सरिता साज़

भिखारी ठाकुर के टीम के सदस्य, मशहूर कलाकार पद्मश्री रामचंद्र मांझी ना रहनी। 7 सितंबर 2022, बुधवार के देर रात के उहाँ के निधन हो गइल। पटना के आइजीआइएमएस (IGIMS) में उहाँ के अंतिम सांस लेनी। 96 वर्ष के मांझी लंबा समय तक भिखारी ठाकुर के शागिर्द रहनी। उहाँ के सारण जिला के नगरा प्रखंड क्षेत्र के तुजारपुर के रहे वाला रहनी।

श्री माँझी 12 वर्ष के उम्र में भिखारी ठाकुर के नाच दल से जुड़ गइल रहनी जहाँ उहाँ के आंगिक-वाचिक अभिनय सहित धोबिया नाच, नेटुआ नाच, गजल, कव्वाली, निर्गुण, भजन, दादरा, खेमटा, कजरी, ठुमरी, पूर्वी, चइता गायन के गहन प्रशिक्षण प्राप्त कइनी। प्रशिक्षण के पश्चात भिखारी ठाकुरकृत लगभग सभ नाटकन में मुख्य कलाकार के रूप में आपन भूमिका अदा कइनी। रामचंद्र माँझी भिखारी ठाकुर के एक-एक नाटकन के हजारो हज़ार प्रस्तुति देश-विदेश के विभिन्न समारोह आ गाँव के शादी-विवाह-त्योहार आदि में कर चुकल बानी। माँझी जी मोतीलाल नेहरु, जवाहरलाल नेहरू, इंदिरा गांधी, राजीव गांधी, जगजीवन राम, जयप्रकाश नारायण, लालू प्रसाद यादव, नितीश कुमार, राबड़ी देवी, शरद यादव, रामविलास पासवान आ दारोगा राय जस देश के बड़ राजनेता लोग के समक्ष आपन प्रस्तुतियाँ दे चुकल बानी।

भिखारी ठाकुर रंगमंडल के संयोजक आ रामचंद्र मांझी के साथ कई मंच पर अभिनय कर चुकल  जैनेंद्र दोस्त अंतिम समय तक उहाँ के साथे रहनी।

BOX

भिखारी ठाकुर के नाटकन में रामचंद्र माँझी के भूमिका

बिदेसिया: रखेलिन/प्यारी सुंदरी     

गबरघिचोर: गलीज बहु     

बेटी-बेचवा: हजामिन

पिया निसइल: रखेलिन           

गंगा-स्नान: मलेछू बहु     

पुत्र-बध: छोटकी          

भाई-बिरोध: छोटकी  

कृष्णलीला: यशोदा        

ननद-भाउजाई: भाउजाई          

बिधवा-बिलाप: बिधवा स्त्री

BOX

रामचंद्र माँझी के मिलल सम्मान

लाइफ़ टाइम एचीवमेंट कला पुरस्कार (कला संस्कृति एवं युवा विभाग, बिहार सरकार) 2021

संगीत नाटक अकादमी पुरस्कार 2017

पद्मश्री 2021

भोजपुरी के कवि-कथाकार सत्यनारायण सिंह के 27 नवंबर 2022 के पटना, बिहार में निधन हो गइल। एकावाना घाट, थाना बड़हरा, जिला भोजपुर, बिहार में सन 1945 में महाशिवरात्रि के जन्मल सत्यनारायण बाबू भोजपुरी साहित्य के ना खाली समर्पित लेखक रहनी बलुक भोजपुरी सम्मेलन पत्रिका के लंबा समय तक प्रायोजक बन के साहित्य के उन्नयन खातिर आर्थिक सहयोग करे में भी आगे रहत रहीं। उहाँ के प्रकाशित पुस्तकन में  इहे कहानी बा , नदी के किनारा, खानगी मसीहा ( कविता संग्रह ) आ नाव खुल गइल (कथा संग्रह ) प्रमुख बा। भोजपुरी निबंध सागर (निबंध संग्रह ) ; करूप कन्या (उपन्यास); नेता देऊआ जमीन , बीजू भौजी , स्वामी अभयानंद के आत्मकथा (सब कथा-संग्रह); शरद के पूनो (कविता संग्रह) आदि प्रकाशन के राह देखत बा।  

टेलीग्राफ मास्टर के नौकरी से सेवानिवृति के बाद उहाँ के कई गो संगठन से जुड़नी जइसे कि श्रमिक नेता, फेडरल कोंसिलर, एन. टी. ई. , संगठन मंत्री एन. एफ. टी.,  अध्यक्ष, बिहार राज्य प्रेस कोआपरेटिव सोसाइटी ; सदस्य, बिहार राज्य कोआपरेटिव यूनिट कौंसिल; सचिव , निराला सहकारी गृह निर्माण समिति सी० , पटना ; भूतपूर्व अध्यक्ष, बिहार राज्य सहकारी गृह निर्माण संघर्ष समिति आदि। अपना कर्मठ आ जुझारू व्यक्तित्व से पटना में कई गो कॉलोनी बसवनी यथा नागार्जुन नगर, राजीव नगर, दीप नगर , आचार्य शिवपूजन सहाय नगर , कलक्टर केशरी नगर , सूरकांत त्रिपाठी निराला नगर ,गोपाल सिंह नेपाली नगर आदि |

भोजपुरी जंक्शन परिवार के ओर से विनम्र श्रद्धांजलि।

जन्मतिथि- 24 जनवरी 1954

पुण्यतिथि – 14 नवंबर 2022

राष्ट्रपति पुरस्कार से सम्मानित भोजपुरी गीतकार ब्रजकिशोर दुबे के 14 नवंबर के संदिग्ध हालत में मौत के बाद से मीडिया के मित्र लोग लगातार पूछ रहल बा जे ब्रज किशोर दुबे के रहल ह ? इहे भोजपुरी कलम के नियति आ दुर्भाग्य बा। लोग के गीत इयाद रह जाला, गीतकार भुला जाला। 

रक्षा-बंधन पर हर साल एगो गीत पूर्वाञ्चल में गूँजेला – ‘राखी हर साल कहेले सवनवा में, भइया बहिनी के हरदम रखिहs मनवा में / बहिनी बसेलू तू हमरा परनवा में, तोहरी मनसा पुराइब हर जनमवा में’। राखी पर एह से बढ़िया गीत का हो सकत बा? ई हृदयस्पर्शी गीत ब्रजकिशोर दूबे जी के लिखल ह। एह गीत में ई ताकत बा कि कवनो कारण से भाई-बहिन में रूसा-फूली भइल होखे भा बोलचाल बंद होखे त गीत मन के मइल आँख के लोर से धोके रिश्ता के टूटल तार फेर से जोड़ सकेला। चित्रगुप्त जी के संगीत पर, अलका याज्ञनिक आ मनहर उदास के आवाज में, दूबे जी के संवेदना से भरल बोल आ भाव जादू करत बा। शत्रुघ्न सिन्हा आ शकीला मजीद पर फिल्मावल फिल्म ‘बिहारी बाबू’ के ई गीत एगो अमर गीत बा।

के ह ब्रजकिशोर दुबे ?

24 जनवरी 1954 के मंगरवलिया, रोहतास, बिहार में जनमल ब्रजकिशोर दुबे जी से उनका यात्रा पर न जाने केतना बेर हमरा बातचीत भइल बा। बकौल दूबे जी, “ आकाशवाणी, पटना के ‘चौपाल ‘ के मुखिया जी ‘ (स्व। गौरी कांत चौधरी ) के पुत्र आ हमार मित्र सुप्रसिद्ध पत्रकार लक्ष्मी कांत ‘सजल ‘ जी हमरा के 1984 में एक दिन राम बाबू से मिलववले जे ‘माई ‘ फिल्म बनावे के तइयारी में रहन। बातचीत में ऊ हमरा के ‘माई ‘ के गीत लिखे के कहलन आ हम गीत लिखे में लाग गइलीं। एही बीचे ‘गंगा किनारे मोरा गाँव ‘ के निर्देशक दिलीप बोस जी पटना आइल रहीं जेकरा के राम बाबू ‘माई ‘ के निर्देशक रखेवाला रहन। ऊ हमरा के उहाँ से मिलववले आ उहाँ का हमरा से दू-तीन गो गीत सुनलीं। संजोग से ओही घरी शत्रुध्न सिन्हा जी के ‘बिहारी बाबू’ बने लागल आ एकर निर्देशक दिलीप बोस जी रहीं जे लोकेशन देखे खातिर फेर पटना गइल रहीं। उहाँ का रामबाबू के खबर कइलीं कि ऊ हमरा के उहाँ से जतना जल्दी हो सके मिलवावस काहे कि हमरे ओकर गीत लिखे के रहे। 11 जनवरी 1985 के राम बाबू संगे सांझि खानि हम उहाँ से शत्रुध्न सिन्हा जी के घरे मिललीं आ उहाँ का हमरा के 12 जनवरी 1985 के गाड़ी धरे के कहलीं। 14 जनवरी 1985 के हम बंबई पहुंच गइलीं। दिलीप बोस जी जहाँ लेखन में लागल रहीं। हमरा के पहिला गीत (राखी के गीत ) लिखे के मिलल। 16 जनवरी 1985 के चित्रगुप्त जी से भेंट भइल आ गीत के कुछ कड़ी सुनवला के बाद हमरा के गीतकार राख लिहल गइल। ‘बिहारी बाबू ‘ के सब गीत लिखत-लिखत चित्रगुप्त जी अतना प्रभावित भइलीं कि पुत्रवत नेह दुलार देवे लगलीं। उहाँ का हमरा के बंबई में रहे के सलाह देलीं, बाकिर अपना पारिवारिक हालत के चलते हम स्थाई रूप से बंबई में रहे के हालत में ना रहीं। उहाँ के भावुक होके कहलीं “हमार आसिरवाद बा। बंबई में नाहियों रहला प रउआ के लोग गीत लिखे खातिर बोलावत रही, जवन हरदम साँच भइल।

आगे ब्रज किशोर जी कहनी कि ‘बिहारी बाबू ‘ के बाद रामबाबू के ‘माई ‘ बने लागल जवना के निर्देशक रहलीं ‘ दूलहा गंगा पार के’ निर्देशक राज कुमार शर्मा जी। गीत त हम पहिलहीं लिख के रखले रहीं। फेर दृश्य के मुताबिक ओकरा के बनावल गइल। एकर संगीत संयोजन उत्तम सिंह जी कइलीं। गीत से राजकुमार शर्मा जी अतना प्रभावित भइलीं कि हमरा के छोट भाई अइसन माने लगलीं। भगवान के अइसन किरिपा भइल कि ‘ माई ‘ के जुबली हो गइल। ‘बिहारी बाबू ‘ आ ‘माई ‘ के गीतकार के रूप में हमरा जनता के अपार नेह-दुलार मिलल आ हमार पहचान बन गइल। एही तरे गीत-लेखन के यात्रा चलत रहल जवन आजो चल रहल बा।

ब्रजकिशोर दूबेजी के गीत वाला कुछ प्रमुख फिल्म बा, बिहारी बाबू, माई, जुग जुग जीयs मोरे लाल, हो जाये द नयना चार, महुआ, हे तुलसी मइया, दुलहिन, हम हईं गँवार आ हमार देवदास आदि।

‘ राखी हर साल कहेले सवनवा में, भईया बहिनी के रखिहs अपना मनवा में ‘  के अलावा जवना गीतन से दूबे जी के पहचान मिलल, ओह मे के कुछ प्रमुख गीत बा – तोहरी सुरतिया से (‘बिहारी बाबू), सरवता कहाँ भूलि गइलs (‘बिहारी बाबू), माई ना रही त (माई), जीयs बबुआ जीयs(‘जुग जुग जीयs मोरे लाल), बेटी भइली पराई (‘हे तुलसी मइया) आ अइले कन्हइया तोहार (‘हो जाय त नयना चार) आदि।

किशोर कुमार भी गवले बाड़न ब्रजकिशोर दुबे जी के गीत 

किशोर कुमार भगवान शंकर पर भोजपुरी में भी एगो गाना गवले रहलन जवना के उनका हिंदी क्लासिक हिट गाना ‘जय जय शिवशंकर, कांटा लगे न कंकड़’ के भोजपुरी विकल्प के रूप में देखल जा सकत बा। शत्रुघ्न सिन्हा के जवानी के दिन के भोजपुरी फिल्म ‘बिहारी बाबू’ में ई गाना रहे, बोल रहे  ‘अगड बम बमक बमक बम बोल बबुआ’। किशोर दा अइसन कठिन शब्द वाला गीत गावे खातिर मशहूर रहलन। ई फिल्म 1985 में रिलीज़ भइल रहे। ब्रजकिशोर दुबे जी के लिखल एह गीत के संगीत देले रहनी चित्रगुप्त जी।

सम्मान-पुरस्कार-

दूबे जी के गीत-संगीत के क्षेत्र में उल्लेखनीय योगदान खातिर कई बेर सम्मानित कइल गइल।   महामहिम राष्ट्रपति जी द्वरा राष्ट्रपति भवन में 17 जनवरी 2018 के भारत सरकार के ‘संगीत नाटक अकादमी पुरस्कार 2016 से नवाजल गइल।एकरा अलावा बिहार सरकार के ओर से ‘विध्यवासिनी देवी पुरस्कार ‘(वरिष्ठ)-2013, अखिल भारतीय भोजपुरी साहित्य सम्मलेन का ओर से ‘महंत लाल दास पुरस्कार आ बिहार राज्य भोजपुरी सम्मलेन का ओर से स्वर्ण पदक मिलल।

