेषण चाहीं, ब्रजभूषण भाई के लगे ऊ सभ जरूरी गहिराई सङे मौजूद बा। सामयिक आलेख, नीर-छीर आलोचनवे ले ना, ब्रजभूषण भाई भोजपुरी में रचनाकारन के पुस्तकन खातिर जिम्मेवार भूमिकओ लिखत रहल बानीं। भूमिका आ समीक्षा के अर्थबोध प उहाँ के मत एकदम सोझ बा। जे, भूमिका में ’कमी के ओर खुल के संकेत करे में कठिनाई होला’। बाकिर, भूमिका के माध्यम से ओह पुस्तक के मूल बिसै प चर्चा करत ओकर कथ्य के बिसेसता, महत्व आदि के बखान होला। लेखक लेखन-परम्परा के कतना निर्वाह कइले बा, कतना प्रयोगधर्मी बा आदी का ओर चर्चा कइल जाला। ओजुगे, समीक्षा करत एह बिन्दू प जोर रहेला जे ’विवेच्य पुस्तक में पढ़े के का मिली?’ आ, ऊ किताब अपना मौजूदा समै में कहँवाँ ले प्रभावी बा।

अठाइस गो भूमिका आ आलेखन के संचयन के रूप में एगो पुस्तक सोझा आइल बा ’भोजपुरी साहित्य परम्परा आ परख’। एह संग्रह में भोजपुरी पुस्तकन प ब्रजभूषण भाई के मत संग्रहीत बा, चाहें भूमिका के रूप में भा समीक्षा के तौर प। जवना अधार प भोजपुरी भासा आ एकर परम्परा के बहुआयामी विस्तार के बूझे आ परखे के बेजोड़ संजोग बन रहल बा।

संग्रह के भूमिका में डॉ० रिपुसूदन श्रीवास्तव जी ब्रजभूषण भाई के साहित्यानुराग के एगो आउर महत्वपूर्ण जोगदान प धेयान घींच रहल बानीं, ’डॉ० ब्रजभूषण मिश्र संगठन आ साहित्य दूनू में समान रूप से सक्रिय ढंग से लागे वाला व्यक्ति के नाँव ह।’ ब्रजभूषण भाई के ई परिचय उनकर आलेख, आलोचना आ भूमिका के लेके पाठकन के उमेद सहजहीं बढ़ा देवे वाला बड़ुए। ब्रजभूषण भाई भोजपुरी साहित्य के हवाला से आलोच्य पुस्तकन के उदेस आ बिसेसता के निकहा चर्चा कइले बानीं। कुछेक उद्धरन आ उदाहरनन का हवाला से एह के परखल एह आलेख के कारन बा।

डॉ० अशोक द्विवेदी के पद्य-संग्रह ’फूटल किरिन हजार’ के भूमिका ’बोझा ना कबो हलुकाइल’ में ब्रजभूषण भाई के एह तुलनात्मकता प धेयाअन दिहल निकहा उचित होई, जे, ’मेहनती कामन के बिम्ब उनका कवितन में खड़ा भइल बा।’ चाहें, ’डॉ० अशोक द्विवेदी के पूर्ववर्ती कवियन में अनिरुद्ध अइसन कवि बाड़न जिनका काव्य-रचना में छोटहन किसान, खेतिहर मजदूर आ जातीय पेशा करेवाला का श्रम के बिसै बनावल गइल बा, जवन बिम्ब, प्रतीक आ मिथक के रूप में आइल बा।’ ब्रजभूषण भाई अपना तर्क के अकाट्य बनावे खातिर कवि अनिरुद्ध के कहन आ द्विवेदी जी के कहन के बीच महीनी के परखत कहतारन, ’श्रम प द्विवेदियो जी केन्द्रित बाड़न, बाकिर उनकर दृष्टी अनिरुद्धजी से अलगा बा। अनिरुद्ध के कवितन मे श्रम के महिमामंडन बा … ओतहीं, द्विवेदीजी के कवितन में श्रम के संघर्ष बा।’ माने, ब्रजभूषण भाई द्विवेदीजी के यथार्थबोध के सूत्र पाठकन के थमा देत बाड़न। ओजुगे, भोजपुरी साहित्य के पोढ़ गीतकार हरिराम द्विवेदी जी के गीत-संग्रह ’नदियो गइल दुबराय’ के भूमिका में पाठकन के गीतात्मकता के भावबोध से परिचित करावत कहत बाड़न, ’लोकभासा भइला के चलते भोजपुरी में दू तरह के साहित्यिक-धारा विकसित होत चलल आवत बा। एगो लोक परम्परा से चलल आ रहल लोक साहित्य के धारा जवन वाचिक परम्परा में सदियन से भोजपुरी समाज में पीढ़ी-दर-पीढ़ी से बरकरार चलल आवत बा। … दोसर साहित्यिक धारा … आध्यात्मिक बिचार धारा से आगे बढ़त, राष्ट्र-प्रेम के धारा से गुजरत, प्रगतिशील चेतना के आगे बढ़ावत समकालीन आ समसामयिक बिचारधारा के संपुष्ट क रहल बा।’ लोक-कृति आ साहित्यिक-कृति के सार्थक भेद से पाठक परिचित हो जा रहल बा। हरिराम द्विवेदीजी के गीत के परख करत उनका रचनन में गीति-प्रतीती प नजर राखत ब्रजभूषण भाई कौ गो गीतन में नवगीत के सरूप देख लेत बाड़न। ईहे ई साबित क देता जे हर नवगीत बलुक गीते ह, जवना के बिम्ब आ बिन्यास पाठक तक निकहा अलगा बिस्तार से होला।