ब्रजकिशोर दुबे जी से जुड़ल संस्मरण –

ब्रजकिशोर दुबे जी से हमार व्यक्तिगत रिश्ता बहुत मधुर आ आत्मीय रहल बा। साल 98-99 के बात ह। अक्सर भोरे टहलत ब्रजकिशोर भईया हमरा कोचिंग पर चल आईं। तब हम एसबीआईसी – सिंह भावुक आईएससी कोचिंग  नाम से एगो संस्थान खोल के इंटर आ मेडिकल के तैयारी करे वाला लइकन के पढ़ावत रहीं लेकिन लेखन में भी ओतने सक्रिय रहीं। थियेटर (बिहार आर्ट थियेटर ) आ भोजपुरी सम्मेलन से भी जुडल रहीं। महाभोजपुर पत्रिका ( संपादक – विनोद देव) में धारावाहिक रूप से भोजपुरी सिनेमा के इतिहास पर लिखत रहीं। भोजपुरी सिनेमा के विकास यात्रा, भोजपुरी फिल्मन पर विहंगम दृष्टिपात, भोजपुरी सिनेमा: चुनौती आ संभावना, काहे बनल भोजपुरी सिनेमा चनाजोर गरम, भोजपुरी सिनेमा के निर्माता-निर्देशक, भोजपुरी सिनेमा के गीतकार-संगीतकार ।।अइसन बहुत सारा चैप्टर लिखनी। ओह खातिर मिले-जुले आ इंटरव्यू के सिलसिला चलते रहे। गंगा किनारे मोरा गांव आ धरती मईया के निर्माता अशोक चंद जैन, पिया के गांव के निर्माता मुक्ति नारायण पाठक, हो जाये द नैना चार के निर्माता संजय राय, हक के लड़ाई, कजरी आ बबुआ हमार के निर्देशक किरण कांत वर्मा समेत बहुत सिनेहस्ती से मिलनी, लिखनी, जननी, बुझनी। फिल्मी गीतकारन के अलावां विशुद्ध साहित्यकार के फिल्मी गीतन से गुजरनी। डॉ0 रामनाथ पाठक प्रणयी, डॉ0 प्रभुनाथ सिंह, भोलानाथ गहमरी के बाद ब्रज किशोर दूबे आ विशुद्धानंद जी के कलम के कमाल देखनी। हमरा जइसन लइका खातिर ई सब रोचक आ रोमांचक रहे। ब्रजकिशोर भईया चूंकि सम्मेलन पत्रिका से जुड़ल रहीं आ मंच से भी त गाहे-बगाहे भेंट मुलाकात भी शुरू हो गइल। मंच भी साझा करे लगनी सं। भारतीय नृत्य कला मंदिर में कई बेर साथे कार्यक्रम भइल। ब्रज भैया बहुआयामी प्रतिभा के धनी। आला दर्जा के ललित निबंधकार, कवि, गीतकार, अभिनेता के अलावा कमाल के मंच संचालक आ मिमिक्री आर्टिस्ट। एस्ट्रोलॉजर भी। फोन पर जब बात होखे, कहीं कि बबुआ हो तोहरा चाय आ बिस्किट के पइसा सधा देले बानी। तहार हाथ देख के कहले रहनी नू कि विदेश जइबs …रह अइलs नू अफ्रीका-इंग्लैंड।

भोजपुरी सिनेमा के इतिहास वाला अपना किताब में गीतकार-संगीतकार वाला आलेख में चित्रगुप्त जी आ ब्रजकिशोर दूबे जी पर कुछ बेसिये लिखा गइल रहे। एह पर ब्रज किशोर भईया कहले रहीं कि कहंतरी में से खाली छाल्ही खिअइले बाड़s लोग के। हम अतनो अच्छा नइखीं जेतना तू बतवले बाड़s।

ब्रजकिशोर भईया के साथ अंतिम मंच पंजवार में साझा कइले रहीं। सुकुल चाचा (पंडित घनश्याम शुक्ल ) होत फ़जीरे हमरा कोचिंग पर पहुँचल रहीं। लाइब्रेरी के 25 साल पूरा होता मनोज। कार्यक्रम करे के बा। कवि- सम्मेलन, गीत-संगीत आ विचार गोष्ठी भी। ब्रज किशोर भईया से तब मेल मिलाप कुछ बेसिये बढ़ गइल रहे। हमरा मुंह से अनायास निकलल, गायन खातिर ब्रज किशोर दूबे जी। चाचा कहनी तू जेकरा के फाइनल कर द। ब्रज भईया से बात कइनी त उहां के कहनी तू जइसे आ जेतना में फाइनल कर द। फाइनल हो गइल। फेर कवि सम्मेलन के अध्यक्षता खातिर हम चाचा के लेके पांडेय कपिल जी किहाँ गइनी। उहाँ के भी हमार बात मान लेनी। ई सब सन 2000 के आस पास के बात ह।

ओकरा बाद हमार पटना छूट गइल लेकिन पोस्टकार्ड तमाम साहित्यकार, कलाकार से रिश्ता जोड़ले रहे। मोबाइल हमरा पास ना रहे अउर टेलीफोन से ज्यादा आराम पोस्टकर्डवे में रहे। सिरहाना पोस्टकार्ड के बंडल राखत रहीं। पीपीएल के हॉस्टल में डाकिया आवे त रिसेप्सनिस्ट मुस्कुरा के कहे … और किसी का लेटर हो ना हो भावुक सर का तो होगा हीं।

ब्रजकिशोर भईया से चाहे फोन प बतियायीं या पढ़ी उहां के भाषा में गजब के लासा होला। लेकिन अब ऊ लासा कहाँ भेंटाई। अब ऊ हँसी-ठहाका सुने के कहाँ मिली ! बात-बात पर हँसावे वाला ब्रज किशोर भईया गजब तरीका से रोआ के गइलें। ई कइसे आ का हो गइल ब्रज भईया। कादो राउर हत्या हो गइल आ कि रउरा आत्महत्या कर लेले बानी ।।। ई गुत्थी अभी सुलझल नइखे। ओम शांति। ईश्वर रउरा के अपना चरण में स्थान दीं।

रउरा याद के साथे राउर गीत ‘ बाँसुरी मन के रोवे बजवला बिना / गीत लोर हो गइल सब सुनवला बिना ‘ दिलोदिमाग में गूँजत रहेला।

श्रद्धांजलि!     

आर.के. सिन्ह

सायरस मिस्त्री के मौत से भारत के आम जन आ कॉर्पोरेट संसार हिल सा गइल बा। मिस्त्री चमक-धमक से दूर रहे वाला, एक सज्जन, प्रतिभाशाली आ गर्मजोशी से भरल मनुष्य रहले। मिस्त्री अपना पीढ़ी के श्रेष्ठ व्यावसायिक प्रतिभा में से एक आ बेहद सज्जन किस्म के व्यक्ति रहले। उनकर वैश्विक दिग्गज कंपनी शापुरजी-पालनजी पालोंजी के खड़ा करे में अहम योगदान रहे। सायरस मिस्त्री में नेतृत्व के पर्याप्त गुण रहे।

सारयस मिस्त्री के हादसा के शिकार भइला के बाद ई सवाल फेर से अहम हो गइल बा कि अपना देश के सड़क आ हाईवे कब जाके पूर्ण रूप से सुरक्षित होई। हर साल देश में लगभग डेढ़ लाख से ज्यादा लोग सड़क हादसा के शिकार हो जाला। सड़कन पर अराजकता के त खत्म करहीं के होई। एकरा अलावे कवनो दोसर रास्ता नइखे बाँचल। … हम समझतानी कि देश के उर्जावान परिवहन मंत्री नितिन गडकरी जी दुर्घटनन के नियंत्रण खातिर अवश्य ही कवनो ठोस आ सख्त कदम उठइहें I

टाटा ग्रुप के पूर्व चेयरमेन सायरस मिस्त्री के सड़क हादसा में अकाल मृत्यु से दिल्ली के पूर्व मुख्यमंत्री साहिब सिंह वर्मा, मशहूर कलाकार जसपाल भट्टी आ कांग्रेस के नेता राजेश पायलट अउर मोदी सरकार के वरिष्ठ कैबिनेट मंत्री गोपीनाथ मुंडे के सड़क हादसा के इयाद आइल स्वाभाविके बा। ई सब सड़क हादसा के ही शिकार भइल। अभी त ये लोग के देश के बहुत कुछ देवे के रहे। सायरस मिस्त्री के मौत से भारत के आम जन आ कॉर्पोरेट संसार हिल सा गइल बा। मिस्त्री चमक-धमक से दूर रहे वाला, एक सज्जन, प्रतिभाशाली आ गर्मजोशी से भरल मनुष्य रहले। मिस्त्री अपना पीढ़ी के श्रेष्ठ व्यावसायिक प्रतिभा में से एक आ बेहद सज्जन किस्म के व्यक्ति रहले। उनकर वैश्विक दिग्गज कंपनी शापुरजी-पालनजी पालोंजी के खड़ा करे में अहम योगदान रहे। सायरस मिस्त्री में नेतृत्व के पर्याप्त गुण रहे। उनहीं के सरपरस्ती में शापुरजी-पालनजी मिस्त्री ग्रुप इंफ्रास्ट्रक्टर क्षेत्र के अनेक बड़ प्रोजेक्ट देश आ देश से बाहर पूरा करत रहे। राजधानी में प्रगति मैदान के भी उनहीं के कंपनी फेर से नया ढंग से तैयार करत रहल ह। ऊ लंदन से सिविल इंजीनियरिंग के ड्रिगी भी ले ले रहलन। एकर उनका अपना बिजनेस के गति देवे में भरपूर लाभ भी मिलत रहल ह।

हो सकता कि ई जानकरी सबका ना होखे कि सायरस मिस्त्री के दादा ही मशहूर फिल्म मुगले आजम जइसन बड़हन पिक्चर के निर्माता रहले। ऊ ओकरा निर्माण में भरपूर इनवेस्ट कइले रहलन। ई बात अलग बा कि ना त सायरस मिस्त्री ना ही उनके पिता पालानजी मिस्त्री फिल्म निर्माण में कवनो दिलचस्पी देखवलन। अरबों के चल-अचल संपत्ति भइला पर भी सायरस मिस्त्री के लाइफ स्टाइल काफी सादगी से भरल रहल। ऊ अपना घर के निर्माण में अरबों रुपया खर्च ना करत रहले। ऊ कामे भर से मतलब रखत रहले। ऊ एक बाकी उद्योगपति के तरह उद्योगपति सबके संगठन सीआईआई या फिक्की से भी सक्रिय रूप से ना जुड़ल रहले। उनकर कवनो सियासी दल से भी कवनो सीधा संबंध ना रहे। कह सकीलें कि ऊ एक गैर-राजनीतिक इंसान रहले। उनकर सारा फोकस अपना बिजनेस पर ही रहत रहे। अभी पिछला 3 जून के ही त उनके वयोवृद्ध पिता के निधन भइल रहे।

सायरस मिस्त्री के भारत तब जनलस जब उनका रतन टाटा के बाद टाटा ग्रुप के चेयरमेनशिप मिलल। ऊ टाटा ग्रुप के मुख्यालय बॉम्बे हाउस में अब बइठत रहले। ई साल 2012 के बात ह। लेकिन, ऊ टाटा ग्रुप के चेयरमेन ये खातिर बनलन काहे कि उनका परिवार के स्वामित्व वाला ग्रुप शापुरजी-पालनजी के टाटा सन्स में टाटा परिवार के बाद सर्वाधिक शेयरहोल्डिंग रहे। उनका के टाटा ग्रुप के पहिला चेयरमेन बनवावे आ फेर ओ पद से हटवावे में रतन टाटा के ही भूमिका रहे। उनका बाद एन. चंद्रशेखरन टाटा ग्रुप के चेयरमेन बनलन। ऊ टाटा ग्रुप के पहिला गैर-पारसी चेयरमेन रहलन। कुछ ओही तरह से जइसे मिस्त्री पहिला गैर टाटा रहलन, टाटा ग्रुप के चेयरमेन।

सायरस मिस्त्री के टाटा सन्स के बोर्ड में 2006 में शामिल भइला के बाद से ही रतन टाटा के साथ विवाद शुरू हो गइल रहे। कहल जाला कि विवाद के मूल में कारण ई रहे कि सायरस मिस्त्री चाहत रहलन कि टाटा ग्रुप अपना लाभ के जवन हिस्सा परोपकारी कार्यन में लगावेला, ओपर लगाम लगावे। रतन टाटा ये राय के ना मानत रहलन। ऊ मानस कि टाटा ग्रुप अपना मूल लक्ष्य से दूर नइखे जा सकत। ऊ राष्ट्र निर्माण में आपन अहम भूमिका निभावत रही। एमे कवनो शक नइखे कि टाटा ग्रुप भारत में विज्ञान अउर शिक्षा के क्षेत्र में अभूतपूर्व योगदान देले बा। सायरस मिस्त्री आ रतन टाटा के रास्ता थोड़ा सा अलग-अलग रहे। इहाँ ऊ हवा के रुख ना समझ सकले। बहरहाल, सायरस मिस्त्री के इ चिंता रहे कि टाटा ग्रुप के टाटा कंसल्टेंसी सर्विसेज ( टीसीएस आ टाटा स्टील ) के छोड़ के चूँकि अधिकतर कंपनी घाटा में बा, चाहे पर्याप्त लाभ नइखे कमात, एसे ओह सबके गति देहल जाए। ई साँच भी बा कि टाटा ग्रुप के ताकत त टीसीएस ही बा। टाटा ग्रुप के कुल मुनाफ़ा के बड़ हिस्सा टीसीएस ही कमाला। कहल त इहो तक जाला कि सायरस मिस्त्री नैनों कार के प्रोजेक्ट में बड़हन निवेश से भी नाखुश रहले। ऊ मानत रहले कि नैनो के टाटा ग्रुप बहुत देर से लांच कइलस। एसे टाटा ग्रुप के कवनो खास लाभ ना भइल। उनका नैनो प्रोजेक्ट पर सवाल खड़ा कइल रतन टाटा पर सीधे हमला कइला के बराबर रहे। आखिर नैनो रतन टाटा के दिल करीब के प्रोजेक्ट रहे। ऊ एसे भावनात्मक रूप से जुड़ल रहलन।

एही बीच, सारयस मिस्त्री के हादसा के शिकार भइला के बाद ई सवाल फेर से अहम हो गइल बा कि अपना देश के सड़क आ हाईवे कब जाके पूर्ण रूप से सुरक्षित होई। हर साल देश में लगभग डेढ़ लाख से ज्यादा लोग सड़क हादसा के शिकार हो जाला। सड़कन पर अराजकता के त खत्म करहीं के होई। एकरा अलावे कवनो दोसर रास्ता नइखे बाँचल।

सड़क हादसन के शिकार होखे वाला में 50 फीसद 14 से 35 साल के उम्र के लोग ही होला। एमे से बहुत सारा अपना परिवार के एकमात्र कमाये वाला सदस्य रहेलन चाहे रहलन। ओइसे त सड़क हादसा के तमाम कारण गिनावल बा। पर तेज रफ्तार से वाहन चलावल सबसे लमहर कारण बा। अभी साफ नइखे कि जवना मर्सडीज कार में सायरस मिस्त्री सवार रहलन, ऊ केतना के स्पीड से चलत रहे। रफ्तार पर नियत्रंण त करे के होई। तेज वाहन चलावे वालन पर कठोर दंड लगावे के चाहीं। समझ ना आवे कि कार आ दोसर वाहन चालक अनाप-शनाप गति से अपना वाहन के काहे दउरावेलन। ई लोग लेन ड्राइविंग में यकीन ना करेला। ई लोग हमेशा ओवरटेक करे के फिराक में रहेला। सड़क हादसा में ना जाने केतने लोग जीवन भर खातिर विकलांग हो जाला, एकर त कहीं से कभी कवनो आंकड़ा मिल ही नइखे सकत।

सायरस मिस्त्री के निधन से दू बात सीखल जा सकता। पहिला, कइसे कवनो कारोबारी मीडिया के सुर्खी से दूर रह के काम करे। दूसर, देश के अपना सड़कन के सुरक्षित बनाने के ठोस उपाय करे के होई।

हमरा अइसन लागता कि साइरस के कार उनका महिला मित्र के जगही कवनो पेशेवर ड्राइवर चलावत रहित त बेहतर रहित I चलीं, अब त जवन होखे के रहे हो गइल I लेकिन, हम समझतानी कि देश के उर्जावान परिवहन मंत्री नितिन गडकरी जी दुर्घटनन के नियंत्रण खातिर अवश्य ही कवनो ठोस आ सख्त कदम उठइहें I

 (लेखक वरिष्ठ संपादक, स्तभकार अउर पूर्व सांसद हईं)

मर गइलें बाबा। मर गइली ईया। मर गइलें नाना। मर गइली नानी। बाबुओजी मर गइलें। … बाकिर ना मरल ओह लोग से जुड़ल संबंध। पितृपक्ष इहे बतावेला। श्राद्ध-पिंडदान आ तर्पण क के पूर्वज लोग के इहे नू बतावल जाला कि आजो ऊ लोग हमनी के परिवार के हिस्सा बा। आजो हमनी के ओह लोग के स्नेह आ आशीर्वाद के जरूरत बा। आजो ऊ लोग हमनी का जिनिगी में जीयत बा आ धड़कन में धड़कत बा।

आखिर हमनी का हईं जा के ? ओही लोग के नू परछाईं ! ओही लोग के नू प्रतिरूप ! ओही लोग के गुणसूत्र ! ओही लोग के डीएनए ! त अलगा कइसे हो सकेनी जा? ओह लोग के नाक-नक्शा, रंग-रूप, लंबाई, सुघराई, हाव-भाव हमनी में उतरल बा त कइसे कहीं कि ऊ लोग दुनिया से पूरा तरह चल जाला। अरे, ऊ त हमनिये में रहेला लोग आ हमनी के बोली-भाषा, लहजा, व्यवहार आ संस्कार में अभिव्यक्त होत रहेला।

असहूँ हमनी का देश का दर्शन आ चिंतन परम्परा में मृत्यु के जीवन के खतम भइल ना मानल जाला बलुक देह के रूप परिवर्तन मानल जाला। हमनी ई मानीले कि हमनी के पितर लोग कवनो ना कवनो रूप में विद्यमान बा। एही वजह से शादी-बियाह आ अउरी अनुष्ठान में पितरो लोग के नेवतल जाला।

संत लोग कहेला कि हमनी के ईश्वर के संतान हईं जा, ईश्वर हमनी के अंदर बाड़ें तबो हमनी के ईश्वर के पूजा करेनी जा। ओही तरे हमनी के अपना पूर्वज के जामल हईं जा, ओही लोग से हमनी के देह मिलल बा, तबो हमनी के पितृपक्ष में अपना पूर्वज लोग के पूजा करेनी जा, श्राद्ध, पिंडदान आ तर्पण करेनी जा।       

श्राद्ध आ श्रद्धा एकही स्रोत से निकलल बा। ओही तरह से तर्पण आ तृप्ति बा। पितर लोग खातिर श्रद्धा से कइल गइल मुक्ति-कर्म के श्राद्ध कहल जाला आ उन्हन लोग के तृप्त करे खातिर तिल मिश्रित जल अर्पित करे के क्रिया के तर्पण कहल जाला।   

दरअसल श्राद्ध में श्रद्धा आ भावना ही प्रमुख बा। जवन सनातन धर्म अपना मुअला पुरखा-पुरनिया के पूजे के बात करत बा, ऊ जीयत बाप-दादा के तिरस्कार करे वाला बेटा-पतोह के कवना रूप में देखत होई, ई समझल जा सकेला। मुअले ना, अपना जीवित बुजुर्गन के प्रति भी आदर, सत्कार आ सम्मान के पवित्र भाव रखे के चाहीं ना त ई श्राद्ध, तर्पण आ पिंडदान एगो रस्म-अदायगी भर कहाई। 

पितृपक्ष के दौरान पितर लोग के श्राद्ध कइल जाला। एह से सुख-समृद्धि के आशीर्वाद मिलेला आ पितर लोग संतुष्ट होलें।

एह सब के समझे-बूझे खातिर भोजपुरी जंक्शन के दू गो विशेषांक ‘ जन्म-मृत्यु’ पर निकालल गइल। ई ‘ जन्म-मृत्यु विशेषांक’ ( भाग-2) ह। ई काव्यमय विशेषांक बा। एह में जन्म-मृत्यु पर गीत-गजल आ कविता ढेर बा। जीवन के मरम समझावत तरह-तरह के राग वाला फिल्मी गीतो बा।

जिनिगियो त एगो रागे नू ह! हमार एगो दोहा बा –

जिनिगी एगो राग ह, खुल के गाईं गीत।

टूट जाय कब का पता, साँसन के संगीत॥

पितृपक्ष चल रहल बा। पितर लोग के संगे गाय, कुत्ता आ कउआ के भोजन दियाइल ह। कउआ उचरत बा। हमार आपन एगो शेर इयाद आवत बा –

उचरे लागल हमरो छान्ही काग, ए बाबा

लागत बा कि हमरो जागी भाग, ए बाबा 

प्रणाम !

मनोज भावुक

डा0 सुनील कुमार उपाध्याय

सांस चलला के नांव जिनगी आ सांस बंद त मृत्यु (मुअल)। ई त भौतिक जगत के विधान ह। अपना देष के प्रसि़˜ संत स्वामी विवेकानंद जी लिखले बानी कि जौने दिन आदमी के जिज्ञासा खतम हो जाला ओही दिन आदमी मर जाला। हमनी के शास्त्र कहता कि मृत्यु त रूपान्तरण भा देह परिवर्तन के अवस्था ह। आत्मा अजर अमर ह। ना आग जला सकेले, ना हवा सुखा सकेले ना कौनो शस्त्र काट सकेला। आत्मा पुरान वस्त्र त्याग के नया वस्त्र धारण करेले। आदमी कहंवा से आवेला आ मुअला का बाद कहंवा जाला एकरा बारे मे अलग – अलग धर्म सम्प्रदाय के अलग अलग मत। मुअला का बाद कहीं जलावल जाला ज कहीं दफनावल जाला।
ई भौतिक जगत मे दुइए गो चीज मूल मे बा पदार्थ ;उंजजमतद्ध आ ऊर्जा। दुनु एक दूसरा में रूपान्तरित हो सकेला, आईंस्टीन के सूत्र ;म्त्र Δउब2 द्ध से ई बात दरषावल गईल बा। हर भौतिक पदार्थ में द्रव्यमान होला जवन गॉड पार्टिकल के उपस्थिति के कारण होला। जईसे कहल जाला कि भगवान कण- कण में विद्यमान बानी बोइसही गॉड पार्टिकल ( हिग्स बोसोन) कण कण में बा। हमनी के देष के प्रसिद्व भौतिक शास्त्री डा0 सत्येन्द्र नाथ बोस जी के नाम एह पार्टिकल से जुडल बा। षव में इ जुडले पर ऊ षिव बनेला ( इ ़ शव त्र षिव) शव माने मुर्दा भा पदार्थ। ओमे ऊर्जा जोडला पर ही उ क्रियाषील रहेला। शरीर से आत्म ऊर्जा निकलला पर ऊ पदार्थ यानि शव हो जाला।
प्रसि˜ दार्षनिक ओषो लिखले बाड़े कि मृत्यु भी एगो उत्सव होले। हमनी का अपना परिजन के मुअला पर भले दुखी होई पर जीव का नया वस्त्र मिलला के खुषी होला। आत्म ज्ञान भईला का बाद मृत्यु से भय खतम हो जाला। शुकदेव जी जब राजा परीक्षित के भागवत सुनवनी त उनकर भय खतम हो गईल। भागवत में बारह अध्याय ( स्कंध) बा। शुरू के चार को शोक दूर करेके उपाय बा ( भूत काल )बीच वाला चार गो मोह ( वर्तमान काल ) दूर करेला आ अंतिम चार गो अध्याय भय ( भविष्य काल) दूर करेला। आदमी चौरासी लाख योनी में भरमेला। मानव योनी बडा भाग्य से मिलेला। जेकरा आवागमन के मरम मालूम हो जाला ऊ मृत्यु से भयभीत ना होला। भौतिक शरीर चाहे जरावल जाव चाहे दफनावल जाव एकरा से आत्मा के कवनो लेना देना नइखे।
जीवन -मृत्यु सापेक्ष शब्द बा यदि सांस चलला के नांव जिनगी ह त कौमा में तीन, चार साल से परल आदमी के का कहल जाइ। ऊ त मुअले समान बा। दोसरा तरफ गांधी जी, उस्ताद बिस्मिला खान, अटल जी, ए0 पी0 जे अब्दुल कलाम जी,सी0 बी0 रमन जी, सकिल बदायुनी जी, भिखारी ठाकुर जी, मेहेन्द्र मिसिर जी, पाण्डेय कपिल जी, भोलानाथ गहमरी जी लोग का कब˜ मरिहें । इ लोग हमेषा जिन्दा बा। विज्ञान में, दर्षन में, गीत में संगीत में ई लोग हमेषा जिन्दा बा। कुरूक्षेत्र के मैदान में अर्जुन के मोह दूर करत भगवान श्री कृष्ण जी कहनी कि मारे वाला आ बचावे वाला दूनू हमही हई। तू काहे परेषान बाड़। जयद्रथ बध के समय भी अर्जुन के समझावनी कि ई तहार पुत्र, पूर्व जनम में कभी तहार बाप भी रहल बा। जन्म जन्मातर के ई चक्र बा।
बीग बैग ; ठपह दृ ठंदह द्ध आ बीग क्रंच ; ठपह दृ ब्ीतंदबीद्ध के खेल प्रकृित में चल रहल बा। अंडा के फंडा आज तक ना पता चलल । जीवन – मृत्यु के मरम जे समझ जाला ओकरा खातिर जीवन आ मृत्यु शोक के विषय ना रह जाला।

आलेख

उदय नारायण सिंह

 बेटी-तिस्ता उर्फ अनुभूति के संगे हम मंच पर प्रदर्शन करत रहीं। ऊ आपन जीउ-जान लगा के मंच पर ‘कुंवर सिंह’  के गाथा गावस आ हम उनकरा संगे-संगे गाईं। सब कुछ सुंदर रहे बाकिर अचानक- “कवन ठगवा नगरिया लुटल रे”- हमार सब कुछ लुटा गइल। हम सारा उतजोग कर के भी “तिस्ता” के बचा ना पवनीं, बेटी सुरधाम के जतरा पर निकल गइली। एह सांच से गुजरल एगो अनुभव रहल जवना के लिखल हमरा खातिर असंभव बा।  तीस्ता चल गइली, उनकर बहिन सृष्टि उनका अभियान के आगे बढ़ा रहल बाड़ी बाकिर तीस्ता के जगह केहू थोड़े ले सकेला। उनकर हूक रह-रह के हिया में उठत रहेला।

“संसार की हर शय का इतना ही फसाना है,

इक धूंध से आना है, इक धूंध में जाना है!”

अब जब हर शय के, हर जीअतार जीव के, धूंध से आ के धूंधे में मिल जाये के बा त हर जीव से आदमी के महत्त्व अलगा काहे? एकर एतना बखान काहे? एकरा में का गुन बा कि सभे आदमी के योनि के ही सबसे बड़हन आ दामिल योनि मानेला? तनीं सा गहिराह हो के देखाव त एगो अंतर त जरूर लउकता आ ऊ ह हर जीव से अलगा, आदमी के सोचे-समझे के गुन। ई गुन आदमी के छोड़ के आऊर कवनो जीव में ना पावल जाला।

जइसहीं सोचे-समझे वाला बात के बोध होखे लागेला, तब आदमी एह सवाल के दबाव में आ जाला कि हम के हईं, हमरा के केऽ भेजलख आ काहे भेजलख? आखिर ऊ के बा, जेकर हम इहां साध पुरावे आइल बानीं, ऊ का चाहता हमरा से, हमरा का-का करे के बा? अइसन कई-कई गो बात बा, जवना के आज तक जबाब ना मिल सकल एह जगत के अभी ले।

बात धूंध के होखो-धूंध आखिर ह का? एह सवाल के जवाब इहे नूं होई – एगो अइसन घना बादल, जवना के भीतर ना त देखल जा सकेला आ ना झांकल जा सकेला। मतलब अइसन दुनिया, जवन सबका सोझा त बा बाकिर सबकरा खातिर गोपनीय बा-एकदम अस्पष्ट आ अभेद्य। आ इहे ह जिनगी के मूल तत्त्व। एकरा के केहू आज ले ना समझ पावल कि जिनगी पावल कइसे जाला। कहाँ से आदमी आवेला आ कहाँ चल जाला।

ई परम सत्ता के ऊ गोपनीय व्यवस्था ह, जवना के समझे-बूझे खातिर आज तक सभे अपना-अपना सोच के ऊंचाई तक ले गइल बाकिर जे जेतना समझल, ओकरा खातिर ऊ ओतने ढ़ेर रहल। ओह विचार करे वाला बेचारा के ओतने औकात रहे। कबीर दास जी एह जगहा पर कहतानीं- “मन फूला फूला फिरै, जगत से कैसा नाता रे”- माने ई भरम ही बा कि हम सब जान गइनीं आ एही फेरा में एह क्षणभंगुर जगत से आदमी मोह लगा लेहलख! कबीरदास जी एह जगहा पर कहत बानीं- “जाये के अकेल बा त झमेल कवना काम के!” जब अकेलहीं जाये के बा त भरमे के का बा, मोहाए के का बा? अकेले आइल बानीं, खाली हाथे अइनीं-अकेले जायेब आ खालिए हाथे जायेब। जवन लेहनीं, इहवें से लेहनीं, जवन देब, इहवें दे जायेब। (ई गीता भी कहेला)। एह सब बतकही के मथला के बाद एगो बात त जरूर बुझाता-जिनगी के सांच तबहीं ले बुझाई, जब ले आदमी जीअता। आदमी मतलब सभे बाकिर अभी बात अकेल के होखो। हम जवन देखतानीं भा रऊआ सभे जवन देखत बानीं, उहे सांच बा। मतलब जवन सोझा बा आ लऊकत बा, ऊ जिनगी ह बाकिर सब कुछ अन्हरिया। एकरे खातिर हमनीं के दार्शनिक भा धरम के किताबन में पहिलहीं लोग कह गइल बा-“सत्यम् शिवम् सुंदरम्”। जवन आंख के सोझा बा, उहे सांच ह आ जवन सांच बा, ऊ देवता के तरफ से संचालित होता, ईश्वर के प्रतिनिधित्व करता, एह से ई शिव ह। चूंकि शिव ह, एह से एकरा से बढ़-चढ के कुछुवो आऊर सुन्दर होइए ना सके -एकदम साफ-सुथरा आ बाईस कैरेट के सोना।