हर नया समै बिसेस सवाल आ चुनौती लेके आवेला। ओह सवालन आ चुनौतियन से रचनाकार आ आलोचक दूनो के समुझ प्रभावित होला। लेखक-कवि आ आलोचक के आपन प्रतिभा, कहि सके के साहस, विवेक आ संवेदना प निर्भर करेला।’संस्कृति, प्रकृति आ प्रवृति के निबाह’ शीर्षक के अंतर्गत केशव मोहन पाण्डेय के संग्रह प इनकर कहनाम देखीं, ’एह संकलन के सब लेख सांस्कृतिक मान्यता के बचवले राख के, एक तरह से पर्यावरण के प्रदूषण से बचावे खातिर सजग बा … हमनी किहाँ पर्यावरण के बचावे खातिर परब, तेवहार बनल। ऊ मन के शुचिता के साथे प्रकृतिओ के शुचिता के बरकरार राखे के उतजोग ह।’ अइसहीं, डॉ० किशोरी शरण शर्मा के शोक-काव्य संग्रह ’भोर अँजोर नहाइल’ जेकरा रचनाकार प्रबन्धकाव्य के श्रेणी में राखत बाड़न, प आपन बात कहत ब्रजभूषण भाई आपन उद्घोषना से तथ्य में सोझ सुधार क देतारन, ’प्रबन्ध काव्य होखेला काव्यशास्त्री लोग कौ गो शर्त रखले बा। ओह दृष्टी से … काव्य के मूल भावना में भटकाव आ जाई।’ बिधा-बिधान के लेके अइसन नीर-छीर करे के साहस बगैर गहीर अध्ययनशीलता आ गहन मनन के ना आ सके। ब्रजभूषण भाई के अध्ययन, परख के प्रिज्म से भोजपुरी समाज के परंपरा आ ओकर मायना लेके बेलाग अस्पस्टता के साथ पाठकन के सोझा आवेला। आपन आलेख के आलोक में बिभिन्न छंदन के, हाइकु, ताँका आ सनेर्यु जइसन बिदेसी बिधानन के शिल्प प तार्किक नजर राखत निकहा परख कइले बानीं।

उहाँ का पुरजोर साहस आ तार्किकता से बात करे के हामी हईं। इनका आलोचनात्मक विवेक प संस्कृत काव्यशास्त्र के मानदण्ड भा पच्छिमी साहित्य के आलोचना के मुहावरा के आतंक नइखे। अइसना से भोजपुरी भासा के आलोचना ला निकहा स्वतंत्र पद्धती आ ओकर बनावट के सूत्र भेंटा रहल बा। संग्रह बिचारधारा, जीवनदृष्टी, साहित्यिक विवेक आ बेवहारिक रूप से साहित्यिक विश्लेषन आ मूल्यांकन के परिपाटी से परिचित करावे वाला बा। वस्तुतः समीक्षक के लगे गहन जीवनानुभूती आ बिभिन्नता भरल अनुभव चाहीं, जवन साहित्य के धरातल प आमजन के समर्थन में ठाढ़ क देवे। माने, आलोचना रचना के बहिरङ पाठ से ना, रचना में अंतर्निहित जीवनानुभव के मार्मिक मौजूदगी से अर्थ पावेले। आलोचना कवनो लेखन के भावबोध, अर्थबोध, शिल्प आ शब्द-बेवहार के साधे वाली ’कला’ कहल जाला। एह पुस्तक के हवाला से ब्रजभूषण भाई के गहन अध्ययन, साहित्यिक-अनुभव आ साहित्य-कर्म सार्थक रूप से पाठकन का सोझा आइल बा।

परिचय- छंदशास्त्री श्री सौरभ पांडेय भोजपुरी के खाँटीपन के आग्रही हईं। हिन्दी आ भोजपुरी में लगभग तीन दशक से समान रूप से सक्रिय बानीं।    

पुस्तक-समीक्षा

निरंजन प्रसाद श्रीवास्तव  

पुस्तक : पनिहारिन (भोजपुरी काव्य संग्रह)

लेखक : अनिरूद्ध

विधा : काव्य

प्रकाशक : सरोज प्रकाशन, 5, टैगोर हिल्स रोड, राँची

प्रकाशन वर्ष : 1989

पृष्ठ संख्या : 96

मूल्य : 25 रुपया

‘पनिहारिन’, भोजपुरी कविता-संसार में भोजपुरी के पन्त आ वर्ड्सवर्थ का नाम से विख्यात भोजपुरी के यशस्वी कवि-गीतकार आ शब्द-पुरुष अनिरुद्ध के पहिला काव्य-संग्रह ह. ई काव्य-संग्रह छव् खंड में बंटल बा-‘गीत भोर के’, ‘गीत साँझ के’, ‘गीत रितु के’, ‘गीत देस के’, गीत खेत-खरिहान के’ आ ‘विविध गीत’. एह काव्य-संग्रह में अनिरुद्ध के 1949 से 1988 का बीच लिखल कुल 77 रचना संकलित बा।