एह ‘सत्यं-शिवं-सुदरम्’ के खाली रउरे भा हमहीं नइखीं स साधत। ढ़ेरे कोई सधलख, ढ़ेरे कोई साधत आइल बा आ ई आजो सिलसिला जारी बा। जे साध लेहल, पा लेहलख सूत्र, ऊ त ई कहत इहां से निकल गइल-“पिया मोरा मिलिया रे, पिया मोरा मिलिया रे-सत्त, गेयानी रे। ऐसा पिया हम कबहुं ना देखा, सूरत देखी लुभानी रे, पिया मोरा मिलिया रे-बकौल कबीर दास जी”। जे जीवन आ मरण के जतरा के बीच में कबहुं एह फिलॉसफी के समझ गइल, ऊ अब हमरा भा रउआ के बतावे खातिर रूकल ना, ऊ तर गइल।

अइसन अनगिनत प्रसंग बा, जवन हमनीं के आध्यात्मिक किताबन के पन्ना में छुपल बा। अइसन साधक, अपना सफल साधना के बाद एह मोह-माया के तेअगलख आ जगत के टाटा-बाय बाय कह के चल देहलख। ओकरा साधना के का स्तर रहे, ऊ जीवन-मरण के कइसे देखलख, का समझल, केतना समझल, ओकर ऊ आपन प्रयास रहे आ ऊ ओहि ढ़ंग से एकरा के खोजे के प्रयास कइलख। हमनीं के दिक्कत ई बा कि हमनिओ के उहे खोजतानीं स बाकिर साधना के ओह ऊंचाई के नइखीं स पकड़ पावत।

सब आदमी अपना-अपना ढ़ंग से जिअता। अब हर आदमी के आपन-आपन अनुभव बा। अगर सभे आपन-आपन अनुभव साझा करो, तब त जिनगी के परिभाषा के ओरे-छोरे ना भेंटाई। केहू कहेला-जीवन संघर्ष ह त केहू कहेला- “जीवन चलने का नाम, चलते रहो सुबहो शाम”, केहू कहले बा-“जिंदगी, हंसने-गाने के लिए है पल-दो पल।” केहू त इहवां तक कह गइल बा- “जिंदगी एक सफर है सुहाना,यहां कल क्या हो,किसने जाना!”

जब सभे आपन-आपन विचार दे सकता जिनगी के ले के, त हमहूँ कुछ कहे के चाहेब कबीर साहेब के गीत के परतोख देत-“ई जग खाली माया रे साधु, ई जग खाली माया, के बा आपन, के ह पराया, केहू  समझ ना पाया रे साधु, ई जग खाली माया।” बड़ी आस लगा के जिनगी के सजावे के उतजोग कइनीं। हमार जिनगी बहुत ही खुसहाल गुजरत रहे, जब आपन बेटी-तिस्ता उर्फ अनुभूति के संगे हम मंच पर प्रदर्शन करत रहीं। ऊ आपन जीउ-जान लगा के मंच पर ‘कुंवर सिंह’  के गाथा गावस आ हम उनकरा संगे-संगे गाईं। सब कुछ सुंदर रहे बाकिर अचानक- “कवन ठगवा नगरिया लुटल रे”- हमार सब कुछ लुटा गइल। हम सारा उतजोग कर के भी “तिस्ता” के बचा ना पवनीं, बेटी सुरधाम के जतरा पर निकल गइली। एह सांच से गुजरल एगो अनुभव रहल, जवन कहल ना जा सके काहे कि एकरा के लिखल हमरा खातिर असंभव बा।  तीस्ता चल गइली बाकिर उनकर बहिन सृष्टि उनका अभियान के आगे बढ़ा रहल बाड़ी लेकिन तीस्ता के जगह केहू थोड़े ले सकेला। उनकर हूक रह-रह के हिया में उठत रहेला।

हमनीं के भोजपुरी पारंपरिक गीत में मटकोर के एगो गीत के दोसर अर्थ में भी हमरा समझे के मौका मिलल- “कवना बने रहलु ए कोईलर, कवना बने जास/ केकरा दुअरिया हो कोईलर, उछहस जास!”

अइसन भी जिनगी में हो सकेला, ई पहिल बेरा बुझाइल। जवन जिनगी हमरा खातिर हॅंस-हॅंस के जीवन बितावे के अवसर देहलख, ऊ अब कुहुक-कुहुक के मूए खातिर छोड़ देलख। हमरा सोझा, हमरा देखत देखत, हमरा ना चहला के बादो, हमार दुनिया उजड़ गइल। एड़ीं में कुचुट लागित त एगो बात रहित, ई त तरहत्थीं में कुचुट गड़ गइल। मनोज भावुक जी के एगो भोजपुरी गजल के एह पंक्ति से हमार भाव आऊर स्पष्ट हो जाई- “बहुत नाच जिनगी नचावत रहल / हॅंसावत-खेलावत-रोआवत रहल।”

दुनिया में एगो सोच बा- जे आइल बा, ऊ लइका से सेआन होई, बूढ़ होई, तब मऊअत के राही बनीं, इहां त उल्टे हो गइल।”

‘’ अभी लाजे घूंघट ना उठवनीं कि झट से बिहान हो गइल।” मात्र साढ़े सत्रह साल में बेटी हाथ छोड़ा के चल गइली। हमार आपन सोंच बा-अगर जिनगी बा त एकर एगो मानक, एगो नियम होखे के चाहीं। बालपन, जवानी आ बुढ़ऊती – जवना के सभे मनबो करेला, तक के जतरा करे के अधिकार त होखहीं के चाहीं। अगर ईश्वर कवनो उद्देश्य पूर्त्ति खातिर भेजलहीं बाड़ें त कम से कम एतना त अवसर देवहीं के चाहीं उनका। सभे कही कि ई हमार मोह बोलता, हम मानतानीं बाकिर कुछुवो त खेले-खाये के मन हर जीव के होला।

एही बतकही में एगो रोचक बात आऊर उठता-हम बुढ़ऊती ले अगर जी भी लिहीं आ तबहूँ ले हम अपना उपस्थिति के होखल साबित ना कर पवनीं, कवनो पहचान ना दे सकनीं त हमार दाम ई समाज कइसे लगाई? समाज हमरा के कवना आंखि देखी? इहे नूं कही-फलनवा के बेटा भा फलनवां के पोता छछन-छछन के मू गइल, ओकरा पिलुआ पड़ गइल रहे-कादू कादू।

“मौत वही जो दुनिया देखे”- बाकिर कइसे देखी, एकरा खातिर त इतिहास रचे के पड़ी, आपन एगो पहचान बना के चले के पड़ी, तबहीं त देस-दुनिया के लोगो चिन्हीं। जिनगी के उद्देश्य त तय करे के पड़ी तबहीं से, जब से सोचे समझे के बूता आवे लागे।

हमरा हिसाब से जिनगी आ मऊअत एगो डरेंड़ ह। एगो चिचिरी पार दिहल जाला। जइसहीं केहू जन्म लेलख, ओकर चिचिरी पराइल। जहां से शुरू भइल, ऊ जिनगी ह आ जहां पर जा के ओराईल, ऊ मऊअत ह। जे जिअता, ओकरा मृत्यु तक के जतरा करहीं के बा। जीवन बा त मृत्यु होई। जीवन प्रारंभ ह आ मृत्यु अंत। अइसने डरेंड़ भा राह पर चल के सभे के आपन-आपन कर्तव्य करे के बा। ऊ कर्तव्य का होई, ई भी तय करे के जिम्मेवारी ओही आदमी के होई, जे आपन जिनगी जिअता। एगो इतिहास रचाव, उहो अइसन कि आदमी जाव त समाज के मुंह से आह निकलो। लोग रोवो भोंकार पार-पार के। कुछ लोग त अइसनो जाला कि अइसनका लोग के गइला पर समाज थपरी पिटेला-ठीक भइल, चल गइल। ई धरती के बोझ रहल ह सरवा। माने लोग गरिअइबो करेला। अइसन आदमी के चार गो कान्धा ना मिलेला। जीवन आ मृत्यु के बीच के एह अंतराल के मूल्यांकन कइल ही खांटी जिनगी जिअल कहल जा सकेला। जे अपना के भवगर बना लेहलख, ऊ भवसागर से पार उतर गइल, ऊ अमरत्व पा ली। कबीर दास जी कहले बाड़ें- कबीरा जब पैदा हुए, जग हॅंसे हम रोय / ऐसी करनीं कर चले, हम हॅंसे जग रोय”।

एही जगहा पर कबीरे दास जी के एगो आऊर पद इयाद पड़ता-“तोर हीरा हेरा गइल कचरे में।” एह जीवन के ऊ हीरा के रुप में देखले बाड़ें। अगर हीरा रुपी जीवन के चमक से रउआ जोत फइला सकनीं त राउर जीवन सार्थक बा।

आवरण कथा

अनिरुद्ध त्रिपाठी ‘अशेष‘

अपने चैतन्यरूप वास्तविक स्वरूप के उपलब्ध होके आदि शंकराचार्यो एही परम सत्य के उद्घोष कइले रहें। कहले रहें-“हम न मन हईं, न बुद्धि हईं, न अहंकार हईं, न चित्त हईं, न कान हईं, न जीभ हईं, न नाक हईं, न ऑंख हईं, न आकाश हईं, न पृथ्वी हईं, न अग्नि हईं, न वायु हईं। हम त चिदानन्दरूप शिव हईं, शिव हईं।”

 

‘श्रीमद्देवीभागवतमहापुराण’ में वर्णित महिषासुर के कथा वास्तव में ‘दैवीचेतना’ के ‘दानवीचेतना’ में पतन हो गइला के आवरण कथा हवे। आजु सगरो संसार देह के सत्य मानिके जीयेवाले ये महिषासुरन के कारने जुद्ध के सर्वनाशी आग में झॅंउसा रहल बा। इनहने के वजह से आजु जंगल-झाड़, धरती, अकास, हवा, पानी, सबके सत्यानाश हो रहल बा आ सगरो सृष्टि बहुते तेज चाल से विनाश के ओर बढ़ति जा रहलि बा।

मृत्यु के अर्थ नास ना हवे। इहाँ कवनो चीज के नास ना होखे, खालीभर ओकर रूप बदल जाला, आकार बदल जाला। जगत के हर चीज एगो विशेष रूप भा विशेष आकार में जन्म लेले। माने ई कि इहाँ जनमेवाली हर चीज के एगो आपन आकार बा, आपन रूप बा, आपन गति बा, आ ओह गति के आपन पड़ाव बा। देखल जाउ त सगरो जगत रूपे त हवे, तब्बे त ऊ लउकत बा, दिखाई देत बा। आ, तब्बे त ओके ‘दृश्यमान जगत’ कहिके बोलावल-बतियावल जाला।

रामकृष्ण कहलें-“शारदा! तू रोवत बाड़ू! बाकिर काहें?” शारदा जी कहली-“हम बेवा हो रहल बानीं, आ तू पूछत हवऽ कि हम काहें रोवत बानीं!” रामकृष्ण कहलें-“जदि तू हमार पत्नी हऊ, त तुहॅंके बेवा होखेके उपाये नइखे। तू सुहागिन बाड़ू, सुहागिने रहबू। काहेंकि हम कबो मू नइखीं सकत। हम त बस कपड़ा बदलत बानीं। आ, जदि तू शरीर के पत्नी हऊ, त रोवऽ, हम मना ना करब।” रामकृष्ण के प्रज्ञा-शब्दन के ज्वाला में शारदा के सगरो अज्ञान जरिके राख हो गइल। शारदा जी शायद भारत के इकलौता अइसन मेहरारू रहली ह जे पति के मूअला का बाद चूरी ना फोरली, सेनुर ना पोंछली, बेवा के कपड़ा ना पहिरली, जिनिगी भर सुहागिन के वेश में रहली।

आत्मज्ञानी मनुष्य मय जड़-चेतन सभके खातिर सब समय समान रूप से प्रेम, करुना आ मंगल के दिव्य अहोभाव में रहेला, केहू खातिर ईर्ष्या-द्वेष, घृणा भा हिंसा आदि ना रखेला। एही अर्थ में कृष्ण कहत बानें कि जे पुरुष सब जगह समभाव से स्थित ईश्वर के समभाव देखत-‘समम् पश्यन्’ यानी कि अपने से अभिन्न देखत खुद के द्वारा खुद के हनन ना करेला, ऊ परम गति के प्राप्त होला। मतलब ई कि जे ईश्वर आ खुद में भेद-बुद्धि ना रखेला, बलुक अपनिये के सब जगह समानरूप से स्थित देखेला, ऊ खुद के द्वारा खुद के हत्या कइसे क सकेला!