एह काव्य-संग्रह के पहिलका खंड ‘गीत भोर के’ में भोर पर 13 गो गीत-कविता बा जवना में गंवई अंचल के बिहान-भोर-भिनसार, विशेष रूप से आसिन, सरद, आ अगहन का भोर का प्राकृतिक छटा आ सौन्दर्य के अद्भुत मनोहारी चित्रंण बा. एह खंड के दू गो गीत विशेष रूप से उल्लेख करे लायक बा- “गाँव के भोर’ आ ‘पनिहारिन’। ‘गाँव के भोर’ में रात का घूंघट के उठावे वाला नीला रंग के आसमान के  मिलन-पर्व के आनन्द गांव का भोर में कइसन छलक रहल बा ओकर वर्णन एह पँक्तियन में अद्भुत बिम्ब-विधान का जरिए भइल बा-रतिया के घुंघटा उघारे असमनवा, हँसेला मिलनवा में प्यार/लाले रंग पगिया के रंगेली लहरिया, नील रंग चुंदरी के कोर/धरवा किनरवा जे रंगे सातो रँगवा, उतरल पंखिया पै भोर/डोलिया कँहारवा जे रखे पनिघटवा, खोली झाँके खिड़की केंवार.“पगड़ी आ चुंदरी के बिम्ब पुरुष आ प्रकृति के मिलन के सुंदर शास्ति रच रहल बा।

 ‘पनिहारिन’ अनिरुद्ध के सबसे प्रिय कविता रहल बा. एही कविता पर संग्रह के नाम भी बा. भोर में घइला में पानी भरके पुरवा हवा में अंचरा लहरात पनिहारिन के गोल लौटेला. एह दृश्य के कविता के तीसरकी आंख कइसे देखता- “दिल दरियाव घड़ा में जीवन, घट में बहता पानी/घइला में नदिया के भर के उमड़ल भरल जवानी/अंचरा के सब पाल उड़वले, भुइँए नाव चलेला/’. एह पंक्तियन में दू गो दृश्य के समीकरण बा आ ओकरा बाद धरती पर नाव चलला के असम्भव कल्पना में अपूर्व उन्मेष बा जे कवि के गजब के सृजनशीलता के संकेत दे रहल बा।

      ‘गीत साँझ के’ खंड में साँझ पर 8 गो गीत-कविता बा. एह खंड के ‘सँझिया साँवर गोरी’ कविता विशेस रूप से उलेख करे लायक बा. सांझ का बेरा पल-पल बदलत प्रकृति के रूप के सुंदर आ मनोहर वर्णन बा। एह कविता में सूरज के मछुआ से तुलना भइल बा ‘”ताल-ताल नदिया दिन भर फेंके जाल सूरुज/ खींचे गुटीआवे अब लाल-लाल डोरी”. “एक बेर फेरु जिनगी गाँव चहक रंग जाला/ बगिया पंखिया पसार प्राण अब लौट आइल.” “बीन पछिम बाजेला समय का सपेरा के” आ “रावन गदबेर सांझ सुसुकत रथ ले भागे” में समय के तुलना सपेरा से आ रावण के तुलना गदबेर से में उहे उन्मेष दिखाई देता.

‘गीत रितु’ के खंड में अलग–अलग रितु अलग-अलग संवेदना, अलग-अलग रंग आ प्रकृति के अलग रूप के गीत-कविता बा. एह गीतन में कवि निरीक्षण शक्ति सराहे लायक बा. कुछ पंक्ति देखीं-लाल पगड़िया ला चुनरिया रंगे नगरिया लाल रे/बगिया में चैता रस मातल रंगे नजरिया लाल रे/’ (फागुन के गीत), “ले पहुंचल संदेश कोइलिया आइल रे मधुमास/ कँटइया के पीयर प्याली मातल नयन पलास/चइत राज का अगुआनी में कनइल बिगुल बजावे/” (मधुमास), “अँखियाँ में महंक रहल सनेह चइता के/गान-गाँव में रंगल बथान बा/मउसम हरदम नया जवान बा/’’ (मउसम हरदम नया जवान बा). ‘उमर घुमड़ बरसे आषाढ़ के कजरा नैन बदरिया बरसे” (आषाढ़ के बादल), “धनके जिनिगिया बगिया, हरी फुलवरिया/जीभवा निकाले हांफे नदिया-पोखरिया/तडपे परानी भुंइया सागर मांगे पानी/ बदरा बरसS हो/” (मेघ गीत), ‘रूप महकेला महके उमिरिया/ झुनुर-झुनुर नाचेली भोर/’ (शरद गीत), हरियर सेज बिछल फिसलल मन, मोटी जदल रंगीला/मखमल पर रंगीन रेशमी तितली कढ़ल कसीदा/ई मउसम रंगरेज रूप के सुंदर सजल बजरिया (हेमंत गीत), सरसों फूल बसंती पगिया मीत चुनरिया रंग दे रे/नैन गुलाबी चटक प्रेम रंग मीत नजरिया रंग दे रे/ धरती धनी फसिल पके जब रंगे कनक रंग काया/कांटा फूल कुसुम रंग चोला ई माटी के माया/उड़े बिहग बिसरे न भुंइया नेह अंचरिया रंग दे रे/ (मीत नजरिया रंग  दे रे).