भारतीय चिन्तन-साहित्य में देह हरमेसा से परिधि पर, आ आत्मा केन्द्र में रहलि बा। वेद-उपनिषद् आदि वैदिक आ पौराणिक संस्कृत-साहित्य से लेके तुलसी, कबीर, नामदेव, नानक, दादू, रैदास, धर्मदास, सींगा, जंभदास, सुन्दरदास, मलूकदास, धन्ना, दयाबाई, सहजोबाई, रज्जब, हरिदास निरंजनी आदि जन-भाषा के तमाम संत कवियनो के काव्य-साहित्य एकरा उपस्थिति से बाँचल नइखन। अध्यात्म-केन्द्रित एह देश के प्रज्ञा आदिकाल से आत्मा के नित्य आ देह के अनित्य बतावति आ रहलि बा। ओकरानुसार देहे मूएले, आत्मा ना, आत्मा त जन्म-मृत्यु से परे अज, अजर, अमर, शुद्धबुद्ध चैतन्य आ सच्चिदानन्द स्वरूप हवे। साँच ई बा जे आत्मा ईश्वर के पर्याय हवे, यानी कि आत्मे ब्रह्म हवे। आत्मा आ ब्रह्म दू ना हवे, अ-दू हवे, अभिन्न हवे। आत्मा के यथार्थ रूप में ठीक-ठीक जानल, ठीक-ठीक कहल-सुनल भा ठीक-ठीक समुझल-समुझावल आसान नइखे। आत्मा एगो अजगुत हवे, एगो रहस्य हवे। तब्बे त कृष्ण कहत बानें कि केहू एगो महापुरुष एह आत्मा के आश्चर्य के नाईं देखेला, आ ओही तरे केहू दूसर महापुरुष आश्चर्य के नाईं एकर वर्णन करेला, आ केहू दूसर अधिकारी पुरुष आश्चर्य के नाईं एके सुनेला, आ केहू-केहू त सुनियो के एके ना जान पावेला। जइसे-

 

आश्चर्यवत्पश्यति कश्चिदेन-

माश्चर्यवद्वदति तथैव चान्य:।

आश्चर्यवच्चैनमन्य: श्रृणोति

श्रुत्वाप्येनं वेद न चैव कश्चित्।।

–श्रीमद्भगवद्गीता-2/29

आत्मा एगो अजगुत आ रहस्य एहूलिए बा कि, जदि केहू एके जानियो जाउ, तब्बो ओकरे खातिर ई अनजाने रहि जाले, ज्ञात हो गइला का बादो अज्ञाते रहि जाले। शायद एहीलिए जे-जे लोग एके जनले बाड़न, ऊ सभे जना अपने रचनन में एके ‘अज्ञेय’ कहिके गवले बाड़न। एही अर्थ में ‘केनोपनिषद्’ के ऋषि कहत बाड़न- “ब्रह्म जेके ज्ञात नइखे, ओहीके ज्ञात बा। आ, जेके ज्ञात बा, ऊ ओके नइखे जानत। काहेंकि, ऊ जानेवालन क बिना जानल हवे, अउर ना जानेवालन क जानल हवे।” यथा-

 

यस्यामतं तस्य मतं मतं यस्य न वेद स:।

अविज्ञातं विजानतां विज्ञातमविजानताम्।।

–कनोपनिषद्-2/3

 

आ, एहीलिए आत्मा के जान लिहला का बादो ऋषि जान लिहला के दावा नइखें करत, बलुक बहुते नम्रता से कहत बाड़न- “हम ना त ई मानत बानीं कि हम ब्रह्म के ठीक-ठीक जान गइल बानीं, आ ना त

इहे समुझत बानीं कि ओके नइखीं जानत।” यथा-

 

नाहं मन्ये सुवेदेति नो न वेदेति वेद च।

-केनोपनिषद्-2/2

 

तुलसी एके ‘अकथ कहानी’ कहिके सम्बोधित कइले बानें, यानी अइसन कहानी, जवन समझ में त आवेले, बाकिर कहे में ना आ पावेले। यथा-

 

सुनहु तात यह अकथ कहानी।

समुझत बनइ न जाइ बखानी।।-7/116,ख-1

 

एह प्रसंग में कबीरो तुलसिए के भाषा बोलत बाड़न, अचिको भिन्न नइखें बोलत। यथा-

कहै कबीर सुनो हे संतो, ई सभ अकथ कहानी।

 

यम अउर नचिकेता के बीच कहल-सुनल गइल ‘कठोपनिषद्’ एही आत्मा आ जन्म-मृत्यु के अकथ कहानी हवे। एह अकथ कहानी के कहले से पहिले उपनिषद् के ऋषि ‘ॐ’ यानी कि सच्चिदानन्दघन परमात्मा के नाँव लिहल जरूरी समुझत बाड़न ताकी ओकरे कृपा से एह अकथ कहानी के कहल सम्भव हो सके। यथा-

ॐ उशन् ह वै वाजश्रवस: सर्ववेदसं ददौ।

तस्य ह नचिकेता नाम पुत्र आस।।१।।

–कठोपनिषद्, प्रथम वल्ली

 

एह अकथ कहानी कहेके शुरूआत हम अपना छात्र-जीवन के एगो अइसन संस्मरण से कइल चाहब, जवन प्रस्तुत विषय के समुझे-बुझे में बहुते सहायक साबित होई। बात सन् 1985-86 के हवे। ओह घरी हम बी.एड. के पढ़ाई करत रहीं। फादर हिलेरी लोबो ‘एजुकेशनल फिलासफी’ के घंटी लेत रहलें हां। उनके द्वारा शिक्षा में ‘प्रकृतिवाद’ पर व्याख्यान देत आजु हफ्तन बीत चलल रहे, बाकिर पाठ खत्मे ना होत रहे। एकर कारन रहे। कारन ई रहे कि फादर लोबो शिक्षा में भारत के ‘आदर्शवाद’ के घोर विरोधी आ पश्चिम के ‘प्रकृतिवाद’ के कट्टर समर्थक रहलें हां। हिन्दू छात्र ‘प्रकृति’ के सत्य मानेके कतई तइयार ना रहलेंहा सन। ऊ सभ आत्मा-परमात्मा आ जन्म-मृत्यु से सम्बन्धित अपने मान्यता पर अड़ियाके ठाढ़ रहलेहा सन। बाकिर, फादर लोबो खातिर जन्म-मृत्यु आ आत्मा-परमात्मा से जुड़ल भारतीय दर्शन के बात बहुते अजगुत, रहस्य से भरल, अतार्किक आ अव्यवहारिक रहे। हफ्तन बीत गइला का बादो एह लमहर आ अनओराय सम्वाद में केहुओ अपना मत से पीछे हटे के तइयार ना रहे। आजिज होके फादर लोबो ओह दिन चुनौती भरल लहजा में कहले रहें-

“देखऽ लो, हम बेर-बेर इहे कहब कि ‘प्रकृति’ सत्य हवे। उहे सगरो सृष्टि के रचयिता हवे। सभ कुछ ओकरे से उपजेला आ ओकरे में बिला जाला। आ, सबसे बड़ बात ई कि ‘प्रकृति’ इन्द्रियाधीन बिया, इन्द्रियातीत ना। एहलिए ओकरे सत्यता के सिद्ध करे खातिर कवनो प्रमाण के जरूरत नइखे। आत्मा-परमात्मा के बात कपोल कल्पना हवे, मनगढंत भवें, मिथ्या हवे। आखिर जे इन्द्रियातीत बा, यानी कि जेके ऑंख से देखल ना जा सके, हाथ से छूवल ना जा सके, नाक से सूँघल ना जा सके, कान से सुनल ना जा सके, जेकर जीभ से सवाद ना लिहल जा सके, ओके सत्य कइसे मानल जा सकेला! आ, जदि केहू मानत बा त साबित करिके देखावे, कुतर्क जनि करे।”

फिरु का, साबित करेके चुनौती सुनिके सगरो हॉल में सन्नाटा छा गइल रहे। हम शुरुवे से एह सम्वाद के हिस्सा ना रहलीं हाँ, तटस्थ श्रोता रहलीं हाँ। बाकिर, हिन्दू छात्रन के बहुते आग्रह आ दबाव पर हम ठाढ़ हो गइल रहीं आ विनम्रतापूर्वक कहले रहीं-

“फादर! हम साबित करिके देखाइब। बाकिर, एकरे खातिर हमके राउर सहयोग, आ कवनो कसूर हो जा त क्षमा, दूनों चाहीं।”

फादर से जबान पाके हम एगो नजर अपने चारों ओर डरले रहीं। संयोग से ओह दिन व्यख्यान-मंच के सीलिंग-फैन खराब हो गइल रहे। एहलिए फादर लोबो खातिर मंच के बगल में स्टैंड-फैन लगा दिहल गइल रहे। हम फैन के लगे पहुँच गइलीं आ स्वीचबोर्ड के साँकिट से प्लग निकाल दिहलीं। फैन कुछ सेकेंड चलल, फिर बंद हो गइल। फादर कुछ पूछें कि हम झट से उनकर कलाई पकड़िके स्विचबोर्ड के लगे आ गइलीं, आ मिसिरी नियन मीठ आवाज में कहलीं-

“फादर! तनीं साँकिट के छेद में आपन अँगुरी घुसाईं त!”

फादर लोबो ब्लडप्रेशर के मरीज रहलें हॅं। अतना सुनते उनके माथे प पसीना छलछला गइल आ हाथ-गोड़ काँपे लागल। हालांकि साँकिट के छोट छेद में अँगुरी घुसल एकदम्मे सम्भव ना रहे, बाकिर भय के मारे उनकर सुधि-बुधि हेरा गइल रहे। हाथ छोड़ावे खातिर छटपटात ऊ चिल्लाके कहले रहें-

“छोड़ऽ छोड़ऽ! हाथ छोड़ऽ ! ई का करत बाड़ऽ तू?”

उनके चिल्लइला-छपटइला का बादो हम उनकर हाथ ना छोड़लीं। आ, ओही मीठ आवाज में कहलीं-

“ये स्वीचबोर्डवे में भारतीय आदर्शवाद के ऊ इन्द्रियातीत सत्य लुकाइल बा जेके देखल, छूवल, सूँघल, सुनल भा जेकर सवाद लिहल सम्भव नइखे। रउवा साँकिट में अँगुरी घुसाईं, घुसवते रउरा देह के हर इन्द्रिय ओकर सवाद चीखि लीहें सन। बाकिर, रउवा आपन अनभो सुनावे लायक रहब कि ना, नइखे कहल जा सकत।”

फादर लोबो के दशा अइसन हो गइल रहे, जइसे उनका दिल के दौरा पड़ि गइल होखे। देखिके हमहूँ डेरा गइल रहीं। ब्लडप्रेशर के मरीज फादर जदि साँचो के हार्ट अटैक के शिकार हो गइलें त बड़ा अनर्थ हो जाई। जन्म के रहस्य खुले ना खुले, मूअल त लोग ऑंखके सोझहीं देख ली। हम फादर के हाथ छोड़ दिहलीं आ बहुते आदर से उनके कुर्सी प बइठाके कहलीं-

“फादर! हमरा वजह से रउरा जवन कष्ट भइल, ओकरा खातिर हम माफी माँगत बानीं। हमार उद्देश्य रउरा के दु:ख पहुँचावल ना रहे, बलुक ई समुझावल रहे कि ये हॉल में जवन बल्ब आ ट्यूबलाइट जरत लउकत बानें सन, भा पंखा चलत दिखाई देत बानें सन, ऊ सजे प्रकृति हवे, सत्य ना। सत्य त ऊ अदृश्य, अरूप आ इन्द्रियातीत विद्युत-ऊर्जा हवे, जवने के वजह से ई सब बल्ब आ ट्यूबलाइट प्रकाशित बानें सन, आ पंखन में गति मौजूद बा। ओ ऊर्जा से अलग होते सगरो बल्ब आ ट्यूबलाइट ओही छन बुता जालें सन, आ पंखन के गति थथमि जाले, माने कि सब बेपरान के हो जालें सन, मू जालें सन। अइसहीं जवन सर्वव्यापी दिव्य ऊर्जा जड़-चेतन समेत अखिल सृष्टि के धारण कइले बा, सबके जीवन देति बा, उहे सबके आत्मा हवे, आ उहे परमात्मो हवे। ओकरे से सगरो सृष्टिरूप प्रकृति जन्म लिहले बा, अस्तित्व में बा, सजीवता में बा। उहे सबके आधार-शक्ति हवे। ओकरे से बिलग हो गइल मृत्यु हवे। एहलिए ऊ अदृश्य, अरूप, चैतन्य आ इन्द्रियातीत ऊर्जे सत्य हवे, जड़ प्रकृति ना।”

एह संस्मरण से हमार अभिप्राय ई स्पष्ट कइल बा कि बल्ब, ट्यूबलाइट आ पंखा आदि के तरे आदमी के देहियो प्रकृतिये हवे। एकरो रचना प्रकृतिये के पाँचो तत्वन से भइल बा। पृथ्वी, जल, वायु, आग अउर आकाश, एह पाँच तत्वन के अलावा मन, बुद्धि आ अहंकार, इहो तीनों प्रकृतिये हवें सन। एही अर्थ में कृष्ण प्रकृति के अष्टधा कहिके सम्बोधित कइले बानें। यथा-

 

भूमिरापोऽनलो वायु: खं मनो बुद्धिरेव च।

अहंकार इतीयं मे भिन्ना प्रकृतिरष्टधा।।

–श्रीमद्भगवद्गीता-7/4

 

प्रकृति स्वभावे से जड़ हवे, चेतन ना। बाकिर, ऊ चैतन्यस्वरूप आत्मा के कारण चेतन प्रतीत होति बिया, सजीव बुझाति बिया। ई चैतन्यस्वरूप आत्मे मनुष्य के वास्तविक स्वरूप हवे। तब्बे त महाराज जनक के समुझावत अष्टावक्र कहले रहें- “हे जनक! तू न धरती हवऽ, न आग हवऽ, न पानी हवऽ, न बयार हवऽ, न अकास हवऽ। एहलिए तू मुक्ति खातिर अपने आपके ये सबके साक्षी जानऽ, चैतन्यस्वरूप जानऽ।” यथा-

 

न पृथ्वी न जलं नाग्निर्न वायुर्द्यौर्न वा भवान्।

एषां साक्षिणमात्मानं चिद्रूपं विद्धि मुक्तये।।

-अष्टावक्रगीता-3

 

अपने चैतन्यरूप वास्तविक स्वरूप के उपलब्ध होके आदि शंकराचार्यो एही परम सत्य के उद्घोष कइले रहें। कहले रहें-“हम न मन हईं, न बुद्धि हईं, न अहंकार हईं, न चित्त हईं, न कान हईं, न जीभ हईं, न नाक हईं, न ऑंख हईं, न आकाश हईं, न पृथ्वी हईं, न अग्नि हईं, न वायु हईं। हम त चिदानन्दरूप शिव हईं, शिव हईं।” यथा-

 

मनोबुद्ध्यहंकारचित्तानि नाहं

न च श्रोत्रजिह्वे न च ध्राणनेत्रे।

न च व्योम भूमिर्न तेजो न वायु:

चिदानन्दरूप: शिवोऽहं शिवोऽहं।।

-निर्वाणषट्कम्-1

चिदानन्दरूप शिवे हर मनुष्य के असली रूप हवे। हर मनुष्य मूल रूप में शिव हवे, पशुपति हवे, ईश्वर हवे। ऊ पञ्चमहाभूत-निर्मित मरणधर्मी देह ना हवे, मन, बुद्धि, अहंकार ना हवे, यानी कि क्षुद्र चित्तवृत्ति ना हवे, परमात्मा हवे। बाकिर, ओकर दुर्भाग्य ई बा कि ऊ अपने एह पशुपतिस्वरूप के भुलाके पशु के तरे जी रहल बा। पशु के तरे एह अर्थ में कि ऊ अपने आपके देह मानिके जी रहल बा, मन-बुद्धि-अहंकार आ मिथ्या चित्तवृत्ति मानिके जी रहल बा। ओके ग्याने नइखे कि ऊ नाशवान देह भा मिथ्या चित्तवृत्ति ना हवे, शुद्ध-बुद्ध-चैतन्य हवे, परमात्मा हवे, पशुपति हवे। एह अग्याने के कारन ऊ अपने त दुःख, पीड़ा, चिन्ता, तनाव अउर अशांति में पड़ले बा, दूसरो के तरे-तरे के ताप, संताप, शोक, कष्ट आ अशांति के आग में झोंक देले बा आ झोंकते जा रहल बा। अग्यान के अन्हार में जियले त पशु के तरे जीयल हवे। अग्यान आदमी के पशुवे ना, पशुवनो में ‘राछसपशु’ बना देला, यानी कि भॅंइसा त बनाइये देला, भॅंइसनो में ‘भॅंइसासुर’ बना देला, यानी कि ‘असुरभॅंइसा’ बना देला,’राछसभॅंइसा’ बना देला। ‘श्रीमद्देवीभागवतमहापुराण’ में वर्णित महिषासुर के कथा वास्तव में ‘दैवीचेतना’ के ‘दानवीचेतना’ में पतन हो गइला के आवरण कथा हवे। आजु सगरो संसार देह के सत्य मानिके जीयेवाले ये महिषासुरन के कारने जुद्ध के सर्वनाशी आग में झॅंउसा रहल बा। इनहने के वजह से आजु जंगल-झाड़, धरती, अकास, हवा, पानी, सबके सत्यानाश हो रहल बा आ सगरो सृष्टि बहुते तेज चाल से विनाश के ओर बढ़ति जा रहलि बा।

भारतीय ऋषि-प्रज्ञा के अनुसार अग्याने बन्धन आ जन्म-मृत्यु से जुड़ल सब तरे के दुःख-पीड़ा के अकेले कारण हवे, आ ग्याने एह सब तरे के दुःख-पीड़ा आ बन्धन से मुक्ति हवे। ग्यानी मनुष्य खातिर आत्मा परम सत्य हवे। ग्यानी जानेला कि ऊ छनभंगुर देह आ चित्तवृत्ति से पैदा अहंकार के विकार ना हवे, ऊ त निर्विकार, अजर, अमर, अद्वैत, अखण्ड, विराट आ सच्चिदानन्द स्वरूप आत्मा हवे। तब्बे त शंकराचार्य कहले बानें- “हम शरीर से अद्भुत हईं। एलिए हमरे में जन्म, बुढ़ापा, क्षय आ मृत्यु आदि विकार नइखें सन। हम बिना इन्द्रियन के हईं। एलिए शब्दादि विषयन से हमार कवनो सम्बन्ध नइखे।।32।। चूंकि हम मन ना हईं, एहलिए हमरे में दुःख, राग, द्वेष आ भयो आदि दोष नइखें सन।।33।। हम त उहे परमब्रह्म हईं जवन नित्य, शुद्ध, मुक्त, एक, अखण्ड, आनन्द, अद्वय आ सत्य-ज्ञान-आनन्दस्वरूप बा।।36।। यथा-

 

देहान्यत्वान्न मे जन्मजराकार्श्यलयादय:।

शब्दादिविषयै: संगो निरीन्द्रियतया न च।।32।।

**** **** **** ****

अमनस्तवान्न मे दुःखरागद्वेष भयादय:।।33।।

**** **** **** ****

नित्य शुद्धविमुक्तैकमखण्डानन्दमद्वयम्।

सत्यं ज्ञानमनन्तं यत्परं ब्रह्माहमेव तत्।।36।।

–आत्मबोध

बाकिर, आत्मज्ञान से रहित अग्यानी मनुष्य खातिर देहे सब कुछ हवे। ऊ देहे के सत्य मानिके जीयेला आ देह के मू गइला प छाती पीटि-पीटिके रोवेला। ऊ जनबे ना करे कि देह अनित्य हवे। जन्म, बुढ़ापा आ मृत्यु देह के स्वाभव हवे, गुण-धर्म हवे। इहे देह के आखिरी सत्य बा। विषाद-ग्रस्त अर्जुन के समुझावत देह के एही सच्चाई के ओर इशारा करत कृष्ण कहत बानें- “जे जनम लिहले बा, ओकर मउत निश्चित बा, आ जे मू गइल बा, ओकर जनम निश्चित बा। एहलिए ये अपरिहार्य विषय के लेके तू शोक करे योग्य नइखऽ।” यथा-

जातस्य हि ध्रुवो मृत्युर्ध्रुवं जन्म मृतस्य च।

तसमाद्परिहार्येऽर्थे न त्वं शोचितुमर्हसि।।

–श्रीमद्भगवद्गीता-2/27

एह प्रसंग में ‘श्रीरामचरितमानस’ के एगो मधुर कथा इहाँ जाने-समुझे लायक बा। कथा ई बा कि बाली के मउत हो रहल बा। बाकिर, राम चाहत बानें कि ऊ मूयें ना, जीयें। एहलिए ऊ कहत बानें- हे बाली! हम तुहरे देह के अचल क देत बानीं, तू प्रान राखऽ, त्यागऽ जिन- “अचल करौं तनु राखहु प्राना।”(4/9/2) बाकिर, बाली राम के एह प्रस्ताव के नामंजूर करत जे कुछ कहत बानें ऊ अद्भुत बा। बाली कहत बानें- “हे कृपानिधान! मुनिजन जनम-जनम जतन करत रहेलें, यानी कि साधना करत रहेलें। तब्बो अन्तकाल में उनके मुँह से रामनाम ना निकसेला। जेकर नाँव लेके शिवजी काशी में सबके समानरूप से अविनाशिनी गति, यानी कि मुक्ति देलें। उहे राम आजु खुद आके हमरे ऑंखिन के आगे ठाढ़ बानें। हे प्रभो! अइसन संजोग फिर कबो मिली का? श्रुति ‘नेति-नेति’ कहिके हमेशा जेकर गुनगान करत रहेली सन, प्रान अउर मन के जीतिके आ इन्द्रियन के नीरस करिके मुनिगन ध्यान में जेकर कबो-कभारे झलक पावेलें, उहे प्रभु हमरे आगे ठाढ़ बानें। हे नाथ! रउवा हमके बहुते अभिमानी जानिके देह राखेके कहत बानीं। बाकिर, अइसन मूर्ख के होई जे हठपूर्वक कल्पवृक्ष काटिके बबूर के बाड़ लगाई?”

यथा-

जन्म जन्म मुनि जतन कराहीं।

अंत राम कहि आवत नाहीं।।

जासु नाम बल संकर कासी।

देत सबहि सम गति अबिनासी।।

मम लोचन गोचर सोइ आवा।

बहुरि कि प्रभु अस बनिहि बनावा।

 

सो नयन गोचर जासु गुन नित

नेति कहि श्रुति गावहीं।

जिति पवन मन गो निरस करि

मुनि ध्यान कब पावहीं।।

मोहि जानि अति अभिमान बस

प्रभु कहेउ राखु सरीरही।

अस कवन सठ हठि काटि सुरतरु

बारि करिहि बबूरही।।

-श्रीरा०मा०-4/9/3-5/ 1

 

इहाँ राम के दर्शन होते बाली के भीतर ग्यान के उदय, अग्यान के अस्त, देह के प्रति अनासक्ति आ मृत्यु के भय से मुक्ति के जवन दिव्य अवस्था दिखाई देति बा, ओकर रहस्य समुझे लायक बा। असल में, इहाँ बाली द्वारा राम के दर्शन के अर्थ बा- अपनिये आत्माराम के दर्शन, अपनिये सहज स्वरूप के प्राप्ति। राम शबरी से अपने दर्शन के मर्म समुझावत ठीक इहे बात त कहले रहें। कहले रहें- हे शबरी! हमरे दर्शन के फल परम अनुपम बा। आ, ऊ ई बा कि जीव अपने सहज स्वरूप के प्राप्त हो जाला-

 

मम दरसन फल परम अनूपा।

जीव पाव निज सहज सरूपा।।-3/35/9

इहाँ ‘अनूपा’ के अर्थ बा- उपमारहित, माने कि अद्वितीय। कहे के जरूरत नइखे कि उपमा खातिर उपमान आ उपमेय, दू के होखल जरूरी बा। बाकिर जहाँ उपमान आ उपमेय, दूनों दू नइखें सन, अपितु अ-दू बानें सन, अभिन्न बानें सन, उहाँ केसे, केकर उपमा? आ, ‘परम’ के अर्थ बा- आखिरी, यानी कि जेसे इतर केहू दूसर नइखे, माने कि ब्रह्म। एकर अर्थ ई हवे कि अपने सहज स्वरूप के प्राप्त हो गइला के अवस्था में आत्मा आ ब्रह्म के भेद समाप्त हो जाला, दू के भाव मिट जाला। एही परम दशा के ओर इशारा करत ब्रह्म के उपलब्ध सद्गुरु कागभुशुण्डि से कहले रहें- “तोरे में आ ओकरे में, माने कि आत्मा आ ब्रह्म में, कवनो भेद नइखे। वेद कहेलन कि जल आ लहर के भाँति दूनों अभिन्न हवें सं।” यथा-

 

सो तैं ताहि तोहि नहिं भेदा।

बारि बीचि इव गावहिं बेदा।।-7/110/घ-6

 

तब्बे त द्वैत में जी रहल पाखण्डी ग्यानियन के पोल खोलत उपनिषद् के ऋषि कहले बानें कि- “जे ई कहेला कि ऊ (ब्रह्म) दूसर हवे आ हम दूसर हईं, ऊ ओके (ब्रह्म के) नइखे जानत-

 

अन्योऽसावन्योऽहमस्मीति न स वेद।

–बृ०उ०-1/4/10

 

आत्माराम के प्राप्त होत आदमी ओही छन क्षुद्र से विराट हो जाला, नर से नारायण हो जाला। एही रहस्य के समुझावत तुलसी कहत बानें- “जानत तुम्हहि तुम्हहि होइ जाई” आ, कबीर कहत बानें- “बूँद समानी सिंधु में सो कत हेरी जाय।” ऊ एक जगह इहो कहले बानें- “मैं जाना कोई और था, मैं तो भया अब सोय।” कठोपनिषद् के ऋषि नचिकेता के इहे त समुझावत बानें। कहत बानें- “हे गौतमवंशी नचिकेता! जइसे बरसात के शुद्ध पानी दूसरे शुद्ध पानी में मिलके ओकरिए जइसन हो जाला, ओइसहीं परमात्मा के जानेवाला मुनिजन के आत्मा परमात्मामय हो जाले, तद्रूप हो जाले।” यथा-

यथोदकं शुद्धे शद्धमासिक्तं तादृगेव भवति।

एवं मुनेर्विजानत आत्मा भवति गौतम।।15।।

 

चूँकि ये दिव्य दशा में मनुष्य देह के मोह-माया, राग आ आसक्ति से मुक्त हो जाला, एलिए ऊ देह में रहला का बादो देह में ना रहेला, विदेह हो जाला। इहे राम-दर्शन, यानी कि आत्म-दर्शन के सुफल हवे। इहाँ बाली अब अपने सहज स्वरूपावस्थारूपी आत्माराम के पाके ये बोध में स्थित हो गइल बाड़न कि ऊ देह ना हवें, अ-देह हवें, चित्तवृत्ति ना हवें, आत्मा हवें, जड़ इन्द्रिय ना हवें, साक्षी चैतन्य हवें, शोक-कष्ट ना हवें, सच्चिदानन्द हवें, मउत ना हवें, अमरित हवें। अपने अबिनासीरूप के प्राप्त होते बाली एह सत्य के जान गइल बाड़न कि देह माटी हवे, छनभंगुर हवे। आ, जे माटी बा, ऊ माटी में मिलबे करी, जे छनभंगुर बा, ओकर नाश होइबे करी, जे मरणधर्मा बा, ओके मूअही के बा। आ, एहीलिए ऊ मउत से तनिको डेराइल नइखें, छूटि रहल देह के प्रति कवनो मोह-माया, राग आ आसक्ति के बन्धन में नइखें, बलुक सब तरे के बन्धन से निर्बन्ध, अपने अजर, अमर, मुक्त, निर्भय, निर्विकार, चैतन्य आ सच्चिदानन्द स्वरूप में स्थित बानें।

 

बाकिर, बाली के पत्नी तारा अपने अजर,अमर, सहज आत्मस्वरूप के ग्यान से बंचित बाड़ी। एहलिए ऊ देह के प्रति मोह-माया आ रागासक्ति से मुक्त नइखी। ऊ देहे के सत्य जानत बाड़ी। आ, एहीलिए ऊ बाली के मृत देह प बिलखि-बिलखि के रोवत बाड़ी। तब राम देह के नश्वरता आ आत्मा के अमरता के रहस्य समुझावत तारा से कहत बानें- “धरती, आग, हवा, पानी आ अकास से बनल ई देह नित्य ना हवे, अनित्य हवे, नित्य त जीव हवे, फिर नित्य खातिर विलाप का? आ, जदि तू पंचमहाभूतन से गढ़ल ये देह खातिर रोवत बाड़ू, त ऊ त अब्बो तुहरे आगे सूतल पड़लि बा, कहीं गइलि नइखे, त फिर काहें रोवत बाड़ू?” यथा-

 

छिति जल पावक गगन समीरा।

पंच रचित अति अधम सरीरा।।

प्रगट सो तनु तव आगें सोवा।

जीवन नित्य केहि लगि तुम्ह रोवा।।-4/10/4-5

 

राम के कहेके माने ई बा कि देह सत्य ना हवे, सत्य रहिति त मूअति ना, नष्ट ना होइति। सत्य त ऊ आत्मा हवे, जे स्वभाव से ब्रह्मरूप बा। ई ब्रह्मरूप आत्मे ज्ञानेन्द्रियन समेत सगरो कर्मेन्द्रियन के असली संचालक हवे। एहीलिए केनोपनिषद् के ऋषि कहले बाड़न कि जे कान के कान हवे, मन के मन हवे, वाणी के वाणी हवे आ उहे प्राण के प्राण हवे अउर उहे ऑंख के ऑंख हवे। ये सत्य के जानिके धीर पुरुष संसार से मुक्त होके अमर हो जालें-

“श्रोत्रस्य श्रोत्रं मनसो मनो यद्वाचो ह वाचं

स उ प्राणस्य प्राणश्चक्षुषश्चक्षुरतिमुच्य धीरा:

प्रेत्यास्माल्लोकादमृता भवन्ति।।”

–केनोपनिषद्-1/2

 

हर जीव स्वभाव से ब्रह्म हवे। बाली के पत्नी तारो ब्रह्मे हई। बाकिर, जन्म-जन्म से देह के प्रति गहिर तादात्म्य के कारन ऊ अपने ब्रह्मरूप के भुला गइल बाड़ी आ देहे के आपन असली रूप मान लेले बाड़ी।