‘गीत देस के’ खंड में पांच गो देस गीत आ ईगो बढ़ावा गीत बा आ एकरा अलावा ईगो गीत नदी का महिमा पर बा. “दुनिया में देस हमार मुंदरी के हीरा बा” (देस गीत), “कस्मीर धवल मुखड़ा,  हिय हार सजल नदिया/ नभ झील जड़े नीलम दरपन हमार भारत/ ई प्राण से पियारा मधुबन हमार भारत’ (ह्मार भारत) में कवि के राष्टवाद के भावना झलक रहल बा. भोजपुरी भाषा में लिखल अनिरुद्ध के बढ़ावा गीत के तुलना इनल-गिनल प्रयाण-गीतन से कइल जा सकता- “आज महाधार में देस के पुकार बा/कर्म के गोहार बा/.सामने पहाड़ बा/तू जवान चढ़ चल/ झूम-झूम चढ़ चलs/बान बन कमान पर सनसनात चल चलs.

अनिरुद्ध श्रम का सौन्दर्य के भी चित्र प्रस्तुत किइले बाड़न. ‘गीत खेत खरिहान के’ आ विविध गीतन के ‘गाड़ीवान गीत’ से मालूम होता-“गाय भंइसिया भेड़ बकरिया धन दउलत चरवाहा के/फसल-फसल पर चमक पसीना फल मोटी हरवाहा के”.

‘पनिहारिन’ के तुलना पन्त के कविता संग्रह ‘ग्राम्या’ कइल जा सकता. दुनों में ग्राम-चित्र के बहुलता बा. अनिरुद्ध के कवितन में प्रकृति के उद्दीपन, आलंबन आ अलंकार तीनों रूप उपस्थित बा. सदानीरा नारायणी नदी का किनार पर बसल उनकर गाँव आ ओकर प्रकृति उनका भीतर बा उहे उनकर अनुभूत आ बिम्बन के स्रोत बा. ‘पनिहारिन’ के गीतन आ कवितन में चाक्षुष, श्रव्य, गंध्य, स्पर्श्य, गत्यात्मक, पौराणिक सभे तरह के बिम्बन के अन्तर्गुम्फन बा, सब तरह के रस बा, आदमी आ प्रकृति के अंतर्संबंध के पहिचान बा संवेदना के जुड़ाव बा. अनिरुद्ध के कविता भोजपुरी कविता के कथ्य आ शिल्प के नया मोड़ देले बा.भोजपुरी खातिर ई कम गौरव के बात नइखे कि अनिरुद्ध के कविता के रामवृक्ष बेनीपुरी, राम विलास शर्मा, हंस कुमार तिवारी, जानकी बल्लभ शास्त्री, राहुल संकृत्यायन, श्याम नारायण पाण्डेय आ डॉ० हरिवंश राय बच्चन सभे सरहले बा.

परिचय – निरंजन प्रसाद श्रीवास्तव  

सारण जिला के एक छोटे-से गाँव गलिमापुर में 27 नवंबर, 1943 के जनम. कुछ साल तक शिक्षण कार्य कइला का बाद बिहार सरकार के उत्पाद विभाग में नौकरी आ उपायुक्त का पद से सेवानिवृत्त होके लेखनकार्य. सन् 1976 से भोजपुरी आन्दोलन से सक्रिय जुड़ाव. 1982 आ 1985 में अखिल भारतीय भोजपुरी साहित्य सम्मलेन में संरक्षक मंडल में भागीदारी रहल. मुख्य रूप से हिंदी में लेखन

पुस्तक-समीक्षा

डॉ. नीरज सिंह 

1. किताब: बटवृक्ष
2. लेखक: स्व बरमेश्वर सिंह
3. विधा : विविधा ( भोजपुरी आ हिंदी के निबंध,समीक्षा आ संस्मरण के संग्रह )
4.  प्रकाशक: सर्वभाषा ट्रस्ट, नई दिल्ली
5.  प्रकाशन वर्ष:2022
6. पृष्ठ संख्या : 112
7. मूल्य : 180.00

                स्वर्गीय बरमेश्वर सिंह कवनो परिचय के मोहताज नइखन। उहां के  भोजपुरी के एगो बहुत समर्थ रचनाकार रहनी हां जे एक साथ ही कविता आ कहानी दुनो क्षेत्र में सक्रिय रहीं। उहांके लिखल कविता के दुगो संग्रह प्रकाशित हो  चुकल बा। पहिला कविता संग्रह छंद मुक्त कविता के ह, जवना के शीर्षक ह – अथ लुकाठी कथा। दूसर पुस्तक छंदोंबद्ध रचनन के संग्रह ह- ‘ गीत-अगीत ‘। एह दुनो कविता संग्रहन के अतिरिक्त बरमेश्वर जी के दुगो कहानी संग्रह भी प्रकाशित बाड़न स- ‘ कथा वृक्ष’ आ ‘ अमर कथा ‘। एह चार पुस्तकन के रचनाकार बरमेश्वर जी अपना लेखकीय  सजगता के चलते बहुत बिपुल परिमाण में सृजन कार्य त  नइखी कइले बाकिर गुणवत्ता के लिहाज से उनका कृतियन के अप्रतिम महत्व बा।  कविता के साथे साथे कहानी के क्षेत्र के भी में उहांके  योगदान बेजोड़ रहल बा।  सबसे बड़ चीज कि जब तक उहांके जीवित रहनी,  नियमित लेखन करत रहनी आ सार्थक रचत रहनी।