उनके शोक-पीड़ा के इहे मूल कारन बा। आ, इहे दशा संसार के सब जीव-जाति के बा। तुलसी कहत बानें कि अपने असली स्वरूप के बिसार दिहले के कारने मनुष्य दारुन दुःख के शिकार बा-

 

मायाबस स्वरूप बिसरायो।

तेहि भ्रम तें दारुन दुख पायो।।

-वि०प०-136

बाकिर, मृत्यु के अर्थ नास ना हवे। इहाँ कवनो चीज के नास ना होखे, खालीभर ओकर रूप बदल जाला, आकार बदल जाला। जगत के हर चीज एगो विशेष रूप भा विशेष आकार में जन्म लेले। माने ई कि इहाँ जनमेवाली हर चीज के एगो आपन आकार बा, आपन रूप बा, आपन गति बा, आ ओह गति के आपन पड़ाव बा। देखल जाउ त सगरो जगत रूपे त हवे, तब्बे त ऊ लउकत बा, दिखाई देत बा। आ, तब्बे त ओके ‘दृश्यमान जगत’ कहिके बोलावल-बतियावल जाला। आ, एगो बात इहो कि ऊ हर छन बेरुकले चल रहल बा, हरदम एगो गति में बा। जगत के अर्थे होला (गम्+क्विप् नि. द्वित्वं तुगागम:) हरदम हिलत-डोलत रहेवाला, स्थिर ना रहेवाला। जगत समेत जगत के  कवनो चीज बिना आकार के, बिना रूप के आ बिना गति के ना जनमेले। ई रूपे जन्म हवे। आ, रूप में जे गति बा, उहे जीवन हवे, अउर ओह गति के थथमि गइल मृत्यु हवे। बाकिर, मृत्यु के अर्थ रूप के विनाश ना हवे, ई त यात्रा के आखिरी पड़ाव प रूप के पट-परिवर्तन हवे। भोजपुरी प्रबंध-काव्य ‘धर्मक्षेत्रे कुरुक्षेत्रे’ के कृष्ण जन्म-मृत्यु के रहस्य समुझावत गांधारी से इहे त कह रहल बानें-

 

गंधारी! ‘रूप’ जनम ह,

ओमे जे गति, ऊ ‘जीवन’,

गति के थम गइल ‘मौत’ ह

पल-भर के पट-परिवर्तन।।8।।

 

आ, ई मृत्यु संसार के मंगल खातिर केतना जरूरी बा, आ एकर हिरदय करुना से केतना लबालब भरल बा, एकर एगो बानगी भोजपुरी महाकाव्य ‘प्रेमायन’ के कुछ छंदन के अँजोर में देखे लायक बा। अपने पिता दशरथ के मृत्यु से दुखी भरत के समुझावत आ तसल्ली देत गुरु वशिष्ठ कहत बानें-

 

तरु के पाकल फल के टूटल अनिवार्य, उचित,

एलिए कि फिरु से डारन में फल नया फले।

मिट सके कबो ना महकत बगिया के सिॅंगार

एलिए रोज खिल फूल, धूल के गले मिले।।92।।

 

लौ जरत दिया के बुता चले ताकी फिरु से

जग के अन्हार में नया दिया के जोति जले,

आ सके सबेरा नया, नया उग सके सुरुज

एलिए रोज चुप रात ढले, चुप सुरुज ढले।।93।।

 

जे उगल ढली ऊ अवसि, झरी हर फूल खिलल

संभव न जीर्न के ध्वंस बिना, नव सृष्टि-सृजन

अज अमर अनासी नित्य जीव, का सोक पुत्र

बा होत मौत में मात्र जीर्न-पट-परिवर्तन।।94।।

 

तू देख पिता के ओर तनिक निज ऑंख खोल,

मौतौ जीवन के सत्य, लास अइसन कठोर

पर, बड़ा दयामयि, ममतामयि, माँ के समान

बा बड़ा करुन एकरे नैनन के हर हिलोर।।95।।

 

जो देत प्यार ना मौत सृष्टि के समय-समय

पड़ जात सृष्टि में कीट, करत भू नरक बास

छा जाइत चारों ओर असह दुर्गंध सड़न

ना दिखत सृजन के ओंठन पर सुरभित सुहास।।96।

 

जो दीप दिखाइत मौत न जीवन-संझा के

ठोकर अन्हार में खात बुढ़ापा गली-डगर

का पाइत थाकल जीव-पथिक आपन पड़ाव

देइति न मौत आ पग-पग पर बिश्राम अगर।।97।।

 

–प्रेमायन, सर्ग-9

मृत्यु, रूप के यात्रा क एगो पड़ाव हवे, ओकर अंत ना। जन्म से शुरू भइल रूप के ई यात्रा चक्का के नाईं गोलाकार गति करत मृत्यु प आके पूरा हो जाले, बाकिर रुकेले ना, पुरान रूप त्यागिके नया रूप के साथे आगे सरकि जाले। एतरे जन्म-मृत्यु के ई चक्र हरदम चलत रहेला, कबो समाप्त ना होखे। बाकिर, जन्म-मृत्यु के चक्र जवने कील पर गति करेला, ऊ कील कबो गति ना करेले, हमेशा अ-गति के अवस्था में रहेले, अचल रहेले। आ, ओकर कवनो रूप नइखे, नाँव नइखे। ऊ अरूप आ अनाम अस्तित्व हवे। बाकिर, हर रूप पानी में बुलबुला के भाँति ओही अरूप से उपजेला, ओही प ठहरेला आ फिर ओही में हेरा जाला। ऊ अरूप कीलवे सत्य हवे, रूप ना, ऊ अरूप आ अनाम अस्तित्वे सत्य हवे, देह ना। उहे आत्मा हवे। जे परिधि से सरकि के ओह आत्मारूपी कील से जुड़ जाला, ओके मौत न डेरवा पावेले, न ओकर कुछू बिगाड़ि पावेले। तब्बे त संत कमाल कहले रहें-

 

चलती चक्की देखकर कह कमाल खुश होय।

जो कीली से लग गया, बाल न बाँका होय।।

 

ओह आत्मारूपी कील के उपनिषद्न के ऋषि ‘कूटस्थ ब्रह्म’ नाँव देले बाड़न। कूटस्थ के अर्थ हवे- ‘निहाई’। लोहार खेती-बारी आ घर-गिरहस्ती के सामान बनावे खातिर भठ्ठी के आग में गरम कइल अँगारा के भाँति लाल-लाल दहकत लोहा निहाई प रखिके हथउड़ा से हुमचि-हुमचि के पीटेला। आग के ऑंच आ हथउड़ा के मार से लोहा के आपन पहिलेवाला रूप ओ निहाई के ऊपर ना जाने कहाँ बिला जाला आ ऊ हॅंसुआ, खुरुपी, कुदार, खंती, छूरा, चाकू आदि नया-नया रूप-शक्ल में रूपान्तरित हो जाला। बाकिर, ये सब के आधार ऊ निहाई आग के ताप आ हथौड़ा के असर से एकदम बेअसर, अपने सहज स्वभाव आ मूल स्वरूप में स्थित रहेले। आत्मो स्वभाव से निहाइये के भाँति एकरस, अचल, निर्दोष, आ अपरिवर्तनशील हवे। आत्मे के ऊपर देह जन्म लेले। आ, ओकरिये ऊपर ऊ बचपन, जवानी आ बुढ़ापा से गुजरत नाना तरे के सुख-दु:ख, रोग-बियाधि, हर्ष-विषाद, हानि-लाभ, मान-आपमान, यश-अपयश, पाप-पुण्य, शुभ-अशुभ आदि द्वैत-द्वंद्व सहत-भोगत रहेले। बाकिर, आत्मा देह द्वारा सहल-भोगल गइल ये सभ तरे के द्वैत-द्वंद्व के आधार होखला का बादो निहाई के भाँति ओ सभके असर से हमेशा बेअसर, अचल, निर्विकार, अछूता, एकरस आ जन्म-मृत्यु के चक्र से बाहर रहेले। ई आत्मे आदमी के असली स्वरूप हवे। आत्मा अउर परमात्मा, दूनों दू ना हवे, एक्के अ-दू हवे “एकमेवाद्वितीयम्।”(छा०उ०, 6/2/1) एहलिए ओके, यानी कि आत्मा आ परमात्मा के, एक्के रूप देखेके चाहीं- “एकधैवानुद्रष्टव्यम्।”(बृ०उ०,4/4/20)

 

 

जे दूनों में तनिको अन्तर करेला, यानी कि दूनों के दू मानेला, ऊ हमेशा भय में रहेला, यानी कि मृत्यु के भय से कबो मुक्त ना होला- “उदरमन्तरं कुरुते अथ तस्य भयं भवति।” (तै०उ०,2/7/1) आ, ऊ मृत्यु से मृत्यु के प्राप्त होत रहेला, अर्थात् ओके बार-बार मूये के पड़ेला-“मृत्यो: स मृत्युमाप्नोति।”(क०उ०,2/1/10)

बाकिर, जे ओ परब्रह्म के जान लेला ऊ ब्रह्मे हो जाला। ओकरे कुल में केहू अब्रह्मवित् ना होला। ऊ शोक तर जाला, पाप तर जाला आ अज्ञानजन्य ग्रंथियन से मुक्त होके ओही छन अमर हो जाला-

 

स यो ह वै तत्परमं ब्रह्म वेद ब्रह्मैव भवति

नास्याब्रह्मवित्कुले भवति। तरति शोकं तरति

पाप्मानं गुहाग्रन्थिभ्यो विमुक्तोऽमृतो भवति।।

–मु०उ०3/2/9

 

रामकृष्ण परमहंस के कैंसर रहे। कैंसरे से उनके मौत भइल रहे। जवने छन ऊ मूअत रहलें हॅं, ओ छन उनके ओंठन पर मधुर मुस्कान उतर आइलि रहे। बाकिर, उनके पत्नी शारदा जी फूट-फूट के रोवत रहली ह। रामकृष्ण कहलें-“शारदा! तू रोवत बाड़ू! बाकिर काहें?” शारदा जी कहली-“हम बेवा हो रहल बानीं, आ तू पूछत हवऽ कि हम काहें रोवत बानीं!” रामकृष्ण कहलें-“जदि तू हमार पत्नी हऊ, त तुहॅंके बेवा होखेके उपाये नइखे। तू सुहागिन बाड़ू, सुहागिने रहबू। काहेंकि हम कबो मू नइखीं सकत। हम त बस कपड़ा बदलत बानीं। आ, जदि तू शरीर के पत्नी हऊ, त रोवऽ, हम मना ना करब।” रामकृष्ण के प्रज्ञा-शब्दन के ज्वाला में शारदा के सगरो अज्ञान जरिके राख हो गइल। उनकर हृदय सत्य के निर्मल उजास से जगमगा उठल। पास-पड़ोस के मेहरारू सब बहुत कहली-“शारदा! तें चूरी फोरि दे, सेनुर पोंछि ले, बेवा के कपड़ा पहिर ले।” बाकिर, शारदा जी साफे मना क दिहली। कहली-“रामकृष्ण मूअल नइखें। हम सुहागिन हईं, सुहागिने नियन रहबि।” शारदा जी शायद भारत के इकलौता अइसन मेहरारू रहली ह जे पति के मूअला का बाद चूरी ना फोरली, सेनुर ना पोंछली, बेवा के कपड़ा ना पहिरली, जिनिगी भर सुहागिन के वेश में रहली।

आत्मज्ञानी पुरुष खातिर सगरो संसार आत्मे क विराट स्वरूप हवे। उपनिषद् के ऋषिगण कहले बानें-

आत्मा के अलावा कुछ ना हवे-

न तु तद्द्वितीयमस्ति। (बृ०उ०-4/3/23)

ई जे कुछ बा, सब आत्मे हवे-

इदं सर्वं यदयमात्मा। (बृ०उ०-2/4/6)

ई सब आत्मे हवे-

आत्मैवेदं सर्वम् ।(छा०उ०-7/25/2)

शंकराचार्यो इहे कहले बानें-

ई सगरो संसार वास्तव में आत्मे हवे। इहाँ आत्मा के सिवा केहू अउर के अस्तित्वे नइखे। जइसे घड़ा आदि सब कुछ माटिए हवे, ओइसहीं आत्मज्ञानी सब कुछ आत्मारूपे देखेला-

 

आत्मैवेदं जगत्सर्वमात्मनोऽन्यन्न विद्यते।

मृदौ यद्वद्वटादीनि स्वत्मानं सर्वमीक्षते।।48।।

–आत्बोध

 

आत्मज्ञानी मनुष्य सब में खुद के, आ खुद में सबके देखेला। येही परम सत्य के प्राप्त होके कबीर कहले रहें-

 

हम सब माँहिं सकल हम माँहीं,

हम थैं और दूसरा नाहीं।

तीन लोक में हमारा पसारा,

आवागमन सब खेल हमारा।।

खट दरसन कहियत हम भेखा,

हमहीं अतीत रूप नहीं रेखा।

हमहीं आप कबीर कहावा,

हमहीं अपनां आप लखावा।।  -क०ग्रं०,पद सं०-332

 

आ, एहीलिए आत्मज्ञानी मनुष्य मय जड़-चेतन सभके खातिर सब समय समान रूप से प्रेम, करुना आ मंगल के दिव्य अहोभाव में रहेला, केहू खातिर ईर्ष्या-द्वेष, घृणा भा हिंसा आदि ना रखेला। एही अर्थ में कृष्ण कहत बानें कि जे पुरुष सब जगह समभाव से स्थित ईश्वर के समभाव देखत-‘समम् पश्यन्’ यानी कि अपने से अभिन्न देखत खुद के द्वारा खुद के हनन ना करेला, ऊ परम गति के प्राप्त होला। मतलब ई कि जे ईश्वर आ खुद में भेद-बुद्धि ना रखेला, बलुक अपनिये के सब जगह समानरूप से स्थित देखेला, ऊ खुद के द्वारा खुद के हत्या कइसे क सकेला! जे ये तरे देखेला, उहे परम दशा के प्राप्त होला-

 

समं पश्यन्हि सर्वत्र समवस्थितमीश्वरम्।

न हिनस्त्यात्मनात्मानं ततो याति परां गतिम्।।

–श्रीमद्भगवद्गीता-13/28

 

ठीक इहे बात दादू कहत बानें, बाकिर अपने ढंग से।

यथा-

 

काहें को दुख: दीजिये, साईं है सब माहिं।

दादू एकै आत्मा, दूजा कोई नाहिं।।

 

एही सत्य के तुलसी अपने ढंग से कहत बानें। यथा-

 

उमा जे राम चरन रत बिगत काम मद क्रोध।

निज प्रभुमय देखहिं जगत केहि सन करहिं बिरोध।।

–रा०मा०-7/112ख,

 

इहे द्वैत से मुक्त होके अद्वैत में स्थित होखल हवे। बाकिर, विभेदकारी चित्तवृत्ति ‘मैं’, यानी कि अहंकार के रहते ई स्थिति सम्भव नइखे। अहंकारे काम, क्रोध, मद आदि सब तरे के मनोविकार, मनोरोग, सब तरे के विभाजन आ सब तरे के भेद-भाव के एकमात्र कारन हवे। एकरिये वजह से आदमी समुद्र-स्थित जल नियन अपने अथाह आ असीम ईश्वरीय स्वरूप के बिसारि के घड़ा-स्थित जल नियन लघु आ ससीम स्वरूपवाला हो गइल बा। बाकिर, जब देहरूपी घड़ा के अहंकाररूपी दीवार गिर जाले त घड़ा-स्थित उहे लघु आ ससीम जल समुद्र-स्थित जल से मिलके ओही छन विराट आ असीम हो जाला। एकरे ओर इशारा करत कबीर कहले बानें-

 

जल मैं कुंभ कुंभ मैं जल है,

बाहरि भीतरी पांनी।

फूटा कुंभ जल जलहि समांनां

यह तत् कथौ गियानीं।।

–क०ग्रं०,पद-44

 

आ, एकरे ओर संकेत करत केहू शायर कहले बानें-

 

घटे तो एक मुश्त-ए-खाक है इंसां।

बढ़े तो वुसअतें कौनैन में समा न सके।।

 

अहंकारे के वजह से जिनिगी में सब तरे के संकीर्णता, भेद-भाव, विभाजन, असमानता, ईर्ष्या-द्वेष, घृणा-नफरत, लड़ाई-झगड़ा, हिंसा, लोभ, स्वार्थ, असंतोष, डर-भय, चिन्ता-तनाव, अशांति आदि दोष व्याप्त बानें सन। जबले अहंकार रही तबले जिनिगी में सेवा, त्याग, करुना, क्षमा, प्रेम आ समानता के अवतरण सम्भव नइखे। अहंकार आदमी के पशु बना देला। पशु के अर्थो इहाँ समुझे-बूझे लायक बा। पशु ‘पाश’ शब्द से बनल बा। ‘पाश’ के अर्थ हवे- बन्धन। माने ई कि अहंकार के पाश में बन्हाइल रहल, पशु होखल हवे। जे अहंकार के पाश से मुक्त हो जाला ऊ पशुपति हो जाला, शिव हो जाला, आपन वास्तविक स्वरूप पा जाला। अहंकार के अस्ते त शिवत्व के उदय हवे। इहे परम अवस्था हवे। येही परम अवस्था के प्राप्त होके आदि शंकराचार्य गा उठल रहें- “चिदानन्दरूप: शिवोऽहम् शिवोऽहम्।” एक बात अउर। अहंकार नामक ई चित्तवृत्तिये जनमे-मरेले, आत्मा ना। एहीलिए ज्ञानी आ भक्तजन के दृष्टि में अहंकार के मौते असली मौत हवे। ये मौत में बहुते मधुरता बा, बहुते मिठास बा। तब्बे त कबीर कहत बानें- “ई मूअल बहुत मीठ बा। गुरु के कृपा से जे ये मरन के देख लिहले बा ओकरे खातिर ये मरन में कर्तापन के अहंकार मूवेला, कर्म-भावना मूवेले, देह आ संसार के प्रति आसक्ति के स्मृति मूवेले भा सुन्नर घरनी के सुघराई मूवेले। अहंकार आ मान प्रपंच के साथ अभिमान मूवेला। बाकिर, राम में रमण करिके जे ये मृत्यु के पा जाला ऊ अबिनासी ब्रह्म हो जाला।’

यथा-

 

जे को मरै मरन है मीठा,

गुरु परसादि जिनहिं मरि दीठा।

मूवा करता, मुई ज करनी, के

मुई नारि सुरति बहु घरनी।

मूवा आपा, मूवा मान,

परपंच लेइ मूवा अभिमान।।

राम रमें रमि जो जन मूवा,

कहै कबीर अविनासी हुआ।।

–क०ग्रं०,पद-46

 

येही दिव्य मृत्यु के पाके तुलसी झूमि-झूमि के गा

उठल बानें-

 

अब लौं नसानी, अब ना नसैहौं।

राम-कृपा भव-निसा सिरानी, जागे फिरि न डसैहौं।।

–वि०प०-105/1

भारतीय ऋषि-प्रज्ञा येही मृत्यु के पा लिहला के कला सिखावेले। जे जीते-जी ये मृत्यु के वरण कइला के

हिम्मत रखेला ऊ मृत्यु से बाहर सरकि जाला, अमरत्व पा जाला, काहेंकि इहे इहाँ के विधान हवे।

जे खुद के बचावे के जतन करेला, ऊ मिट जाला आ जे खुद के मिटा देला, ओकरे मिटला के सगरो डगर बन्द हो जाले।

कठोपनिषद् के कथा कहेले कि नचिकेता जब यम के दुआरे पहुँचल आ उनके किवाड़ खटखटवलस त यम के ना पवलस। यम कहीं गइल रहें, माने कि मृत्यु अपने घर में ना रहे, घर से बाहर रहे। मृत्यु हमेशा हमनीके किवाड़ खटखटावेले आ ऊ उहाँ हमनीके पइबो करेले। नचिकेता मृत्यु के किवाड़ खटखटावत बा आ मृत्यु नदारद बा। एकर मतलब ई कि जे खुद मृत्यु के किवाड़ खटखटावेके हिम्मत राखेला, ऊ पावेला कि मृत्यु एगो भ्रम हवे। ऊ मृत्यु से अमरत्व लेके लौटेला, अमर होके लौटेला। सावित्रियो के कथा एही मृत्यु से अमरत्व लेके लौटे के प्रतीक-कथा हवे।

कबीर एही मृत्यु से अमरत्व पाके गा रहल बानें, अपने आत्माराम के पाके नाच रहल बानें, अमर होके गुनगुना रहल बानें-

हम न मरैं मरिहैं संसारा

हम कूं मिल्या जियावनहारा।।टेक।।

अब न मरौं मरनैं मन मांनां,

तेई मूए जिनि राम न जांनां।

साकत मरै संत जन जीवै,

भरि भरि रांम रसाइन पीवै।।

हरि मरिहैं तो हमहूँ मरहैं,

हरि न मरै हमं काहे कूं मरिहैं।

कहै कबीर मन मनहि मिलावा,

अमर भये सुख सागर पावा।।

 

राउर पाती

भोजपुरी जगत के 27 गो साहित्यकार के जवन जीवनी भोजपुरी जंक्शन के अंक में प्रकाशित भइल बा, ऊ भोजपुरी दुनिया के अनमोल धरोहर बा। सदियन तक ई अंक भोजपुरी दुनिया के गरिमा के गौरव बढ़ावत रही आ नया पीढ़ी के स्वाभिमान के भी आधार बनत रही। एह अंक के रचनाकार सभे के लेखनी में श्रद्धा के भाव अइसन समायोजित भइल बा कि एक एक शब्द आत्मा से संवाद कर रहल बा। एह अंक के डिजिटल टीम के संवेदना भी खुल के दिखाई दे रहल बा। एक पिता रामदेव बाबू के सम्मान में जब पुत्र मनोज भावुक जी के कलम चलल बा त श्रद्धा आ स्नेह के बारिश से पाठक के मन भीग जा रहल बा। कुल मिलाके ई अंक संग्रहणीय आ ऐतिहासिक बन गइल बा। एह अंक से जुड़ल हर व्यक्तित्व के बहुत बहुत आभार।

गणेश दत्त पाठक, लेखक, पत्रकार व आईएएस कोचिंग के संचालक, सिवान, बिहार 

भोजपुरी के गौरव विशेषांक ऐतिहासिक अंक बा 

अद्भुत आ बहुत महान काम बा अइसन ऐतिहासिक अंक के प्रकाशन। हमार लिखल लेख के भी एह अंक में जगह देवे ला बहुत बहुत धन्यवाद।

हमरा त ई ना बुझाला कि जेकरा गोड़ में पाँख बँधाइल बा आ जे कबो दिल्ली त कबो पटना, कबो लखनऊ त कबो कानपुर उड़त रहेला,  ऊ एतना सब कुछ क कइसे लेला?

धन्य बानी मनोज बाबू ! बड़ भइला के बावजूद प्रणाम करे के मन करता।

अजय कुमार पांडेय, वरिष्ठ लेखक, चंपारण 

कमाल के अंक बा

प्रियवर भावुक जी,

राउर भेजल पत्रिका मिलल। कमाल के अंक बा। एक सांस में बाबूजी विद्यार्थी जी के बारे में लिखल डॉ. जयकान्त सिंह जय लिखित अत्यंत सारगर्भित सुन्दर आलेख पढ़ि गइनी हां। अइसन काम कर के बाबूजी के कविवर नाटककार भिखारी ठाकुर जी के साथ ही संग्रह संस्करण में स्थान दे के रवा उनकर अकथ्य ईक्षि के सम्मान कइले बानी।

एह लेखे हमनी रवा प्रति धन्यवाद ज्ञापित करतानी जा।

प्रोफेसर विकास चंद्र, आरा  

गौरवान्वित महसूस हो रहल बा

भोजपुरी जंक्शन के इ अंक पढ़के बहुत अच्छा लागल। रउआ बहुत खोज कइले बानी। गौरवान्वित महसूस हो रहल बा। हमरा तरफ़ से शुभकामना अउर हार्दिक बधाई स्वीकार करीं ।

लेफ्टिनेंट जनरल एस के सिंह

 

माटी  के  पुरखन के दस्तावेज ह ई अंक

माटी  के  पुरखन के दस्तावेज ह ई अंक

भोजपुरियत के सान,बान मान ह ई अंक

माटी  के बोली के पहचान देवे वालन के

डंका  के चोट पर हैसियत गान ह ई अंक।

 

भोजपुरी जंक्शन आ भावुक के काम देखs

भोजपुरी  गौरव  के  आपन  पहचान  देखs

सीख  जोगावल  तुहूं पुरखन के सान, मान

माटी  के पुरखा के साहित्यक कमाल देखs।

 

कनक किशोर, वरिष्ठ साहित्यकार, राँची 

बहुत-बहुत धन्यवाद

जीवन में पहली बार भोजपुरी में इतना ढेर सारा लिखा देख रहा हूं। इसके पहले नदिया के पार फिल्म जिस उपन्यास पर बनी थी उस उपन्यास को अर्थात “उधार का सेनूर” देखा था। यह उपन्यास भोजपुरी में लिखा है और इस उपन्यास के लेखक केशव प्रसाद मिश्र थे जो बलिया के थे और इलाहाबाद में एजी ऑफिसर में ऑडिट ऑफिसर थे। बाद में उनका स्वर्गवास हो गया था।

भोजपुरी साहित्य के क्षेत्र में इतना उम्दा कार्य करने के लिए बहुत-बहुत धन्यवाद। भोजपुरी भाषा को राष्ट्रीय और अंतरराष्ट्रीय स्तर पर ले जाने के लिए जैसे लोगों की सक्रियता बहुत जरूरी है। 

तारकेश्वर सिंह, अवकाश प्राप्त जज 

भोजपुरी जंक्शन के संपादकीय विशेषांक अपने आप में एगो धरोहर किताब बन गइल बा।संपादकीय युगानुकूल निरन्तर चिंतन के परिणाम होला,जवन एह संस्करण में झलकता।एह संस्करण से संपादक के वक्त -वक्त के सृजनात्मक चिंतन के गहराई आ विविध विषयन पर सटीक मूल टिप्पणी बहुते सार्थक बाड़ीसन।सामाजिक,सांस्कृतिक, धार्मिक आ राष्ट्रीय-अंतरराष्ट्रीय विषयन के जइसे ई पत्रिका समेटले बिया,उ संपादक के संवेदना आ प्रतिभा के दर्शन हो रहल बा।आज के भागम भाग के जिनगी में भावुक जी के अइसन प्रयास एगो मजबूत आ अजगुत संकल्प के एहसाह करावत बिया ई पत्रिका।सगरी पत्रिका सन के कलेवर  अपने आप में अद्भुत आ आकर्षक बन गइल बा।ई पत्रिका निरन्तर समाज आ देश के आईना बनके सत्य के दर्शन करावत रहो,इहे कामना बा।एह निरन्तर सृजनात्मक प्रयास खातिर भाई मनोज भाउक जी के हिरदया से अउलाह बधाई आ सुभकामना बा। 

मनोज कुमार सिंह, वरिष्ठ साहित्यकार, आदमपुर, सिवान 

भावुकजी, आप बहुत उत्साही एवं ऊर्जावान हैं। भोजपुरी में आपकी यह नई संकल्पना की जितनी सराहना की जाय कम है।

मुझे मालूम नहीं कि भोजपुरी में भाषाविदों और साहित्यकारों की कोई विवरणिका है या नहीं। अगर नहीं है तो ऐसी विवरणिका या नामवाची कोष तैयार किया जा सकता है। 

निरंजन प्रसाद श्रीवास्तव 

सकारात्मक दृष्टिकोण आ देश प्रेम से भरल संपादकीय विशेषांक 

आमतौर पर संपादकीय कौनो भी पत्रिका के आईना होला। काहेकि ओह पत्रिका के प्राण तत्व का बा ?  एह बात के आभास पाठक के संपादकीय से ही हो जाला। अगर संपादकीय रोचक रहेला त ऊ पाठक के ओह पत्रिका के पढ़े खातिर प्रेरित भी करेला। संजोग से “भोजपुरी जंक्शन” के ज्यादा विशेषांक ही निकलेला। एह से एह पत्रिका के संपादक मनोज भावुक जी के आपन बात के अलग-अलग तरह से रखे के अवसर भी मिलेला। अब त “भोजपुरी जंक्शन” के विभिन्न अंक खातिर लिखल अलग-अलग संपादकीय एक जगह इकट्ठा होके “संपादकीय विशेषांक” के रूप में रउआ लगे बा। 

व्यक्तिगत रूप से हमरा भावुक जी के संपादकीय के जे बात सबसे अधिक प्रभावित करेला ऊ ह उहाँ के सकारात्मक दृष्टिकोण आ अपना राष्ट्र के प्रति लगाव। ओकर बानगी रउआ भी उहाँ के एगो संपादकीय से लेहल कुछ पंक्तियन में देख लीं- 

“अमन वतन के बनल रहे बस

 हवा में थिरकन बनल रहे बस

 इहे बा ख्वाहिश वतन के धरती

 वतन के कन-कन बनल रहे बस ।”

 ज्योत्स्ना प्रसाद, वरिष्ठ साहित्यकार, पटना