          बरमेश्वर सिंह जी के  चारो पुस्तक उहांके  जीवनकाल में ही प्रकाशित हो चुकल रही स। एकरा बावजूद उहांके  अलग-अलग कईगो गद्य विधन के कुछ रचना अब तकले  अप्रकाशित रह गइल रही स। ओह सभ बाचल-खुचल रचनन के प्रकाशन हाल फिलहाल सर्व भाषा ट्रस्ट दिल्ली से भइल हा। एह पुस्तक के संपादन कइले बाड़न- सुप्रसिद्ध कवि- कथाकार-आलोचक विष्णुदेव तिवारी आ अनुभवी  संपादक-रचनाकार दिलीप कुमार।  ‘  बटवृक्ष ‘ के प्रकाशन से एगो बहुत बड़ काम भइल बा जवना खातिर संपादक- द्वय आ प्रकाशक के साथ ही स्वर्गीय बरमेश्वर सिंह जी के सुपुत्र हेमंत कुमार सिंह भी बराबर के बधाई के हकदार बाड़न।

                       बटवृक्ष में निबंध, प्रतिक्रिया, समीक्षा आ संस्मरण खंड के अंतर्गत कुल उन्नीस गो रचना संकलित बाड़ी स। एंहनी में एग्यारह गो निबंध, दू गो प्रतिक्रिया, पांच गो समीक्षा आ एगो संस्मरण विधा के रचना  बा।  संस्मरण के शीर्षक  ‘ बटवृक्ष ‘ ह जवना के नाम पर ही एह पुस्तक के नामकरण भी कइल गइल बा। संस्मरण बटवृक्ष के अतिरिक्त  पुस्तक में शामिल सभ रचना भोजपुरी के बाड़ी स। बटवृक्ष एकमात्र रचना बा जवन हिंदी के बा आ पुस्तक के अंत में राखल बा। अब ई बात हमरा समझ से परे बा कि आखिर संपादक  द्वय के अइसन कवन मजबूरी रहल हा जवना के चलते उहां सभे के एगो जानल-मानल भोजपुरी साहित्यकार के मरणोपरांत प्रकाशित अंतिम पुस्तक के नामकरण हिंदी में प्रकाशित रचना के नाम पर करे के पड़ल हा! हमरा समझ से एकरा के उचित ना कहल जा सके। खैर।

                       पुस्तक के पहिला रचना के रूप में एगो निबंध बा जवना के शीर्षक ह -‘ कहानी के व्याकरण ‘। एह निबंध में कहानी विधा के स्वरूप पर बहुत बढ़िया से प्रकाश डालल गइल बा। कहानी के परिभाषा आ ओकरा तत्त्वन प  एह निबंध में विचार कइल गइल बा। सबसे बड़ चीज बा- कहानी के अंग्रेज लेखकन द्वारा दिहल गइल परिभाषण के बहुत सुन्दर अनुवाद। अंग्रेजी परिभषन  के अतना बढ़िया साफ सुथरा आ सटीक अनुवाद त हिंदी के  बड़ बड़  विद्वान लोग भी नइखे कर सकल। एहिजा विस्तारभय से हम उदाहरण नइखीं देत। एकरा साथही एह निबंध में  हेनरी हडसन के द्वारा उल्लेखित कहानी के छह  तत्वन के तनिका संशोधित बाकिर ज्यादे ग्राह्य आ संप्रेषणीय रूप में  बतलावल गइल बा। ई निबंध एगो आदर्श वस्तुनिष्ठ निबंध के उदाहरण कहल जा सकेला। एही तरह के अउर तीन गो निबंध पुस्तक में संकलित बाडन स- लघु कथा आ भोजपुरी लघु कथा, भोजपुरी पत्रकारिता: दशा आ दिशा तथा गजल आ भोजपुरी ग़ज़ल। एकरा साथ-साथ दुगो और निबंध बाड़न स- ब्राह्मणवाद के शब्दार्थ आ आर्ष ग्रंथन में पर्यावरण चिंतन। एह सभ निबंधन में विषय वस्तु के बहुत बढ़िया से विवेचन विश्लेषण भइल बा। उदाहरणस्वरूप लघुकथा के ई परिभाषा के देखल जाव –  ” लघुकथा जिनिगी के लघु-धड़कन के कहानी ह। जवना के काल क्षणिक होला। हालांकि, ओह क्षणिक काल में तीव्रता आ गति के कमी ना होला। इहे कारण बा कि लघुकथा चील-झपट्टा अस पूर्ण होला। माने कि प्रारम्भ होखते अपना समाप्ति पर पहुंच जाला।” हां, भोजपुरी ग़ज़ल पर आपन बात कहे के क्रम में गजलकार लोग के लापरवाही आ भावन के पुनरावृत्ति के जवना अंदाज में चर्चा लेखक कइले बाड़न, ओकरा से एगो रम्य रचना पढ़े के आनंद मिलत बा। बाकी के जवन निबंध बाड़न स, ऊ सभ त संचहूं के ललित निबंध बाड़न स- एकदम बरमेश्वर सिंह जी द्वारा देल गइल ललित निबंध के परिभाषा के अनुरूप। उहेँ के शब्दन में – ”   साहित्य के क्षेत्र के हर आदमी जानेला  कि ललित निबंध  भा  रम्य रचना जे कहीं, के माने होला – उड़ी जहाज के पंछी पुनि जहाज पर आए।  बाकीर, ई उड़ान आ वापसी कलात्मक आ ललित रूप से घटित होला। फूहड़पन खातिर एह में कावनो स्थान ना होला । एह में जो फूहड़पन के पयसार हो जाई त ऊ निबंध ललित निबंध ना होके फूहड़ी के बड़ी हो जाई।” ‘ भोजपुरी कविता के वर्तमान स्थिति ‘, ‘ भोजपुरी आलोचना के नया प्रतिमान ‘, ‘ भोजपुरी कविता के त्रिकोण ‘ आ ‘ भोजपुरी के हिट साहित्यकार ‘ हमरा दृष्टि में  ललित निबंध के उपर्युक्त कसौटी पर खरा उतरेवाली रचना बाड़ी स। एह सभ निबंधन से अलग डॉ. विजय बालियाटिक के व्यक्तित्व आ कृतित्व प केंद्रित निबंध एगो शुद्ध शोधपूर्ण निबंध बा, जवना से उहांके हिंदी आ भोजपुरी के साधक साहित्यकार आ एगो प्रभावशाली आ लोकप्रिय शिक्षक नेता रूप के सुंदर परिचय मिलत बा।

                       पुस्तक में एगो प्रतिक्रिया खंड बा, जवना में दुगो पाठकीय प्रतिक्रिया शामिल बाड़ी स। एगो के शीर्षक बा -‘ सावन भादो के मिलन समारोह ‘ । एकरा में भोजपुरी के दुगो प्रतिष्ठित साहित्यकार लोग के सावन आ फागुन के आगमन प रचाइल गीतन में दिखलाई पड़ेवाला भावसाम्य के बहुत रोचक अंदाज में चर्चा कइल गइल बा। दोसरकी प्रतिक्रिया समकालीन भोजपुरी साहित्य के  कहानी विशेषांक के रूप में प्रकाशित ओकरा चउथा अंक प केंद्रित बा जवन बरमेश्वर बाबू के अपना कबीराना अंदाज के चलते  बहुते रोचक हास्य-व्यंग्यपूर्ण रचना बन गइल बिया। एह रचना में उहांके एह विशेषांक में प्रकाशित कहानियन प आपन बेबाक राय रखला के बाद अंत में जवन निष्कर्ष प्रस्तुत कइले बानी, ऊ बेजोड़ बा आ पढ़े लायक बा – ‘ बाकिर, तइयो ई विशेषांक दू बात में बेजोड़ बा। पहिला-आपन जात के भात खियावे में आ दोसर-सेतु न्यास के धन प गुलछर्रा उड़ावे में। ‘
                       समीक्षा खंड में भोजपुरी के पहिला उपन्यास ‘ बिंदिया ‘ के लेखक स्व रामनाथ पांडेय जी के चउथा उपन्यास ‘ इमरितिया काकी ‘, हिंदी-भोजपुरी के बहुआयामी व्यक्तित्व के धनी साहित्यकार भगवती प्रसाद द्विवेदी के लघुकथा संग्रह ‘ थाती ‘, स्व कृष्णानंद कृष्ण के चउथा कहानी संग्रह ‘ हादसा ‘, राज नारायण दीक्षित जी के पौराणिक कहानी संग्रह ‘ सेर भर सतुआ ‘ आ विदुषी साहित्यकार शारदा पांडेय जी के निबंध संग्रह ‘ रसबोध के एने-ओने ‘ के समीक्षा  शामिल बा।

                       अंत में एह पुस्तक के शीर्षक रचना आ एकमात्र हिंदी रचना ‘ बटवृक्ष ‘ के बारे में दू शब्द। ई रचना सांच पूछी त एगो श्रद्धांजलि वक्तव्य ह, जवन हिंदी-भोजपुरी के अनन्य साधक आ बलिया से प्रकाशित होखेवाली पत्रिका ‘ रससुलभ ‘ के संपादक स्व नरेंद्र शास्त्री जी प केंद्रित बा।  एकरा में शास्त्री जी के विस्तृत परिचय त नइखे दिहल गइल बाकिर उहांके बहुते आत्मीयतापूर्वक इयाद कइल गइल बा।

                       ‘ बटवृक्ष ‘ में शामिल रचना अपना विषयवस्तु के चलते त पठनीय बड़ले बाड़ी स, आपन रचना शिल्प आ भाषा-शैली के चलते भी पाठक के मन-मस्तिष्क में हमेशा खातिर रच-बस जाए में समर्थ बाड़ी स। विस्तारभय से डेरइला के बादो हम एकाधगो उदाहरण देबे से अपना के रोक नइखीं पावत। देखल जाव – ‘ खैर, भोजपुरियो में ग़ज़ल आइल आ खूब ताम-झाम के संगे आइल। नतीजा ई भइल कि जवना भोजपुरी के आत्मा गीत में बसत रहे, ओकरा के जबर्दस्ती ग़ज़ल में ठेले के पुरजोर कोशिश होखे लागल। फिर इहे कोशिश बाद में चलि के एगो कुचक्र के रूप अख्तियार करि लिहलस आ ई सिद्ध करे के तिकड़म होखे लागल कि बिना ग़ज़ल लिखले अब  भोजपुरी के कल्याण होखेवाला नइखे, कि जतना दम गज़ल  में बा, ओतना दम अउरी कवनो विधा में नइखे,  कि भोजपुरी के इज्जत भोजपुरी ग़ज़ले बंचा सकेला। नतीजा ई भइल कि भोजपुरी साहित्य के आकाश में बरसाती फितिनगी अस भोजपुरी के सैकड़न ग़ज़लगो उड़े लगलें। हालात इहवां तकले पहुँचि गइल कि भोजपुरी के अच्छा खासा निबंधकार, कहानीकार आ आलोचक तकले गजलगो कहाय खातिर छटपटाए लगलें। ‘

                       अंत में, ‘ बटवृक्ष ‘ के संपादन-प्रकाशन रूपी एह महत्त्वपूर्ण कार्य में शामिल भाई विष्णुदेव तिवारी, दिलीप कुमार, हेमंत कुमार सिंह अउर बहुते सुन्दर आ साफ-सुथरा प्रकाशन-मुद्रण खातिर  केशव मोहन पांडेय जी आ सर्व भाषा ट्रस्ट के बार-बार बधाई आ धन्यवाद।
                      

परिचय- डॉ. नीरज सिंह, वीर कुँवर सिंह विश्वविद्यालय, आरा के स्नातकोत्तर हिंदी आ भोजपुरी विभाग के पूर्व प्रोफ़ेसर आ विभागाध्यक्ष।
                  

पुस्तक-समीक्षा

डॉ. महेश सिंह

पुस्तक : झनकि बाजे हो

लेखक- बलभद्र

प्रकाशक- सर्व भाषा ट्रस्ट, नई दिल्ली

पेज- 72,

मूल्य ₹140.00

कथेतर गद्य संग्रह ‘झनकि बाजे हो’ एगो अइसन रम्य-रचनन के संग्रह बा जेमे स्वाभाविक रूप से पाठक रमत चलि जाला। एकर कारन बा लेखक की लेखनी के लालित्य। एहमें अनुभव में हर उ चीज बा जवन घर, परिवार, गाँव, जवार, खेत-बारी, खर-खरिहान, गढ़हा-गुडुही, बाग-बागइचा, ताल-पोखरा, नदी-नाला, चिरई-चुरङ्ग, पेड़-रुख़, हर-फार, जर-जुआठ आदि के बीचे हर मनई के आरे-पास से हो के गुजरेला। एहमें स्त्री जाति के दुःख-दर्द बा, संघर्ष बा तएही बीच से निकलल गीत आ संगीत भी बा। संगीत भी अइसन कि पाठक चाहि के भी एसे किनारा ना क सकेलन। एह संग्रहमें ज गो लेख बा उ त तरह के मनोरम दृश्य पाठक के सोझा रखि रहल बा। असल में ई एह संग्रह के लेखक डॉ. बलभद्र की लेखनी आ अनुभव के ताकत बा जवन पाठक के अपना भीतर आहिस्ता-आहिस्ता न खाली जगह दे रहल बा बलुक अपना भीतर रमि जाए के मजबूर क रहल बा। हम त इहे कहब कि जवना तरह से कहल जाला- हिंदुस्तान के जाने के होखे त प्रेमचंद के उपन्यास गोदान पढ़ लिहल जाव। असहीं भोजपुरिया समाज आ संस्कृति के जाने के होखे त डॉ. बलभद्र के ई कथेतर गद्य-संग्रह ‘झनकि बाजे हो’ पढ़ लिहल जाय।

आईं देखल जाव कि अउर का-का बा एह संग्रह में। त एह संग्रह में कुलि बारह गो कथेतर गद्य-रचना बा, जवन 1993 से 2019 तक भोजपुरी के तमाम पत्र-पत्रिकन में समय-समय पर प्रकशित भइल रहे। ओ समय अधिकतर पाठक आ संपादक लोग एह रचनन के पढ़ि इहे कहलन कि ई रम्य रचना ह, कुछ लोग ललित निबंध भी कहले बा। एह संबंध में हम भी इहाँ  कवनो नया स्थापना नइखीं देबे जात काहें कि हमके भी एह संग्रह के सब रचना रमा देबे वाला ही लागल। एह संग्रह में जवन पहिलका रचना बा ओकर नाम ह ‘टभकल से टुभुकल ले’। एह में बेटा के जन्म भइला के अवसर पर सोहर गावे खातिर जुटल गाँव के मेहरारुन आ लइकिन के स्वच्छंद बतकही आ गीतन के माध्यम से आपन दुःख-दरद, संघर्ष आ स्वतंत्रता के अभिव्यक्ति देखाई दे रहल बा।

“तोर मन बसे कि ना रे साँवरका

मोर मन बसेला तोरा में

चाहे मराइब चाहे कटाइब

चाहे कसाइब बोरा में”

एह गीत में खाली लय, सुर, राग आ ताल नइखे बलुक पितृसत्तात्मक व्यवस्था से विद्रोह करत अपना मन भा आत्मा की अभिव्यक्ति के बात बा। लेखक के हवाले से देखीं- “छाती के भीर। समय के माथा ठनकल। लइकिन के आपन दरद। लइकी भइला के दरद। समाज के आधा हिस्सा के दरद। आपन बात अपने राग में।”

दोसरका रचना के नाम ह ‘बिरह से जिरह में’। एह रचना में देखल जा सकेला कि लेखक आधा हिस्सा के साथे पूरा मन से खड़ा हो रहल बाड़न। उ जानि रहल बाड़न कि “लइकिन के मन के भीतर बहुत कुछ बा अइसन जवना के लेके कहल जा सकेला कि ऊ ऊपर-ऊपर से बेसी भीतर-भीतर होली।” चूँकि भारतीय समाज में पहिलहीं से एह आधा हिस्सा खातिर कवनो खास स्थान ना रहल, जेकरे चलते ऊ अपना भीतर के बात गीतन के माध्यम से अभिव्यक्त करे ली। डॉ. बलभद्र एह रचना में वोही भीतर की बात से समाज के रूबरू करावत बाने। 

‘समय के साँचा में’ एह संग्रह के तीसरका रचना ह। “अबकी बाजार के एकरा खातिर एगो हलुको-पातर कपड़ा कीनब जरूर। आपन त तोप-ढाँप लेब कसहूँ। पिलुआ भ के लइका। सवख का एह से दोसर होला । एकरा खातिर अबकी…!” इहाँ हम नइखीं समझत कि एह से अधिका कुछ कहला के जरूरत बा। लेखक कहि रहल बाड़न कि अभाव मन में बड़ा खीझउपजावेला एकरे बावजूद भी मजदूर वर्ग के हँसुआ समय की साँचा में बइठि के निरंतर गतिशील रहेला। काहें कि ऊ सारा खीझ हँसुआ पर उतर आवेला।

‘बाकी चइत के झकोर जानि माँगऽ’ आ ‘ताल टूटे ना’ एह दुनो रचना में पूरा भोजपुरिया समाज आ संस्कृति के बड़ा सलीका से लेखक प्रस्तुत क रहल बाने। चइत एगो महीना के नाम ह त चइता भोजपुरी लोक गीत के एगो शैली। चइता के विषय बड़ा व्यापक होला एमे जतने व्यापकता मिली अतने गहरायी भी अतने विविधता। विविधता की व्यापकता आ गहराई एह रचना के सौंदर्य बा। ताल टूटे ना में लेखक बता रहल बाने कि “शहर होखे भा गाँव- एही ताव आ ताल प साधारण आदमी के सँउसे जीवन नाचत रहेला।… किसान के जीवन में एह ताव आ ताल के एगो आपन रंग-ढंग होला। जोतनी-बोअनी से लेके कटनी-पिटनी तक के आपन ताव आ ताल होला।” लेकिन आज के पूँजीवादी आ बाजारवादी व्यवस्था में एह ताव आ ताल प खतरा मंडरा रहल बा। एही खतरा से समाज के अवगत करवले के प्रयास कहल जा सकेला ई रचना। एहि तरे ‘एकहवा’ में एगो आम के पेड़ (जवना के अब काटि दिहल गइल बा)  के माध्यम से लेखक गाँव-जवार के बीच मे ओकरे रहले के महत्व के बता रहल बाड़न। एह लेख में उनकर चिंता खाली पर्यावरण के लेके नाही बा बलुक ओकरे स्नेह की छाया में अंगे लागल आमजन आ हर प्राणी से भी बा।

एह संग्रह के अन्य रचनन में ‘अटका में परल बसन्त’, ‘पीर हउवे जहँवा के पहचान’, ‘झनकि बाजे हो धनि खेते-खेते चुरिया’, ‘कॉलेज में तोंत’, ‘लेवा’ आ ‘ढूढंन हम आइब’ बा।

अटका में परल बसन्त आ पीर हउवे जहँवा के पहचान में लेखक के चिंता आम आदमी के दैनंदिन समस्या आ प्रकृति के साथे हो रहल जबरदस्ती के ले के बा। त झनकि बाजे हो धनि खेते-खेते चुरिया में जीवन खातिर गीत आ श्रम के साथे गीत में रचल-बसल भोजपुरिया समाज के जीवंत मिश्रण वाला संस्कृति देखे के मिल रहल बा। कॉलेज में तोंत के बहाने लेखक पवनी-पंसारी के बात कर रहल बाने त लेवा आ ढूढंन हम आइब में लेखक के नितांत आपन आ अपना परिवार के साथ जुड़ाव, लगाव, स्नेह आदि उभर के आइल बा। लेकिन एकरे बावजूद भी ई रचना आपन से बढि के सबकर बनि गइल बा।

अंत मे इहे कहब कि डॉ. बलभद्र के ई संग्रह भोजपुरिया समाज आ लोक की संवेदना के संगीतात्मक दस्तावेज ह।

परिचय – डॉ. महेश सिंह, शिक्षक आ संपादक (‘परिवर्तन’ ई-पत्रिका) , उत्क्रमित उच्च विद्यालय, फुलची,  गांडेय, गिरिडीह, झारखण्ड 815312